Nafea ia oaoa i te faariroraa i te taata ei pǐpǐ

HOÊ o te mau oaoa hohonu roa ˈˈe e fanaˈohia e te hoê taata, o te riroraa ïa ei hoa ohipa na te Atua. I teie mahana, te ohipa a te Atua, o te haaputuraa mai ïa i te feia aau tia i roto i te amuiraa kerisetiano e te faaineineraa ia ratou no te ora ei kerisetiano i teie nei e no te ora ˈtu i roto i te hoê ao apî.—Mika 4:1-4; Mataio 28:19, 20; Petero 2, 3:13.

Ua oaoa mau â te mau Ite no Iehova no Marite Latino i te iteraa i te hoê mirioni taata i te riroraa mai ei mau pǐpǐ na Iesu Mesia mai te matahiti 1980 mai â. I roto i teie aua hotu mau, i reira mea faatura e mea tiaturi atoa te taata i te Bibilia, ua manuïa te tahi mau tavini ma te taime taatoa i te tauturu i te mau tatini taata ia pûpû i to ratou ora no Iehova. Maoti teie mau ohipa atoa i farereihia e ratou, peneiaˈe e nehenehe ratou e horoa mai i te tahi manaˈo no nia i te oaoa i te faariroraa i te taata ei pǐpǐ. E riro to ratou mau manaˈo i te tauturu ia outou ia oaoa i te faariroraa i te taata ei pǐpǐ i te vahi o ta outou e faaea ra.

Te iteraa e e “mamoe” paha tera

Ia ˈna i tono i ta ˈna mau aposetolo no te poro, ua parau o Iesu e: “E te oire e te oire iti ta outou e tomo ra, e ui atu i to reira taata au.” (Mataio 10:11) Ia haere outou e farerei i te taata, nafea outou ia ite e tera te feia e nehenehe e tauturuhia i te pae varua? Te na ô ra o Edward, hau atu i te 50 matahiti to ˈna taviniraa ma te taime taatoa, e: “E itehia ratou na roto i to ratou aniraa i te mau uiraa haavare ore e to ratou mauruuru ia horoahia ˈtu te mau pahonoraa no roto mai i te mau Papai.” Te na ô atoa ra o Carol e: “Ia faaite mai te hoê taata i te tahi fifi aore ra te tahi haapeapearaa to ˈna, te taparu maira ïa oia e ia tauturuhia oia. E tamata vau i te imi i te mau haamaramaramaraa e tano i roto i te mau papai a te Taiete Watch Tower. E faatupu pinepine teie anaanatae i te taata iho i te hoê haapiiraa bibilia.” Teie râ, e ere noa i te mea ohie ia ite i te feia aau haavare ore. Te faatia ra o Luis e: “Te feia i manaˈohia e mea anaanatae roa ratou, aita roa ratou i anaanatae i te pae hopea, area te feia patoi roa i te omuaraa ra, ua taui ratou i to ratou faarooraa eaha mau na ta te Bibilia e parau ra.” I te mea e e rave rahi mau marite latino o te faatura nei i te Bibilia, te na ô faahou ra oia, “E ite au i te feia e nehenehe e tauturuhia i te pae varua, ia farii oioi ratou i ta te Bibilia e haapii ra ia faaite atu vau ia ratou.” E faatupu te tautururaa i teie feia “au” ia haere i mua i te pae varua, i te oaoa e te mauruuru mau. Nafea outou ia tauturu ia ratou?

A haamata i te mau haapiiraa bibilia

Mea pinepine, te ravea maitai aˈe no te tauturu i te mau taata ia taa i te parau mau bibilia, o te faaohiparaa ïa i te mau ravea tauturu no te haapii i te Bibilia faanahohia e “te tavini haapao maitai e te paari.” (Mataio 24:45) Nafea outou ia faarahi atu â i te mauruuru no te faufaa o teie mau ravea tauturu no te haapii i te Bibilia? Te na ô ra o Edward e: “I te mea e e taa ê te huru tupuraa, te ihotaata, e te manaˈo ia au i te taata, te tamata nei au i te faaau ia ˈu iho ia au i to ratou huru ia haamata anaˈe au i te mau haapiiraa.” Eita outou e nehenehe e faaohipa i te hoê â huru raveraa e te mau taata atoa.

