Te mau maitai aore ra te mau ino—A maiti!
“Ua tuu vau i te ora e te pohe, i te maitai e te ino i mua ia oe; e tena na, a rave i te ora ia ora oe.”—DEUTERONOMI 30:19.
1. Ua horoahia i te taata i teihea aravihi?
NA TE Atua ra o Iehova i hamani ia tatou—ta ˈna mau poieteraa maramarama—ei taata tiamâ i te pae morare. Aita tatou i hamanihia mai te mau matini noa ra te huru, mai te mau taata râ e fanaˈo ra i te haamaitairaa taa ê e te tiaraa e maiti. (Salamo 100:3) E tiamâraa to na taata matamua—Adamu raua Eva—ia maiti i to raua haerea, e e hopoia ta raua i mua i te Atua no ta raua maitiraa.
2. Eaha te maitiraa ta Adamu i rave, e eaha te faahopearaa?
2 Ua horoa mai te Poiete no te oraraa o te taata e rave rahi maitai mure ore i roto i te paradaiso i nia i te fenua nei. No te aha aita teie tapao i naeahia ˈtura? No te mea ua rave Adamu i te maitiraa hape. Ua faaue Iehova i te taata ra e: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:16, 17) Ahiri Adamu i maiti i te auraro, e haamaitaihia ïa to tatou na metua matamua. Ua afai mai te auraro-ore-raa i te pohe. (Genese 3:6, 18, 19) No reira, ua naeahia te taatoaraa o te huaai a Adamu i te hara e te pohe.—Roma 5:12.
E nehenehe e fanaˈo i te mau maitai
3. Mea nafea to te Atua haapapuraa mai e e tupu mau â ta ˈna opuaraa no te huitaata nei?
3 Ua faanaho te Atua ra o Iehova i te hoê ravea e tupu roa ˈi ta ˈna opuaraa e haamaitai i te huitaata nei. Ua faaite atea mai o ˈna iho i te hoê Huaai, ia ˈna i tohu i Edene ra: “E tuu hoi au i te au ore e riri ai ra ia orua o te vahine, e to huaai, e to ˈna ra huaai; na ˈna e haaparuparu i to afii, e na oe e haaparuparu i to ˈna poro avae.” (Genese 3:15) I muri iho, ua tǎpǔ te Atua e e niniihia mai taua mau maitai ra i nia i te huitaata auraro na roto i te arai o teie Huaai, te hoê tamarii a Aberahama.—Genese 22:15-18.
4. Eaha te faanahoraa ta Iehova i rave e maitaihia ˈi te huitaata nei?
4 O Iesu Mesia taua Huaai ra no te haamaitairaa i tǎpǔhia mai. No nia i te tiaraa o Iesu i roto i te faanahoraa a Iehova e haamaitai i te huitaata nei, teie ta te aposetolo kerisetiano ra o Paulo i papai: “Ua faarahi . . . te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou nei.” (Roma 5:8) Te feia hara e auraro ra i te Atua e e haafaufaa ra i te tusia taraehara o Iesu Mesia, o ratou te fanaˈo i te mau maitai. (Ohipa 4:12) E maiti anei outou i te auraro e te mau maitai? Te auraro-ore-raa, mea taa ê roa te faahopearaa.
Eaha ïa no nia i te mau ino?
5. Eaha te auraa o te taˈo ra “ino”?
5 Mea taa ê roa te ino i te maitai. Te auraa o te taˈo ra “ino” oia hoi o te faainoraa ïa i te tahi taata aore ra o te faahitiraa i te ino i nia ia ˈna. No roto mai te taˈo Hebera qela·lahʹ i te ihoparau tumu ra qa·lalʹ, teie hoi te auraa mau “ia mâmâ.” Ia faaohipahia râ oia i roto i te hoê auraa taipe, teie ïa te auraa e “pii i te ino i nia” aore ra e “haavahavaha.”—Levitiko 20:9, MN; Samuela 2, 19:43, MN.
