Iesu Mesia: te Tamaiti here a te Atua
“E inaha, o te reo maira no te raˈi mai, i te na ôraa mai e, Tau Tamaiti here teie, au mauruuru roa vau ia ˈna.” — MATAIO 3:17.
1, 2. a) Eaha te parau mau ta te Bibilia e haapii maira no nia i te Atua Puai hope e no nia ia Iesu Mesia? b) Eaha ta te mau haapaoraa o te amuiraa faaroo kerisetiano e haapiiraa?
UA BAPETIZOHIA o Iesu Mesia i roto i te pape i te 30raa o to ˈna matahiti. A na roto mai ai oia i te pape, ua faaroohia aˈera te hoê reo i te na ôraa mai e: “Tau Tamaiti here teie, ua mauruuru roa vau ia ˈna.” (Mataio 3:17). No te Atua hoi taua reo ra. I te tahi atu taime, te pure noa ra oia, ua na ô aˈera Iesu e: “E tau Metua, e haamaitai i to iˈoa. Ua itea maira te hoê reo no nia i te raˈi i te na ôraa mai, Ua haamaitai au, e e haamaitai faahou atu â vau.” — Ioane 12:28.
2 Ia taiohia taua mau irava nei, e taa atoa i te hoê tamarii iho e te mau auraa e tahoê ra i te Atua Puai hope e o Iesu Mesia, mai te mau auraa atoa ïa i rotopu i te hoê metua tane e ta ˈna tamaiti here, e e nau taata taa ê hoi raua. Teie râ, aita te mau haapaoraa o te amuiraa faaroo kerisetiano e turu nei i taua parau mau bibilia ra. Te parau nei ratou e o Iesu Mesia te Atua Puai hope, te piti o te taata o te torutahi, e o te varua moˈa hoi te toru.
3. Na te aha e faaite maira e e faatupu te haapiiraa no nia i te Torutahi i te manaˈo arepurepu?
3 Te tuu nei taua haapiiraa ra i te mau melo o te amuiraa faaroo kerisetiano i roto i te hoê arepurepu rahi; o te hoê ïa o te mau tumu te Nouvelle Encyclopédie catholique (beretane) e faariro ai i te Torutahi ei ohipa moe. I te parau mau, tei roto atoa hoi te mau upoo faatere haapaoraa iho i te taa ore. Inaha, teie te nehenehe e taiohia no nia i taua tumu parau ra i roto i taua buka ra: “Mea iti roa te mau orometua e turu ra i te haapiiraa no nia i te torutahi, i roto i te mau fare haapiiraa perepitero katolika, tei ore i te hoê taime, i feaa no nia i taua tumu parau ra: ‘Nafea râ hoi ia faaite i te parau no nia i te Torutahi?’ Mai te peu e aita taua uiraa nei e papu-maitai-hia i roto i te feruriraa o te mau taata e haapii ra, eita atoa ïa e papu-maitai-hia i roto i te feruriraa o te feia e haapii ra.”
4. Eaha te haapiiraa tumu a te mau Ekalesia no nia i te Torutahi?
4 O te haapiiraa tumu hoi taua haapiiraa papu ore ra na te mau haapaoraa katolika e porotetani. Inaha, teie ta te Encyclopédie katolika (beretane) e parau ra: “Te Torutahi, o te parau ïa e faaohipahia no te faataa i te haapiiraa tumu a te haapaoraa kerisetiano (...). No reira, ia au i te mau parau a te haapiiraa a Athanase, ‘te Atua Metua, te Atua Tamaiti, e te Atua Varua Moˈa, e ere râ e toru Atua hoê anaˈe râ Atua’.” Oia atoa, i roto i te hoê hororaa i ravehia no te aro atu i te mau Ite no Iehova i Heleni, teie ta te Ekalesia orthodoxe i parau: “Te haapiiraa tumu o te kerisetianoraa, ta te mau kerisetiano atoa e farii nei, noa ˈtu eaha ta ˈna haapaoraa, o te (...) Torutahi ïa, oia hoi te tiaturiraa e te vai ra te hoê Atua i roto e toru taata.” Teie atoa ta ˈna e parau ra: “Te mau kerisetiano, te feia ïa e farii i te Mesia ei Atua.” E, ua na ô mairâ oia e te feia e ore e farii i te Torutahi, e ere ïa ratou i te mau kerisetiano, e mau taata patoi râ i te haapaoraa mau.
