A faaohipa i te haapiiraa no te arue ia Iehova
“O tei parau i te parau no ˈna ihora, te imi ra ïa i to ˈna iho hinuhinu, o te imi râ i te hinuhinu no tei tono mai ia ˈna ra, e parau mau ta ˈna.”—IOANE 7:18.
1. Afea e nafea te haapiiraa i te haamataraa?
TE HAAPIIRAA, ua haamata ïa e rave rahi roaraa tau i teie nei. Ua haamata hoi i muri noa ˈˈe i to te Atua ra o Iehova, te Orometua e te Haapii Rahi, poieteraa i ta ˈna Tamaiti fanau tahi. (Isaia 30:20; Kolosa 1:15) E nehenehe atura ïa teie Tamaiti e haapiihia e te Orometua Rahi iho! I roto i te mau rahiraa tausani matahiti to ˈna apiti-piri-raa ˈtu e te Metua, ua fanaˈo taua Tamaiti ra—o tei piihia i muri iho o Iesu Mesia—i te hoê haapiiraa hau roa ˈˈe i te faufaa i te pae no te mau huru maitatai, te mau ohipa, e te mau opuaraa a te Atua ra o Iehova. I muri iho, i to ˈna vairaa mai ei taata i nia i te fenua nei, ua nehenehe atura o Iesu e parau e: “Aore a ˈu peu rave noa, o ta tau Metua râ i haapii mai ia ˈu ra, o ta ˈu ïa e parau nei.”—Ioane 8:28.
2-4. (a) Ia au i te pene 7 a Ioane, eaha te huru tupuraa i te taime a haere ai o Iesu i te Oroa patiaraa tiahapa i te matahiti 32 o to tatou nei tau? (b) No te aha te mau ati Iuda i hitimahuta ˈi i te aravihi o Iesu ia haapii?
2 Mea nafea to Iesu faaohiparaa i te haapiiraa o ta ˈna i fanaˈo? I te roaraa o ta ˈna taviniraa e toru matahiti e te afa i nia i te fenua nei, ua tufa oia ma te rohirohi ore i te mau mea o ta ˈna i haapii ia vetahi ê. Teie râ, te vai ra te hoê tumu matamua i roto i to ˈna feruriraa. E eaha taua tumu ra? E hiˈopoa anaˈe na i te mau parau a Iesu i roto i te pene 7 a Ioane, i reira to ˈna faataaraa e nohea roa mai e eaha te tumu o ta ˈna haapiiraa.
3 A hiˈo na i te huru tupuraa. Ua tupu ïa i te tau auhune o te matahiti 32 o to tatou nei tau, fatata e toru matahiti i muri aˈe i to Iesu bapetizoraahia. Ua haaputuputu te mau ati Iuda i Ierusalema no te Oroa patiaraa tiahapa. I roto i te mau mahana matamua o te oroa, ua atutu te parau no nia ia Iesu. I te afaraa o te oroa, ua haere maira o Iesu i te hiero e ua haamata ˈtura i te haapii. (Ioane 7:2, 10-14) Mai tei matauhia, ua haapapu o Iesu e e Orometua aravihi oia.—Mataio 13:54; Luka 4:22.
4 Te na ô ra te Ioane 7:15 e: “Ua maere ihora te ati Iuda, na ô aˈera, No hea ra te ite o teie nei taata, aore hoi oia i haapiihia?” Te taa ra anei ia outou e no te aha ratou i hitimahuta ˈi? Aita hoi o Iesu i haere i te haapiiraa a te mau rabi, no reira aore oia i haapiihia—i to ratou ïa manaˈoraa! Inaha hoi, e mea ohie roa na Iesu ia imi e ia taio i te mau tuhaa o te mau Papai Moˈa. (Luka 4:16-21) Hau atu, na teie tamuta no Galilea iho i haapii ia ratou no nia i te Ture a Mose! (Ioane 7:19-23) Nafea hoi e nehenehe ai?
5, 6. (a) Mea nafea to Iesu faataaraa i te pu o ta ˈna haapiiraa? (b) Mea nafea to Iesu faaohiparaa i to ˈna ite?