6. Eaha te ohipa tei tupu i nia ia Elisaia i pihai iho ia Betela i tahito ra?
6 A rave na i te hoê hiˈoraa peapea o te hoê ino tei tupu oioi. Ua tupu te reira i to te peropheta a te Atua ra o Elisaia haereraa mai Ieriko i Betela. Te na ô ra te aamu e: “E te haere noa ra oia i nia na te eˈatia ra, ua haere maira te tamarii mai roto mai i te oire; e ua tâhitohito maira ia ˈna, na ô maira ia ˈna, A haere atoa i nia, e tena na upoo pahure; a haere atoa i nia, e tena na upoo pahure e. Ua fariu aˈera oia i muri, ua hiˈo atura ia ratou, e ua katara ˈtura i te iˈoa o Iehova. Ua haere maira na daba e piti mai roto mai i te vahi ururaau, haehaea-noa-hia ihora taua mau tamarii e maha ahuru ma piti ra.” (Te mau arii 2, 2:23, 24) Aita i faaite-maitai-hia eaha ta Elisaia i parau ia ˈna i katara aore ra i pii i te ino i nia i taua mau tamarii tâhitohito ra. Teie râ, ua tupu mau taua parau i faahitihia ra no te mea ua faahitihia te reira na roto i te iˈoa o Iehova e te hoê peropheta o tei ohipa ia au i te hinaaro o te Atua.
7. Eaha te ohipa i tupu i nia i te mau tamarii tei tâhitohito ia Elisaia, e no te aha?
7 Te tumu rahi i tâhitohitohia ˈi oia, e au ra e no te mea ua oomo Elisaia i te ahu toroa o Elia, e aita te mau tamarii i hinaaro e ia mono mai te tahi taata i taua peropheta ra. (Te mau arii 2, 2:13) No te faaruru i te tautooraa e riro ei mono no Elia e no te haapii i teie mau tamarii e to ratou mau metua ia faatura ma te tano i te peropheta a Iehova, ua pii Elisaia i te ino i nia i teie mau tamarii tâhitohito na roto i te iˈoa o te Atua ra o Elia. Ua faaite Iehova e ua farii oia ia Elisaia ei peropheta na ˈna na roto i te faahaereraa mai e piti daba mai roto mai i te ururaau e te hahaeraa i na tamarii tâhitohito e 42. Ua ohipa mau â Iehova no te mea ua ere-rahi-hia ratou i te faatura i te auvaha ta ˈna i faaohipa na i nia i te fenua i taua tau ra.
8. Eaha ta te nunaa Iseraela i farii e rave, e eaha ïa ta ratou e fanaˈo?
8 Tau matahiti na mua ˈˈe, ua faaite atoa te mau ati Iseraela i te hoê â huru ereraa i te faatura i te mau faanahoraa a te Atua. Mai teie te huru tupuraa: I te matahiti 1513 hou to tatou tau, ua faaite atu Iehova i te nunaa Iseraela i to ˈna farii maitai na roto i te faaoraraa mai ia ratou i te faatîtîraa a to Aiphiti mai “na nia i te pererau aeto ra” te huru. I muri noa ˈˈe, ua euhe ratou e e auraro ratou i te Atua. A tapao na e ua taai-roa-hia te auraroraa i te fanaˈoraa i te farii maitai a te Atua. Teie ta Iehova i parau na roto i te arai o Mose e: “Ia faaroo mau mai outou i tau reo, e ia haapao maite i ta ˈu ra faufaa, e riro ïa outou ei taoˈa here rahi na ˈu i te mau taata atoa ra. No ˈu noa iho hoi to te ao atoa nei.” I muri iho, ua farii te nunaa i teie mau parau ia ratou i na ô e: “Te mau parau atoa ta Iehova i parau, e rave ïa matou.” (Exodo 19:4, 5, 8; 24:3) Ua parau te mau ati Iseraela e e here ratou ia Iehova, ua pûpû ratou ia ratou no ˈna, e ua euhe e e faaroo ratou i to ˈna reo. E fanaˈo rahi ïa ratou i te mau maitai ia na reira ratou.
