A faaea i roto i te “oire haapuraa” e a ora!

“E parahi hoi oia i roto i te oire haapuraa no ˈna e tia ˈi, e ia pohe te tahuˈa rahi.”—NUMERA 35:28.

1. O vai te Taata tahoo, e eaha te ohipa ta ˈna e fatata i te faatupu?

FATATA roa te Taata tahoo a Iehova, o Iesu Mesia, i te tairi. E ta ˈna mau nuu melahi, fatata roa taua Taata tahoo ra i te ohipa no te patoi atu i te feia e utua toto ta ratou e o te ore e tatarahapa. Oia mau, te ohipa ra o Iesu ei Faaoti i te faautuaraa a te Atua i te roaraa o te “ati rahi” e piri oioi maira. (Mataio 24:21, 22; Isaia 26:21) Eita te huitaata e nehenehe e ape i te mau faahopearaa o ta ratou utua toto.

2. Teihea roa te vahi haapuraa mau, e eaha te uiraa e titau ra i te pahonoraa?

² Te eˈa no te vai ora o te haereraa ïa i te oire haapuraa taipe e o te hororaa no to outou iho ora! Ia fariihia outou i roto i te oire, e tia i te taata horo ia vai noa i roto, no te mea o te reira anaˈe te vahi haapuraa mau. E uiui paha outou e, ‘I te mea e aita te rahiraa i rotopu ia tatou i taparahi i te hoê noa ˈˈe taata, e utua toto anei ta tatou paatoa? No te aha e o Iesu te Taata tahoo? Eaha te oire haapuraa no teie nei tau? E nehenehe anei te hoê taata e faarue atu i taua vahi ra ma te fifi ore?’

E utua toto mau anei ta tatou?

3. Eaha te tuhaa a te Ture a Mose o te tauturu ia tatou ia hiˈo e e utua toto to na mirioni taata na te ao nei?

³ E tauturu te hoê tuhaa iti o te Ture a Mose ia tatou ia ite e te apiti atoa nei te rahiraa mirioni taata i nia i te fenua nei i te utua toto. Ua faatae te Atua i nia i te mau ati Iseraela i te utua no te hoê faataheraa toto. Ia itehia e ua pohe te hoê taata e aita i itehia e na vai ra i taparahi, e tia i te feia haava ia faito i te mau oire i pihai iho no te ite e o vai ra te oire piri roa ˈˈe. No te haamatara i te hara, e tia i te mau matahiapo no te oire e manaˈohia ra e o ratou te feia hapa ia faataa ê i te afii o te hoê puaatoro ufa apî aita i ohipa i roto i te hoê peho aita i arotehia e i ueuehia i te huero. E tupu te reira i mua i te mau tahuˈa ati Levi ‘no te mea o ratou hoi tei maitihia e Iehova no te faatitiaifaro i te mau mârôraa atoa, e te mau hara atoa ra.’ E horoi te mau matahiapo o te oire i to ratou mau rima i nia i te puaatoro ufa e e parau ratou e: “Aore to matou rima i haamanii i teie nei toto, aore hoi to matou mata i ite i te taparahiraa. E aroha mai oe, e Iehova, i to oe ra mau taata ia Iseraela i faaorahia e oe ra, eiaha hoi to oe ra mau taata o Iseraela ia parihia i te haamanii i te toto hara ore ra.” (Deuteronomi 21:1-9) Aita te Atua ra o Iehova i hinaaro e ia viivii te fenua o Iseraela i te toto aore ra e ia amo to ˈna nunaa i te utua toto.

4. Eaha te faito utua toto e vai ra i nia ia Babulonia Rahi?

⁴ Oia, te vai ra te tahi mau mea tei riro ei utua toto amui aore ra na te nunaa. A hiˈopoa na i te faataheraa toto rahi e vai ra i roto ia Babulonia Rahi, te hau emepera o te haapaoraa hape. Oia hoi, ua inu oia i te toto o te mau tavini a Iehova! (Apokalupo 17:5, 6; 18:24) Te faahua parau nei te mau haapaoraa o te amuiraa faaroo kerisetiano e te apee nei ratou i te Tamaiti huiarii no te hau, na te mau tamaˈi, te tiribuna ekalesiatiko haava i te hairesi a te haapaoraa, e te mau tamaˈi faaroo faatupu i te pohe i rave e e utua toto ta ˈna i mua i te Atua. (Isaia 9:6; Ieremia 2:34) Oia mau, e tia ia ˈna ia amo i te rahiraa hopoia no te poheraa o te tahi tau mirioni taata i roto i na tamaˈi rahi e piti o te senekele. No reira, i mua i te Atua, e utua toto atoa ta te feia i roto i te mau haapaoraa hape mai te feia e turu nei e e apiti nei i roto i te mau tamaˈi.

