Eaha to outou tiaraa na mua ˈˈe te tupuraa o te haavaraa?

“Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana.”—MATAIO 25:31.

1-3. Eaha te tumu tatou e hiˈo ai i te haavaraa tia ma te tano?

‘FAAHAPAHIA AORE RA AORE E HAPA I ITEHIA?’ O te feruriraa ïa o e rave rahi ia faaroo ratou i te faaotiraa a te tahi tino haava. E tamata te mau haava e te mau melo maitihia no te faautua i te haava ma te tia, tera râ o te haavaraa tia noa anei te matara mai? Aita anei outou i faaroo aˈenei i te haavaraa tia ore e te mau faatura-ore-raa i te mau tiaraa i roto i te hoê tereraa i te pae o te haavaraa ture? E ere taua mau haavaraa tia ore i te ohipa apî, mai ta tatou e ite i roto i te faahohoˈaraa a Iesu e itehia ra i roto i te Luka 18:1-8.

² Noa ˈtu eaha ta outou i ite i roto i te haavaraa a te taata, a tapao na i te faaotiraa a Iesu: “E ore anei te Atua e faatia mai i to ˈna ra taata maitihia, o tei tiaoro atu ia ˈna i te rui e te ao? E faaite atu vau ia outou, e faatia mai ïa oia ia ratou e ore roa e mahia. Ia tae mai râ te Tamaiti a te taata nei, te vai ra anei te faaroo i te fenua nei?”

³ Oia, e haapao o Iehova e ia noaa i ta ˈna mau tavini i te pae hopea te haavaraa tia. Tei roto atoa o Iesu, i teie nei taime iho â ra no te mea te ora nei tatou i te “anotau hopea” o te faanahonahoraa o te mau mea e vai nei. E fatata roa o Iehova i te faaohipa i Ta ˈna Tamaiti puai mau no te faaore roa i te mau mea iino i nia i te fenua nei. (Timoteo 2, 3:1; Tesalonia 2, 1:7, 8; Apokalupo 19:11-16) E nehenehe e noaa ia tatou i te aravihi na roto i te tuhaa ohipa a Iesu i roto i te faahohoˈaraa hopea nei o ta ˈna i horoa, tei pii-pinepine-hia te parabole o te mau mamoe e te mau puaaniho.

4. Nafea tatou ia taa i te tau e tupu ai te parabole o te mau mamoe e te mau puaaniho, e no te aha e tia ˈi ia tatou ia haapao maite i te parabole i teie nei? (Maseli 4:18)

⁴ Ua taa ia tatou e te faataa ra te parabole ia Iesu o te parahi ra ei Arii i te matahiti 1914 e mai reira mai te haava nei oia—te ora mure ore no te mau taata e faaite papu ra e e mau mamoe ratou, te pohe mure ore no te mau puaaniho. Te titau ra te hiˈopoa-faahou-raa i te parabole i te tahi haamaramaramaraa i faatanohia i te tau e tupu ai ra e eaha ta te reira e faahohoˈa ra. Te haapapu ra teie maramarama tano aˈe i te faufaaraa o ta tatou ohipa pororaa e te auraa o te pahonoraa a te mau taata. No te ite i te niu o teie taa-hohonu-raa o te parabole, e hiˈopoa na tatou eaha ta te Bibilia e faaite ra no nia ia Iehova e ia Iesu, i nia i to raua tiaraa Arii e Haava.

Iehova ei Haava Teitei roa ˈˈe

5, 6. No te aha e mea tano ia hiˈo ia Iehova ei Arii e ei Haava atoa ra?

⁵ Te faatere nei o Iehova i te ao atoa nei ma te mana i nia i te mau mea atoa. No te mea e aita to ˈna e haamataraa e aita e hopea, o o ˈna te “Arii hau mure ore.” (Timoteo 1, 1:17; Salamo 90:2, 4; Apokalupo 15:3) E mana to ˈna no te horoa i te mau haapueraa parau, aore ra mau ture, e no te rave e ia faaturahia te reira. Tera râ te titau nei to ˈna mana e ia riro oia ei Haava. Te parau nei te Isaia 33:22 e: “O Iehova hoi to tatou haava; o Iehova ta tatou iriti ture; o Iehova to tatou arii; na ˈna tatou e faaora.”