5, 6. No te aha e riro ai ei mea faufaa mau ia ite i te parau mau no nia i te Torutahi?
5 Teie râ, mai te peu e mea hape taua haapiiraa ‘tumu’ nei a te amuiraa faaroo kerisetiano, e mai te peu e e haavare, o te feia ïa e ore e farii nei i te reira, o te ore hoi e riro ei mau taata patoi i te haapaoraa mau, te mau kerisetiano mau. Te feia e farii i te reira ra, aita ïa ratou e farii ra i te kerisetiano. Eaha ïa te roohia i nia ia ratou? Oia hoi, eita ratou e nehenehe e fanaˈo i te ora mure ore i roto i te Basileia o te Atua; ta te buka hopea ïa a te Bibilia e parau mai nei, “te apokalupo a Iesu Mesia, ta te Atua i tuu mai ia ˈna ra”. Teie hoi ta tatou e taio: “Area to rapae au ra, e urî ïa, e te tahutahu, e te faaturi, e te taparahi taata, e te haamori idolo, e te feia atoa e hinaaro e ua parau haavare ra.” — Apokalupo 1:1; 22:15.
6 I te mea hoi e mea faufaa roa te haapiiraa no nia i te Torutahi, e tia iho â ïa ia tatou ia ite no hea mai taua haapiiraa ra e te tumu oia e haamauhia ˈi; o vai mau na te metua; e eaha te manaˈo o te mau taata tuatapapa i te parau no nia i te Atua o to tatou nei tau, no nia i taua mau mea ra. Teie râ, hou aˈe tatou e haere roa ˈtu ai i mua, e hiˈopoa anaˈe na eaha ta te Parau a te Atua e parau ra no nia i taua tumu parau nei. — Timoteo 2, 3:16, 17.
Eiaha ‘te Atua Tamaiti’, te “Tamaiti [râ] a ta Atua”
7. Eaha ta te hoê taioraa pae tahi ore no nia i te Bibilia e faaite maira no nia ia Iesu?
7 Mai ta te hoê taioraa pae tahi ore no nia i te Bibilia e faaite mai, ma te ore hoi e hamani i te tahi noa ˈˈe manaˈo no nia i te Torutahi, aita o Iesu i parau aˈenei e o ˈna te Atua Puai hope. I roto i te Ioane 3:16, ei hiˈoraa, teie ta ˈna e parau ra: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi.” E piti noa irava i mua ˈtu, te parau faahou ra o Iesu e o ˈna te “Tamaiti fanau tahi a te Atua ra”. (Ioane 3:18.) A pari mai ai te mau ati Iuda ia ˈna i te faaino i te Atua, ua pahono atura oia ia ratou e: “I pari mai hoi outou i te tuhi i ta te Metua i faataa e i tono mai i te ao nei, o vau i parau ia ˈu iho e, E Tamaiti au na te Atua?” (Ioane 10:36). No reira, aita o Iesu i parau aˈenei e o ˈna te ‘Atua Tamaiti’, o ˈna râ te “Tamaiti a te Atua”.
8. Eaha te faaiteraa ta raatira hanere e ta te feia i pee na ia ˈna, i horoa mai?
8 A pohe ai o Iesu, ua ite te mau faehau roma iho i reira e, e ere o ˈna o te Atua: “Ite aˈera te raatira hanere, e ratou atoa i tiai ia Iesu ra, i te fenua i te aueueraa, e te mau mea atoa i tupu ra, roohia ihora ratou i te mǎtaˈu rahi, ua na ô ihora, O te Tamaiti mau â teie na te Atua.” (Mataio 27:54). Aita ratou i parau e: “O ˈna te Atua”, aore ra: “O ˈna te Atua Tamaiti”, i te mea ua haapii Iesu e ta ˈna mau pǐpǐ e o ˈna te Tamaiti a te Atua, eiaha râ te Atua Puai hope tei riro mai ei taata.
