Te taviniraa ia Iehova ei utuafare tahoê

FAATIAHIA E ANTONIO SANTOLERI

E 17 matahiti to to ˈu Papa i to ˈna faarueraa i te fenua Italia i te matahiti 1919 ra. Ua reva oia i Beresilia no te imi i te hoê oraraa maitai aˈe. I muri aˈe, ua noaa maira ta ˈna fare tâpûraa rouru i roto i te hoê oire iti i roto roa i te hau no São Paulo.

I TE hoê mahana o te matahiti 1938, e hitu matahiti ïa to ˈu i reira, ua hoo mai to ˈu Papa i te huriraa Brasileira o te Bibilia i te hoê taata i haere mai i ta ˈna fare tâpûraa rouru. E piti matahiti i muri iho, ua pohehia o Mama i te maˈi e ua vai hapepa noa oia e tae noa ˈtu i to ˈna poheraa. Ua maˈi-atoa-hia o Papa, e no reira, ua haere atura matou pauroa—o Mama, o Papa, to ˈu tuahine o Ana, e o vau iho nei—e faaea e te tahi mau fetii to matou i te oire no São Paulo.

I te tau a haere ai au i te haapiiraa i São Paulo, ua au roa vau i te taio, te mau buka aamu tahito iho â râ. Ua maere au i te mea e ua faahitihia te Bibilia i te tahi taime i roto i teie mau buka. Ua faahiti te hoê buka aamu feruri-noa-hia, o ta ˈu i rave mai i te fare buka huiraatira no São Paulo, i te Aˈoraa i nia i te Mouˈa e rave rahi taime. I reira ïa to ˈu opuaraa e rave mai i te hoê Bibilia no te taio roa i taua aˈoraa ra. Ua maimi au i te Bibilia tei hoohia mai e to ˈu Papa tau matahiti na mua ˈtu e ua itehia mai ia ˈu i raro roa i te hoê afata, e hitu matahiti to ˈna vai-noa-raa i reira.

E Katolika matou, e no reira, aita vau i faaitoitohia ia taio i te Bibilia. I taua taime ra, na ˈu iho i haapii e nafea ia imi i te mau pene e te mau irava. Ua au roa vau i te taioraa, eiaha noa te Aˈoraa i nia i te Mouˈa, te taatoaraa atoa râ o te buka a Mataio e te tahi atu mau buka a te Bibilia. Te mea i haaputapû roa ia ˈu, o te taˈi ïa o te parau mau i te faataaraahia te mau haapiiraa e te mau semeio a Iesu.

Ua papu atura ia ˈu e mea taa ê roa te haapaoraa Katolika i te mea o ta ˈu i taio i roto i te Bibilia, e ua haamata ˈtura vau i te haere i te Ekalesia Presbytérienne, e ua haere atoa mai o Ana na muri iho ia ˈu. Teie râ, aita to ˈu mafatu i mauruuru. E rave rahi matahiti to ˈu imi-noa-raa i te Atua ma te hiaai rahi. (Ohipa 17:27) I te hoê po fetia, te feruri noa ra vau, e ua aniani ihora vau ia ˈu iho, ‘Eaha te tumu vau e vai ai i ǒ nei? Eaha te tumu o te oraraa?’ Ua haere atura vau i te hoê vahi moemoe o te aua, tuturi aˈera, e ua pure ihora, ‘E te Atua e! O vai oe? Nafea vau ia ite ia oe?’ Aita i maoro, ua tae maira te pahonoraa.

Te haapiiraa i te parau mau a te Bibilia

I te hoê mahana o te matahiti 1949, ua haere maira te hoê vahine apî e paraparau ia Papa i to ˈna pouraa mai i raro i te hoê pereoo utaraa taata. Ua pûpû maira oia ia ˈna te mau vea ra Te Pare Tiairaa e A ara mai na! Ua tamatahiti Papa i Te Pare Tiairaa e ua ani atura oia i teie vahine ia haere mai i to matou fare, ma te faataa e e piti tamarii ta ˈna e haere ra i te Ekalesia Presbytérienne. I to ˈna haereraa mai, ua vaiiho maira oia i te buka ra Tamarii (beretane) ia Ana ra e ua haamata ˈtura i te hoê haapiiraa Bibilia e o ˈna. Ua apiti atoa ˈtu vau i te haapiiraa i muri iho.

