Te pee ra anei outou i to tatou Atua pae tahi ore?

TE HURU pae tahi ore—ihea roa e itehia ˈi? Te vai ra te hoê Taata aita roa to ˈna e huru pae tahi, aita e manaˈo hiˈo ino, eita oia e hiˈo i te huru o te taata, e eita atoa e au ore i vetahi. O te Atua ïa o Iehova, te Poiete o te huitaata nei. No nia râ i te mau taata, ua papai te papai buka Beretane o te senekele 19 ra o Charles Lamb, ma te haavare ore e: “Eita vau e huna e, e mau manaˈo hiˈo ino anaˈe to ˈu—te vai ra te mau mea o ta ˈu e au e te mau mea o ta ˈu e ore e au.”

Te ere-rahi-hia nei te huru pae tahi ore i roto i te mau taairaa taata nei. E rave rahi senekele i teie nei, ua faahiti te Arii paari no Iseraela ra o Solomona e “te faatere ra te taata i te taata no to ˈna ra ati.” (Koheleta 8:9, MN) Te haere noa ra te feii i rotopu i te mau nunaa, te mau aroraa i rotopu i te mau fenua, e te mau peapea i rotopu i te mau fetii, i te uˈanaraa. No reira, e tano anei ia tiaturi e e nehenehe ta te mau taata, na roto i ta ratou iho ravea, e haamau i te hoê totaiete taata pae tahi ore?

E titauhia te tutavaraa ferurihia no te haavî i to tatou mau haerea e no te haapae i te mau manaˈo hiˈo ino atoa tei aa hohonu roa i roto ia tatou. (Ephesia 4:22-24) Ma te ore hoi tatou e ite, te vai ra paha te tahi mau haerea to tatou o tei noaa mai na roto i te mau mea i haaati ia tatou aore ra o ta tatou i haapii mai e o tei riro ei huru matauhia i roto i to tatou fetii, to tatou nunaa, e to tatou fenua. Mea pinepine teie mau huru e ere hoi i te mea puai roa ia hiˈohia, i te aa hohonu roa i roto ia tatou e i te faatupu i te mau haerea o te faariro ia tatou ei taata pae tahi. Ua tae roa te taata papai ture e pia buka Ekosia ra o Lord Francis Jeffrey i te faˈi e: “Aita ˈtu mea o te ore e ite-vave-hia e te hoê taata maoti râ te hohonuraa e te puairaa o to ˈna mau manaˈo hiˈo ino.”

Ua faˈi o Lenaa e mea titauhia ia tutava ma te feruri no te aro i te hinaaro pae tahi. No te haapae i te mau manaˈo hiˈo ino i roto ia ˈna iho, o ta ˈna ïa e parau ra, “e titauhia te tutavaraa rahi no te mea ua riro te huru o to oe paariraa mai ei mana puai mau.” Ua farii atoa o Lena e mea hinaarohia te mau faahaamanaˈoraa tamau.

Te hiˈoraa pae tahi ore o Iehova

O Iehova te hiˈoraa tia roa i te pae no te huru pae tahi ore. Mai te haamataraa mai â o te Bibilia, e taio tatou e mea nafea to ˈna faaiteraa i to ˈna huru pae tahi ore i roto i ta ˈna mau huru raveraa e te mau taata. E mea rahi te haapiiraa ta tatou e nehenehe e huti mai na roto i teie mau hiˈoraa e teie mau faahaamanaˈoraa maitatai roa.

Ua faaite Iehova i te huru pae tahi ore na roto i te faanahoraa i te mau ohipa ia haere te aposetolo ati Iuda ra o Petero e faaite i te parau apî maitai ia Korenelio e i te tahi atu feia Etene i te matahiti 36 ra o to tatou tau. Ua parau o Petero i taua taime ra e: “E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

I roto i ta ˈna mau huru raveraa atoa e te fetii taata nei, ua faaite tamau noa Iehova i to ˈna huru pae tahi ore. Ua parau o Iesu Mesia no nia i to ˈna Metua e: “Te faahiti nei oia hoi i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.” (Mataio 5:45) Ma te faateitei atu â ia Iehova ei Atua pae tahi ore, ua haapapu o Petero e: “E faaoromai rahi râ to ˈna ia tatou, aita roa i hinaaro e ia pohe atu te hoê, ia noaa paatoa râ te tatarahapa.”—Petero 2, 3:9.