5 Ua faataa o Iesu, mai ta tatou e taio ra i roto i te mau irava 16 e 17 e: “[E] ere i ta ˈu ta ˈu e haapii nei, na ˈna râ, na tei tono mai ia ˈu nei. O tei hinaaro maite i te haapao i to ˈna ra hinaaro, e ite ïa i ta ˈu e haapii nei e na te Atua, e [ere râ] na ˈu iho.” Ua hinaaro ratou e ite e na vai i haapii ia Iesu, e ua faaite papu atu oia e, na te Atua i haapii mai ia ˈna!—Ioane 12:49; 14:10.
6 Mea nafea to Iesu faaohiparaa i to ˈna ite? Ia au i tei papaihia i roto i te Ioane 7:18, ua parau o Iesu e: “O tei parau i te parau no ˈna ihora, te imi ra ïa i to ˈna iho hinuhinu, o te imi râ i te hinuhinu no tei tono mai ia ˈna ra, e parau mau ta ˈna, aita roa e haavare o roto ia ˈna.” Auê te tano e ia faaohipa o Iesu i to ˈna ite no te faahanahana ia Iehova, “te Itehope ra”!—Ioba 37:16.
7, 8. (a) Nafea te ite ia faaohipahia? (b) Eaha na tapao matamua e maha o te hoê haapiiraa aifaito?
7 E haapiiraa faufaa roa ïa ta tatou e huti mai na roto i te hiˈoraa o Iesu—e tia ia faaohipahia te haapiiraa, eiaha no te faahanahana ia tatou iho, no te arue râ ia Iehova. Aita ˈtu ravea maitai aˈe no te faaohipa i te haapiiraa. Nafea ïa outou ia faaohipa i te haapiiraa no te arue ia Iehova?
8 Te auraa o te parau e haapii oia ïa, “e haamataro maoti te haapiiraa matauhia e te faaohiparaa e hiˈopoahia i te pae [iho â râ] o te hoê ite aravihi, te hoê ohipa, aore ra te hoê toroa.” E hiˈopoa anaˈe na i teie nei e maha tapao matamua o te hoê haapiiraa aifaito e nafea teie mau tapao tataitahi ia faaohipahia no te arue ia Iehova. E tia i te hoê haapiiraa aifaito ia tauturu ia tatou (1) ia taio maitai, (2) ia papai maitai, (3) ia tupu maitai i te pae feruriraa e i te pae morare, e (4) ia ite i te rave i te ohipa no te oraraa i te mau mahana atoa.
Te haapiiraa ia taio maitai
9. No te aha e mea faufaa ia riro ei taata taio maitai?
9 Te tapao matamua, te haapiiraa ïa ia taio maitai. No te aha e mea faufaa roa ia riro ei taata taio maitai? Te faataa ra te hoê buka parau paari (The World Book Encyclopedia) e: “O te taioraa . . . te taahiraa avae matamua no te haapiiraa e hoê o te mau ite aravihi faufaa roa ˈˈe i roto i te oraraa o te mau mahana atoa. . . . Te turu nei te feia taio aravihi i te faatupuraa i te hoê totaiete ruperupe e te hotu. I te hoê â taime, te fanaˈo nei ratou iho i te hoê oraraa î maitai e te anaanatae aˈe.”