⁶ Ua farii atea te mau tavini a te Atua ia Iehova mai te Haava i te mau ohipa e te mau faahopearaa. Ei hiˈoraa, i muri aˈe to “te Haava i to te ao atoa nei” iteraa e ua ino roa iho â o Sodoma e o Gomora, ua haava oia e mea tia e ia haamouhia i te feia e ora i reira e ua faaohipa oia i ta ˈna haavaraa tia mau. (Genese 18:20-33; Ioba 34:10-12) Te turai mau nei hoi te reira ia tatou ia ite e e Haava tia mau o Iehova o te nehenehe e faatupu i ta ˈna mau haavaraa!

7. Mea nafea to Iehova ohiparaa ei Haava no te haapao ia Iseraela?

⁷ I Iseraela i tahito ra, i te tahi taime ua horoa tahaa roa o Iehova i te haavaraa. Aita anei outou e mahanahana ra ia ite e te vai ra te hoê Haava tia e faaoti ra i te mau ohipa? (Levitiko 24:10-16; Numera 15:32-36; 27:1-11) Te horoa atoa nei te Atua i te mau ‘faaotiraa i te pae o te haavaraa’ e mea tano te taatoaraa ei hiˈoraa no te haavaraa. (Levitiko 25:18, 19; Nehemia 9:13; Salamo 19:9, 10; 119:7, 75, 164; 147:19, 20) O o ˈna te “Haava i to te ao atoa nei,” no reira te ô atoa ra tatou paatoa i roto.—Hebera 12:23.

8. Eaha te orama tano maitai ta Daniela i ite?

⁸ Te vai ra ia tatou i te mau “ite” o te tuea ra i taua tumu parau ra. Ua horoahia i te peropheta ra o Daniela i te hoê orama o te mau puaa taehae o te tia ra no te pae o te mau faatereraa aore ra mau hau emepera. (Daniela 7:1-8, 17) Ua parau faahou atu oia e: “E haamauhia ihora te mau terono e ua parahi maira To te mau mahana tahito ra, o tei au to ˈna ahu i te hiona i te teatea.” (Daniela 7:9) A tapao na e ua ite o Daniela i te mau terono “e ua parahi maira To te mau mahana tahito ra [Iehova].” A uiui na ia outou iho e, ‘Ua ite anei o Daniela i ǒ nei i te Atua i te riroraa ei Arii?’

9. Eaha te hoê auraa o te parau ra ‘parahi maira’ i nia i te hoê terono? A horoa i te mau hiˈoraa.

⁹ Oia mau, ia taio tatou e te hoê taata ua “parahi maira” i nia i te hoê terono, e manaˈo paha tatou e riro maira oia ei arii, e faaohipa te bibilia i te tahi taime i taua huru parau ra. Ei hiˈoraa: “E tei te riroraa te hau [ia Zimeri] ra, e ua mau oia i nia i to ˈna terono, e ua . . .” (Te mau arii 1, 16:11; Te mau arii 2, 10:30; 15:12; Ieremia 33:17) Te parau nei te hoê parau tohu no nia i te Mesia e: “E parahi oia i nia i to ˈna terono ma te mana.” Teie nei râ, te auraa e ‘parahi i nia i te terono’ oia hoi te riroraa ïa ei arii. (Zekaria 6:12, 13) Ua faataahia o Iehova ei Arii o te parahi ra i nia i te hoê terono. (Te mau arii 1, 22:19; Isaia 6:1; Apokalupo 4:1-3) O o ˈna te “Arii hau mure ore.” No reira, ua haapapu oia i te hoê tuhaa apî no nia i to ˈna tiaraa mana arii, e parau atu tatou e ua riro oia ei Arii, mai te huru ra e mea apî to ˈna parahiraa i nia i te terono.—Paraleipomeno 1, 16:1, 31; Isaia 52:7; Apokalupo 11:15-17; 15:3; 19:1, 2, 6.

10. Eaha te hopoia matamua a te mau arii i Iseraela? A faahohoˈa na.

¹⁰ O te reira râ te tuhaa faufaa: Te ohipa matamua a te mau arii i tahito ra o te faarooraa ïa i te mau hororaa e te horoaraa i te haavaraa. (Maseli 29:14) A haamanaˈo na i te haavaraa paari mau a Solomona a ani onoono ai e piti vahine i te hoê â aiû. (Te mau arii 1, 3:16-28; Paraleipomeno 2, 9:8) O te “poretiko no te terono ei reira oia haava ai i te taata” te hoê o te mau fare a te hau te pii-atoa-hia “poretiko haavaraa.” (Te mau arii 1, 7:7) Ua faataahia o Ierusalema ei vahi i reira “te mau terono haava ra i te haamauraahia.” (Salamo 122:5) Papu maitai, e nehenehe atoa e matara mai te auraa ‘te parahiraa i nia i te hoê terono’ te faaohiparaa i te hoê mana i te pae haavaraa.—Exodo 18:13; Maseli 20:8.

