Mau uiraa a te feia taio

Ua ite anei Iesu i teie nei e afea Aramagedo e tupu ai?

E au ra e e tano ia manaˈo e oia.

E maere paha vetahi e no te aha râ teie uiraa e faahitihia ˈi. No te parau ïa a Iesu i roto i te Mataio 24:36 (MN): “E taua mahana ra e taua hora ra, aita e taata i ite, aita te mau melahi o te mau raˈi, aita atoa te Tamaiti, o te Metua anaˈe râ.” A tapao na i te pereota ra “aita atoa te Tamaiti.”

Tei roto teie irava i te pahonoraa a Iesu i te uiraa a te mau aposetolo e: “E faaite mai oe ia matou i te tupuraa o taua mau mea nei? e te tapao o to oe taeraa mai e te hopea o teie nei ao?” (Mataio 24:3) I roto i ta ˈna parau tohu tei tui te roo i teie nei no nia i te mau haapapuraa o “te tapao,” ua tohu oia e e tupu te tamaˈi, te oˈe, te aueueraa fenua, te hamani-ino-raa i te mau Kerisetiano mau, e te tahi atu mau mea i nia i te fenua nei o te faaite e tei reira oia. Na roto i teie tapao ta ˈna mau pǐpǐ e ite ai e ua fatata te hopea. Ua faahohoˈa oia i teie piriraa mai, e te tau e oteo ai te omou rii o te tumu suke, e tapao faaite ïa e ua fatata te tau veavea. Ua na ô oia i muri iho e: “Oia atoa i teie nei, ia hiˈo outou i taua mau mea nei, . . . ia ite hoi outou; tei te pae uputa ïa.”—Mataio 24:33.

Aita râ Iesu i haapapu roa mai e afea te hopea e tae mai ai. Area râ, ua faahiti oia i te parau i roto i te Mataio 24:36. O te huriraa ïa i roto i Te mau Papai Moˈa—Tatararaa a te ao apî, e i roto atoa e rave rahi mau Bibilia no teie tau. Teie râ, aita te tahi mau tatararaa tahito aˈe e faahiti ra i te pereota ra “aita atoa te Tamaiti.”

Ei hiˈoraa, te na ô ra te tatararaa Katolika a Douay e: “Area taua mahana ra e taua hora ra, aita e taata i ite, aita te mau melahi o te raˈi, o te Metua anaˈe râ.” Hoê â huru i roto i te tahi atu tatararaa (King James Version). No te aha ïa te pereota ra “aita atoa te Tamaiti” i faaorehia ˈi, noa ˈtu e te vai ra i roto i te Mareko 13:32? No te mea i te omuaraa o te senekele 17 ra, i te taime a faaineinehia ˈi teie na tatararaa e piti, aita teie pereota i roto i te mau papai ta te feia huri i faaohipa. Mai taua tau maira râ, e rave rahi mau papai Heleni tahito aˈe tei iteahia mai. E te vai ra te pereota “aita atoa te Tamaiti” a te Mataio 24:36 i roto i teie mau papai tei piri atu i te tau o te papai matamua a Mataio.

Te vahi anaanatae, te faahiti ra te hoê tatararaa Katolika (Bible de Jérusalem) i teie pereota, e te hoê nota i raro i te api e na ô ra e aita te tatararaa Vulgate Latino e faahiti ra i teie pereota, “peneiaˈe no te tahi mau tumu i te pae no te tuatapaparaa faaroo.” Papu maitai! Inaha, mea ohie roa na te feia huri aore ra te mau papai parau e tiaturi na i te Toru Tahi, ia faaore i te hoê pereota e haapapu ra e aita Iesu i ite i te hoê mea ta te Metua anaˈe i ite. Nafea hoi Iesu e ore ai e ite ahiri e e melo oia e to ˈna atoa Metua no te hoê Atua toru tahi?

Oia atoa, te na ô ra te hoê buka (A Textual Commentary on the Greek New Testament, a B. M. Metzger) e: “Aita te parau ra ‘aita atoa te Tamaiti’ e vai ra i roto i te rahiraa o te mau [papai] haapapuraa ia Mataio, e tae noa ˈtu i roto i te papai Byzantin no muri iho mai. I te tahi aˈe pae, te vai ra teie pereota i roto i te mau papai maitatai roa ˈˈe o te mau papai parauhia no Alexandrie, no Tooa o te râ, e no Kaisarea. Mea papu aˈe e ua faaorehia teie mau parau no te mea te faahapa ra te reira i te hoê haapiiraa faaroo, aita râ i anoihia ˈtu i” te Mareko 13:32.—Na matou e papai faaopa nei.

Te turu nei teie mau “papai maitatai roa ˈˈe” o te mau papai na mua ˈtu, i te huriraa e faataa ra e e noaa mǎrû noa mai te ite no nia i te hopea. Aita te mau melahi i ite e afea te hopea e tupu ai; aita atoa te Tamaiti; o te Metua anaˈe râ. E ua tuea te reira e te mau parau a Iesu i roto i te Mataio 20:23, i reira oia i farii ai e aita i tia ia ˈna ia horoa i te parahiraa teitei aˈe i roto i te Basileia, maori râ o te Metua.

No reira, te faaite ra te mau parau iho a Iesu e, i nia i te fenua nei, aita oia i ite i te taio mahana o “te hopea o teie nei ao.” Ua ite râ anei oia i muri iho?

Te faataa ra te Apokalupo 6:2 ia Iesu e parahi ra i nia i te hoê puaahorofenua uouo e te haere ra “ma te haapau atu, e ia pau atu â.” I muri iho, ua fa mai te mau taata na nia i te puaahorofenua e faataipe ra i te tamaˈi, te oˈe, e te maˈi pee, mai tei tupu mai te haamataraa mai â o te Tamaˈi Rahi Matamua i te matahiti 1914 ra. Te tiaturi nei te mau Ite no Iehova e, i te matahiti 1914, ua faateronohia Iesu ei Arii o te Basileia o te Atua i nia i te raˈi, e na ˈna e aratai i te tamaˈi i mua nei no te faaore i te ino i nia i te fenua nei. (Apokalupo 6:3-8; 19:11-16) I te mea e ua haamanahia Iesu i teie nei e na ˈna e haere e haapau na nia i te iˈoa o te Atua, e tano ïa ia manaˈo e ua faaite to ˈna Metua ia ˈna e afea te hopea e tupu ai, afea oia e ‘haapau roa ˈtu ai.’

Aita taua taio mahana ra i faaitehia mai ia tatou i nia i te fenua nei, no reira, ua tano noâ te mau parau a Iesu no tatou: “E haapao maitai, e faaitoito, . . . aita hoi outou i ite i taua tau ra. . . . E ta ˈu e parau atu ia outou na, o ta ˈu ïa parau i te taata atoa, E faaitoito.”—Mareko 13:33-37.