10. Nafea te taioraa i te Parau a te Atua ia tauturu ia tatou ia fanaˈo i te hoê oraraa î maitai e te anaanatae aˈe?
10 Mai te peu e e nehenehe te taioraa i te tahi mau buka e tauturu ia tatou ia fanaˈo i “te hoê oraraa î maitai e te anaanatae aˈe,” eaha ˈtu ïa no te taioraa i te Parau a te Atua! E haamahora teie taioraa i to tatou feruriraa e to tatou mafatu no te taa i te mau manaˈo e te mau opuaraa a Iehova, e e horoa mai te papu-maitai-raa i te reira i te hoê auraa i to tatou nei oraraa. Hau atu, te na ô ra te Hebera 4:12 e, “e mea ora hoi te parau a te Atua, e te puai rahi.” Ia taio e ia feruri hohonu tatou i nia i te Parau a te Atua, e haafatata ˈtu â tatou i to ˈna Pu, e e turaihia tatou ia rave i te mau tauiraa i roto i to tatou oraraa ia rahi atu tatou i te faaoaoa ia ˈna. (Galatia 5:22, 23; Ephesia 4:22-24) E turai-atoa-hia tatou ia tufa ia vetahi ê te mau parau mau faufaa o ta tatou e taio ra. E arue teie mau ohipa atoa i te Orometua Rahi, o te Atua ra o Iehova. Papu maitai, aita ˈtu ravea maitai aˈe no te faaohipa i to tatou aravihi ia taio!
11. Eaha to roto i te hoê porotarama haapiiraa tataitahi aifaito?
11 Noa ˈtu e e taurearea tatou aore ra e taata paari, te faaitoitohia nei tatou ia haapii ia taio maitai inaha, e tuhaa faufaa roa to te taioraa i roto i to tatou oraraa kerisetiano. Taa ê atu i te taio-tamau-raa i te Parau a te Atua, i roto i te hoê porotarama haapiiraa tataitahi aifaito, te vai ra te hiˈopoaraa i te irava bibilia i roto i te buka iti E hiˈopoa anaˈe i te mau Papai i te mau mahana atoa, te tuatapaparaa i Te Pare Tiairaa e te A ara mai na!, e te faaineineraa i te mau putuputuraa kerisetiano. Eaha ïa no te taviniraa kerisetiano? Papu maitai, e titau te pororaa i mua i te taata, te hoˈi-faahou-raa e farerei i te feia anaanatae, e te faatereraa i te mau haapiiraa bibilia i te fare o te taata, e ia ite maitai tatou i te taio.
Te haapiiraa ia papai maitai
12. (a) No te aha e mea faufaa ia haapii i te papai maitai? (b) Eaha te parau faahiahia roa ˈˈe i papaihia aˈenei?
12 Te piti o te tapao, oia hoi e tia i te haapiiraa aifaito ia tauturu ia tatou ia papai maitai. Eita noa te papairaa e tufa i ta tatou mau parau e to tatou mau manaˈo, e faaherehere atoa râ oia ia ratou. E rave rahi mau senekele i teie nei, ua papai tau 40 ati Iuda i nia i te gima aore ra te otaro te mau parau o tei riro mai i muri aˈe te mau Papai faauruahia. (Timoteo 2, 3:16) Papu maitai, o te papairaa faahiahia roa ˈˈe ïa i ravehia aˈenei! Ma te feaa ore, ua aratai o Iehova i te papai-faahou-raa na nia iho o taua mau parau moˈa ra i te roaraa o te mau senekele, e inaha, ua tapae roa mai ia tatou nei ei mau papai te nehenehe e tiaturihia. Aita anei tatou i mauruuru i te mea e ua haapapai o Iehova i ta ˈna mau parau, e aita i tiaturi i te ravea o te parau vaha?—A faaau e te Exodo 34:27, 28.
13. Na te aha e faaite ra e ua ite te mau ati Iseraela i te papai?
13 I te tau tahito, o te tahi noa mau pǔpǔ feia tiaraa taa ê, mai te mau papai parau no Mesopotamia e no Aiphiti, tei ite i te taio e te papai. Taa ê roa i te tahi atu mau nunaa, i Iseraela, e faaitoitohia na te mau taata atoa ia haapii i te taio e te papai. Te faaite ra te faaueraa i roto i te Deuteronomi 6:8, 9 e ia papai te mau ati Iseraela i nia ˈˈe i to ratou mau uputa fare, e au ra ïa ia hiˈohia, e ua ite ratou i te papai. I to ratou nainairaa, e haapiihia na te mau tamarii ia papai. Te manaˈo ra vetahi feia ite e ua riro te kalena no Gezera, hoê o te mau hiˈoraa tahito roa ˈˈe o te papairaa hebera tahito, ei papairaa tamau-aau-hia na te hoê tamaroa haere haapiiraa.