9, 10. A vai ai Mose i nia i te Mouˈa Sinai ra, eaha ta te mau ati Iseraela i rave, e eaha te mau faahopearaa?
9 Tera râ, hou te mau haapiiraa tumu o taua faaauraa a ootihia ˈi i nia i te ofai e te “rima o te Atua,” ua titauhia ia faataehia mai te ino no ǒ mai i te Atua ra. (Exodo 31:18) No te aha i titauhia ˈi teie mau faahopearaa iino? Aita anei te mau ati Iseraela i faaite i to ratou hinaaro e rave i te mau parau atoa ta Iehova i faaue? Oia, na roto i te parau ua ani ratou i te mau maitai, tera râ, na roto i ta ratou mau ohipa ua maiti ratou i te hoê haerea o tei titau i te mau ino.
10 I te hoê roaraa e 40 mahana, tei nia hoi Mose i te Mouˈa Sinai ra i horoahia mai ai ia ˈna ra na Ture Ahuru, ua ofati te mau ati Iseraela i ta ratou parau i tǎpǔ na mua ˈˈe e ore ratou e taiva ia Iehova. Te na ô ra te aamu e: “Ite aˈera râ te mau taata e, ua maoro Mose, aita i haere mai i raro mai nia mai i taua mouˈa ra, ua tairuru maira taua mau taata ia Aarona ra, ua na ô maira ia ˈna, Ahiri, a hamani i te atua no tatou ei na mua ia tatou nei; area o Mose, o te taata i aratai mai ia tatou mai Aiphiti maira, aore tatou i ite i to ˈna haerea.” (Exodo 32:1) Teie ïa te tahi atu hiˈoraa o te hoê huru auraro ore i nia i te arai taata ta Iehova i faaohipa i taua tau ra no te aratai e no te faatere i to ˈna nunaa. Ua hema te mau ati Iseraela i roto i te haamoriraa idolo a to Aiphiti e ua ite ratou i te mau faahopearaa iino i te haapoheraahia te tahi 3 000 taata i rotopu ia ratou e te ˈoˈe i te hoê noa mahana.—Exodo 32:2-6, 25-29.
Faahitiraa i te mau maitai e te mau ino
11. Eaha te mau faaueraa no nia i te mau maitai e te mau ino i faaohipahia e Iosua?
11 A fatata ˈi te hope te tere o Iseraela e 40 matahiti i roto i te medebara, ua faataa maitai Mose i te mau maitai e itehia na roto i te maitiraa i te hoê haerea auraro i te Atua. Ua faahiti atoa oia i te mau ino e nehenehe e roohia e te mau ati Iseraela ia maiti anaˈe ratou e faaroo ore ia Iehova. (Deuteronomi 27:11–28:10) I muri noa ˈˈe to Iseraela tomoraa i roto i te Fenua i Tǎpǔhia mai, ua faaohipa Iosua i te mau faaueraa a Mose no nia i teie mau maitai e teie mau ino. E ono opu no Iseraela tei tia i raro i te Mouˈa Ebala ra, e e ono ê atu i mua i te Mouˈa Gerezima ra. O te mau ati Levi ïa te tia i ropu i roto i te peho. E au ra e, e parau te mau opu i mua i te Mouˈa Ebala ra “Amene” ia taiohia te mau ino, aore ra te mau katara i mua ia ratou. Na vetahi ê ïa e pahono i te mau maitai i taiohia e te mau ati Levi i mua ia ratou i raro i te Mouˈa Gerezima ra.—Iosua 8:30-35.