5. Nafea te tahi mau taata i te riroraa ei mau taata taparahi ma te opua ore i Iseraela?

⁵ Ua faatupu vetahi mau taata i te pohe o te taata ma te hinaaro mau aore ra ma te tâuˈa ore. Ua faaô roa te tahi pae i roto i te mau taparahiraa amui, peneiaˈe e ua turaihia ratou e te mau aratai faaroo ma te parauhia e te reira te hinaaro o te Atua. Teie nei râ, ua hamani ino e ua haapohe vetahi i te mau tavini a te Atua. Noa ˈtu e aita tatou i rave i taua mau ohipa ra, te apiti atoa nei râ tatou i roto i te hopoia amui o te haapoheraa i te taata no te mea aita tatou i ite i te ture e te hinaaro o te Atua. E mau taata taparahi taata opua ore tatou ‘o tei taparahi ma te ite ore i te taata, aore i riri ia ˈna i mutaaihora.’ (Deuteronomi 19:4) E tia i taua mau taata ra ia ani onoono i te aroha faito ore o te Atua e e tia ia horo atu i te oire haapuraa taipe. Aita anaˈe e nehenehe ratou e farerei i te Taata tahoo o te haapohe ia ratou.

Te tiaraa faaora ta Iesu e hauti ra

6. No te aha e nehenehe ai e parau e o Iesu te fetii piri roa ˈˈe o te huitaata?

⁶ I Iseraela o te metua piri roa o te taata i taparahihia te taata tahoo. No te tahoo i te mau taata atoa i taparahihia i nia i te fenua nei, i te mau tavini a Iehova iho â râ, e tia e ia riro te taata tahoo no teie nei tau ei metua piri roa o te huitaata atoa. Na Iesu Mesia e amo nei i taua tuhaa ra. Ua fanauhia oia ei taata tia roa. Ua pûpû o Iesu i to ˈna ora hara ore no te pohe ei hoo tusia, e i muri iho i to ˈna tiafaahou-raa i nia i te raˈi, ua horoa oia i to ˈna faufaa i te Atua no te hara a te huaai tia ore a Adamu. Ua riro atura te Mesia ei Hoo no te huitaata, to tatou fetii piri roa ˈˈe—te Taata tahoo tia roa. (Roma 5:12; 6:23; Hebera 10:12) Ua faaitehia o Iesu ei taeae no te mau pǐpǐ i faatavaihia e apee nei i to ˈna taahiraa avae. (Mataio 25:40, 45; Hebera 2:11-17) Ei Arii i nia i te raˈi, ua riro atura oia ei “Metua no te ui a muri atu” no te feia e fanaˈo i ta ˈna tusia ei mau melo na ˈna i nia i te fenua nei. O ratou ïa te ora mai e a muri noa ˈtu. (Isaia 9:6, 7) No reira ua nomino o Iehova ma te tano i taua Fetii ra o te huitaata ei Taata tahoo.

7. Mai te Tahuˈa Rahi, eaha ta Iesu e rave ra no te mau taata?

⁷ Ua riro atoa o Iesu ei Tahuˈa Rahi hapa ore, tei tamatahia, e te aroha mau. (Hebera 4:15) Na roto i taua tiaraa ra oia i faaohipa ˈi i te faufaa o to ˈna tusia taraehara no te huitaata. Ua patuhia te mau oire haapuraa “no te tamarii a Iseraela, e no te taata ěê, e no te taata i purutia noa i roto ia ratou.” (Numera 35:15) I reira te Tahuˈa Rahi e pûpû ai na mua i te faufaa o to ˈna tusia no ta ˈna mau pǐpǐ i faatavaihia, “te tamarii a Iseraela.” I teie nei, te pûpû-atoa-hia ra no te ‘mau taata ěê’ e te ‘mau taata i purutia’ i roto i taua oire haapuraa taipe. Te hinaaro nei taua mau “mamoe ê atu” a te Fatu ra o Iesu Mesia e ora e a muri noa ˈtu i nia i te fenua nei.—Ioane 10:16; Salamo 37:29, 34.