14, 15. Eaha vetahi mau ravea maitatai e te au no te faaohipa i te aravihi ia papai?
14 Nafea râ tatou ia faaohipa ma te maitai e te au i to tatou aravihi ia papai? Papu maitai na roto i te tapaoraa i te mau nota i te mau putuputuraa e te mau tairururaa kerisetiano. E riro te hoê rata, noa ˈtu e e “papai poto noa,” i te faaitoito i te hoê taata i pohehia i te maˈi aore ra i te haamauruuru i te hoê taeae aore ra te hoê tuahine i te pae varua o tei hamani maitai mai aore ra o tei farii popou ia tatou. (Petero 1, 5:12) Mai te peu e ua pohe te hoê taata herehia e te tahi i roto i te amuiraa, e nehenehe te hoê rata aore ra te hoê poroi iti “e haamahanahana ˈtu” i taua taata ra no tatou. (Tesalonia 1, 5:14) Ua faataa te hoê tuahine kerisetiano, ua pohe to ˈna metua vahine i te mariri aˈi taata, e: “Ua papai mai te hoê hoa i te hoê rata maitai roa. Ua tauturu mau te reira ia ˈu no te mea e nehenehe ta ˈu e taio noa na nia iho.”
15 Te hoê ravea maitai roa no te faaohipa i te aravihi no te papai, o te arueraa ïa ia Iehova na roto i te papairaa i te hoê rata o te faaite i te poroi o te Basileia. I te tahi mau taime, e titauhia ia papai tamau i te feia o tei anaanatae apî mai e faaea ra i te mau vahi atea. E nehenehe te maˈi e haafifi ia outou no te tahi taime ia haere e poro i tera fare e tera fare. Peneiaˈe e nehenehe te hoê rata e parau na roto i te papairaa i te mea o ta outou e parau roa ˈtu i te hoê taata.
16, 17. (a) Eaha te hiˈoraa o te faaite ra i te faufaa ia papai i te hoê rata no te faaite i te poroi o te Basileia? (b) E nehenehe anei outou e faatia mai i te hoê tupuraa mai teie te huru?
16 Teie te tahi hiˈoraa. E rave rahi matahiti i teie nei, ua papai te hoê Ite i te hoê rata e faaite ra i te poroi o te Basileia, i te hoê vahine ivi, tei faaitehia te poheraa o ta ˈna tane na roto i te vea. Aita ta ˈna rata i pahonohia mai. E inaha, e 21 matahiti i muri iho, i te avaˈe novema ra 1994, ua tae mai ta taua Ite ra te hoê rata, no ǒ mai i te tamahine a taua vahine ra. Teie ta taua tamahine ra i papai:
17 “I te avaˈe eperera 1973, ua papai mai oe i to ˈu mama no te tamahanahana ia ˈna i muri aˈe i te poheraa o to ˈu papa. E iva matahiti to ˈu i tera ra tau. Ua haapii to ˈu mama i te Bibilia, aitâ râ oia i riro atura ei tavini no Iehova. Teie râ, na roto i ta ˈna haapiiraa, ua matau atura vau i te parau mau. I te matahiti 1988 ra, ua haamata vau i ta ˈu haapiiraa bibilia—e 15 matahiti i muri aˈe i te taeraa mai ta oe rata. I te 9 no mati 1990, ua bapetizohia vau. Auê au i te mauruuru e i te rata o ta oe i hapono mai e rave rahi matahiti i teie nei, e ua oaoa roa vau i te faaiteraa ˈtu ia oe e ua tupu taua mau huero o ta oe i ueue ra, maoti te tauturu a Iehova. Ua horoa mai to ˈu mama i ta oe rata e na ˈu e tapea, e te hinaaro nei au e ite e o vai oe. Maitai e e tapae atu teie rata ia oe ra.” Ua tapae atu iho â te rata a teie nei tamahine, tei roto to ˈna vahi nohoraa e ta ˈna numera niuniu, i te Ite ra o tei papai e rave rahi matahiti na mua ˈtu. A feruri na i te maere rahi o taua vahine apî ra i to te Ite taniuniuraa ˈtu ia ˈna—e te papai noa nei â hoi oia i te mau rata no te tufa i te tiaturiraa o te Basileia e o vetahi ê!