E vetahi mau taata, e titauhia paha ia faatupu e rave rahi mau aparauraa no nia i te mau Papai hou e faaite atu ai i te hoê buka no te haapii i te Bibilia. Noa ˈtu râ, te na ô ra te hoê mitionare e ta ˈna vahine e: “E pinepine mâua i te pûpû i te hoê haapiiraa i te farereiraa matamua.” Oia atoa, te parau ra te hoê Ite o tei tauturu e 55 taata ia pûpû ia ratou iho no Iehova e: “Ta ˈu ravea matamua no te haamata i te mau haapiiraa bibilia, o te haamataraa ïa i reira iho i te haapii i te buka E nehenehe oe e ora e a muri noa ˈtu i roto i te paradaiso i nia i te fenua nei.” Noa ˈtu e e mea au ore roa na vetahi pae te manaˈo e haapii i te tahi mea, ua ineine vetahi atu i te haapii i te mau mea atoa e nehenehe e tauturu ia ratou i roto i te oraraa. E pinepine te pûpûraa i te mau haapiiraa bibilia tamoni ore i to ratou iho fare i te faaara i te anaanatae o teie feia. E faataa ˈtu vetahi mau mitionare i teie pûpûraa a parau atu ai e: “E faaite noa ˈtu vau ia oe i ta matou huru raveraa. Mai te peu e e anaanatae oe, e nehenehe oe e tamau i te haapii. Mai te peu e eita ra, na oe e maiti.” Ia pûpûhia mai te reira te huru, eita te mau taata e mǎtaˈu i te farii.

Te na ô ra te tahi atu Ite, o tei tauturu e rave rahi mau taata navai ore e o tei ore i haere maoro i te haapiiraa, e: “Ta ˈu i ite, e mea tano roa te mau api parau iti no te haamata i te mau haapiiraa bibilia.” Noa ˈtu eaha te papai o ta ratou e faaohipa, te tamata nei te feia haapii i te taata ma te taime taatoa i te tuu i te tapao faufaa roa ˈˈe i nia i te Bibilia. Te na ô ra o Carola e: “I te haapiiraa matamua, e faaohipa noa vau i te mau hohoˈa e peneiaˈe e pae irava, ia matara te mau manaˈo matamua e ia ite te taata e ere te Bibilia i te mea fifi roa.”

A tamau noa i te faaara i te anaanatae

Mea oaoa roa na te taata ia ite e te haere ra ratou i mua, no reira, te faaitoito ra o Jennifer e: “A faaoraora i te haapiiraa. A haere i mua.” E tauturu atoa te faatere-tamau-raa i te haapiiraa ma te ore e mairi i te hebedoma ia ratou ia ite e te haere ra ratou i mua. Te faataa ra te hoê pionie taa ê o tei paari i te mataeinaa, i te faufaaraa ia faaohie noa i te mau tatararaa e ia haamatara i te mau manaˈo faufaa roa ˈˈe, ia nehenehe atoa te feia o tei ore i haere maoro i te haapiiraa e haere i mua. Te na ô ra oia e: “I to ˈu oire iti, e tia ia pîpî i te repo e maa pape iti noa i muri aˈe i te ueueraa i te huero. Ia rahi roa anaˈe te pape, e paari roa te repo e eita ˈtura te huero e nehenehe e oteo, e e pohe oia. Hoê â huru, mai te peu e e rahi roa te mau manaˈo o ta oe e pîpî i nia i te feia anaanatae apî, e mea fifi roa ïa no ratou e e faaea ratou i ta ratou haapiiraa.” E tia atoa i te feia feruriraa vitiviti ia haapii i te haamau i to ratou feruriraa i nia i te hoê tumu parau i te hoê taime, ia hinaaro ratou e haere i mua i te pae no te maramarama. Ua parau o Iesu i ta ˈna mau aposetolo e: “E rave rahi â ta ˈu parau ia parau atu ia outou, eita râ e tia ia outou i teie nei.”—Ioane 16:12.

Te tahi atu ravea no te faaara noa i te anaanatae, o te faaitoitoraa ïa i te feia o ta outou e farerei ra ia tamau noa i te feruri i te Parau a te Atua i muri aˈe i to outou revaraa. Te faaitoito ra o Yolanda e: “A vaiiho i te tahi uiraa pahono-ore-hia. A horoa i te tahi ohipa na ratou, mai te taioraa i te tahi mau irava i roto i te Bibilia aore ra te maimiraa no nia i te hoê tumu parau e tano no ratou.”