Te oire haapuraa i teie nei mahana

8. Eaha te oire haapuraa taipe?

⁸ Eaha te oire haapuraa no teie nei tau? E ere roa ˈtu i te hoê vahi i roto i teie nei ao mai ia Heberona, te hoê o te mau oire haapuraa e ono a te mau ati Levi e te vahi nohoraa o te tahuˈa rahi no Iseraela. Te oire haapuraa i teie nei mahana o te ravea ïa e faaohipahia e te Atua no te paruru ia tatou i te pohe na roto i te ofatiraa i ta ˈna ture no nia i te moˈaraa o te toto. (Genese 9:6) Noa ˈtu e mea opuahia aore ra mea opua-ore-hia, e tia i te mau taata atoa o tei ofati i te ture a te Atua ia imi i te faaoreraa hapa e te tatararaa hara na roto i te faaroo i roto i te toto o te Tahuˈa Rahi, o Iesu Mesia. Te fanaˈo nei te mau kerisetiano i faatavaihia o te tiaturi ra e ora i nia i te raˈi e te “feia rahi roa” o te tiaturi ra e ora i nia i te fenua nei i te tusia hapa ore o Iesu e tei roto ratou i te oire haapuraa taipe.—Apokalupo 7:9, 14; Ioane 1, 1:7; 2:1, 2.

9. Mea nafea to Saulo no Tareso i te ofatiraa i te mau faaueraa a te Atua no nia i te toto, teie nei râ mea nafea oia i te faatupuraa i te tahi mau tauiraa i roto i te haerea?

⁹ Na mua ˈˈe oia i riro ai ei kerisetiano, ua ofati te aposetolo ra o Paulo i te ture no nia i te toto. O o ˈna hoi o Saulo i Tareso, ua hamani ino oia ia Iesu e ua farii atoa oia i taua taparahiraa ra. “I arohahia mai râ vau, no te mea i na reira maua noa vau no te faaroo ore,” o ta Paulo ïa e parau ra. (Timoteo 1, 1:13; Ohipa 9:1-19) Ua faatupu o Paulo i te hoê huru tatarahapa, tei haapapuhia i muri iho na roto e rave rahi ohipa faaroo. Ua titauhia râ hau atu â i te faaroo i roto i te tusia no te tomo i roto i te oire haapuraa no teie nei tau.

10. Nafea e nehenehe ai e tapea i te hoê haava manaˈo tia, e eaha te ohipa ta tatou e rave no te tapea i te reira?

¹⁰ E tia i te taata taparahi ma te opua ore ia faaea noa i roto i te hoê o te mau oire haapuraa ia haapapu oia e e haava manaˈo tia to ˈna i mua i te Atua no nia i te faataheraa toto. No te tapea i te hoê haava manaˈo tia, e tia ia tatou ia faatupu i te faaroo i roto i te tusia o Iesu, ia tatarahapa i ta tatou mau hara, e ia taui i to tatou haerea. E tia ia tatou ia imi i te hoê haava manaˈo tia na roto i te pûpûraa i to tatou ora no te Atua na roto i te Mesia, ma te faataipe i te reira na roto i te bapetizoraa i te pape. (Petero 1, 3:20, 21) Na roto i taua haava manaˈo tia ra tatou e nehenehe ai e faatupu i te mau taairaa piri roa e o Iehova. Te ravea otahi roa no te tapea i te haava manaˈo tia na roto ïa i te auraroraa i te mau titauraa e te raveraa i te ohipa i horoahia na tatou i roto i te oire haapuraa taipe, mai te mau taata ěê i roto i te mau oire haapuraa tahito i auraro i te Ture e i faatupu i te ohipa i titauhia ia ratou. Te ohipa matamua a te mau tavini a Iehova i teie mahana o te faaiteraa ïa i te poroi o te Basileia. (Mataio 24:14; 28:19, 20) E tauturu te faatupuraa i taua ohipa ra ia tatou ia riro ei taata ohipa o te oire haapuraa no teie nei tau.