11, 12. (a) Eaha te faufaaraa ia parahi mai o Iehova, tei faahitihia i roto i te Daniela pene 7? (b) Nafea te tahi atu mau irava ia haapapu e ua parahi o Iehova no te haava?

¹¹ I teie nei e hoˈi na tatou i te hohoˈa i reira to Daniela iteraa e ‘ua parahi maira To te mau mahana tahito ra.’ Te parau faahou ra Daniela 7:10 e: “Parahi ihora te haavaraa, e ua heheuhia te mau buka.” Oia mau, te parahi ra To te mau mahana tahito ra no te horoa i te hoê haavaraa no nia i te faatereraa na te ao nei e no te haava e ua tano te faatereraa e ia horoahia i te Tamaiti a te taata nei. (Daniela 7:13, 14) I muri iho, te taio nei tatou e “tae maira To te mahana tahito ra, e ua tuuhia mai te haavaraa i te feia moˈa,” e rave amui taua mau taata ra i te ohipa no te faatere e te Tamaiti a te taata. (Daniela 7:22) I te pae hopea “e parahihia râ te haavaraa” e ua faaotihia te haavaraa i nia i te puai o te ao hopea nei.—Daniela 7:26.a

¹² Ei faahopearaa, ua ite aˈera o Daniela i te Atua e ‘parahi ra i nia i te hoê terono’ teie ïa te auraa e te tae maira oia no te horoa i te haavaraa. Na mua ˈˈe, ua himene o Davida e: “Ua tauturu mai oe [Iehova] ia ˈu i ta ˈu nei parau au e te parau-tia ra; ua parahi oe i nia i te terono ma te haapao i te parau-tia.” (Salamo 9:4, 7) E ua papai o Ioela e: “Faaaraara mai te mau fenua, e haere mai i te pohe o Iehosaphata: ei reira vau [Iehova] e parahi ai e haava i te mau fenua e haaati mai nei.” (Ioela 3:12; a faaau e te Isaia 16:5.) Ua ô aˈena o Iesu e o Paulo i roto i te hoê huru tupuraa i te pae o te haavaraa i reira te hoê taata e parahi ai no te faaroo i te hoê hororaa e e horoa atu ai i te hoê haavaraa.b—Ioane 19:12-16; Ohipa 23:3; 25:6.

Te tiaraa o Iesu

13, 14. (a) Eaha te haapapuraa e vai ra i te mau tavini a te Atua e e riro mau â o Iesu ei Arii? (b) Afea râ to Iesu parahiraa i nia i to ˈna terono, e i roto i teihea auraa oia e faatere ai mai te matahiti 33 o to tatou nei tau mai â?

¹³ Ua riro o Iehova ei Arii e ei Haava. Eaha ïa no Iesu? Ua parau te melahi i faaite i to ˈna fanauraa e: “Na te Atua e horoa mai i te terono o to ˈna ra metua o Davida no ˈna: . . . e ore roa to ˈna basileia e mure.” (Luka 1:32, 33) O Iesu te taata e fatu tamau i te tiaraa arii no te fare o Davida. (Samuela 2, 7:12-16) E faatere oia mai te raˈi mai, no reira o Davida i parau ai e: “Ua parau atura o Iehova i tau Fatu [Iesu], E parahi oe i tau rima atau nei; e ia faarirohia e au to mau enemi ei taahiraa avae no oe. E faatae atu â o Iehova i te sepeta ra o to oe mana mai Ziona ˈtu nei: e arii hoi oe i rotopu i to mau enemi ra.”—Salamo 110:1-4.

¹⁴ Afea râ te reira e tupu ai? Aita o Iesu i faatere ei Arii i to ˈna riroraa ei taata. (Ioane 18:33-37) I te matahiti 33 o to tatou nei tau, ua pohe oia, ua faatiahia, e ua hoˈi atura i nia i te raˈi. Te parau ra te Hebera 10:12 e: “Area te Mesia, oti aˈera ta ˈna tusia hoê i te pûpûhia ei taraehara faufaa mure ore, parahi atura i te rima atau o te Atua ra.” Eaha te mana i roaa ia Iesu? “Haaparahi ihora [te Atua] ia ˈna i to ˈna iho rima atau i te basileia ra i te ao; i nia ê roa i te mau arii, e te feia mana, e te puai, e te rahi . . . e ua haapao hoi ia ˈna ei upoo i nia iho i te mau mea atoa i te ekalesia nei.” (Ephesia 1:20-22) No te mea ua noaa ia Iesu i te mana faatere i nia i te mau kerisetiano, ua papai aˈera o Paulo e “tei faaora ia tatou i te varua mana o te pouri, e ua tahiti ê mai ia tatou i roto i te basileia o ta ˈna Tamaiti here ra.”—Kolosa 1:13; 3:1.