9, 10. Eaha te faaiteraa puai mau ta te mau Evanelia e horoa mai nei no nia i te mau auraa e vai ra i rotopu i te Atua e o Iesu?
9 Ia au i te faatiaraa parau a Mataio, te hoê o te mau papai evanelia, a bapetizohia ˈi Iesu, ua haapapu maira te Atua iho e tera ta ˈna Tamaiti here (Mataio 3:17). Ua na reira atoa hoi te tahi atu mau taata papai bibilia. No reira o Mareko i papai ai e: “E ua itea maira te hoê reo no te raˈi mai, i te na ôraa mai, O tau Tamaiti here oe, ua mauruuru roa vau ia oe.” (Mareko 1:11). E nehenehe atoa tatou e taio i roto i te Evanelia a Luka: “E te hoê reo maira no te raˈi, i te na ôraa mai, Tau Tamaiti here oe, ua mauruuru roa vau ia oe.” (Luka 3:22). I to ˈna aˈe pae, teie ta Ioane tei bapetizo ia Iesu i parau: “Ite atura hoi au, e teie ta ˈu parau, o te Tamaiti ïa oia [o Iesu] na te Atua.” (Ioane 1:34). No reira, ua haapapu maitai mai te Atua iho, na papai evanelia e maha e o Ioane bapetizo e o Iesu ra, o te Tamaiti ïa a te Atua. Hau atu, tau taime i muri iho, a faahuru-ê-hia ˈi o Iesu, ua tupu te hoê ohipa mai te reira te huru: “E te hoê reo [to te Atua] maira no roto i taua ata ra, i te na ôraa mai, O tau Tamaiti here teie, a faaroo ia ˈna.” — Luka 9:35.
10 I roto i taua mau irava atoa nei, te parau ra anei te Atua e o ˈna iho te tamaiti, ua tono o ˈna ia ˈna iho, e ua farii o ˈna ia ˈna iho? Aita, ua parau ra te Atua Metua, e te Poiete atoa, e ua tono mai o ˈna Tamaiti ia Iesu, tei taa ê maitai hoi ia ˈna, no te faatupu i Ta ˈna ohipa. No reira, te parau ra i faaohipahia i roto i te mau Papai heleni kerisetiano, o te “Tamaiti [ïa] a te Atua” no te faahiti mai te parau no Iesu. I te tahi aˈe pae, eita roa ˈtu e farereihia te hoê noa ˈˈe taime te parau ra ‘te Atua Tamaiti’, e inaha hoi: e ere o Iesu te Atua Puai hope, o te Tamaiti râ o ˈna na te Atua. E piti na taata taa maitai teie, e eita roa ˈtu te hoê noa ˈˈe “parau moe” i te pae no te tuatapaparaa i te parau no nia i te Atua e nehenehe e faaore i taua parau mau ra.
Mea teitei aˈe te Metua i te Tamaiti
11. Mea nafea to Iesu faaiteraa e mea rahi aˈe te Atua ia ˈna?
11 Ua ite o Iesu e aita o ˈna i aifaito i to ˈna Metua, tera râ, e tia ia ˈna ia auraro ia ˈna i roto i te mau mea atoa. Ua ite o ˈna e e Tamaiti here o ˈna mea here roa na ˈna i to ˈna i to ˈna Metua. No reira ˈtura, e rave rahi taime to Iesu faahitiraa i teie mau parau: “Eita e tia ta te Tamaiti ia rave oia anaˈe ihora, maori râ o ta ˈna i ite i te Metua i te raveraa ra; te mau mea atoa ta ˈna e rave ra, oia atoa ta te Tamaiti e rave.” (Ioane 5:19). “I pou mai nei hoi au mai te raˈi mai e haapao o to tei tono mai ia ˈu nei hinaaro, eiaha to ˈu iho hinaaro.” (Ioane 6:38). “Ere i ta ˈu ta ˈu e haapii nei, na ˈna râ, na tei tono mai ia ˈu nei.” (Ioane 7:16). “Area vau, ua ite au ia ˈna [oia hoi te Atua], mai reira hoi au nei, e na ˈna hoi au i tono mai nei.” (Ioane 7:29). Te taata e tono, mea hau aˈe ïa o ˈna i te taata i tonohia oia hoi, e te hoê tavini. Na te Atua e tono ra, o Iesu râ tei tonohia; e na taata taa maitai teie. Mai ta Iesu i parau, “aore te tavini i hau i to ˈna ra fatu, e te aposetolo aore ïa i hau i tei tono ia ˈna”. — Ioane 13:16.