12. Eaha vetahi mau ino tei faahitihia e te mau ati Levi?
12 A feruri na e te faaroo ra outou i te parauraa te mau ati Levi e: “Ia katarahia te taata i hamani i te idolo tarai e te faatôhia ra, i te mea faufau na Iehova ra, e ohipa na te rima o te feia tahuˈa ra, e ua faatia aˈera i nia i te vahi moe ra. . . . Ia katarahia tei faaino i tana metua tane, e tana metua vahine. . . . Ia katarahia te hopoi ê i te tapao fenua a tana taeae. . . . Ia katarahia te faahahi ê i te matapo i te eˈatia ra. . . . Ia katarahia te ruri ê i te parau-tia i te taata ê, e te otare, e te vahine ivi ra. . . . Ia katarahia te taoto i te vahine a tana metua tane ra; no te mea, ua heheu oia i te ahu o tana metua tane. . . . Ia katarahia te rave i te manu ra. . . . Ia katarahia te rave i to ˈna ihora tuahine, i te tamahine a tana metua tane, e te tamahine a tana metua vahine. . . . Ia katarahia te rave i te vahine a to ˈna ra metua tane. . . . Ia katarahia te taparahi huna noa i tana taeae. . . . Ia katarahia te rave i te tarahu e taparahi i te taata hara ore ra. . . . Ia katarahia tei ore e haapao tamau i te mau parau atoa i roto i teie nei ture.” I muri aˈe i te faahitiraahia te ino tataitahi, e parau te mau opu i mua i te Mouˈa Ebala ra e, “Amene.”—Deuteronomi 27:15-26.
13. Na roto i ta outou iho mau parau, nafea outou ia faahiti i vetahi mau maitai i faahitihia e te mau ati Levi?
13 A feruri na i teie nei e te faaroo ra outou i te pahonoraa puai a te mau opu i mua i te Mouˈa Gerezima ra i te maitai tataitahi i taiohia mai e te mau ati Levi: “E maitai oe i roto i te oire, e maitai oe i rapae. E maitai oe i ta oe e fanau, e tei tupu i to oe ra fenua; e ta to mau puaa e fanau ra; e te rahiraa o to mau puaatoro, e to mau nǎnǎ mamoe ra. E maitai ta oe ete maa, e ta oe oˈiraa faraoa. E maitai oe ia haere mai i roto, e maitai oe ia haere i rapae.”—Deuteronomi 28:3-6.
14. I nia i teihea niu e fanaˈo ai te mau ati Iseraela i te mau maitai?
14 I nia i teihea niu e fanaˈohia ˈi teie mau maitai? Te na ô ra te aamu e: “Ia tia ia oe i te faaroo i te reo o to Atua ra o Iehova, e i te rave e te haapao i te mau parau atoa ta ˈu e parau atu ia oe i teie nei mahana, e faateitei rahi to Atua ra o Iehova ia oe i reira, i te mau fenua atoa o te ao nei: e e iri atoa teie atoa nei mau maitai i nia ia oe, e e vai mau â ia oe, ia faaroo oe i te reo o to Atua ra o Iehova.” (Deuteronomi 28:1, 2) E, te tuhaa faufaa roa e fanaˈohia ˈi te mau maitai no ǒ mai i te Atua ra, o te auraroraa ïa ia ˈna. Eaha râ ïa no tatou i teie mahana? E maiti anei tatou tataitahi i te mau maitai e te ora na roto i te tamauraa i te ‘faaroo i te reo o Iehova’?—Deuteronomi 30:19, 20.
Te hiˈopoa-maite-raa
15. Eaha te manaˈo faufaa e matara ra i roto i te maitai i faahitihia i roto i te Deuteronomi 28:3, e mea nafea tatou e faufaahia ˈi i te reira?