15, 16. (a) No te aha tatou e parau ai e aita o Iesu i riro ei Arii o te Basileia i te matahiti 33 o to tatou nei tau? (b) Afea râ to Iesu haamataraa i te faatere i roto i te Basileia o te Atua?

¹⁵ I taua râ taime, aita o Iesu i ohipa ei Arii e ei Haava i nia i te mau nunaa atoa. Ua parahi oia i pihai iho i te Atua, ma te tiai i te taime e ohipa ˈi oia ei Arii no te Basileia o te Atua. Ua papai o Paulo no ˈna e: “O vai to taua mau melahi ra ta ˈna i parau noa ˈtu mai tahito mai â e, A parahi i tau rima atau nei, e ia faariro vau i to mau enemi ei taahiraa avae no oe?”—Hebera 1:13.

¹⁶ Ua nenei te mau Ite no Iehova e rave rahi haapapuraa e ua hope te tau tiairaa a Iesu i te matahiti 1914, i te taime oia i riro ai ei faatere i roto i te Basileia o te Atua i roto i te mau raˈi itea-ore-hia. Te parau ra te Apokalupo 11:15, 18 e: “O te basileia ra o teie nei ao ua riro ei basileia no to tatou Fatu e no ta ˈna ra Mesia, e e vai ïa te hau ia ˈna e a muri noa ˈtu.” “I riri na te mau fenua, e ua itea mai to oe riri.” Oia mau, ua faaite te mau nunaa i to ratou riri i nia i te tahi e te tahi i te roaraa o te Tamaˈi Rahi Matamua. (Luka 21:24) Te haapapu nei te mau tamaˈi, te mau aueueraa fenua, te mau maˈi, te mau oˈe e te vai atu â, ta tatou i ite mai te matahiti 1914 mai â e te faatere ra o Iesu i teie nei i roto i te Basileia o te Atua, e te fatata maira te hopea o te ao nei.—Mataio 24:3-14.

17. Eaha te tuhaa faufaa ta tatou i haamau aˈena?

¹⁷ E mau parau haamanaˈoraa noa to muri mai: E nehenehe e parauhia e te parahi ra te Atua i nia i te terono ei Arii, i roto râ i te tahi atu auraa e nehenehe oia e parahi i nia i to ˈna iho terono no te haava. I te matahiti 33 o to tatou nei tau, ua parahi na o Iesu Mesia i te rima atau o te Atua, e i teie nei o oia te Arii o te Basileia. Te faatere ra anei o Iesu i teie nei ei Arii, e te tavini râ anei oia ei Haava? E no te aha tatou e anaanatae ai i te reira, i teie taime iho â râ?

18. Eaha te haapapuraa e vai ra e e riro atoa o Iesu ei Haava?

¹⁸ Ua maiti o Iehova, tei ia ˈna ra te tiaraa haava, ia Iesu mai te hoê Haava o te faahope nei i Ta ˈna mau titauraa. Ua faaite o Iesu i te reira i to ˈna aparauraa no nia i te mau taata o tei riro ei mau taata ora i te pae varua: “Aore roa hoi a te Metua taata i haava, ua pûpû-hua-hia mai te haava i te Tamaiti.” (Ioane 5:22) No reira, tei nia aˈe te tuhaa i te pae o te tiribuna a Iesu i taua huru haavaraa ra, no te mea e haava oia i te feia e ora nei e te feia i pohe. (Ohipa 10:42; Timoteo 2, 4:1) Ua parau o Paulo i te hoê taime e: “Ua haapaohia e [te Atua] te mahana e haava mai ai oia i to te ao atoa nei ma te parau-tia, i te taata [Iesu] i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira.”—Ohipa 17:31; Salamo 72:2-7.