Te tupu-maitai-raa i te pae feruriraa, i te pae morare, e i te pae varua
18. I te mau tau bibilia, mea nafea to te mau metua haapaoraa i te haapiiraa i ta ratou mau tamarii i te pae feruriraa e i te pae morare?
18 Te toru o te tapao, oia hoi, e tauturu te hoê haapiiraa aifaito ia tatou ia tupu maitai i te pae feruriraa e i te pae morare. I te tau bibilia, e faarirohia na te haapiiraa i te tamarii i te pae feruriraa e i te pae morare ei hoê o te mau hopoia matamua a te mau metua. Aita noa te mau tamarii i haapiihia ia taio e ia papai, te mea faufaa roa ˈtu râ, te haapiiraa ïa ia ratou i te Ture a te Atua, o tei ohipa i nia i te mau tuhaa atoa o to ratou oraraa. No reira, ua amuihia i roto i te haapiiraa, te aˈo no nia i ta ratou mau hopoia i te pae faaroo e te mau faaueraa tumu e faatere i te faaipoiporaa, te mau taairaa fetii, te morare i te pae taatiraa, e tae noa ˈtu i ta ratou mau hopoia e to ratou taata-tupu. Ua tauturu teie huru haapiiraa ia ratou ia tupu maitai eiaha noa i te pae feruriraa e i te pae morare, i te pae varua atoa râ.—Deuteronomi 6:4-9, 20, 21; 11:18-21.
19. Ihea roa e itehia mai ai te haapiiraa o te faaite mai te mau faufaa morare maitatai roa ˈˈe te tia ia tatou ia pee e o te tauturu ia tatou ia tupu maitai i te pae varua?
19 Eaha ïa no teie nei tau? E mea faufaa roa te hoê haapiiraa maitai. E tauturu te reira ia tatou ia tupu maitai i te pae feruriraa. Ihea râ tatou e fariu ai no te fanaˈo i te haapiiraa o te faaite mai te mau faufaa morare maitatai roa ˈˈe te tia ia pee e o te tauturu ia tatou ia tupu maitai i te pae varua? I roto i te amuiraa kerisetiano, te fanaˈo nei tatou i te hoê porotarama haapiiraa teotaratia, o te ore e fanaˈohia i te tahi atu vahi i nia i te fenua nei. Maoti i ta tatou haapiiraa tataitahi i te Bibilia e te mau pueraa papai bibilia, e tae noa ˈtu te aˈo e horoahia mai i te mau putuputuraa a te amuiraa e te mau tairururaa, e nehenehe e noaa mai ia tatou teie haapiiraa faufaa rahi, e te tamau noa—te haapiiraa no ǒ mai i te Atua ra—ma te tamoni ore! Eaha ta te reira e haapii maira ia tatou?
20. Eaha ta te haapiiraa no ǒ mai i te Atua ra e haapii mai ia tatou, e eaha te mau faahopearaa?
20 Ia haamata tatou i te haapii i te Bibilia, e tuatapapa tatou i te mau haapiiraa matamua a te mau Papai, ‘te mau parau matamua.’ (Hebera 6:1) Ia tamau noa tatou i te haapii, e rave mai tatou i “te maa etaeta”—oia hoi, te mau parau mau hohonu aˈe. (Hebera 5:14) Hau atu â râ, e haapii tatou i te mau faaueraa tumu a te Atua o te faaite ia tatou nafea ia ora ia au i ta te Atua e hinaaro ra. Ei hiˈoraa, e haapii tatou i te haapae i te mau peu e te mau raveraa o te ‘haaviivii i te tino’ e, i te faatura i te mana e i te tiaraa taata e te faufaa a vetahi ê. (Korinetia 2, 7:1; Tito 3:1, 2; Hebera 13:4) Hau atu, e taa ia tatou i te faufaaraa o te haerea parau-tia e te itoito i roto i ta tatou ohipa e te faufaaraa ia ora ia au i te mau faaueraa a te Bibilia i te pae taatiraa. (Korinetia 1, 6:9, 10; Ephesia 4:28) A haere ai tatou i mua i roto i te faaohiparaa i teie mau faaueraa tumu i roto i to tatou oraraa, e tupu tatou i te rahi i te pae varua, e e hohonu atu â to tatou taairaa e te Atua. Hau atu, e faariro to tatou haerea paieti ia tatou ei feia maitatai, noa ˈtu e eaha te vahi o ta tatou e faaea ra. E e riro paha te reira i te turai ia vetahi ê ia faahanahana i te Pu o te haapiiraa no ǒ mai i te Atua ra o Iehova.—Petero 1, 2:12.