Te faatupuraa i te here no Iehova

E rahi atu to outou oaoa ia tauturu outou i te feia o ta outou e haapii ra ia riro ‘ei feia rave i te parau, eiaha ei feia faaroo noa.’ (Iakobo 1:22) Nafea ïa? Na te here no Iehova e turai i te mau kerisetiano mau. Te faataa ra o Pedro, no Mexico oia, e: “Eita te taata e nehenehe e here i te hoê taata o ta ratou i ore i matau, no reira, i te omuaraa iho o te haapiiraa, e haapii au ia ratou i te iˈoa o te Atua i roto i te Bibilia, e e imi au i te ravea no te haamatara i te mau huru maitatai o Iehova.” I roto i te tauaparauraa, e nehenehe outou e faarahi i te mauruuru no Iehova na roto i te faaiteraa i to outou iho huru no nia ia ˈna. Te na ô ra o Elizabeth e: “E tamata noa vau i te faahiti i te maitai o Iehova. I roto i ta ˈu mau haapiiraa, mai te peu e e ite au i te hoê tiare haviti, te hoê manu nehenehe, aore ra te hoê fanauˈa mîmî e hauti ra, e faahiti iho â vau e na Iehova i poiete i te reira.” Te na ô ra o Jennifer e: “A faahiti i te ao apî i tǎpǔhia mai e te Atua mai te hoê mea mau o ta outou iho e tiaturi ra. A ani eaha ta ratou e hinaaro ra e rave i roto i te ao apî.”

Ia feruri hohonu te hoê taata ma te mauruuru i nia i te mea o ta ˈna e haapii ra no nia ia Iehova, e aa hohonu roa te reira i roto i to ˈna mafatu e e turai atoa ia ˈna ia ohipa. Eita râ oia e nehenehe e feruri hohonu mai te peu e eita oia e haamanaˈo. E riro te hiˈopoa-faahou-raa poto noa e toru aore ra e maha manaˈo matamua i muri aˈe i te haapiiraa taitahi, ei tautururaa i te taata ia haamanaˈo. E rave rahi feia haapii i te taata i te Bibilia o te ani nei i te feia apî ia papai i te tahi mau irava faufaa e te tahi nota i te api hopea o ta ratou Bibilia. Te faataa ra te hoê mitionare no Beretane i te tahi atu vahi maitai o te mau hiˈopoa-faahou-raa: “E ani au e mea nafea to ratou faufaaraahia i te mea o ta ratou i haapii. E turai te reira ia ratou ia feruri ma te mauruuru i nia i te mau eˈa e te mau ture a Iehova.”

Te na ô ra te hoê Ite haapao maitai o tei faatuitehia i te toru o te pǔpǔ haapiiraa no Gileada e: “E tia ia faaite i te aau tae. E tia i te feia o ta tatou e haapii ra ia ite e te tiaturi ra tatou i te mea o ta tatou e haapii ra.” E nehenehe te faaroo o tei faariro ia outou ei taata ‘rave i te parau’ oaoa e pee i nia ia vetahi ê mai te peu e e faaite hua outou i te reira.—Iakobo 1:25.

“Te ite nei au e e piri roa ˈtu â te taata i te Atua mai te peu e e tauturu vau ia ratou ia ite i te pahonoraa i ta ratou mau pure,” o te parau ïa a te hoê Ite o tei tauturu e rave rahi mau taata ia haamori ia Iehova. “E horoa ˈtu vau i te mau hiˈoraa o ta ˈu iho i farerei, mai teie: I to mâua to ˈu hoa pionie tapaeraa i ta mâua tuhaa taviniraa apî ei mau pionie, e maa pota iti noa ta mâua, e te hoê puohu pata, e aita ta mâua e moni. A paia ˈi mâua i tera ra po, ua na ô atura mâua, ‘Aita ta tâua maa no ananahi.’ Ua pure ihora mâua no te reira, e haere atura e taoto. I te poipoi aˈe, ua haere maira te hoê Ite no taua vahi ra, faaite maira i to ˈna iˈoa, ma te parau e, ‘Ua pure au ia Iehova ia tono mai i te mau pionie. I teie nei, e nehenehe au e haere na muri ia orua fatata i teie mahana taatoa, tera râ, i te mea e te faaea nei au i te mataeinaa, e tamaa mai au ia orua ra i teie avatea, e ua afai mai au i te maa na tatou pauroa.’ Mea rahi roa te puaa e te pota. E parau noa vau i te feia o ta ˈu e haapii ra e eita roa o Iehova e faarue ia tatou mai te peu e e imi na mua tatou i te Basileia.”—Mataio 6:33.