12. Eaha te parabole e faaite maira e tei raro aˈe o Iesu i te mana o te Metua?
12 I te mea e ua auraro maitai o ˈna i te mana o te Metua, te faaite maramarama maitai maira Iesu i te reira i roto i te hoê parabole i reira to ˈna faaauraa i te Atua ra o Iehova i te fatu o te hoê ô vine. Hou aˈe oia e reva ˈtu ai i te fenua ěê, e vaiiho mai taua fatu ra i ta ˈna ô vine na te feia faaapu, oia hoi te mau upoo faatere haapaoraa ati iuda. I muri iho, a hinaaro ai oia e ia faahoˈi mai te feia faaapu i te hoê tuhaa o te hotu o te po vine i roto i to ˈna rima, e tono atu oia i te hoê tavini; e tupai mai râ te mau taata faaapu i te tavini e e faahoˈi faahou mai ia ˈna ma te faufaa ore. E tono faahou atu oia i te piti o te tavini, e hoê â ohipa i tupu. E na reira-atoa-hia i nia i te toru o te tavini. Parau maira râ te fatu (te Atua) ra e: “E tono vau i tau tamaiti [o Iesu] here, e ite maitai mai paha ratou ia ˈna ia hiˈo mai.” Teie râ, e na ô atu te feia faaapu ino ra: “O te taata aiˈa teie, tatou e taparahi ia riro mai te fenua ia tatou iho. Hopara maira ratou ia ˈna i rapae au i taua ô vine ra, e taparahi pohe roa ihora.” (Luka 20:9-16). Te faaite maitai maira taua parabole nei e mea auraro na Iesu i to ˈna Metua, na te Metua i tono mai ia ˈna no te faatupu i te hinaaro o te Metua.
13. Eaha te mau faahitiraa bibilia e haapapu maitai maira e e rahi aˈe te Atua ia Iesu?
13 Ua parau atoa Iesu iho e: “E rahi hoi tau Metua ia ˈu.” (Ioane 14:28). E tia ia tatou ia tiaturi ia Iesu, no te mea eita ta ˈna e nehenehe e ore e ite i te tumu no te mau auraa e vai ra i rotopu ia ˈna e to ˈna Metua. Ua ite atoa te aposetolo Paulo e, mea hau aˈe te Atua ia Iesu; no reira o ˈna i parau ai e: “E i raro atoa aˈe ïa te Tamaiti iho (...) [i] te Atua.” (Korinetia 1, 15:28). Ua papai aˈena atoa hoi oia i roto i te Korinetia 1, 11:3 e: “O to te Mesia ra upoo, o te Atua ïa.” Ua farii aˈera Iesu e tei raro aˈe o ˈna i te mana o te hoê Atua hau aˈe ia ˈna, ia ˈna i parau atu i ta ˈna mau pǐpǐ e: “Te haere nei au i tau Metua ra e to outou Metua ra, e i tau Atua ra e to outou Atua ra.” — Ioane 20:17.
