“Aita anei au e moemoeâ ra?”

Teie te hoê faatiaraa parau no te fenua Malawi no te hoê o te mau Tairururaa mataeinaa faufaa roa ˈˈe a te mau Ite no Iehova “Te feia e arue i te Atua ma te oaoa” tei faatupuhia i te tau veavea o te matahiti 1995 ra.

“I TE roaraa o te hoê hiti purumu, fatata i te ropuraa i te pae tooa o te râ o te Roto Malawi, ua tuuhia te hoê parau faaite no te taime matamua a 29 matahiti. Te na ô ra, ‘Tairururaa Mataeinaa a te mau Ite no Iehova.’

“Ua tapea te hoê pereoo rahi i pihai iho i te parau faaite, e i roto i to ˈna tavere hau atu i te 200 mau tia no te oire no Mzuzu tei pou mai. Ua hopoi mai ratou i te mau otaa ahu, te mau ahutaoto, te mau pani, te mau patete, te maa, te vahie, e te mau Bibilia no te apiti atu e fatata e 3 000 o to ratou mau taeae e tuahine o te tahi atu mau vahi.

“I to matou fariiraa i te mau taeae e ia pou mai i te pereoo rahi, te haere maira George Chikako, 63 matahiti, ma te turai i to ˈna pereoo tataahi na roto i te one, ma te tereraa mai e piti mahana mai Nkhotakota. I te roaraa o te mau matahiti, ua tapeahia Taeae Chikako e maha utua fare auri ei faahopearaa no to ˈna patoiraa i te ofati i te mau faaueraa tumu a te Bibilia. Ua pohe to ˈna taeae fetii na roto i te mau ruturaa o ta ˈna i faaruru i to ˈna tapearaahia. ‘Aita anei au e moemoeâ ra?’ o ta Taeae Chikako ïa e uiui nei. ‘Te faatupuhia ra teie tairururaa i mua i te taata, e te himene nei teie mau taata i te mau himene a te Basileia ma te reo puai! I roto i te mau rahiraa matahiti, i putuputu na matou i te maororaa po, ma te himene i te mau himene a te Basileia ma te reo mǎrû, e ma te ǔi i to matou rima no te haapoupou. I teie nei e tairuru matou ma te tapuni ore, e e maere roa te mau taata ia ite e e mea rahi matou i to ratou manaˈoraa e mea iti noa matou!’

“Ua haaatihia te vahi tairururaa e te matie, e ua tapoihia e te aeho ia mǎrǔmǎrǔ. Ua faatiahia te mau fare nainai hamanihia e te aihere e te mau fare taotoraa i rapaeau mai ei nohoraa na te mau tia. Ua î te mataˈi o te po i te taˈi o te mau reo navenave o tei ore i mamû faahou i te mǎtaˈu o te hamani-ino-raa.

“Ua tano ïa te tumu parau o te tairururaa ‘Te feia e arue i te Atua ma te oaoa’!”

[Faaiteraa i te tumu]

Mountain High Maps® Copyright © 1995 Digital Wisdom, Inc.