Te naearaa i te mau huru taata atoa i Ateno o teie nei tau

I TO te aposetolo Paulo tereraa ˈtu i Ateno i te area matahiti 50 o to tatou nei tau, e pu tapihooraa faufaa mau noâ te oire, noa ˈtu e aita oia e fanaˈo faahou ra i te hanahana matau-maitai-hia o to ˈna ra oraraa tahito. Te faataa ra te hoê buka aamu e: “Ua tamau noa o [Ateno] i te riro ei oire rahi i te pae varua e i te pae o te ohipa aravihi no Heleni, ei vahi hinaarohia atoa no te mau tere o te taata haapiihia e te puai no taua vahi ra.”

I reira, eita e ore ua nehenehe o Paulo e poro atu i te mau ati Iuda, te feia etene no Ateno, e te mau taata no roto mai e rave rahi mau fenua. Ei taata faaara e ei taata haapii aravihi, ua parau oia i roto i te hoê oreroraa parau e ua horoa te Atua ‘i te mau taata atoa te ora e te aho,’ e “na ˈna i hamani i te taata i te mau fenua atoa nei i te toto o te taata hoê ra,” e ia nehenehe “te taata atoa e tatarahapa, eiaha ei vahi toe” no te mea e haava Oia i “to te ao atoa nei.”—Ohipa 17:25-31.

Hoê tuhaa fenua huru rau

Tau ahuru matahiti aita i maoro aˈenei, ua riro faahou â o Ateno ei oire o te arato nei i te manaˈo o te mau taata no te mau vahi atoa. Ua haere atu te mau tia e te mau faehau i reira no te tahi mau hopoia ěê. Te faaea ra te mau taurearea no Afirika e no te pae Hitia o te râ no Ropu i reira ei feia haere haapiiraa tuatoru. Ua faaea te feia rave ohipa no Afirika, Asia, e no te mau fenua no Europa Hitia o te râ ma i reira. E rave rahi feia no Philipino e no Asia Apatoa Hitia o te râ ma, o tei haere atu i reira no te imi i te tahi ohipa tavini fare. E te vai ra i te hoê rahiraa taata tamau no te mau fenua tapiri o tei horo e te tahi mau vahi arepurepu i nia i te fenua atoa nei.

E tautooraa teie huru tupuraa no te feia poro i te parau apî maitai o te Basileia no taua vahi ra. Te paraparau nei te rahiraa o te feia e faaea poto ra i reira i te reo Beretane, te paraparau noa nei râ vetahi i to ratou mau reo tumu. E rave rahi ihotumu e faaroo to teie mau taata. I rotopu i te feia ratere, e nehenehe outou e farerei i te feia e parau ra e e kerisetiano ratou, te mau Mahometa, te mau Hindous, te feia haamori ia Bouddha, te feia haamori i te mau animala, te feia e feaa ra i te vai-mau-raa o te Atua, e te feia tiaturi ore i te Atua. E tia i te mau Ite no Iehova ia haapii i te faatuea i ta ratou mau faaiteraa no te faaau i te mau ihotumu rave rau o teie mau taata.

I te mea e ua faaruru teie mau taata apî e rave rahi i te mau taime fifi mau, mea pinepine e uiraa ta ratou no nia i te auraa o te oraraa e te mau tiaturiraa no te tau no a muri aˈe. Te haafaufaa rahi nei vetahi i te Bibilia e aita e fifi aˈe no ratou ia farii i ta ˈna parau. E taata haehaa, anaanatae, e tei poia i te parau mau te rahiraa i roto i taua tuhaa fenua huru rau ra. Te tiamâ nei ratou i te maimiraa i te parau mau no te mea ua atea ê ratou i to ratou utuafare e to ratou vahi faaearaa.