Te ite i te rave i te ohipa no te oraraa i te mau mahana atoa
21. Eaha te haapiiraa i te pae no te raveraa i te ohipa o tei fanaˈohia e te mau tamarii i te mau tau bibilia?
21 Te maha o te tapao o te haapiiraa aifaito, oia hoi ia ite te hoê taata i te rave i te ohipa no te oraraa i te mau mahana atoa. I te mau tau bibilia, e haapii na te mau metua i ta ratou mau tamarii ia rave i te ohipa. E haapiihia na te mau tamahine i te mau ohipa o te utuafare. Te faaite ra te pene hopea a te buka Maseli e e rave rau mau ohipa taa ê. Ua ite ïa te mau tamahine i te nino, te raraa i te ahu, te tunu i te maa, te haapao i te tereraa o te utuafare, te hoo taoˈa, e te hoo mai aore ra hoo atu i te fare e te fenua. E mea matauhia ia haapii te mau metua tane i te mau tamaroa i to ratou iho toroa, te faaapu anei aore ra te tahi atu ohipa hamani tauihaa. Ua haapii o Iesu i te toroa tamuta e to ˈna papa faaamu, o Iosepha; no reira, aita noa oia i piihia “te tamaiti a te tamuta,” “te tamuta” atoa râ.—Mataio 13:55; Mareko 6:3.
22, 23. (a) E tia i te haapiiraa ia faaineine i te tamarii i te aha? (b) Eaha te manaˈo e turai ia tatou ia maiti e faaroa ˈtu â i te tau haapiiraa mai te peu e e titauhia?
22 I teie atoa mahana, te vai atoa ra i roto i te haapiiraa aifaito maitai, te faaineineraa ia faaamu i te hoê utuafare i te hoê mahana. Te faaite ra te mau parau a te aposetolo Paulo i roto i te Timoteo 1, 5:8 e, ua riro te haapaoraa i to ˈna iho utuafare ei hopoia moˈa. Teie ta ˈna i papai: “O te taata hoi aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te [faaroo], e e rahi atu ïa to ˈna ino i to te taata [faaroo] ore ra.” E tia ïa i te haapiiraa ia faaineine i te mau tamarii no te mau hopoia o ta ratou e amo a muri aˈe i roto i te oraraa e tae noa ˈtu ia haamataro ia ratou ia riro ei mau melo rave ohipa itoito.
23 Eaha te faito haapiiraa te tia ia tatou ia tapapa? Mea taa ê i roto i tera aore ra tera fenua. Tera râ, mai te peu e e titau te matete o te ohipa e ia haere â i te haapiiraa i muri aˈe i te faito faahepohia e te ture, tei te mau metua te hopoia e aratai i ta ratou mau tamarii ia rave i te faaotiraa no nia i te haapiiraa aore ra te faaineineraa hau atu, ma te feruri i te mau vahi maitatai e te mau vahi atâta e noaa mai ia faaroahia ˈtu â te tau haapiiraa. Eaha râ te manaˈo e turai i te hoê taurearea ia maiti e faaroa ˈtu â i ta ˈna tau haapiiraa mai te peu e e titauhia ra? E ere ïa i te moni, te hanahana no ˈna iho, aore ra ia aruehia oia. (Maseli 15:25; Timoteo 1, 6:17) A haamanaˈo i te haapiiraa e noaa mai na roto i te hiˈoraa a Iesu—e tia ia faaohipahia te haapiiraa no te arue ia Iehova. Mai te peu e e maiti tatou e haere atu â i mua i te pae haapiiraa, te manaˈo e turai ia tatou oia hoi te hinaaroraa e turu ia tatou iho i te pae moni ia nehenehe tatou e tavini ia Iehova i roto i te faito rahi roa ˈˈe i roto i te taviniraa kerisetiano.—Kolosa 3:23, 24.