I te tau o Noa, “e ino rahi to te taata o te ao nei, e ua ino anaˈe te mau manaˈo atoa, e te mau opuaraa atoa o te aau i te mau mahana atoa ra,” ua faaoti aˈera Iehova e haamou i taua ao ra o te huitaata nei. (Genese 6:5-7, 11, 12) Teie râ, na nia i te faaueraa a te Atua e ma te ite-maitai-hia mai e te mau taata no to ˈna ra tau, ua patu atura o Noa i te hoê araka. A patu ai oia e ta ˈna mau tamaiti i te araka, ua riro atoa o Noa ei “taata i aˈo i te parau-tia ra.” (Petero 2, 2:5) Noa ˈtu e ua ite oia e e mafatu ino to taua ui ra, ma te pae tahi ore, ua faatae atu Iehova i te hoê poroi papu maitai. Ua tamata oia i te haaputapû i to ratou feruriraa e to ratou mafatu na roto i te aniraa ia Noa ia patu e ia poro. Ua fanaˈo ratou i te mau ravea atoa no te farii mai, aita iho â râ, inaha “aore roa [ratou] i ite, e roohia noa ihora ratou e te diluvi, pau roa ˈtura ratou.”—Mataio 24:39.

Auê ïa hiˈoraa maitai roa no te huru pae tahi ore o Iehova! I roto i teie mau mahana hopea e te ati rahi, te turai nei oia i te mau tavini a te Atua ia faaite i te parau apî maitai o te Basileia ma te hoê â huru pae tahi ore. Hau atu, aita ratou e haamarirau nei i te faaite i te mahana tahooraa a Iehova. I mua i te aro o te taata, te faaite nei ratou i te poroi a Iehova ma te pae tahi ore i te feia atoa e faaroo mai.—Isaia 61:1, 2.

Na te mau parau tǎpǔ a Iehova i te mau patereareha ra o Aberahama, o Isaaka, e o Iakoba i haapapu e e ere oia i te Atua pae tahi. Mea na roto i to ratou opu fetii e fa mai ai Tei faatavaihia auaa oia ‘e maitai ai te mau fenua atoa o te ao nei.’ (Genese 22:18; 26:4; 28:14) Ua haapapu o Iesu Mesia e o ˈna taua taata Tei faatavaihia ra. Na roto i te poheraa e te tia-faahou-raa o Iesu, ua horoa mai Iehova i te ravea faaoraraa no te mau taata auraro atoa. Oia, te vai nei te mau maitai o te tusia no te hoo a te Mesia i mua i te taata ma te pae tahi ore.

I te tau o Mose, ua itehia te huru pae tahi ore o Iehova na roto i te hoê tupuraa anaanatae roa i nia i te mau tamahine a Zelophehada. Tei mua taua na vahine e pae nei i te hoê fifi no te tufaa fenua a to ratou metua tane i roto i te Fenua Tǎpǔhia. E te tumu, no te mea e peu matauhia i Iseraela ia horoahia te tufaa fenua na te mau tamaiti a te hoê taata. Tera râ hoi, ua pohe o Zelophehada e aita ta ˈna e tamaiti no te fanaˈo i te tufaa. Ua hopoi atura na tamahine e pae a Zelophehada i teie ohipa i mua ia Mose ia faatitiaifarohia ma te pae tahi ore, e ua na ô atu ratou e: “Eaha e haamoehia ˈi te iˈoa o to matou metua tane i to ˈna ra fetii, i te mea aore a ˈna e tamarii tamaroa? ho mai i te tahi tufaa no matou i roto i te mau taeae o to matou metua ra.” Ua faaroo Iehova i ta ratou mau taparuraa e ua faaue atura oia ia Mose e: “Ia pohe te taata ra, e aita a ˈna e tamaiti, e ruri outou i to ˈna tufaa no te tamahine.”—Numera 27:1-11.

Auê ïa hiˈoraa pae tahi ore aroha mau e! No te haapapu e eita te tufaa opu fetii e mahere i te opu fetii ê ia faaipoipo anaˈe te mau tamahine, ua titauhia ratou ia faaipoipo i “to te fetii anaˈe râ, to te opu o to ratou ra metua.”—Numera 36:5-12.

