Ua haapapu-faahou-hia te tiaraa i te faaotiraa maramarama

UA HAAPAPU faahou te hoê faaotiraa i faahitihia iho nei e te Haava uiui a te Tiribuna o Messina, i Italia, e e tia i te mau taote ia faatura i te mau hinaaro i te pae rapaauraa o te hoê taata paari tei maˈihia. Ua horoahia te faaotiraa i roto i te haavaraa o te hoê Ite no Iehova.

I te avaˈe Tenuare 1994, ua faahoro-ru-hia o Antonino Stellario Lentini, e Ite e 64 matahiti to ˈna tei roohia i te maˈi hémophilie (toto paari ore), i te fare maˈi no Taormina, i Messina. Ua haapapu atu o Catena, te vahine a Antonino, i te feia utuutu maˈi e no te mea e Ite no Iehova raua eita raua ta ˈna tane e farii i te pâmuraa toto. (Ohipa 15:20, 28, 29) Ua faaturahia to raua hinaaro.

Teie râ, i to ˈna faahororaahia i te tahi atu fare maˈi, ua fifi atura to Antonino hutiraa aho, e mea ino roa oia i to ˈna tapaeraa ˈtu. Aita i maoro i muri iho, ua pohe oia. Ua mauiui roa o Catena, tera râ, ua tamahanahanahia oia na roto i te parau tǎpǔ a te Bibilia no te hoê tia-faahou-raa. (Ohipa 24:15) I muri iho râ, ua hitimahuta oia i to te mau tia mana—peneiaˈe ua hape roa to ratou manaˈo na roto i te mau parau apî tano ore tei haapararehia na te mau vea—pariraa e o ˈna te tumu i pohe ai ta ˈna tane, no te mea aita oia i farii i te tâpûraa o ta te mau taote i manaˈo e e tia ia ravehia.

Hau atu i te hoê matahiti i muri iho, i te 11 no Tiurai 1995, ua faatiamâhia ˈtura o Catena, no te mea aita ta ˈna e hara. Inaha, ua haapapu te parau a te feia aravihi e, ia hiˈohia te huru o te taata maˈi, aita iho â e faufaa te tâpûraa.

Tera râ, ua haamatara te mau parau a te haava i te tumu parau rahi. Mea fifi roa ia farii, o ta ˈna ïa i haapapu, i te manaˈo ra e e tiaraa to te feia utuutu maˈi ia rave i te hoê rapaauraa tei patoihia e te taata maˈi aore ra e te feia tei tia mai no ˈna. Ua parau â oia e, “te ite atea ra [te faatureraa morare a te toroa taote i Italia] i te faufaaraa ia noaa te faaotiraa maramarama o te taata [iho aore ra to ˈna tia] hou oia e rapaauhia ˈi.” No reira, ua faaite oia e “ua arai [o Catena], ma te tia roa e te ture, e ia ravehia teie huru ohipa i nia i ta ˈna tane.”

Te haapapu faahou ra teie haavaraa i te tiaraa o te hoê taata paari ia patoi i te hoê rapaauraa o te ofati ra i to ˈna mau hinaaro.