24. Eaha te haapiiraa no ǒ mai ia Iesu ra te tia ia tatou ia haamanaˈo noa?
24 Ia tutava maite ïa tatou ia noaa mai te ite aifaito i te pae haapiiraa. Ia huti tatou i te mau haamaitairaa atoa o te porotarama haapiiraa no ǒ mai i te Atua e ravehia nei, o te horoahia ra i roto i te faanahonahoraa a Iehova. E eiaha roa ia moehia ia tatou i te haapiiraa faufaa roa o ta Iesu Mesia, te taata i haapii-maitai-roa ˈˈe-hia i ora aˈenei i nia i te fenua, i haapii mai—oia hoi, ia faaohipahia te haapiiraa, eiaha no te faahanahana ia tatou iho, no te arue râ i te Orometua rahi roa ˈˈe, o te Atua ra o Iehova!
Eaha ta outou pahonoraa?
◻ Mea nafea to Iesu faaohiparaa i to ˈna ite?
◻ No te aha e mea faufaa ia haapii i te taio maitai?
◻ Nafea tatou ia faaohipa i te ite i te papai no te arue ia Iehova?
◻ Nafea te haapiiraa no ǒ mai i te Atua ra ia tauturu ia tatou ia tupu maitai i te pae morare e i te pae varua atoa?
◻ Eaha te haapiiraa i te pae no te raveraa i te ohipa tei roto i te hoê haapiiraa aifaito?
[Tumu parau tarenihia i te api 13]
Tauturu ohie na te mau orometua haapii
I te mau tairururaa mataeinaa “Te feia e arue i te Atua ma te oaoa” i tupu i te mau matahiti 1995/96, ua pia te Taiete Watch Tower i te hoê vea iti apî Te mau Ite no Iehova e te haapiiraa. Ua pia-taa-ê-hia teie vea iti peni rau e 32 api na te mau orometua haapii. E tae roa mai i teie nei, ua hurihia oia na roto e 58 mau reo.
No te aha i piahia ˈi te hoê vea iti na te mau orometua haapii? No te tauturu ia ratou ia taa maitai aˈe i te mau tiaturiraa a te mau tamarii haere haapiiraa e Ite no Iehova to ratou metua. Eaha to roto i teie vea iti? Ma te ohie e te papu, te faataa ra oia i to tatou hiˈoraa no nia i te mau tumu parau mai te haapiiraa hau atu â, te oroa mahana fanauraa e te oroa Noela, e te faaturaraa i te reva. Te haapapu atoa nei teie vea iti i te mau orometua haapii e te hinaaro nei tatou e ia fanaˈo ta tatou mau tamarii i ta ratou tau haapiiraa e te hinaaro nei tatou e turu atu i te mau orometua haapii, ma te anaanatae rahi i te haapiiraa a ta tatou mau tamarii.
Nafea ia faaohipa i te vea iti ra Haapiiraa? I te mea e ua faaineinehia na te mau orometua haapii, e nehenehe tatou e horoa ˈtu na te mau haapii tamarii, te mau raatira fare haapiiraa, e vetahi atu â mau tia a te fare haapiiraa. Ia tauturu teie vea iti apî i te mau orometua haapii atoa ia taa i to tatou mau hiˈoraa e ta tatou mau tiaturiraa e no te aha, i te tahi mau taime, e titau tatou i te tiaraa ia ore e rave mai ta te tahi pae. Te faaitoitohia nei te mau metua ia faaohipa i te vea iti ei niu no te tahi tauaparauraa e te mau orometua haapii a ta ratou mau tamarii.
[Hohoˈa i te api 10]
E faatura-rahi-hia na te haapiiraa i Iseraela tahito