A pûpû atu i te tauturu papu

Te faariroraa i te taata ei pǐpǐ no te Mesia, e ere noa ïa te faatereraa i te hoê haapiiraa bibilia. Te na ô ra te hoê mitionare o tei tavini e rave rahi matahiti ei tiaau ratere e: “A rave i te taime. Eiaha e reva oioi noa ia oti te haapiiraa. Mai te peu e e tano, a faaea e a tauaparau maa taime iti.” Te na ô ra o Elizabeth e: “E anaanatae to ˈu no ratou no te mea to ratou iho ora te haamǎtaˈuhia ra. E rave rahi taime, e haapeapea vau no ratou mai te mea e e tamarii ratou na ˈu.” Teie te mau manaˈo tauturu a te tahi mau Ite: “A haere atu e hiˈo ia ratou ia pohehia ratou i te maˈi.” “Ia topahia outou na to ratou vahi, peneiaˈe i roto i te pororaa, a haere atu e hiˈo ia ratou maa taime iti no te haamatau i te tahi mau Ite.” Te na ô ra o Eva e: “A horoa i te tariˈa faaroo no te taa i te huru oraraa o te hoê taata i mutaa ihora e i teie nei. E ohipa te reira i nia i te huru fariiraa te taata i te parau mau e e nehenehe e faataupupu i to ratou haereraa i mua. A riro ei hoa no ratou, ia ore ratou ia haamarirau i te faaite mai i to ratou mau fifi.” Te na ô atoa ra o Carol e: “E mea faufaa roa ia anaanatae mau i te taata no te mea ia taui oia i to ˈna oraraa no te parau mau, i te tahi taime, e faaruehia mai oia e to ˈna utuafare e to ˈna mau hoa. I te rahiraa o te taime, mea maitai ia ite te taata haapiihia e teihea roa to tatou faaearaa e ia ore oia ia haamarirau i te haere mai ia tatou ra noa ˈtu eaha te taime.” A tauturu ia ˈna ia faariro i te amuiraa ei utuafare fetii apî no ˈna.—Mataio 10:35; Mareko 10:29, 30.

“A ineine i te horoa i te tauturu papu. A parahi i pihai iho ia ratou i te mau putuputuraa, e a tauturu ia ratou ia haapao i ta ratou mau tamarii,” o ta Yolanda ïa e parau ra. Ua riro te faaiteraa i te feia apî nafea ia aˈo i ta ratou mau tamarii, ia haamaitai i to ratou vai-mâ-raa, ia faaineine i te mau pahonoraa no te mau putuputuraa, e ia vauvau i te mau oreroraa i te Haapiiraa no te taviniraa teotaratia, ei mau tuhaa anaˈe o te ohipa faariroraa i te taata ei pǐpǐ. Te na ô râ te tahi atu tuahine e: “E mea faufaa ia faaineine i te feia apî no te taviniraa. Ia ore teie tuhaa o te faaineineraa e haapaohia, e mǎtaˈu noa vetahi i te pororaa, e erehia ratou i to ratou oaoa i te taviniraa ia Iehova, e e ore ratou e faaoromai.” No reira, a faaineine maitai i te feia apî i roto i te pororaa na te mau fare, i roto i te mau hoˈi-faahou-raa e farerei, e i roto i te haamataraa i te mau haapiiraa bibilia. E rahi atu to outou oaoa ia ite outou i te taata ta outou e haapii ra ia haere i mua maoti ta outou tauturu e ta outou aratairaa.