Ua haamauhia te amuiraa beretane matamua i Ateno i te matahiti 1986 no te ohipa i roto i teie tuhaa fenua. Mea faahiahia mau â te maraaraa. I te roaraa o na matahiti e pae i mairi aˈenei, tau 80 feia o tei bapetizo-apî-hia. Te faahopearaa oia hoi ua haamauhia te hoê amuiraa arabia, te hoê amuiraa polonia, e no te hoê area taime, te hoê pǔpǔ farani i Ateno. Ua haere vetahi no te amuiraa beretane e tauturu i te tahi atu mau amuiraa e mau pǔpǔ i Tesalonia i te pae apatoerau, i Heraklion, Crete, e i Piraeus, te uahu no Ateno. Te hinaaro ra anei outou e farerei i te tahi mau taata ěê o tei haapii i te parau mau i Ateno?

Te tomo maira te feia no te mau nunaa tei hinaarohia

Ua fanauhia o Thomas i Asmara, Eritrea, e ua paari mai oia ei katolika paieti rahi. I te 15raa o to ˈna matahiti, ua faaô oia i roto i te hoê fare monahi. Ua ani oia i te monahi rahi e: “Nafea e nehenehe ai te hoê Atua e riro ei Atua tootoru?” Ua pahono maira te monahi rahi e: “No te mea te farii nei tatou i te parau a te pâpa no nia i te mau mea i te pae varua. Inaha, e miterio te reira, e mea apî roa oe no te taa i te reira.” I muri aˈe e pae matahiti i roto i te fare monahi, ua faarue aˈera o Thomas, ma te ore e vare faahou e ma te inoino i te haerea e te mau haapiiraa a te ekalesia. Aita râ o ˈna i faaea i te imi i te Atua mau.

I te hoê mahana i muri noa ˈˈe i to ˈna haereraa i Ateno, ua itea mai ia ˈna te hoê vea Te Pare Tiairaa, e teie te upoo parau “E nehenehe oe e fanaˈo i te oraora-maitai-raa e te oaoa.” Ua taio oia i te reira e rave rahi taime. I roto i taua noâ vea ra, ua taio o ˈna e e tia ia ˈna ia imi na mua i te Basileia o te Atua e to ˈna parau-tia. (Mataio 6:33) Ua tuturi aˈera o Thomas i raro e ua ani i te Atua e ia faaite mai ia ˈna e nafea râ, ma te fafau e: “Mai te peu e e faaite mai oe ia ˈu e nafea ia imi i to oe Basileia, e pûpû vau e ono avaˈe o to ˈu oraraa no te haapii e nafea râ ia tavini ia oe.” E maha hebedoma i muri aˈe i te reira, ua patoto aˈera e piti Ite i to ˈna uputa. Ua farii oioi o Thomas i te hoê haapiiraa bibilia, e hoê ahuru avaˈe i muri iho ua bapetizohia oia. Te parau ra o ˈna e: “Ua pahono mau o Iehova i ta ˈu pure, e ua horoa mai oia i te ravea ia riro vau ei Ite no ˈna. I teie nei te turai ra to ˈna here ia ˈu ia imi na mua i to ˈna Basileia e ta ˈna parau-tia i roto i to ˈu oraraa.”

A poro ai i tera e tera uputa, ua ite e piti Ite ê atu i te hoê iˈoa ěê i nia i te opani i pihai iho i te ǒe.

“Eaha ta outou e hinaaro ra?” ta te hoê reo vahine i parau na roto i te niuniu fare.

Ua parau te hoê o na Ite e piti e te tamata ra raua i te imi i te mau taata e paraparau ra i te reo Beretane e o tei anaanatae i te Bibilia.

“Eaha ta outou haapaoraa?” ta te vahine i ani atu.

“E Ite no Iehova mâua.”

“Na reira ïa! A paiuma mai i nia.”

Ua paiuma aˈera raua e, a matara ˈi te opani o te piha utaraa taata, te tia noa ra te hoê tane poria mau e e au ra e aita e au maira. Ua tuô maira râ te vahine na roto mai.

“A faatomo mai ia raua i roto. Te hinaaro ra vau e tauaparau ia raua.”