11. Eaha te tia ia patoi mai te peu e e hinaaro tatou e vai ora noa i roto i te oire haapuraa i teie nei mahana?

¹¹ Te faarueraa i te oire haapuraa i teie nei mahana oia hoi te auraa ïa te faarururaa tatou iho i te haamouraa, no te mea e fatata roa te Taata tahoo i te ohipa no te patoi i te mau taata taparahi taata atoa. E ere teie te taime no te haere na rapae i taua oire paruru ra aore ra i te hoê vahi atâta mau i pihai iho i te otia o to ˈna fenua papu. E pohe tatou i rapaeau i te oire haapuraa taipe mai te peu e e ere tatou i te faaroo i roto i te tusia taraehara o te Tahuˈa Rahi. (Hebera 2:1; 6:4-6) Eita atoa tatou e ora mai te peu e e pee tatou i te haerea o teie nei ao, e ore tatou e faaô taatoa ia tatou i roto i te faanahonahoraa a Iehova, e aore ra e ore e pee faahou i te eˈa tia o to tatou Metua i te raˈi ra.—Korinetia 1, 4:4.

Tiamâraa mai roto mai i te oire haapuraa

12. Eaha te maororaa te hoê taata tei taparahi i mutaa ihora e faaea ˈi i roto i te oire haapuraa taipe?

¹² E tia i te hoê taata taparahi ma te opua ore i Iseraela ia faaea noa i roto i te oire haapuraa ‘tae roa i te taime e pohe ai te tahuˈa rahi.’ (Numera 35:28) Eaha ïa te maororaa te hoê taata tei taparahi i mutaa ihora e faaea ˈi i roto i te oire haapuraa taipe? Tae roa i te taime e aita oia e hinaaro faahou i te mau ohipa a te Tahuˈa Rahi, o Iesu Mesia. “E tia maitai roa ˈtu ia ˈna ia faaora i te feia e na reira ˈtu ia ˈna ra i te haere i te Atua ra,” o ta Paulo i parau. (Hebera 7:25) A tamau noa ˈi te mau viivii o te hara e te utua toto, e titauhia i te mau ohipa a te Tahuˈa Rahi i reira te feia tia ore e nehenehe ai e fanaˈo i te hoê tiaraa parau-tia i mua i te aro o te Atua.

13. O vai te mau “tamarii a Iseraela” i teie nei tau, e eaha te maororaa ratou e faaea ˈi i roto i te “oire haapuraa”?

¹³ A haamanaˈo na e ua haamauhia te mau oire haapuraa i te tau tahito no “te tamarii a Iseraela,” te mau taata ěê, e te feia purutia noa. O te mau Iseraela i te pae varua “te tamarii a Iseraela.” (Galatia 6:16) E tia ia ratou ia faaea noa i roto i te oire haapuraa taipe a ora noa ˈi ratou i nia i te fenua nei. No te aha? No te mea tei roto ratou i te tino taata tia ore e no reira te hinaaro nei ratou i te faufaa o te tusia taraehara o te Tahuˈa Rahi i nia i te raˈi ra. Ia pohe râ taua mau kerisetiano i faatavaihia ra e ia faatiahia ratou no te oraraa varua i nia i te raˈi, eita ratou e titau faahou i te hoo o te Tahuˈa Rahi; e faarue ratou e a muri noa ˈtu i te tino e te utua toto i taaihia i te reira. I nia i te feia i faatavaihia tataitahi tei faatiahia, ua pohe na hoi te Tahuˈa Rahi i roto i te tiaraa o te hoo e o te paruru.

14. Eaha ˈtu â te mea e titau ra e ia faaea noa te feia e tiaturi ra e ora i nia i te raˈi i roto i te oire haapuraa no teie nei tau?

¹⁴ No te mea te vai ra ia ratou i te huru taata nei, te titauhia ra e ia faaea noa te feia atoa o te riro ei ‘feia tufaa e te Mesia’ i nia i te raˈi i roto i te oire haapuraa taipe tae roa te taime e hope ai na roto i te pohe to ratou hororaa ma te haapao maitai i nia i te fenua nei. Ia pohe ratou, e faatusia ratou i to ratou huru taata e a muri noa ˈtu. (Roma 8:17; Apokalupo 2:10) No te mau taata noa te tusia o Iesu. No reira, e pohe te Tahuˈa Rahi no te mau Iseraela i te pae varua, ia faatiahia ratou ei mau mea ora varua o te vai e a muri noa ˈtu i roto i te raˈi ia “noaa ia [ratou] te huru Atua.”—Petero 2, 1:4.