Te itehia ra te tahi atu hiˈoraa o te huru pae tahi ore o Iehova i te tau o te tavana e te peropheta ra o Samuela. Ua faaue Iehova ia ˈna ia faatahinu i te hoê arii apî no roto i te opu fetii o Iuda no te utuafare o Iese te ati Betelehema. E vau râ tamaiti ta Iese. O vai ïa te faatahinuhia ei arii? Ua haafaahiahia roa o Samuela i te pautuutu o Eliaba. Teie râ, aita o Iehova i hema i te hiˈoraa rapaeau noa. Ua parau atura oia ia Samuela e: “Eiaha e hiˈo i to ˈna mata, e to ˈna huru i te teitei, . . . e ore hoi ta Iehova hiˈoraa e au i ta te taata; e hiˈo hoi te taata i te huru i rapae au aˈe, area o Iehova, e hiˈo ïa i te aau.” O Davida, te tamaiti hopea a Iese, tei maitihia.—Samuela 1, 16:1, 6-13.

Te haapiiraa e hutihia mai na roto i te huru pae tahi ore o Iehova

E mea maitai ia pee te mau matahiapo kerisetiano ia Iehova na roto i te hiˈoraa i te mau huru maitatai i te pae varua o te hoê taeae. E mea ohie hoi ia haava i te hoê taata ia au i ta tatou iho faatureraa, ma te vaiiho i to tatou iho mau manaˈo ia faahape i ta tatou faaotiraa. Mai ta te hoê matahiapo i parau, “te tutava nei au i te ohipa e o vetahi ê ia au i te hoê huru raveraa e auhia mai e Iehova, eiaha râ ia au i to ˈu iho mau manaˈo oti noa.” Auê te maitai e no te mau tavini atoa a Iehova ia faaohipa i ta ˈna parau ei faatureraa na ratou!

E tauturu te mau hiˈoraa a te Bibilia i muri nei ia tatou ia aro i te mau manaˈo hiˈo ino i te nunaa ê aore ra te fenua ê e vai noa râ paha i roto ia tatou. Na roto i te peeraa i te huru pae tahi ore o Iehova, e paruru tatou i te amuiraa kerisetiano i te manaˈo hiˈo ino, i te au-ore-raa i vetahi, e te hiˈoraa i te huru o te taata.

Ua haapii te aposetolo Petero e “e ore te Atua e haapao i te huru o te taata.” (Ohipa 10:34) Te patoi nei te hiˈoraa i te huru o te taata i te huru pae tahi ore e te ofati nei i te mau faaueraa tumu o te here e te tahoêraa. Ua haere mai te feia veve, te paruparu, e te haehaa, ia Iesu ra e ua haamâmâ oia i ta ratou hopoia. (Mataio 11:28-30) Ua taa ê roa to ˈna huru i to te mau raatira faaroo ati Iuda, o tei faatere i nia i te nunaa, ma te faateimaha ia ratou i te mau haapueraa ture teiaha. (Luka 11:45, 46) Te na reiraraa e te hiˈo-maitai-raa ˈtu i te feia moni e te feia teitei, aita ïa i tuea e te mau haapiiraa a te Mesia.—Iakobo 2:1-4, 9.

I teie mahana, te auraro nei te mau matahiapo kerisetiano i te tiaraa upoo o te Mesia e te faaite nei i te huru pae tahi ore i nia i te mau tavini pûpûhia atoa a Iehova. ‘A faaamu ai ratou i te nǎnǎ a te Atua i roto ia ratou na,’ te haapae nei ratou i te hiˈo i te huru o te taata, oia hoi mai te peu e mea moni anei vetahi, eita anei ratou e afaro i te tahi, aore ra e fetii anei. (Petero 1, 5:2) Na roto i te peeraa i te Atua pae tahi ore e te haapaoraa i ta ˈna opaniraa i te hiˈo i te huru o te taata, te faaitoito nei te mau matahiapo kerisetiano i te huru pae tahi ore i roto i te amuiraa.

Ua riro te amuiraa kerisetiano a te mau Ite no Iehova ei autaeaeraa na te ao nei. E haapapuraa e tupu mau nei e, e nehenehe te hoê totaiete taata pae tahi ore, aita e manaˈo hiˈo ino aˈe, e riro ei mea mau i raro aˈe i te aratairaa a Iesu Mesia. Ua “ahu [te mau Ite] i te huru taata apî tei hamanihia ia au i te hinaaro o te Atua ma te parau-tia e te taiva ore mau.” (Ephesia 4:24, MN) Oia, te haapii nei ratou na roto i te hiˈoraa tia roa o te Atua pae tahi ore ra o Iehova, e te vai nei to ratou tiaturiraa e ora e a muri noa ˈtu i roto i te ao apî tei haapae roa i te huru pae tahi.—Petero 2, 3:13.

[Nota i raro i te api]

[Hohoˈa i te api 26]

Ua haapii te aposetolo Petero e eita te Atua e haapao i te huru o te taata