I te avaˈe Novema 1950, ua haere mâua i ta mâua tairururaa matamua a te mau Ite no Iehova. I reira te matararaa mai te buka ra “Ei parau mau â ta te Atua!” (farani) e ua tamau noa mâua i ta mâua haapiiraa Bibilia i nia i teie buka. Ua taa ˈtura ia mâua i muri iho e ua itea mai ia mâua te parau mau, e i te avaˈe Eperera 1951, ua bapetizohia mâua ei taipe no to mâua pûpûraa ia mâua no Iehova. Ua pûpû atoa o Papa ia ˈna tau matahiti i muri iho e ua pohe oia ma te haapao maitai i te Atua i te matahiti 1982 ra.

Oaoa i roto i te taviniraa ma te taime taatoa

I te avaˈe Tenuare 1954, e 22 matahiti noa ïa to ˈu i reira, ua fariihia vau ia tavini i te amaa a te mau Ite no Iehova, tei piihia Betela. I to ˈu taeraa ˈtu, ua maere roa vau i to ˈu iteraa e, o te hoê taurearea e piti noa matahiti paari aˈe ia ˈu, o Richard Mucha, te tiaau o te amaa. I te matahiti 1955, i te taime a hinaarohia ˈi te mau tavini haaati, te iˈoa ïa o te mau tiaau ratere i tera ra tau, tei roto vau i na taata e pae i anihia ia rave i teie taviniraa.

Ta ˈu tuhaa taviniraa, o te hau ïa no Rio Grande do Sul. E 8 anaˈe amuiraa a te mau Ite no Iehova i reira i to ˈu haamataraa mai, tera râ, 18 avaˈe i muri iho, e 2 amuiraa apî e e 20 pǔpǔ taa ê tei haamauhia. I teie vahi i teie mahana, te vai ra 15 tuhaa haaati a te mau Ite no Iehova, fatata e 20 amuiraa i roto i te tuhaa tataitahi! I te hopea o te matahiti 1956, ua faaarahia maira vau e ua vahihia ta ˈu tuhaa haaati i roto e maha tuhaa nainai aˈe e haapaohia e e maha tavini haaati. I tera taime, ua faauehia mai au ia hoˈi i te Betela no te hoê tuhaa taviniraa apî.

Ua maere e ua oaoa atoa vau i to ˈu tonoraahia i te pae apatoerau no Beresilia ei tavini mataeinaa, e tiaau ratere ïa e haapao e rave rahi tuhaa haaati. I tera tau, 12 000 tavini a te mau Ite no Iehova e e piti mataeinaa i Beresilia. Na Richard Wuttke ïa te pae apatoa, e na ˈu te mataeinaa i te pae apatoerau. I te Betela, ua haapiihia mâua nafea ia faatere i te hoê matini taviri hohoˈa no te pata i te mau hohoˈa a te mau Ite no Iehova, oia hoi Te totaiete a te ao apî e haere ra i mua (beretane) e Te oaoaraa o te totaiete a te ao apî (beretane).

I taua tau ra, mea taa ê te huru ratereraa. Aita ta te mau Ite e pereoo uira, no reira, ua ratere au na nia i te vaa, te poti hoe, te pereoo puaatoro, te puaahorofenua, te pereoo auahi, te pereoo faauta tauihaa, e i te hoê taime na nia i te manureva. Mea haviti mau â ia rere na nia i te ururaau Amazone a tau atu ai i Santarém, te hoê oire i rotopu ia Belém i te muriavai o te Amazone e ia Manaus, te oire pu o te Hau no Amazonas. I tera ra tau, tau tairururaa haaati rii noa ta te mau tavini mataeinaa e haapao, no reira, te rahiraa o to ˈu taime, ua faaite ïa vau i te mau hohoˈa a te Taiete. E mau hanere taata i haere mai e mataitai i roto i te mau oire rarahi.

