Te fanaˈoraa taa ê e poro noa ˈtu te faaheporaa a te feia piri
1 E mana puai to te faaheporaa a te feia piri no nia i te mea maitai e te mea ino atoa. E mana maitai to to tatou mau hoa faaroo i nia ia tatou o te turai ia tatou ia rave i te mau ohipa Kerisetiano maitatai. (Heb. 10:24) Area râ, i te tahi mau taime, e faahepo te tahi mau melo o to tatou utuafare e ere i te Ite, te tahi mau hoa ohipa, te tahi mau hoa haapiiraa, te tahi mau taata tapiri aore ra te tahi atu mau taata ta tatou i matau, ia tatou ia pee i te hoê haerea e ore e au i te mau faaueraa tumu Kerisetiano. E nehenehe ratou e ‘pari haavare i to tatou [haerea] maitai i te Mesia ra.’ (Pet. 1, 3:16; MN) Nafea ia tapea maite i ta tatou faaotiraa papu e tamau noa i te poro noa ˈtu taua mau faaheporaa ra?
2 Te mau melo o to tatou utuafare: E patoi paha te hoê metua tane e ere i te Ite no Iehova eiaha ta ˈna vahine e ta ˈna mau tamarii ia haere i roto i te pororaa. Tera tei tupu i roto i te hoê utuafare i Mehiko. Ua haere mai te hoê vahine e ta ˈna na tamarii e hitu i roto i te parau mau. I te omuaraa, ua patoi ta ˈna tane i to ratou faaroo no te mea aita oia i hinaaro e ia poro e ia pûpû to ˈna utuafare i te mau papai Bibilia na te mau fare. Te manaˈo ra oia e eita teie ohipa e au ia ratou. Teie râ, ua tapea maite taua vahine ra e ta ˈna mau tamarii i ta ratou faaotiraa e tavini ia Iehova e e haere tamau i roto i te pororaa. I te roaraa o te tau, ua ite aˈera te tane i te faufaaraa o taua faanahoraa a te Atua ra, e ua pûpû atoa oia ia ˈna na Iehova. Ua rave oia 15 matahiti no te farii i te parau mau, teie râ, e farii anei oia ahiri e aita to ˈna utuafare i ati maite i ta ˈna fanaˈoraa taa ê e poro?—Luka 1:74; Kor. 1, 7:16.
3 Te mau hoa ohipa: Eita paha vetahi o to outou mau hoa ohipa e au ia tamata outou i te poro atu. Te faatia ra te hoê tuahine e i te hoê mahana a paraparau ai to ˈna mau hoa piha ohipa no nia i te hopea o teie nei ao, ua faaooohia oia no te mea ua parau oia ia ratou e taio i te Mataio pene 24. Tau mahana râ i muri aˈe, ua faaite te hoê o to ˈna mau hoa ohipa e ua taio oia i te pene e ua horuhoru oia i te reira. Ua vaiiho atu to tatou tuahine i te hoê papai na ˈna e ua rave i te tahi mau faanahoraa no te haapii i te Bibilia e o ˈna e ta ˈna tane. Ua tamau noa te haapiiraa matamua e tae roa ˈtu i te hora 2 i te aahiata. I muri aˈe i te toru o te hoˈi-faahou-raa e farerei, ua haamata na hoa faaipoipo i te haere i te mau putuputuraa e, aita i maoro, ua faaea raua i te puhipuhi i te avaava e ua haamata i te apiti i roto i te pororaa. E tupu anei te reira ahiri e aita to tatou tuahine i tutava aˈe i te faaite i to ˈna tiaturiraa ia vetahi ê?
4 Te mau hoa haapiiraa: E ere i te mea varavara e e faaoromai te mau taurearea Ite i te mau faaheporaa a to ratou mau hoa haapiiraa e e mǎtaˈu e ia faahaehaa te tahi atu mau taurearea ia ratou no ta ratou pororaa. Ua parau te hoê potii no te mau Hau Amui e: “Te riaria ra vau i te poro ia vetahi ê no te mea te mǎtaˈu ra vau e ia faaooo mai ratou ia ˈu.” I ape na ïa oia i te poro atu i to ˈna mau hoa haapiiraa i te fare haapiiraa e i roto i te tuhaa fenua atoa. Ihea e itea ˈi ia outou te puai no te patoi i te mau faaheporaa? A tuu i to outou tiaturiraa i nia ia Iehova e a imi i ta ˈna farii maitai. (Mas. 29:25) Ia faahiahia outou i to outou aravihi e faaohipa i te Parau a te Atua i roto i ta outou taviniraa. (Tim. 2, 2:15) Ua pure te potii ta tatou i tauaparau iho nei ia Iehova e ua ani atu i te tauturu ia faahotu oia i te hinaaro e paraparau i to ˈna mau hoa haapiiraa. Ua haamata oia i te poro ma te faanaho-ore-hia i te fare haapiiraa e, i muri aˈe i te roaaraa mai te mau faahopearaa maitatai, ua paraparau oioi oia i te feia atoa ta ˈna i matau. Te faaoti ra oia e: “Te hinaaro ra teie mau taurearea i te hoê tiaturiraa no a muri aˈe, e te faaohipa ra Iehova ia matou no te tauturu ia ratou.”
5 Te mau taata tapiri: E faaite mai paha te mau taata tapiri aore ra te tahi atu mau taata ta tatou i matau i to ratou riri no to tatou huru e te mau tiaraa ta tatou e paruru ra. Mai te peu e te mǎtaˈu ra outou i ta ratou e manaˈo ra, a ui i teie mau uiraa: “Ua ite anei ratou i te parau mau o te aratai i te ora mure ore? Eaha ta ˈu e nehenehe e rave no te haaputapû i to ratou mafatu?” Ua itea mai i te hoê tiaau haaati e e roaa te tahi mau faahopearaa maitatai na roto i te poro-rii-rii-raa i te mau taata tapiri. A taparuparu ia Iehova ia horoa mai i te puai e te paari ta outou e hinaaro ra no te tamau i te imi i te mau taata aau haavare ore.—Phil. 4:13.
6 E nehenehe te hemaraa i te mau faaheporaa a te feia piri e faaoaoa i te feia patoi, mea maitai anei râ te reira no ratou—e no tatou? Te feia o to ˈna iho oire tei patoi atu ia Iesu. Ua faaoromai atoa oia i te tahi mau parau haamauiui a to ˈna mau taeae. Ua ite râ oia e e nehenehe ta ˈna e tauturu ia ratou mai te peu noa e eita oia e taiva i te eˈa ta te Atua i opua no ˈna. No reira, ua “faaoromai” Iesu “i te reira huru faaino a te feia rave hara [o te patoi i to ratou iho mau maitai].” (Heb. 12:2, 3; MN) Ia pee tatou i to ˈna hiˈoraa, e tia ˈi. Ia faaoti papu outou e hiˈo i te pororaa i te Basileia mai ta outou fanaˈoraa taa ê rahi roa ˈˈe. Ia na reira outou, ‘e ora ïa outou e te feia atoa e faaroo mai ia outou.’—Tim. 1, 4:16.