Te faatia ra te feia poro i te Basileia

A faaite i te parau mau i te mau huru taata atoa

E TAATA poro itoito te aposetolo Paulo i te Basileia o te Atua. Aita oia i vaiiho i te patoiraa ia haafifi i ta ˈna ohipa i faauehia mai ia poro i “te parau apî maitai.” (Korinetia 1, 9:16, MN; Ohipa 13:50-52) Ua faaitoito o Paulo ia vetahi ê ia pee i to ˈna hiˈoraa.—Korinetia 1, 11:1.

Ua matauhia te mau Ite no Iehova na te ao nei no ta ratou mau tutavaraa papu maitai e poro. Oia mau, te paraparau nei ratou ia vetahi ê i ‘te tau au’ e i ‘te tau au ore’ no te rave i ta ratou ohipa i faauehia mai e te Atua e ‘faariro i te mau taata atoa ei pǐpǐ.’ (Timoteo 2, 4:2; Mataio 28:19, 20) I te mau fenua atoa e te farerei nei ratou i te patoiraa, te faaitehia ra te poroi faufaa roa no nia i te Basileia o te Atua i te feia aau haavare ore, mai ta te mau faatiaraa i muri nei e faaite ra.

◻ I te hoê motu i te pae tooa o te râ no Patitifa, i reira, ua opanihia te ohipa a te mau Ite no Iehova, ua ite te hoê tamaroa 12 matahiti e ua haaatihia o ˈna e te mau hoa iino i te fare haapiiraa. E rave rahi o to ˈna mau hoa haapiiraa e puhipuhi noa na i te avaava, e taio na i te mau papai faufau, e haamǎtaˈu na i te mau orometua haapii, e e taputô na. I te mea e te ino roa ˈtura te mau mea, ua ani te tamaroa i to ˈna metua tane e e nehenehe anei ta ˈna e taui i te fare haapiiraa. Ua haaferuri râ te metua tane i ta ˈna tamaiti i nia i teie huru manaˈo, i te mea e ua manaˈo oia e aita i taa ê te haerea o te mau tamarii haapii i roto i te tahi atu mau fare haapiiraa tapiri. Tera râ, mea nafea to ˈna tautururaa i ta ˈna tamaiti?

Ua haamanaˈo te metua tane i te hoê buka no nia i te feia apî i roto i te fare. E ô teie buka, na te hoê fetii Ite no Iehova i horoa mai. Ua imi atura oia i te buka, e ua iteahia mai e ana, ua horoa ˈtura oia i ta ˈna tamaiti ra. Teie ïa te upoo parau o te buka, Les jeunes s’interrogent—Réponses pratiques.a Ua riro te pene ra “Nafea vau ia faaruru i te faaheporaa a te mau hoa?” ei mea faufaa iho â no te tamaroa. Aita teie buka i haapii noa ia ˈna i te faufaaraa e tapea i te faaturaraa ia ˈna iho, ua haapii atoa râ oia ia ˈna e nafea ia patoi atu ma te mǎrû ia tamata anaˈe vetahi ê i te faahepo ia ˈna ia pee i te tahi haerea tano ore. Na roto i te faaohiparaa i te mau faaueraa tumu a te Bibilia i roto i te buka, ua haapii teie taurearea e nafea ia faaruru ma te manuïa i te faaheporaa a te mau hoa.

I to ˈna iteraa i te reira e te tahi atu â mau tauiraa maitatai i nia i ta ˈna tamaiti, ua opua ˈtura te metua tane e taio i te buka. No to ˈna maere i te mau aˈoraa ohie ia faaohipa i roto i te buka, ua ani te metua tane i te mau Ite no Iehova i te tahi haapiiraa Bibilia i te fare. I muri iho, ua apiti atoa mai te tahi atu mau melo o to ˈna utuafare i roto i te haapiiraa. Eaha te faahopearaa? I teie nei, ua riro te tamaroa, to ˈna teina, to ˈna metua tane, e e piti o to ˈna mau metua tupuna pae papa ei Ite no Iehova.

◻ I taua noâ motu ra, ua tapeahia e piti Ite no Iehova i roto i te fare auri no to raua auraroraa ma te aueue ore i te mau faaueraa tumu a te Bibilia. Tera râ, aita raua i vaiiho i te mea o ta raua e faaruru ra ia tapea ia raua ia paraparau ma te mǎtaˈu ore no nia i te Basileia o te Atua. Ua tauaparau raua i te hoê taata toroa o te fare auri e ua faatiahia raua ia faatupu i te oroa Amuraa maa ahiahi a te Fatu i reira. Auê raua i te oaoa e, i te faaiteraa mai 14 mau auri i te anaanatae i te Bibilia e te apitiraa mai e nau Ite no teie oroa faufaa roa! I muri aˈe i to ratou matararaa mai, ua tamau noa vetahi o ratou i te haapii i te Bibilia e i te apiti atu e te mau Ite no Iehova.

I roto hau atu i te 25 fenua, te mauiui nei te mau Ite no Iehova no te mau opaniraa aore ra te mau patoiraa aore ra hamani-ino-raa huru rau. Tera râ, mai te mau aposetolo, te tamau noa ra ratou “e aore e mahana tuua ia ratou i te aˈo, e te haapii atu i te taata, e o Iesu â te Mesia.”—Ohipa 5:42.

[Nota i raro i te api]