Te mea i haaputapû roa ia ˈu i te pae apatoerau o Beresilia, o te tuhaa fenua ïa no Amazone. I to ˈu taviniraa i reira i te avaˈe Eperera 1957, ua vai pue te Anavai Amazone e to ˈna mau anavai tapiri. Ua fanaˈo vau i te haamaitairaa taa ê e pata i te hoê o te mau hohoˈa, i roto i te ururaau, ma te huti i te hoê paruai i ropu e piti tumu raau. No roto mai te uira no te matini pata hohoˈa i te matini o te hoê poti i tutauhia i roto i te anavai i pihai iho mai. O te hohoˈa matamua ïa ta te rahiraa o te taata i haere mai, i mataitai aˈenei.

I muri noa iho, ua hoˈi atu vau e tavini i te Betela, e i te matahiti i muri iho, i te matahiti 1958, ua fanaˈo vau i te haamaitairaa taa ê e haere i te Tairururaa Nunaa tuiroo a te mau Ite no Iehova ra “Te hinaaro o te Atua,” i tupu i te oire no New York. Ua ruru mai te mau tia no ǒ mai 123 fenua i rotopu i te mau 253 922 taata i faaî i te tahua Yankee Stadium e te Polo Grounds i pihai iho mai, i te mahana hopea o taua tairururaa ra e vau mahana.

Te mau tauiraa oaoa i roto i to ˈu oraraa

I muri noa ˈˈe i to ˈu hoˈiraa i te Betela, ua haamatau atura vau ia Clara Berndt, e i te avaˈe Mati 1959, faaipoipo ihora mâua. Ua tonohia mâua i roto i te tuhaa haaati i te hau no Bahia, e fatata hoê matahiti to mâua taviniraa i reira. Te haamanaˈo noa nei mâua Clara ma te oaoa i te haehaa, te farii maitai, te itoito, e te here o te mau taeae i reira; mea veve ratou i te pae materia, mea taoˈa râ ratou i te pae no te hotu o te Basileia. I muri iho, ua tauihia mâua e ua haere atura mâua i te Hau no São Paulo. I reira, i te matahiti 1960, ua hapû atura ta ˈu vahine, e ua tia ˈtura ia mâua ia vaiiho i te taviniraa ma te taime taatoa.

Ua faaoti ihora mâua e haere e faaea i te hoê vahi o te hau no Santa Catarina, te vahi fanauraa ïa o ta ˈu vahine. O ta mâua tamaiti o Gerson, te matahiapo o ta mâua e pae tamarii. O Gilson ïa to muri iho, tei fanauhia i te matahiti 1962, o Talita i te matahiti 1965, o Tárcio i te matahiti 1969, e Janice i te matahiti 1974. Auaa o Iehova e te mau aˈoraa maitatai roa ta ˈna e horoa maira i nehenehe ai mâua e amo i te hopoia e haapii ia ratou pauroa i roto i “te aˈo e te faatitiaifaroraa a Iehova i te pae feruriraa.”—Ephesia 6:4, MN.

E taoˈa faufaa rahi ta mâua tamarii tataitahi. Ua faataa maitai te papai salamo i to mâua manaˈo: “Inaha hoi te tamarii ra, e tufaa ïa no ǒ ia Iehova ra.” (Salamo 127:3) Noa ˈtu te mau fifi, ua haapao mâua i ta mâua mau tamarii mai ta mâua e haapao i te mau ‘tuhaa atoa no ǒ ia Iehova ra,’ ma te haamanaˈo tamau i te mau faaueraa a ta ˈna Parau. Mea rahi te mau haamaitairaa i noaa mai. Ua ite mâua i te oaoa aita e faaauraa i te taime a faaite ai ratou e pae atoa ra, te tahi i muri aˈe i te tahi e na nia i ta ratou iho faaotiraa, i to ratou hinaaro e bapetizo ei taipe no to ratou pûpûraa ia ratou no Iehova.—Koheleta 12:1.