15 E feruri anaˈe na tatou i nia i te tahi mau maitai o ta te hoê ati Iseraela e nehenehe e fanaˈo no to ˈna auraroraa ia Iehova. Ei hiˈoraa, te na ô ra te Deuteronomi 28:3 e: “E maitai oe i roto i te oire, e maitai oe i rapae.” Aita te maitai no ǒ mai i te Atua ra i taaihia e te tahi vahi aore ra hopoia. E nehenehe vetahi e hema i roto i to ratou iho huru tupuraa, peneiaˈe no te mea te ora ra ratou i te tuhaa fenua i faainohia i te pae materia aore ra i te hoê fenua amahamaha i te tamaˈi. Te hinaaro ra paha vetahi e tavini ia Iehova i te tahi atu vahi. E nehenehe vetahi mau tane kerisetiano e haaparuparu no te mea aita ratou i nominohia ei tavini tauturu aore ra ei matahiapo i roto i te amuiraa. I te tahi taime, e nehenehe te mau vahine kerisetiano e toaruaru no te mea eita ta ratou e nehenehe e rave i te taviniraa ma te taime taatoa ei pionie aore ra ei mitionare. Tera râ, te taata e ‘faaroo i te reo o Iehova e e haapao maitai i te mau mea atoa ta ˈna e titau ra,’ e maitaihia ïa o ˈna i teie nei e a muri noa ˈtu.
16. Mea nafea te tupuraa te faaueraa tumu a te Deuteronomi 28:4 i nia i te faanahonahoraa a Iehova i teie mahana?
16 Te na ô ra te Deuteronomi 28:4 e: “E maitai oe i ta oe e fanau, e tei tupu i to oe ra fenua; e ta to mau puaa e fanau ra; e te rahiraa o to mau puaatoro, e to mau nǎnǎ mamoe ra.” Te faaite ra te mono iˈoa Hebera i hurihia na roto i te taˈo ra “oe” e e tupuraa teie o ta te hoê ati Iseraela iho e farerei. Eaha ïa no te mau tavini auraro a Iehova i teie mahana? Ua riro te maraaraa e te parare-noa-raa ati aˈe te ao nei i roto i te faanahonahoraa a te mau Ite no Iehova, ei haapapuraa e te haamaitai ra te Atua i te mau tutavaraa tuutuu ore o na hau atu i te 5 000 000 taata poro o te parau apî maitai o te Basileia. (Mareko 13:10) Te ite-atoa-hia ra te faito o te maraaraa rahi roa ˈˈe i te putuputuraa mai na hau atu i te 13 000 000 taata i te oroa Amuraa maa Ahiahi a te Fatu i te matahiti 1995. Te fanaˈo ra anei outou i te mau maitai o te Basileia?
Te taa-ê-raa ia au i te maitiraa a Iseraela
17. E “vai â i nia” ia outou te mau maitai aore ra te mau ino, ua niuhia ïa i nia i te aha?
17 Oia mau, e vai noa te mau maitai i nia i te hoê ati Iseraela auraro. Teie tei tǎpǔhia: “E iri atoa teie atoa nei mau maitai i nia ia oe, e e vai mau â ia oe.” (Deuteronomi 28:2) Oia atoa no te mau ino i te na ôraahia e: “E iri mai teie atoa nei mau ino i nia ia oe, e e vai â i nia ia oe ra.” (Deuteronomi 28:15) Ahiri e e ati Iseraela outou i mutaa ihora, eaha te “vai â i nia” ia outou, te mau maitai anei aore ra te mau ino? E taaihia te reira i nia i to outou auraro aore ra to outou auraro ore i te Atua.