15. O vai te mau ‘taata ěê’ e te mau ‘taata purutia’ no teie nei tau e eaha ta te Tahuˈa Rahi tuiroo i rave no ratou?

¹⁵ Afea râ te Tahuˈa Rahi e “pohe” ai no te mau ‘taata ěê’ e te mau ‘taata purutia’ no teie nei tau, e faatiahia ˈtu ai ratou ia faarue i te oire haapuraa taipe? Eita taua mau melo o te feia rahi roa ra e nehenehe e haere oioi mai i rapae i taua mau oire haapuraa ra i muri aˈe i te ati rahi. No te aha hoi? No te mea e mau taata hara noâ ratou, e e tino hara to ratou e te titauhia nei ratou ia vai i raro aˈe i te parururaa o te Tahuˈa Rahi. Na roto i te fanaˈoraa ratou iho i te hoo i te roaraa o te tausani matahiti ratou e riro ai ei arii e ei tahuˈa, e tapae ratou i te huru taata tia. E pûpû atu ai Iesu ia ratou i te Atua ra no te hoê tamataraa hopea, te faaotiraa mure ore o to ratou haapao maitai na roto i te tuuraa ia Satani e ta ˈna mau demoni no te hoê taime poto noa. Ia manuïa ratou i te tamataraa o te farii maitai a te Atua, e faaoti o Iehova e e feia parau-tia ratou. E fanaˈo atu ai ratou i te huru taata tia i roto i to ˈna auraa taatoa.—Korinetia 1, 15:28; Apokalupo 20:7-10.a

16. Afea râ te feia o te ora ˈtu i te ati rahi e ore ai e titau faahou i te hoo a te Tahuˈa Rahi?

¹⁶ No reira ïa e tia i te feia atoa o te ora i te ati rahi ia tapea i te hoê haava manaˈo tia na roto i te faaea-noa-raa i roto i te oire haapuraa taipe tae roa i te taime e hope ai te Faatereraa tausani matahiti a te Mesia. Ei mau taata tia, eita ratou e hinaaro faahou i te tusia taraehara a te Tahuˈa Rahi e e matara mai ratou mai raro aˈe i ta ˈna parururaa. E pohe ïa o Iesu no ratou ei Tahuˈa Rahi, e aita e titau-faahou-hia e ia tia ˈtu oia no ratou e te toto tia o ta ˈna tusia. I taua taime ra ratou e faarue ai i te oire haapuraa taipe.

17. No te aha e aita e faufaa no te feia o te faatiahia i te roaraa o te Faatereraa tausani matahiti a te Mesia ia tomo i roto i te oire haapuraa taipe e ia faaea i roto?

¹⁷ E ô anei te feia o tei faatiahia i te roaraa o te Faatereraa tausani matahiti a Iesu i roto i te oire haapuraa taipe e e faaea anei ratou i reira tae roa i te poheraa o te tahuˈa rahi? Aita, no te mea na roto i to ratou poheraa ua aufau ratou i tei titauhia no to ratou tiaraa taata hara. (Roma 6:7; Hebera 9:27) Teie nei râ, e tauturu te Tahuˈa Rahi ia ratou ia tapae i te huru taata tia. Ia manuïa ratou i te tamataraa hopea i muri aˈe i te Mileniuma, e farii-atoa-hia ratou e te Atua ei taata parau-tia na roto i te haapapuraa o te ora mure ore i nia i te fenua nei. Oia mau, e afai mai te oreraa e apee i te mau titauraa a te Atua i te haavaraa faautuaraa e te haamouraa i nia i te mau taata atoa o te ore e manuïa i te tamataraa hopea ei feia haapao maitai.

18. No nia i te tiaraa arii e tahuˈa rahi o Iesu, eaha te vai mai i nia i te huitaata e a muri noa ˈtu?

¹⁸ Ia tae i te hoê mahana e pohe te mau tahuˈa rahi a Iseraela. Tera râ, ua “faarirohia [o Iesu] ei tahuˈa rahi e a muri noa ˈtu ia au i te parau ia Melehizedeka.” (Hebera 6:19, 20; 7:3) Eita râ te hoperaa o te ohipa a Iesu ei Tahuˈa Rahi i rotopu i te huitaata nei e haapohe ia ˈna. E vai noa mai te mau faahopearaa maitai o ta ˈna ohipa ei Arii e ei Tahuˈa Rahi i nia i te huitaata e a muri noa ˈtu, e tarahu ta te huitaata ia ˈna ra e a muri noa ˈtu no te ohipa o ta ˈna i rave i roto i taua tuhaa ra. Hau atu, no roto i te oraraa pohe ore, e rave o Iesu i te aratairaa i roto i te haamoriraa viivii ore a Iehova.—Philipi 2:5-11.