A haapuai ia ratou no te faaoromai

Te faaara ra te hoê tuahine aravihi i te faariroraa i te taata ei pǐpǐ e: “Mea ohie ia faaea i te haapiiraa ia oti te taata haapiihia i te bapetizohia.” E tia i te taata haapii e te taata haapiihia ia haamanaˈo e aitâ te kerisetiano bapetizo-apî-hia i riro atura ei taata paari i te pae varua. E tiâ ia ˈna ia tupu i te rahi i roto i to ˈna faaroo, i roto i to ˈna mauruuru no te ture a te Atua, e i roto i to ˈna here no Iehova. E mea faufaa roa ia faaitoito ia ˈna ia faatupu i te mau peu maitatai i te pae no te haapiiraa tataitahi ia tamau noa oia i te haere i mua.—Timoteo 1, 4:15.

E titau paha te taata apî i te tauturu no te haere â i mua e no te riro ei melo farii popou o te taatiraa o te mau taeae. E titau paha oia i te aratairaa no te faaruru i te mau hapa a te mau taeae ia matau hau atu â oia ia ratou. (Mataio 18:15-35) E titau paha oia i te tauturu no te riro mai ei taata haapii aravihi, o te nehenehe e rave i ta ˈna iho mau maimiraa. Te faatia ra te hoê mitionare e: “Ua hinaaro te hoê vahine haapiihia i muri aˈe i te bapetizoraa e haamaitai i to ˈna aravihi no te haapii ia vetahi ê, parau mai nei oia ia ˈu e, ‘E faatere au i te hoê haapiiraa apî i te hebedoma i mua nei, tera râ, e tia ia ˈu ia faahaamanaˈo faahou i te mau pene matamua o ta ˈu i haapii. E nehenehe anei tâua e haapii faahou i teie mau pene, hoê i muri aˈe i te tahi, ia nehenehe au e tapaopao i ta oe mau tatararaa no nia i te mau irava e te mau hohoˈa, a faaohipa ˈtu ai i muri iho ia faatere au i ta ˈu iho haapiiraa?’ Ua aravihi roa oia i te haapiiraa ˈtu i te taata, inaha e maha o te feia o ta ˈna i haapii o tei bapetizohia i te hoê tairururaa.”

No te aha e mea hoona te tutavaraa e faariro i te taata ei pǐpǐ

Te na ô ra o Pamela e: “Ia faariro tatou i te taata ei pǐpǐ, e rahi atu ïa te feia arue ia Iehova. E noaa atoa te ora i te feia e farii i te parau mau. Mea au roa na ˈu ia haapii i te parau mau ia vetahi ê—e mea faahiahia mau! E ite oe i te feia haapiihia ia tupu mǎrû noa i te rahi, ia rave i te mau tauiraa i roto i to ratou oraraa e ia haapaiuma i te mau haafifiraa o te ore roa e titiaifaro ahiri e aita te varua o Iehova. E rave rahi feia e here ra ia Iehova i teie nei o tei riro ei mau hoa here roa no ˈu.”

“Ia hiˈo vau i te feia o ta ˈu i tauturu ia riro mai ei pǐpǐ,” o ta te hoê mitionare no Helemani ïa e faatia ra, “te ite nei au i te tahi mau taata mamahu roa o tei rave i te mau haereraa i mua rahi ei mau tavini a te Atua, e mea fifi roa na ˈu ia tiaturi. Te ite nei au i te mau taata o tei haapaiuma i te mau haafifiraa iti rahi, mea papu maitai e na roto i te tauturu a Iehova. Te ite nei au i te mau utuafare o tei faataa i mutaa ihora, o tei tahoê faahou i teie nei—e mau tamarii oaoa e to ratou mau metua e haapao ra i ta ratou hopoia. Te ite nei au i te mau taata o te fanaˈo nei i te mau oraraa faufaa, e arue ra ia Iehova. Tera te oaoaraa ia faariro i te taata ei pǐpǐ.”

Oia, te riroraa ei hoa rave ohipa na te Atua ra o Iehova i roto i te ohipa faariroraa i te taata ei pǐpǐ, ua riro ïa ei pu no te oaoa aita e faaauraa. Ua haapapu mai te mau ohipa i faatiahia e te mau mitionare e te mau pionie i te reira. E nehenehe atoa outou e ite i teie oaoaraa e teie mauruuru mai te peu e e faaohipa outou i te mau manaˈo tauturu e e ohipa outou ma te horoa ia outou taatoa. Ma te haamaitairaa a Iehova, e hope roa to outou oaoa.—Maseli 10:22; Korinetia 1, 15:58.