18. Nafea te mau ati Iseraela e nehenehe ai e ape i te mau ino?
18 I te Deuteronomi 28:15-68, te faataahia ra te mau faahopearaa mauiui o te auraro-ore-raa mai te mau ino. Mea taa ê roa te reira i te mau maitai e fanaˈohia no te auraroraa faahitihia i roto i te Deuteronomi 28:3-14. Ua farerei pinepine te nunaa Iseraela i te mau faahopearaa o te mau ino no to ratou maitiraa e faaô i roto i te haamoriraa hape. (Ezera 9:7; Ieremia 6:6-8; 44:2-6) Auê ïa ati e! E nehenehe teie mau faahopearaa iino e apehia na roto i te raveraa i te maitiraa tia, oia hoi te auraroraa i te mau ture e te mau faaueraa tumu moˈa a Iehova, o te faataa maitai ra i te mea maitai e te mea ino. E rave rahi o te faaruru ra i teie mahana i te mauiui e te ati no te mea ua maiti ratou i te ofati i te mau faaueraa tumu a te Bibilia na roto i te faaôraa i roto i te haapaoraa hape, te peu taiata, te raau taero opanihia e te ture, te inu-hua-raa i te ava, e vetahi atu â mau mea mai teie te huru. Mai te tau o Iseraela e o Iuda, e faatupu te raveraa i te mau maitiraa hape i te au-ore-raa o te Atua e te mauiui faufaa ore o te mafatu.—Isaia 65:12-14.
19. A faataa mai na i te huru tupuraa i fanaˈohia a maiti ai Iuda e Iseraela e auraro ia Iehova.
19 Ua itehia te mau maitai rahi e te hau ia auraro anaˈe Iseraela ia Iehova. Ei hiˈoraa, no nia i te tau o te Arii ra o Solomona, teie ta tatou e taio ra: “O Iuda e o Iseraela e feia rahi ïa, mai te one tahatai ra ïa i te rahi, i te amuraa e te inuraa e te faaarearearaa ia ratou. . . . Parahi noa ihora Iuda raua o Iseraela ma te hau, o te taata atoa i raro aˈe i ta ˈna vine e ta ˈna suke, mai Dana mai e tae noa ˈtura i Bere-seba, e hope roa aˈera to Solomona anotau.” (Te mau arii 1, 4:20-25) I te tau atoa o te Arii ra o Davida, ua uˈana te patoiraa a te mau enemi o te Atua, ua turu e ua haamaitai Iehova i te nunaa ia maiti ratou i te auraro i te Atua o te parau mau.—Samuela 2, 7:28, 29; 8:1-15.
20. Eaha ta te Atua e tiaturi nei no nia i te mau taata?
20 E auraro anei outou i te Atua, aore ra e faaroo ore outou ia ˈna? E nehenehe ta te mau ati Iseraela e maiti. Noa ˈtu e ua naeahia tatou pauroa i te hara a Adamu, ua hôhia mai ia tatou atoa te ô e maiti. Noa ˈtu Satani, teie ao ino, e to tatou huru tia ore, e nehenehe ta tatou e rave i te maitiraa tia. Hau atu â, te tiaturi nei to tatou Poiete e noa ˈtu te mau tamataraa e te mau faahemaraa atoa, te vai ra te feia e rave i te maitiraa tia, eiaha ma te parau noa, ma te ohipa atoa râ. (Petero 1, 5:8-10) Tei rotopu atoa anei outou ia ratou?
21. Eaha te tuatapapahia i roto i te tumu parau i mua nei?
21 I roto i te tumu parau i mua nei, e nehenehe ta tatou e hiˈopoa maitai i to tatou huru e ta tatou mau ohipa ia au i te mau hiˈoraa no mutaa ihora. E pahono anaˈe ïa tatou tataitahi ma te aau mehara i te mau parau ta te Atua i faahiti na roto i te arai o Mose: “Ua tuu vau i te ora e te pohe, i te maitai e te ino i mua ia oe; e tena na, a rave i te ora ia ora oe.”—Deuteronomi 30:19.
Nafea outou ia pahono mai?
◻ Eaha te faanahoraa ta Iehova i rave e fanaˈo ai te mau taata hara i te mau maitai?
◻ Eaha te mau ino?
◻ Nafea te mau ati Iseraela e fanaˈo ai i te mau maitai eiaha râ te mau ino?
◻ Eaha te mau maitai i fanaˈohia e Iseraela no to ˈna auraro i te Atua?
[Hohoˈa i te api 15]
Te mau ati Iseraela i mua i te Mouˈa Gerezima e te Mouˈa Ebala
[Faaiteraa i te tumu]
Pictorial Archive (Near Eastern History) Est.