Ua putuputu mai ratou ei feia arue oaoa
UA FAAUEHIA te nunaa tahito o te Atua ra o Iehova ia “oaoa mau a hoi” i to ratou putuputuraa no te haamoriraa. (Deuteronomi 16:15) Ma te papu maitai ua horoa te mau tairururaa mataeinaa “Te feia e arue i te Atua ma te oaoa” o te mau matahiti 1995 e 1996 i te mau Ite no Iehova i te mau tumu papu no te oaoa.
Mai te taime a haamata ˈi taua mau tairururaa ra, ua haapaari ratou i to ratou faaroo. Ua faaite atoa ratou e nafea ia oaoa i roto i te hoê ao oaoa ore. E hiˈopoa anaˈe na i te tairururaa no te mahana e te hora tataitahi.
‘A arue ia Iehova, outou . . . A oaoa!’
Ua niuhia te upoo parau i nia mai o te mahana tairururaa matamua i nia i te Salamo 149:1, 2. Ua tuatapapa te oreroraa parau “E tumu to tatou no te umere” i te faaohiparaa o te parau tohu i roto i te Isaia pene 35. Ua itehia te hoê tupuraa i nia ia Iseraela tahito e i to tatou nei tau iho â râ e te faahoˈi-faahou-raa mai te feia haamori ia Iehova i te ruperupe e te oraora maitai i roto i te hoê paradaiso i te pae varua. No reira, e tumu to te feia i putuputu mai no te umere no te ohipa ta te Atua i opua no ta ˈna nunaa i roto i te hoê paradaiso i te pae varua e i roto i te Paradaiso mau o te fatata roa.
Ua pahono te oreroraa parau peretiteni, “Faataa-ê-hia ei feia e arue i te Atua ma te oaoa na te ao nei,” i te uiraa: Na te aha e faataa ê ra ia tatou i teie nei ao? Na ta tatou ïa haamoriraa tahoê ia Iehova. Noa ˈtu eaha te vahi faaearaa a te mau Ite no Iehova i nia i teie nei fenua, te paraparau ra e te haapii ra ratou ma te au maite. Te oaoa atoa nei ratou i te opuaraa rahi a Iehova e faaraa i to ˈna iˈoa moˈa e e faatia i to ˈna tiaraa mana arii na roto i ta ˈna Basileia. Nafea râ Iehova ia tauturu ia tatou ia ô atoa ˈtu tatou i roto i ta ˈna opuaraa? Ua horoa oia e ia haapao tatou i te parau mau o ta ˈna Parau moˈa. Ua horoa te Atua i to ˈna varua moˈa na tatou. Ua haamaitai oia ia tatou e te hoê fetii taeae na te ao nei e te hoê faanahoraa no te haamoriraa viivii ore. Te tauturu ra to tatou utuafare na te ao atoa nei ia tatou ia tavini ia Iehova ma te oaoa rahi o te mafatu.
Ua haapapu te oreroraa parau “A ara e ia vai atea noa tatou e ia ore e viivii i teie nei ao” i te faufaaraa ia ape i te mau viivii o te hiˈo-pae-tahi-raa e te faataa-ê-raa i te mau taata. (Iakobo 2:5-9) E amui atu paha vetahi i te feia anaˈe e hoê â to ratou tiaraa aore ra huru oraraa i te pae moni, ma te haafaufaa ore i te mau hoa kerisetiano veve aore ra navai ore. E haafaahiahia paha vetahi pae i te feia e hopoia ta ratou i roto i te amuiraa. Te moehia ra ia ratou e te haamaitairaa rahi roa ˈˈe ta te hoê taata e nehenehe e fanaˈo o te riroraa ïa ei Ite no Iehova. No reira, eiaha tatou e faatia i te mau hinaaro o te ao nei ia haaviivii ia tatou e ia faaore i te hau o te amuiraa.—Petero 2, 3:14.
Ua faataa te oreroraa parau “Ua ineine anei au no te faaipoipo?” e ua faaipoipo ru noa e rave rahi. Ua faaipoipo vetahi pae no te ape i te hoê fifi i te fare aore ra no te mea te faaipoipo ra to ratou mau hoa. Teie râ, te mau tumu papu o te faaipoiporaa o te hinaaroraa ïa na taata toopiti e faatupu i te mau tapao teotaratia, te here mau, te hinaaroraa i te tahi hoa e te vai-maitai-raa, e te hinaaro e haapao i te mau tamarii. Mea faufaa te faaineineraa i te pae varua ia opua anaˈe e faaipoipo. I ropu i te tahi atu mau mea, mea faufaa ia faatupu i te mau huru maitatai e hinaarohia na roto i te ahuraa i te huru taata apî. Mea paari atoa ia ite mau e te haapapu ra anei te hoa o te opuahia ra e faaipoipo e e taairaa mau to ˈna e o Iehova e te faatura nei oia ia vetahi ê. Mea paari atoa ia imi i te aˈoraa a te mau kerisetiano paari.—Maseli 11:14.
