Te faatia ra te feia poro i te Basileia

‘Ma te anaana mai te mau tiarǎma o te ao nei’

E TIARAA otahi to te mau Ite no Iehova e mea pinepine ratou i te hiˈo-ino-hia no to ratou patoiraa i te pâmuraa toto. Ua niu-papu-hia râ teie tiaraa i nia i te Bibilia. Te faaite ra oia e te opani ra te Atua i te faaohiparaa i te toto ma te tano ore, mea faufaa hoi te toto i mua i to ˈna aro. (Genese 9:3, 4; Levitiko 17:14) I muri aˈe i te hiˈopoaraa i te mau Papai no nia i taua tumu parau ra, ua faaoti te mau Ite no Iehova e tei roto te faaueraa bibilia e ‘haapae i te toto’ i te peu matauhia i teie nei tau no te pâmuraa toto.—Ohipa 15:19, 20, 28, 29.

I te mau matahiti hopea nei, ua turu te mau melo o te tino rapaauraa maˈi, e tae noa ˈtu te mau tiribuna i roto i te tahi mau fenua, i te mau Ite no Iehova no nia i taua tumu parau ra. Ei hiˈoraa, i Danemaka ua pohe te hoê metua vahine apî o tei ite i te manaˈo o te Bibilia no nia i te toto i muri aˈe i te hoê ati purumu. No to ˈna patoiraa i te pâmuraa toto, ua haa to ˈna mau taote no te aro atu i te mau Ite no Iehova hoê avaˈe te maoro na roto i te mau ravea haaparareraa parau.

Ua ani te mau metua o te potii i te hoê tuatapaparaa, e i te avaˈe eperera 1994 ua ravehia te hoê faaotiraa e te Tomite no Danemaka no nia i te mau hororaa a te feia maˈi. Ua faataahia e ua pohe taua potii ra, eiaha no te mea e ua patoi o ˈna i te toto, no te tahi râ faaohiparaa tano ore i te pae rapaauraa. Ua niuhia te faaotiraa i nia i te mau maimiraa a te Piha rapaauraa e au i te ture e te mau tia mana i te pae rapaauraa. I roto i te hoê parau na te mau fare rapaauraa maˈi atoa i Danemaka, ua faataa te Piha rahi no te rapaauraa e e tia i te mau taote ia horoa i te mau Ite no Iehova i te huru rapaauraa monoraa maitai roa ˈˈe ê atu, ma te haapao i ta ratou patoiraa i te toto.

O Dan te tahi atu hiˈoraa, te hoê Ite e 15 matahiti to ˈna o tei pohe i te mariri ai taata o te toto. I roto i taua tupuraa ra ua faatura te mau taote i te faaotiraa itoito a Dan e patoi i te pâmuraa toto. Ua faatupu te reira i te hoê haapurororaa o tei parare e ua faahapa te mau ravea haaparareraa parau i te mau taote no te pohe o Dan. Aita râ te rahiraa i farii i te haapurororaa tano ore.

Ei hiˈoraa, ua tae mai te raatira rahi o te fare haapiiraa ta Dan i haere i te Piha no te Basileia no te hunaraa maˈi. Ua faaite oia i to ˈna huru ê rahi i te mau parau apî tia ore no nia i te pohe o Dan. I muri aˈe i to ˈna aniraa ˈtu i te hoê hoa rave ohipa e Ite o ˈna, e rave rahi mau uiraa no nia i te mau Ite no Iehova, ua farii o ˈna i te hoê ripene vidéo Te mau Ite no Iehova—Te hoê iˈoa, te hoê faanahonahoraa (farani). No te mea ua haaputapû roa te ripene ia ˈna, ua faanaho o ˈna e ia mataitai te mau orometua haapii atoa o te fare haapiiraa i te reira. I muri aˈe, ua patahia te ripene i mua i te mau tamarii haere haapiiraa atoa, i te pǔpǔ tataitahi.

Aita atoa te faatere hau no Danemaka i farii i te haapurororaa ino ta te mau taote o Dan i fanaˈo. Ua faataa oia e ua rave te mau taote i te mea tia ma te faatura i te faaotiraa paari e te faaroo niu-maitai-hia a Dan.

Tau mirioni feia poro i te Basileia o te auraro nei i te mau ture a te Atua. No to ratou auraroraa, e tiaraa otahi to ratou, ‘ma te anaana mai te mau tiarǎma o te ao nei.’—Philipi 2:12, 15.