19. No te aha e ua tano e ia parauhia e te parahi ra o Iesu ei Haava?

¹⁹ E nehenehe anei tatou e haapapu ei faahopearaa e te parahi ra o Iesu i nia te hoê terono hanahana i roto i te tiaraa taa maitai o te taata Haava? E. Ua parau atu o Iesu i te mau aposetolo e: “Ia tae i te faahouraa ra, ia parahi te Tamaiti a te taata i nia iho i to ˈna terono hanahana, e parahi atoa outou, o tei pee mai ia ˈu nei, i nia iho i te terono hoê ahuru e ma piti i te haavaraa i te mau opu o Iseraela tino ahuru ma piti ra.” (Mataio 19:28) Noa ˈtu e i teie nei e o Iesu te Arii o te Basileia, tei nia atoa te feia i faahitihia aˈenei i roto i te Mataio 19:28 i te parahiraa i nia i te hoê terono no te haava i te roaraa o te Mileniuma. I taua tau ra e haava oia i te huitaata atoa nei, te feia parau-tia e te feia parau-tia ore. (Ohipa 24:15) E mea titauhia mau â e ia tapea tatou i te reira i roto i to tatou feruriraa, a huri tia ˈtu tatou i to tatou ara-maite-raa i nia i te hoê o te mau parabole a Iesu e faataa ra i to tatou nei tau e to tatou nei oraraa.

Eaha mau na ta te parabole e parau ra?

20, 21. Eaha ta te mau aposetolo i ani o te faataa ra i to tatou nei tau, ma te aratai i teihea uiraa?

²⁰ Tau taime noa na mua ˈˈe o Iesu e pohe ai, ua ani ta ˈna mau aposetolo ia ˈna e: “E faaite mai oe ia matou i te tupuraa o taua mau mea nei? e te tapao o to oe [vairaa] mai e te hopea o [te mau mea e vai nei]?” (Mataio 24:3) Ua tohu o Iesu i te mau huru tupuraa papu i nia i te fenua nei na mua ˈˈe ‘te hopea e tae mai ai.’ Na mua ˈˈe te hopea e tae mai ai, e ite te mau nunaa “ia hiˈo ratou i te Tamaiti a te taata i te haerea mai na nia i te ata o te raˈi ra, ma te mana e te hanahana rahi.”—Mataio 24:14, 29, 30.

²¹ Eaha râ te huru o te mau taata o te mau nunaa ia tae mai te Tamaiti a te taata nei i roto i to ˈna hanahana? E hiˈo atu na tatou i roto i te parabole o te mau mamoe e te mau puaaniho, o te haamata na roto i teie nei mau parau e: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro.”—Mataio 25:31, 32.

22, 23. Eaha te tuhaa e faaite ra e aita te parabole o te mau mamoe e te mau puaaniho i haamata i te tupu i te matahiti 1914?

²² Ua tano anei taua parabole ra i te taime o Iesu i parahi ai na roto i te puai o te arii i te matahiti 1914, mai ta tatou i taa aˈena? Oia mau, te faahiti ra te Mataio 25:34 ia ˈna i nia i to ˈna tiaraa Arii, i te tanoraa mau ua tupu ïa te parabole i te taime o Iesu i riro ai ei Arii i te matahiti 1914. Eaha te haavaraa ta ˈna i rave aita i maoro i muri aˈe? E ere ïa i te haavaraa i “te mau fenua atoa.” Tera râ, ua huri tia ˈtu oia i to ˈna ara-maite-raa i nia i te feia e parau nei e o ratou “te utuafare o te Atua.” (Petero 1, 4:17) Ia au i te manaˈo i roto i te Malaki 3:1-3, te hiˈopoa nei o Iesu i te pae o te haavaraa, na nia i to ˈna tiaraa vea a Iehova i te toea o te mau kerisetiano i faatavaihia i nia i te fenua nei. O te reira atoa te taime no te faatupu i te haavaraa i nia i te amuiraa faaroo kerisetiano, o tei faahua parau e o ratou “te utuafare o te Atua.”c (Apokalupo 17:1, 2; 18:4-8) Aita roa hoê aˈe ohipa i haapapu e i taua taime ra, aore ra mai reira mai â, ua parahi o Iesu no te haava i te mau fenua atoa i te pae hopea ei mamoe e ei puaaniho.