14. Eaha ˈtu â vetahi mau irava bibilia e faaite maira e, e ere o Iesu te Atua Puai hope?
14 Ua faaite mai o Iesu i te teitei o te Atua a ani mai ai te metua vahine o na pǐpǐ toopiti ia ˈna e ia nehenehe ta ˈna mau tamaiti e parahi te hoê i te pae atau e te tahi i te pae aui ia haere mai oia i roto i to ˈna Basileia. Teie hoi ta ˈna i pahono atu: “Area te parahi i tau rima atau e tau rima aui, eita ïa e tia ia ˈu ia horoa.” (Mataio 20:23). Ahiri e o Iesu te Atua Puai hope, tei ia ˈna atura ïa taua haamaitairaa nei ‘no te horoa ˈtu’ i te reira, e ere râ hoi; na to ˈna Metua e horoa i te reira. Oia atoa, a faahiti ai oia i te parau tohu no nia i te hopearaa o te amuiraa o te mau mea nei, ua parau aˈera oia e: “Area te reira mahana e te reira hora, e ore roa te hoê e ite; e ore hoi te mau melahi o te raˈi, e ore atoa te Tamaiti, maori râ o te Metua anaˈe ra.” (Mareko 13:32). Ahiri e o Iesu te Atua Puai hope, e ite ïa oia i taua mahana ra e taua hora ra. Tera râ, aita o ˈna i ite, no te mea e ere o ˈna i te Atua tei ite i te mau mea atoa, o ˈna râ te Tamaiti a te Atua. Aita o ˈna i ite i te mau mea atoa ta to ˈna Metua i ite.
15. A fatata ˈi oia i te pohe, mea nafea to Iesu faaiteraa mai e, tei raro aˈe o ˈna i te mana o te Atua?
15 A fatata ˈi oia i te pohe, ua faaite maira o Iesu e tei raro aˈe o ˈna i to ˈna Metua, ia ˈna i pure e: “E tau Metua, ia tia ia oe ra, e hopoi ê atu i teie nei aˈua; ia tupu râ to oe hinaaro eiaha to ˈu.” (Luka 22:42). O vai ta Iesu e pure ra? O ˈna iho? Eita, te pure ra o ˈna i to ˈna Metua i te raˈi. Ta te mau parau ïa ta ˈna i faahiti e haapapu maitai maira: “Ia tupu râ to oe hinaaro eiaha to ˈu.” I te mahana o to ˈna poheraa, ua tuô aˈera oia e: “E tau Atua, e tau Atua, eaha oe i faarue mai ai ia ˈu?” (Mareko 15:34). O vai ta Iesu e parau atura? O ˈna iho? Eita, i to ˈna râ Metua i roto i te raˈi.
16. Mea nafea te pohe e te tia-faahou-raa o Iesu i te faaiteraa mai e eita e nehenehe e parau e o Iesu te Atua Puai hope?
16 I muri aˈe i to ˈna poheraa, ua faaea Iesu i roto i te apoo fatata e toru mahana te maororaa. Na vai i faatia-faahou-mai ia ˈna? Eita ta ˈna iho e nehenehe e faatia ia ˈna i te mea hoi e ua pohe o ˈna. E ahiri e aita o ˈna i pohe, eita ïa ta ˈna e nehenehe e aufau i te hoo no te hara a Adamu; ua pohe mau râ oia, e e toru mahana te maororaa, aita o ˈna faahou. Te parau maira te aposetolo Petero e na vai i faatia ia Iesu: “Oia hoi ta te Atua i faatia aˈenei, ua matara hoi ia ˈna te tapea ra o te pohe, e ore roa hoi oia e mau i te reira.” (Ohipa 2:24). Na tei teitei aˈe ïa, te Atua Puai hope, tei faatia mai mai roto mai i te feia pohe tei raro aˈe ia ˈna, oia hoi ta ˈna Tamaiti here ra o Iesu. E rave anaˈe na i te hoê hiˈoraa: a faatia mai ia o Iesu ia Lazaro, o vai te taata rahi aˈe? O Iesu, i te mea ua nehenehe o ˈna e faatia mai ia Lazaro mai roto mai i te mau taata pohe (Ioane 11:41-44). Na reira atoa hoi a faatia mai ai te Atua ia Iesu. Mai te peu e ua nehenehe o ˈna e faahoˈi mai i te ora i roto ia Iesu, mea hau aˈe iho â o ˈna ia ˈna.