Te mau maitiraa a ta mâua mau tamarii

Ua oaoa roa mâua i to Gerson, i muri noa ˈˈe i te otiraa ta ˈna tau haapiiraa i te roro uira, parauraa mai e te hinaaro ra oia e tavini i te Betela, ma te maiti i te taviniraa ma te taime taatoa eiaha râ te hoê toroa i roto i teie nei ao. E ere râ hoi te oraraa i te Betela i te mea ohie no Gerson i te haamataraa ra. E maha noa avaˈe oia i reira, haere atura mâua e hiˈo ia ˈna i te Betela, e ua putapû-roa-hia vau i te peapea o to ˈna mata i to mâua revaraa. Na roto i te hiˈo o to mâua pereoo, ua ite au ia ˈna i te hiˈo-noa-raa ia mâua e tae roa ˈtu i te maaraa purumu matamua. Ua tahe to ˈu pape mata, e ua tapea ˈtura vau i te pae purumu hou mâua a rave ai i te tere e 700 kilometera no te hoˈi i te fare.

Ua au roa râ o Gerson i te Betela. I muri aˈe i to ˈna faaearaa i reira fatata e ono matahiti, ua faaipoipo atura oia ia Heidi Besser, e ua tavini raua i te Betela e piti â matahiti. Ua hapû ihora o Heidi, e ua faarue atura raua i te Betela. E ono matahiti to ta raua tamahine o Cintia i teie nei, e te apee nei oia ia raua i roto i ta raua mau ohipa no te Basileia.

Aita i maoro i muri aˈe i to mâua haere-matamua-raa ˈtu e hiˈo ia Gerson i te Betela, ua parau maira o Gilson, no faaoti noa ˈtura oia i ta ˈna matahiti haapiiraa matamua i te toroa tapihooraa, e te hinaaro atoa ra oia e tavini i reira. Ua opua oia e tavini hoê matahiti i te Betela e ia oti, e haere faahou i ta ˈna haapiiraa toroa tapihooraa. Ua taui râ ta ˈna mau opuaraa, e ua faaea noa oia i roto i te taviniraa i te Betela. I te matahiti 1988, ua faaipoipo atura oia ia Vivian Gonçalves, e pionie oia, te iˈoa ïa o te mau tavini ma te taime taatoa. Mai reira mai, ua tavini noa raua i te Betela.

Aita to mâua oaoaraa i hope atura inaha, ua maiti te toru o ta mâua tamarii, o Talita, e rave i te taviniraa pionie i te matahiti 1986 i muri aˈe i to ˈna haapiiraa i te toroa papai hohoˈa fare. E toru matahiti i muri iho, ua ani-atoa-hia oia ia haere i te Betela. I te matahiti 1991, ua faaipoipo atura oia ia José Cozzi, hoê ahuru matahiti to ˈna taviniraa i te Betela. Te tavini noa nei â raua i reira ei hoa faaipoipo.

Ua oaoa faahou mâua ta ˈu vahine i to mâua faarooraa ia Tárcio, ta mâua tamaiti i muri iho, i te faahitiraa i te pereota o ta mâua i faaroo aˈena e toru taime, “Papa, te hinaaro nei au e haere i te Betela.” Ua fariihia ta ˈna aniraa, e i te matahiti 1991, ua haamata atoa ˈtura oia i te tavini i te Betela, e ua faaea noa oia i reira e tae atu i te matahiti 1995. Te oaoa nei mâua i te mea e ua faaohipa oia i te itoito o to ˈna apîraa no te turu i te mau faufaa o te Basileia o Iehova na roto i teie ravea, hau atu i te toru matahiti.

Ua rave ta mâua hopea, o Janice, i ta ˈna faaotiraa e tavini ia Iehova e ua bapetizo oia i te 13raa o to ˈna matahiti. A haere noa ˈi oia i te haapiiraa, ua tavini oia hoê matahiti ei pionie tauturu. I muri iho, i te 1 no Setepa 1993, ua haamata oia i te taviniraa pionie tamau i roto i ta matou amuiraa i ǒ nei i te oire no Gaspar.