Te mau haapiiraa tano no tatou

19. Eaha te haapiiraa no nia i te riri e te here ta tatou e nehenehe e haapii na roto i te ravea o te mau oire haapuraa?

¹⁹ E rave rahi haapiiraa ta tatou e nehenehe e huti mai na roto i te mau ravea o te mau oire haapuraa. Ei hiˈoraa, aita e faatiahia i te hoê aˈe taata tei taparahi ma te riri uˈana i te hoê taata ia faaea i roto i te hoê oire haapuraa. (Numera 35:20, 21) Nafea râ te hoê taata i roto i te oire haapuraa taipe e faatia ˈi i te riri ia ô mai i roto i te mafatu no te hoê taeae? “O tei riri i tana taeae ra, e taparahi taata ïa,” ta te aposetolo Ioane i papai, “aore o te taparahi taata ra e ora mure ore e vai i roto ia ˈna ra.” Ia ‘aroha na râ tatou ia tatou iho: no ǒ mai te aroha i te Atua ra.’—Ioane 1, 3:15; 4:7.

20. No te paruru i te Taata tahoo, eaha te tia i te feia i roto i te oire haapuraa taipe ia rave?

²⁰ No te paruru ia tatou i te taata tahoo, e nehenehe te taata taparahi ma te opua ore e faaea i roto i te oire haapuraa e eiaha e haere i rapae mai i te fenua papu. Eaha ïa no te feia e faaea i roto i te oire haapuraa taipe? No te ora mai i te Taata tahoo rahi, eiaha ratou e faarue i te oire. Oia mau, e tia ia ratou ia ore e topa i roto i te mau tamataraa e haere i te hiti o te fenua papu, no te paraparau. E tia ia ratou ia haapao maitai ia ore e vaiiho i te here no te ao a Satani ia rahi mai i roto i to ratou mafatu. E titau te reira i te pure e te tutavaraa, e ora ratou maoti te reira.—Ioane 1, 2:15-17; 5:19.

21. Eaha te ohipa haamaitaihia e ravehia ra e te feia i roto i te oire haapuraa i teie nei mahana?

²¹ E tia i te mau taata taparahi ma te opua ore i roto i te mau oire haapuraa i tahito ra ia riro ei feia rave ohipa hotu mau. Ma te hoê â huru, ua horoa te mau “tamarii a Iseraela” i faatavaihia i te hoê hiˈoraa maitai roa ei feia ohipa i roto i te aua e ei feia poro i te Basileia. (Mataio 9:37, 38; Mareko 13:10) Ei ‘taata ěê’ e ei ‘taata purutia’ i roto i te oire haapuraa i teie nei mahana, ua haamaitaihia te mau kerisetiano e tiaturi ra e ora i nia i te fenua nei ia rave i teie ohipa faaora na muri i te feia i faatavaihia e vai noa ra i nia i te fenua nei. E auê hoi ohipa haamaitaihia te reira! E ape te feia e ohipa ra ma te haapao maitai i roto i te oire haapuraa taipe i te pohe mure ore i te rima o te Taata tahoo. Maoti râ, e roaa ia ratou i te mau haamaitairaa mure ore na roto i ta ˈna ohipa ei Tahuˈa Rahi tuiroo a te Atua. E faaea anei outou i roto i te oire haapuraa e e ora ˈtu ai e a muri noa ˈtu?

[Nota i raro i te api]

Nafea outou ia pahono?

◻ No te aha e nehenehe ai e parau e e utua toto ta te tau tau mirioni taata i nia i te fenua nei?

◻ Eaha te mau tuhaa ta Iesu Mesia e faaî ra no te huitaata nei?

◻ Eaha te oire haapuraa taipe, e nafea ia tomo atu i roto?

◻ Afea râ te mau taata e tiamâ roa mai ai i te oire haapuraa taipe?

◻ Eaha te haapiiraa faufaa ta tatou e nehenehe e huti mai na roto i te ravea o te mau oire haapuraa?

[Hohoˈa i te api 16]

Ua ite anei outou i te tuhaa faaora e faatupuhia ra e Iesu Mesia?