17. Eaha ˈtu â te tahi haapapuraa e faaite maira e e ere i Iesu te Atua?
17 I te mea hoi e na te Atua i poiete ia ˈna, eita ïa e nehenehe e parau e, te Atua ra, o Iesu ïa. A hiˈo na mea nafea to Benjamin Wilson, i roto i ta ˈna Emphatic Diaglott, huriraa i te Apokalupo pene 3, irava 14: “Teie ta te Amene e parau ra, te ite haapao maitai e te ite parau mau [o Iesu], te haamataraa o te poieteraa o te poieteraa a te Atua.” Mea na reira atoa to te Kolosa 1:15, 16, faahitiraa i te parau no nia ia Iesu: “O te huru mau oia o te Atua hiˈo-ore-hia ra, o tei fanau na i te mau mea atoa i hamanihia ra: [na roto hoi i to ˈna arai i hamanihia ˈi] i te mau mea atoa nei, o to re raˈi, e to te fenua nei (...). E mea hamani-anaˈe-hia ïa [na roto i to ˈna arai], e no ˈna anaˈe.” No reira, na te Atua Puai hope iho i poiete i ta ˈna Tamaiti i roto i te raˈi. I muri aˈe, ua poiete oia i te tahi atu mau mea “[na roto ia ˈna]” aore ra “[na roto i to ˈna arai]”, mai te hoê taata rima î aravihi e faaohipa ra i te hoê rave ohipa aravihi. E ere o Iesu no roto mai i taua mau mea i poietehia ra “[na roto i to ˈna arai]”, i te mea hoi e ua poiete ê na te Atua ia ˈna. No reira oia e parauhia ˈi te “[matahiapo]”, te “tamaiti fanau tahi”. Ia parauhia no te hoê tamarii e, o ˈna te matahiapo, te tamaiti fanau tahi, eita ïa te auraa e hoê â o ˈna e to ˈna metua, tei mua râ tatou i e piti na taata taa ê maitai te tahi e te tahi, te metua e te tamaiti.
Te varua moˈa: taata aore ra puai ohipa?
18. Eaha ta te Bibilia e haapii maira no nia i te varua moˈa?
18 Eaha ˈtura ïa te nehenehe e parau i teie nei no nia i te varua moˈa, e parauhia ra hoi e te toru o te taata o te Torutahi, tei tuea i te Metua e i te Tamaiti i te pae no te puai, no huru e no te ora mure ore? Aita roa ˈtu i itehia aˈenei i roto i te Bibilia ia tahoêhia te varua moˈa i te Atua e i te Mesia ma te faaite mai e hoê â o ˈna e o raua. No reira te Mareko 1:10, e faataa maira i te parau no nia i te bapetizoraa o Iesu, e faaite mai e, ua pou mai te varua moˈa i nia ia Iesu “mai te uupa ra”; aita o ˈna i parau mai e ua riro mai oia ei taata. E ere atura ïa te varua moˈa i tau mai i nia ia Iesu i te hoê taata, o te puai ohipa râ o te Atua. Maoti taua puai no ǒ mai i te Atua ra, i nehenehe ai Iesu e faaora i te feia maˈi e e faatia mai i te feia pohe. Teie te taiohia i roto i te Luka 5:17: “Tei nia te puai rahi o te Fatu [te Atua] ia ˈna [Iesu] no te faaora.” (Diaglott). I muri aˈe, i te mahana Penetekose, ua noaa atoa mai i te mau aposetolo te puai o te Atua no te faaora i te feia maˈi e te faatia faahou mai i te feia pohe. Ua riro mai anei ïa ratou ei mau melo no te tahi “atua”? Aita, ua noaa maira ia ratou no ǒ mai i te Atua ra, na roto i te arai o te Mesia, te tahi puai o te tauturu ia ratou ia ratou ia faatupu i ta te taata e ore e nehenehe e faatupu i roto i te mau huru tupuraa e mǎtauhia.
19. No te aha e ere roa ˈtu te varua moˈa te toru o te taata no te hoê torutahi?
19 I roto i te Ephesia 5:18, te faahiti ra o Paulo i te parau no taua puai ohipa ra. “Ia î râ outou i te Varua”, ta ˈna ïa e aˈo maira. E taio-atoa-hia i roto i te Ohipa 7:55 e ua “î aˈera [o Setephano] i te [varua moˈa]”. E i te Penetekose, ua “î aˈera [te mau pǐpǐ a Iesu] atoa i te [varua moˈa]”. (Ohipa 2:4.) E nehenehe anei te hoê taata e î i te hoê taata? Eita, e nehenehe râ o ˈna e î i te puai no ǒ mai i te Atua ra. E taua varua moˈa ra, o te puai ïa ta te Atua i faaohipa no te poiete i te ao nei. Ia au i te Genese 1:2, “ua faaarepurepu ihora te Varua o te Atua i nia iho i te moana”.