²³ Ia tuatapapa tatou i te ohipa a Iesu i roto i te parabole, te ite noa nei tatou ia ˈna e haava ra i te mau fenua atoa. Aita te parabole e faaite ra e te tamau ra taua haavaraa i nia i te hoê area tau roa e rave rahi matahiti, mai te huru ra e ua haavahia te mau taata atoa i pohe i teie nau ahuru matahiti i mairi aˈenei e au ia ratou i te pohe mure ore aore ra te ora mure ore. E au ra e te rahiraa o te mau taata i pohe aˈenei tei roto ratou i te menema no te huitaata nei. (Apokalupo 6:8; 20:13) Te faataa nei râ te parabole i te tau o Iesu e haava ˈi te mau taata o “te mau fenua atoa” o te ora i taua taime ra e o te faaruru i te faaotiraa o ta ˈna mau haavaraa.

24. Afea râ te parabole o te mau mamoe e te mau puaaniho i te tupuraa?

²⁴ Na roto i te tahi atu parau, te faaite ra te parabole i te ohipa e tupu a muri aˈe ia haere mai te Tamaiti a te taata nei i roto i to ˈna hanahana. E parahi oia no te haava i te mau taata e ora ra i taua taime ra. E niuhia ta ˈna haavaraa i nia i te mea o ta ratou iho i faatupu. I taua taime ra “te huru-ê-raa i te taata parau tia e te taata parau ino” e haapapu-maitai-hia. (Malaki 3:18) E tae roa te faaiteraa e te faatupuraa i te haavaraa i te hoê tau taotiahia. I reira o Iesu e horoa ˈi i te mau faaotiraa tano tei niuhia i nia i te mea e ite-papu-hia i nia i te mau taata tataitahi.—A hiˈo atoa i te Korinetia 2, 5:10.

25. Eaha ta Mataio 25:31 e faataa ra ma te parau e te parahi ra te Tamaiti a te taata nei i nia i to ˈna terono hanahana?

²⁵ Te auraa ïa ‘te parahi ra o Iesu i nia i to ˈna terono hanahana’ no te haava, tei faaitehia i roto i te Mataio 25:31, e tano no te hoê tau a muri aˈe ia parahi taua Arii puai ra no te faahiti i te haavaraa i nia i te mau nunaa. Oia mau, ua faaauhia te hohoˈa haavaraa e faataa ra ia Iesu i roto i te Mataio 25:31-33, 46 i te hohoˈa i roto i te Daniela pene 7, ia parahi te Arii e faatere ra, To te mau mahana tahito ra, no te amo i to ˈna tiaraa ei Haava.

26. Eaha te faataaraa apî o te parabole o te ite-maitai-hia?

²⁶ Ia na reira tatou i te taa i te parabole o te mau mamoe e te mau puaaniho, te faaite ra ïa e no a muri aˈe te faahitiraa i te haavaraa o te mau mamoe e o te mau puaaniho. E tupu te reira i muri aˈe i te “ati rahi” i faahitihia i roto i te Mataio 24:29, 30 e ‘ia tae mai te Tamaiti a te taata nei i roto i to ˈna hanahana.’ (A faaau e te Mareko 13:24-26.) I reira, ia mou anaˈe te faanahonahoraa ino atoa, e faatupu ai o Iesu i ta ˈna hiˈopoaraa e e horoa oia e e faatupu oia i ta ˈna haavaraa hopea.—Ioane 5:30; Tesalonia 2, 1:7-10.

27. No te aha tatou e anaanatae ai ia ite no nia i te parabole hopea a Iesu?

²⁷ Te haapapu nei te reira i to tatou taaraa i te tau o te parabole a Iesu, o te faaite ra e afea râ te mau mamoe e te mau puaaniho e haavahia ˈi. E nafea râ te reira ia hauti i nia ia tatou o te itoito noa ra no te poro i te parau apî maitai o te Basileia? (Mataio 24:14) Te faaiti ra anei te reira i te faufaaraa o ta tatou ohipa, aore ra te horoa ra anei i te hoê faito hopoia rahi atu â? E hiˈopoa na tatou i te tumu parau i muri iho e nafea te reira ia hauti i nia ia tatou.

[Nota i raro i te api]

Te haamanaˈo ra anei outou?

◻ Mea nafea to Iehova ohiparaa ei Arii e ei Haava atoa?

◻ Eaha na auraa e piti e nehenehe e horoa no te parau ra ‘parahi i nia i te hoê terono’?

◻ Eaha ta tatou i parau aˈena no nia i te tau o te tupuraa o te Mataio 25:31, eaha râ te niu te tia ia rave no te faatitiaifaro i te huru hiˈoraa?

◻ Afea râ te Tamaiti a te taata i te parahiraa i nia i to ˈna terono, mai tei faaitehia i roto i te Mataio 25:31?