Ua hohorahia i muri aˈe i taua oreroraa parau maramarama maitai ra i te hoê oreroraa parau e te upoo parau “Te mau metua e oaoa ra i ta ratou mau tamarii.” E taime oaoa rahi te fanauraa i te hoê tamarii. E faatupu atoa râ te faaamuraa i te mau tamarii i te hopoia rahi. (Salamo 127:3) No reira, mea faufaa ia haapii atu i te mau tamarii ia here ia Iehova. E nehenehe te mau metua e na reira na roto i te paraparau-tamau-raa no nia ia Iehova i ta ratou mau tamarii e te faaohiparaa i te mau faaueraa tumu o ta ˈna Parau i roto i te utuafare.
Ua faaoti te mahana tairururaa e te hoê tupuraa faahiahia mau—te matararaa mai te vea iti apî ra Te mau Ite no Iehova e te haapiiraa. Te faataa maitai ra oia e “te faaitoito nei” te mau Ite “i te mau taurearea ia haapii ma te tutava rahi e ia rave ma te manaˈo tia i te mau ohipa e horoahia na ratou i te fare haapiiraa.” Te faataa atoa ra teie vea iti i te mau faahopearaa faahiahia o te mau piha haapiiraa i te taio e i te papai ta te mau Ite no Iehova i faatere e rave rahi matahiti i Nigeria, Mexico, e vetahi atu â mau fenua. E tauturu te vea iti i te mau orometua haapii ia ite e te haafaufaa rahi nei tatou i te haapiiraa.
‘Ia pûpû noa tatou na te Atua i te tusia arueraa’
Ua niuhia te upoo parau na mua ˈtu o te pitiraa o te mahana i roto i te Hebera 13:15. Ua vauvau te porotarama o te poipoi i te hoê oreroraa parau tatuhaahia e te upoo parau “A pahono i te piiraa e arue ia Iehova.” E ere te faito matahiti i te hoê haafifiraa no te pahono i teie piiraa. Te faaue ra te Salamo 148:12, 13 i te mau taata apî, te mau paretenia, te mau taata paari, e te mau tamarii ia arue ia Iehova. Ua nehenehe e rave rahi mau tavini oaoa a Iehova e faarahi i ta ratou arueraa. Na te ao nei, ua hau atu i te 600 000 o te rave ra i te ohipa pororaa ma te taime taatoa, aore ra te taviniraa pionie. Ua hau atu i te 15 000 o te rave nei i te taviniraa pionie taa ê, e ua hau atu i te 15 000 i roto i te taviniraa i te Betela.
“E tavini anaˈe e te faanahonahoraa a Iehova ma te taiva ore” hoê oreroraa parau ïa o tei faaite e mea faufaa te taiva ore no te mau tavini a te Atua. Te oreraa e taiva ia Iehova o te ati-maiteraa ˈtu ïa ia ˈna ma te paieti puai o te riro mai te hoê tapiri puai ra te huru. Te taiva ore oia hoi eita tatou e ofati ma te hinaaro mau i te mau faaueraa a te Bibilia, noa ˈtu e te ite maira vetahi ê ia tatou aore ra aita. E titau-atoa-hia e ia haapao tatou ma te taiva ore i te mau haapiiraa bibilia i roto i te mau vea Pare Tiairaa e A ara mai na! e tae noa ˈtu te tahi atu maa ta te Taiete Watch Tower e pûpû maira. Ua hohorahia i muri aˈe i teie oreroraa parau i te oreroraa parau no te bapetizoraa. Auê te oaoa i to te feia bapetizo haapapuraa i to ratou pûpûraa ia ratou ia Iehova!
Ua horoa te mau parau a te Hosea 4:1-3 i te hiˈoraa no te oreroraa parau i te avatea “Te peu maitai aore ra te peu iino—Eaha ta outou e maiti?” Noa ˈtu e ua ino roa te huru hiˈoraa o te ao nei no nia i te peu maitai, e tia i te mau kerisetiano ia “faaitoito hua” no te pee i te peu morare maitai roa. (Petero 2, 1:5) E haamata te reira e te huru feruriraa o te hoê taata. Mai te peu e mea maitai to ˈna mau manaˈo, e faahiti o ˈna i te mau parau viivii ore, tia e te faaitoito e e tutava o ˈna i te faaite i te haerea tia i roto i to ˈna mau auraa e o vetahi ê. Te raveraa i te peu maitai o te tutava-atoa-raa i te taa e i te faaite i te aroha i te hoê kerisetiano o te ahoaho ra aore ra o te hepohepo ra.—Tesalonia 1, 5:14.
Ua faaara te tahi atu oreroraa parau, “A ara i te mau marei a te Diabolo,” i te mau kerisetiano i te oreraa e tuu ia ratou iho i mua i te mau mana a te mau demoni. I te pae rapaauraa i te maˈi, e tia i te mau kerisetiano ia ara i te mau ravea apî, mai te faataotoraa, tei taaihia i te ohipa tahutahu. Aita anaˈe, na te taata iho e feruri no nia i te ohipa o ta ˈna e rave no te rapaau i to ˈna tino.