20. Eaha te orama i itehia e Setephano e faaite maira i te tahi parau hau atu â e haapapu mai e e haapiiraa hape te Torutahi?
20 I muri aˈe i te tia-faahou-raa o Iesu, ua ite aˈera o Setephano i te hoê orama no te raˈi mai: “ite atura i te hanahana o te Atua, e ia Iesu i te tia-maite-raa i te rima atau o te Atua ra”. (Ohipa 7:55.) Ua ite atura ïa oia i roto i te raˈi e piti taata taa maitai te tahi e te tahi: 1) te Atua e 2) o Iesu Mesia tei faatiahia mai. Aita e faahitihia ra i te parau no te varua moˈa i roto i taua orama ra, no te mea e ere te varua moˈa i te toru o te taata no roto mai i te tahi torutahi. I te mea hoi e o te puai te reira o te Atua, no ǒ mai ïa te varua moˈa i te Atua ra, e ete hoi mai te hoê taata tei taa ê maitai i te Atua. No reira o Setephano i ite ai e piti anaˈe iho taata.
21, 22. a) Eaha ta te hoê buka faaroo e farii ra no nia i te varua moˈa? b) Eaha te mau parau ta tatou e tuatapapa i roto i te tumu parau i mua nei?
21 Teie ta te Nouvelle Encyclopédie catholique e parau ra no nia i te varua moˈa: “Ua maramarama-maitai-hia e aita roa ˈtu te F[aufaa] T[ahito] e faataa maira i te varua o te Atua mai te hoê taata, eita atoa e faataa maira ia au i te hoê manaˈo philosopho, aore ra i te hoê parau na te mau hebera. Te varua o te Atua, o to ˈna ïa puai. Mai te peu e e faaitehia mai oia i te tahi taime, ma te taa ê maitai i te Atua, no te mea ïa te ohipa ra te aho o Yahweh i rapaeau mai ia ˈna.” Te na ô râ taua buka nei e: “Te faataa maira te rahiraa o te mau irava o te F[aufaa] A[pî] i te varua moˈa o te Atua mai te hoê taoˈa, eiaha râ mai te hoê taata; e papu-maitai-hia te faaauraa i haamauhia i rotopu i te varua e te puai o te Atua.”
22 Te haapapu maitai maira te mau parau atoa ta tatou i hiˈopoa aˈenei e e haapiiraa hape te Torutahi, taua haapiiraa “tumu” ra a te amuiraa faaroo kerisetiano. Mea maramarama maitai te Parau a te Atua no nia i taua tumu parau ra. Te faaite maira hoi oia e e Metua here te Atua ra o Iehova e o Iesu Mesia, o ta ˈna ïa Tamaiti here, te hoê Tamaiti, i te mea e mea here roa na ˈna i to ˈna Metua, tei ineine i te auraro atu ia ˈna e tae roa ˈtu i te pohe. Teie râ, te vai ra te tahi mau taata e faahua parau nei e, te turu ra te tahi mau irava o te mau Papai i te Torutahi; e tuatapapa ïa tatou vetahi o taua mau irava nei i roto i te tumu parau i mua nei. E ite atoa ˈtu tatou e no te aha râ taua haapiiraa ra i riro mai ai ei haapiiraa faufaa roa no te amuiraa faaroo kerisetiano e no hea mai taua haapiiraa ra.
Nafea outou ia pahono mai?
Eaha ta te Bibilia e haapii maira no nia i te Atua e no nia ia Iesu?
Ia au i te mau Papai, eaha te auraa e tahoê ra i te Metua e te Tamaiti?
A faahiti mai na i te tahi mau irava bibilia e faaite mai e e rahi aˈe te Atua ia Iesu.
No te aha e ore ai e nehenehe e parau e e tuhaa te varua moˈa no te hoê torutahi?
[Hohoˈa i te api 13]
Ua parau hoi o Iesu e: “E rahi hoi tau Metua ia ˈu.”