Te haamanaˈo ra anei outou?

Ua feruri maitai anei outou i te mau vea hopea nei o Te Pare Tiairaa? Mai te peu e e, e anaanatae ïa outou i te haamanaˈoraa i te mau tuhaa i muri nei:

◻ Mea nafea te mau tane e te mau vahine faaipoipohia i teie tau, i te peeraa i te hiˈoraa maitai roa o Akuila raua o Perisila? Ua tavini o Akuila raua o Perisila i roto e rave rahi amuiraa taa ê. Mai ia raua atoa, e rave rahi Kerisetiano itoito i teie tau tei pûpû ia ratou no te haere i te vahi e hinaaro rahi ra i te tauturu. Ua ite atoa ratou i te oaoa e te mauruuru no roto mai i te iteraa i te maraaraa o te mau faufaa o te Basileia e te neheneheraa e faatupu i te mau auhoaraa kerisetiano faufaa.—15/12, api 24.

◻ Eaha te manaˈo o te Bibilia no nia i te mau ava? E manaˈo aifaito to te Bibilia no nia i te ava. I te hoê pae, te parau ra te Bibilia e e ô te uaina no ǒ mai i te Atua ra. (Salamo 104:1, 15) I te tahi aˈe pae, te faahapa nei oia i te inu-hua-raa i te ava. (Luka 21:34; Timoteo 1, 3:8; Tito 2:3, MN; Petero 1, 4:3)—15/12, api 27.

◻ Eaha te hoê vahi faufaa roa i roto i te buka Bibilia ra a Hagai? E 38 irava anaˈe to roto i te buka a Hagai, tera râ, te faahitihia ra te iˈoa o te Atua e 35 taime. E au ra e mea pohe teie huru parau tohu i te monoraahia te iˈoa o Iehova e te tiaraa iˈoa ra “Fatu.”—1/1, api 6.

◻ Eaha te haapiiraa e nehenehe e hutihia mai na roto i te mau hara a Davida e a Manase? Noa ˈtu e, ua faaore o Iehova i te hara a Davida e a Manase, ua tia râ i teie na taata—e ia Iseraela atoa—ia ora e te mau faahopearaa o ta raua mau hara. (Samuela 2, 12:11, 12; Ieremia 15:3-5) Hoê â huru, noa ˈtu e, i teie mahana, e faaore o Iehova i te hara a te feia rave hara e tatarahapa ra, e vai te mau faahopearaa no ta ratou mau ohipa o te ore e nehenehe e apehia.—1/1, api 27.

◻ No te aha e parauhia ˈi e e mea ‘nehenehe te avae o te feia i hopoi mai i te parau oaoa’ o te Basileia o te Atua? (Isaia 52:7) E mea matauhia e na te avae e aratai i te hoê taata ia haere e poro ia vetahi ê. Te faahohoˈa mau ra ïa te avae i te taata iho. No te feia e rave rahi o te faaroo e o te farii i te parau apî maitai o te Basileia, ua riro mau â te avae o teie mau vea ei hiˈoraa nehenehe roa.—15/1, api 13.

◻ Eaha te ohipa e piti tuhaa i amuihia i roto i te ‘pororaa i te evanelia’? (Korinetia 1, 9:16)? A tahi, e tia ia tatou ia poro i te parau apî maitai o te Basileia. Te piti o te tuhaa o teie nei ohipa, o te haapiiraa ïa i te feia o te farii mai i te pororaa o te Basileia.—15/1, api 23.

◻ Eaha te mau haamaitairaa ta tatou tataitahi e nehenehe e fanaˈo i te himeneraa i te mau himene o te Basileia i te mau putuputuraa a te amuiraa? Te horoa maira te himene ia tatou nei i te ravea ia faaite i to tatou mau manaˈo hohonu no to tatou Poiete. (Salamo 149:1, 3) Te hohoraraa i to tatou mafatu i roto i te himene a te amuiraa, e faatupu te reira i nia ia tatou i te hoê huru feruriraa e te hoê mafatu e au no te porotarama i muri iho. E turai te reira ia tatou ia apiti rahi atu â i roto i te haamoriraa a Iehova.—1/2, api 28.

◻ No te aha e parauhia ˈi e e maitai aˈe te mahana e pohe ai i te mahana fanauraa? (Koheleta 7:1) E nehenehe te mahana e pohe ai e maitai aˈe i te mahana fanauraa mai te peu e ua noaa i te hoê taata i taua taime ra, i te hoê iˈoa maitai i mua ia Iehova, o ˈna hoi te nehenehe e faatia mai i te feia haapao maitai i pohe. (Ioane 11:25)—15/2, api 12.

◻ No te aha te buka Koheleta e tauturu ai ia tatou tataitahi? E nehenehe oia e tauturu ia tatou tataitahi ia faaafaro i to tatou hiˈoraa no nia i te oraraa e te mea o te riro ei tapao na tatou. (Koheleta 7:2; Timoteo 2, 3:16, 17)—15/2, api 16.

◻ E feia faatumu anei te mau Ite no Iehova? Aita. Noa ˈtu e e mau tiaturiraa puai ta ratou i te pae faaroo, e ere ratou i te feia faatumu, ia au i te auraa i matau-noa-hia. Aita hoi ratou e faaohipa nei i te mau faahuehueraa e te haavîraa uˈana i nia i te feia o tei ore i farii i to ratou manaˈo. Te pee nei ratou i te hiˈoraa o to ratou Aratai, o Iesu Mesia.—1/3, api 6.

◻ No te mea e aita ratou i ite i te taime tia o Iesu e haere mai ai no te faatupu i te tahooraa a te Atua, eaha ïa te huru o te mau Kerisetiano? E vai ara ïa te mau Kerisetiano e e haapapu ratou i te mau mahana atoa e te tavini nei ratou ia Iehova ma te mau hinaaro miimii ore.—1/3, api 13.

◻ Eaha te tia ia tatou ia feruri hou tatou e horo ai i te hoê taeae tei taviri paha ia tatou, i mua i te ture? E feruri tatou i te hopea o te reira no tatou, no te tahi feia i roto i taua ohipa ra, no te amuiraa, e no te mau taata no rapaeau. (Korinetia 1, 6:7)—15/3, api 22.

◻ Nafea e noaa mai ai te oaoaraa mau? Te oaoaraa mau, o te hoê ïa huru o te mafatu, niuhia i nia i te faaroo mau e te hoê taairaa maitai e o Iehova. (Mataio 5:3)—15/3, api 23.

◻ Nafea te hoê Kerisetiano ia titauhia mai oia no te hopoia tia haava? Na te Kerisetiano tataitahi tei titauhia ia riro ei tia haava, e faaoti eaha ta ˈna e rave, ia au i to ˈna ite no nia i te Bibilia e to ˈna iho haava manaˈo. (Galatia 6:5)—1/4, api 29.