Te eˈa o te manuïaraa

Eaha te ravea ia vai tahoê noa te utuafare i roto i te haamoriraa a Iehova? Aita vau e manaˈo ra e te vai ra te hoê ravea ohie noa. Ua horoa mai Iehova i te mau aˈoraa i roto i ta ˈna Parau ei aveia no te mau metua kerisetiano, no reira, o ˈna te tia ia haamauruuruhia no te mau faahopearaa maitatai atoa ta mâua i fanaˈo. Ua tutava noa hoi mâua i te pee i ta ˈna aratairaa. (Maseli 22:6) Ua noaa i ta mâua mau tamarii atoa to ˈu huru horuhoru Latino e te huru feruriraa paari Helemani o to ratou mama. Te mea faufaa roa ˈtu râ o ta mâua i horoa ˈtu na ratou, o te tufaa ïa i te pae varua.

Ua niuhia to matou oraraa utuafare i nia i te mau faufaa o te Basileia. E ere i te mea ohie ia tapea noa i teie mau faufaa i nia i te parahiraa matamua. Ei hiˈoraa, ua fifihia matou i te faatere-tamau-raa i ta matou haapiiraa Bibilia utuafare, aita râ matou i faarue. Mai to ratou aruaruraa mai â, ua afai mâua i ta mâua tamarii tataitahi i te mau putuputuraa kerisetiano e tae noa ˈtu i te mau tairururaa. O te maˈi anaˈe aore ra te tahi atu tupuraa ru o tei tapea ia matou ia tae. Hau atu, i to ratou tamarii-rii-raa, ua afai atoa mâua i ta mâua mau tamarii i roto i te taviniraa kerisetiano.

I te area hoê ahuru matahiti, ua haamata te mau tamarii i te horoa i te mau oreroraa i te Haapiiraa o te Taviniraa Teotaratia. Ua tauturu mâua ia ratou ia faaineine i ta ratou mau oreroraa matamua, ma te faaitoito ia ratou ia faaohipa i te hoê tino parau eiaha râ ia papai pauroa i ta ratou oreroraa. I muri iho, na ratou tataitahi i faaineine i ta ratou iho oreroraa. Oia atoa, i te taeraa i te area 10 e 12 matahiti, ua haamata ratou tataitahi i te haere tamau i roto i te pororaa. Aita ˈtu huru oraraa to matou.

E tuhaa faufaa roa ta ta ˈu vahine o Clara i hauti i roto i te haapiiraa i ta mâua mau tamarii. I te mau po atoa, e mea nainai roâ ratou—te tau i reira te tamarii e apo ai i te mau mea atoa e haapiihia mai ia ˈna mai te rimu e ote i te pape—ua taio o Clara i te hoê aamu Bibilia na ratou e ua pure oia e o ratou tataitahi. Ua faaohipa maitai oia i te mau buka ra Paradaiso i moe, Paradaiso e noaa faahou mai (farani), Faaroo i te Orometua Rahi, e Ta ˈu Buka Aamu Bibilia.a I te matararaa mai te mau ripene haruharuhia e te mau ripene video operehia e te mau Ite no Iehova, ua faaohipa atoa mâua i te reira.

Te haapapu ra ta mâua i ite ei mau metua kerisetiano e te hinaaro mau nei te mau tamarii e ia haapaohia ratou i te mau mahana atoa. O te here-rahi-raa ia ratou, te haapaoraa ia ratou tataitahi, e te horoa-rahi-raa i te taime, vetahi o te mau hinaaro matamua o te mau tamarii. Aita noa mâua i faariro ei hopoia metua na mâua i te haamâharaa i teie mau hinaaro i roto i te faito rahi roa ˈˈe e maraa ia mâua, ua riro atoa râ ei oaoaraa rahi no mâua.

Oia mau, mea oaoa mau no te mau metua ia ite i te tupuraa o te mau parau a te Salamo 127:3-5: “Inaha hoi te tamarii ra, e tufaa ïa no ǒ ia Iehova ra; e ta te opu i fanau ra, e utua [maitai] ïa. Mai te ohe i te rima o te feia puai ra, oia atoa te tamarii a te taata itoito ra. E ao to te taata i î to ˈna piha ohe ia ratou!” Ua oaoa mau â matou i te taviniraa ia Iehova ei utuafare fetii tahoê!

[Nota i raro i te api]

[Hohoˈa i te api 26]

Antonio Santoleri e to ˈna utuafare fetii