Ua faaoti te piti o te mahana e te hoê tupuraa faahiahia mau—te matararaa mai te hoê buka apî faito nainai no te tauturu i te mau taata mafatu haavare ore ia haere oioi ratou i mua no te pûpûraa e te bapetizoraa. Teie te upoo parau o teie buka apî e 192 api Te ite e aratai i te ora mure ore (farani). Te faataa ra te buka Ite i te parau mau ma te hoê huru faaitoito. Aita oia e faananea ra i nia i te mau haapiiraa tumu ore hape. E faaohie te reo maramarama maitai e te tatararaa tano i te faaohiparaa i taua buka ra no te faatere i te mau haapiiraa bibilia e no te tauturu i te mau taata ia noaa i te ite putapû mau no nia i te Atua.
“E oaoa râ outou e ouˈauˈa noa i te oaoa e a muri noa ˈtu”
E upoo parau teie mau parau a te Isaia 65:18 o te toru o te mahana tairururaa. Ua haamatara te tupuraa o te parau tohu bibilia i te matahiti 1914 ei matahiti i reira teie nei faanahonahoraa ino i te faaôraa i roto i to ˈna mau mahana hopea. No reira, ua huti te oreroraa parau tatuhaahia e te upoo parau “Te feia arue oaoa i te hopearaa o teie faanahonahoraa o te mau mea e vai nei” i te ara-maite-raa hohonu o te feia i putuputu mai. Ua faaite te mau taata orero e mea nafea te mau miria taata i te manaraahia e te nounou e te huru feruriraa haavî o te ao nei. I te taime tano, e haavahia ratou ei tuhaa o te ao nei e o Satani te faatere. No reira, teie te taime no te rave i te hoê maitiraa. Teihea pae o ta tatou e hinaaro ra? Te hinaaro ra anei tatou e haamori ia Iehova e e turu i to ˈna mana arii, aore ra e faatia anei tatou ia Satani ia riro mai ei faatere no tatou na roto i te raveraa i te mau mea e faaoaoa ra ia ˈna? E tia ia tatou paatoa ia tia ma te papu i te pae o Iehova.
Ua horoa te oreroraa parau huiraatira o te tairururaa, “E haamaitai anaˈe i te Arii mure ore!” na te feia atoa i putuputu mai i te maa paari no te feruri. Noa ˈtu e eita ta te taata paruparu e nehenehe e taa i te huru mure ore, te taa maitai ra Iehova i te reira. “O Iehova te arii e a muri noa ˈtu,” ta te papai salamo i himene. (Salamo 10:16) Ua iriti taua Arii mure ore ra i te ravea ia nehenehe te huitaata e fanaˈo i te ora mure ore na roto i ta ˈna Tamaiti, o Iesu Mesia. (Ioane 17:3) “Oia mau, e nehenehe tatou te mau taata hara e fanaˈo i te ora mure ore na roto i te haapiiraa no ǒ mai i te Atua ra e te faaroo i roto i te tusia hoo a Iesu,” ta te taata orero i parau.
A fatata ˈi te tairururaa i te faaoti, ua faaitoitohia te feia i putuputu mai e te oreroraa parau hopea, e te upoo parau “E arue anaˈe ia Iehova ma te oaoa i te mau mahana atoa.” Mea putapû mau â ia fanaˈo i te mau tabula o te haereraa te ohipa faariroraa i te taata ei pǐpǐ i mua na te fenua atoa nei. Ua turai-atoa-hia te feia i ruru mai ia ‘haamaitai ia Iehova i te mau mahana atoa e ia arue i to ˈna iˈoa e a muri noa ˈtu.’—Salamo 145:2.
Te faaore ra te mau ohipa taehae mau eita e nehenehe e parau i te oaoa. E nehenehe râ te mau taata e faaroo taatoa to ratou i roto ia Iehova e fanaˈo i te oaoa paieti. Ei fetii taeae na te ao nei, e nehenehe ïa te mau Ite no Iehova e faahiti faahou i teie mau parau a te Salamo 35:27, 28: “E umere ra e e oaoa tei faatia i te parautia na ˈu nei: e ore hoi ratou e faaea i te parau e, Ia faarahihia Iehova, o tei mauruuru i te maitai o tana tavini. Ei reira tau vaha e parau ai i te parau-tia na oe, e ua tamau maite i te arue ia oe.”
[Hohoˈa i te api 7]
E faufaahia te mau utuafare i te vea iti “Te mau Ite no Iehova e te haapiiraa”
[Hohoˈa i te api 8]
Te faataa ra te buka apî, “Te ite e aratai i te ora mure ore,” i te mau parau mau bibilia ma te hoê huru faaitoito
[Hohoˈa i te api 9]
Ua bapetizo e rave rahi no te faataipe i to ratou pûpûraa ia ratou no Iehova
[Hohoˈa i te api 9]
Ua putapû roa te feia i ruru mai e te darama “Te faaturaraa i tei au ia faaturahia i roto i to ratou mau matahiti ruhiruhia”