Ua parau atura oia e ua tere o ˈna na te ao nei e te pǔpǔ tuaro a ta ˈna tane, e inanahi noa ra, ua pure o ˈna e ia itea ia ˈna i te mau Ite no Iehova. Ua haamata ïa te hoê haapiiraa bibilia. I te mea e mea poto roa te taime e faaea ˈi ratou i Heleni, ua faanahohia e toru haapiiraa i te hebedoma, ua hope roa te buka E ora e a muri noa ˈtu i roto hoê ahuru hebedoma noa.

Ua faahoˈi te tataˈuraa tuaro no muri iho ia ratou i Heleni. Ua haapii faahou te vahine e ua haere roa o ˈna i mua. E piti avaˈe i muri iho, ua apiti oia i te mau Ite i roto i te ohipa pororaa ei taata poro bapetizo-ore-hia e ua haamata oioi i ta ˈna haapiiraa bibilia matamua. Ia vai? Ta ˈna tane, o tei maere roa i te mau Ite e i te mau tauiraa ta ta ˈna vahine i faatupu.

Ua paari o Allan, te tamaiti a te hoê orometua porotetani, i Afirika apatoa. Mai to ˈna tamariiriiraa mai â, ua tiaturi papu o ˈna e ua riro te Bibilia ei faaiteraa faauruahia mai e te Atua. Ma te mauruuru ore i ta ˈna haapaoraa, ua fariu aˈera i nia i te haapiiraa philosopho e politita, ua hau roa ˈtu â râ o ˈna i te inoino. I muri aˈe i to ˈna tereraa ˈtu i Heleni, ua rahi roa to ˈna inoino. Ua manaˈo o ˈna e aita e tumu to to ˈna oraraa, tei nia o ˈna i te purumu o te aratai ia ˈna i te vahi papu ore.

I te hoê po ua tupu te hoê ohipa. “Ua tuturi au i raro e ua haamahora vau i to ˈu mafatu i te Atua ra,” ta Allan e faatia ra. “Ma te roimata oto no te haerea o to ˈu oraraa, ua ani au i te Atua ia aratai ia ˈu i ta ˈna mau pǐpǐ mau ra. Ua fafau vau ia ˈna e e haere au na te maramarama o ta ˈna aratairaa.” I roto i te hebedoma, tei roto o ˈna i te hoê fare toa e ua tauaparau aˈera e te fatu o te fare toa, hoê vahine, e Ite oia. Ua riro mau â taua tauaparauraa ra ei tauiraa rahi i roto i te oraraa o Allan. “I te mau mahana i muri iho, aita vau i tiaturi faahou i ta ˈu mau haapiiraa tahito herehia e au: Te Toru Tahi, te po auahi, te pohe-ore-raa o te nephe—e ere roa ˈtu hoi i te mau haapiiraa bibilia.” I te Piha no te Basileia, ua ani atu e piti nau hoa faaipoipo e haapii i te Bibilia e o ˈna. Ua farii e ua haere oioi oia i mua. “Ua faataˈi oaoa te parau mau ia ˈu,” ta Allan e haamanaˈo ra, “e ua faatiamâ te reira ia ˈu.” Hoê matahiti i muri iho ua bapetizohia oia. I teie nei mahana te oaoa ra o ˈna i te tavini ei tavini tauturu i roto i te amuiraa o taua vahi ra.

No Nigeria mai o Elizabeth, i reira to ˈna maimiraa i te Atua i roto e rave rahi mau ekalesia, aita râ o ˈna i mauruuru. Te mea o tei haafaufau rahi roa ˈˈe ia ˈna o te haapiiraa ïa no nia i te haamauiuiraa mure ore i roto i te po auahi. I to ˈna haereraa ˈtu i Ateno e to ˈna utuafare, ua haere mai aˈera e piti Ite i to ˈna ra uputa, e ua faaterehia te hoê haapiiraa bibilia. Ua putapû roa o Elizabeth i to ˈna haapiiraa e aita te Atua e haamauiui ra i te mau taata, te pûpû nei râ i te tiaturiraa o te ora mure ore i nia i te fenua o te riro ei paradaiso. Te hapu ra o ˈna i te maharaa o ta ˈna tamarii, e o ta ˈna i hinaaro e haamarua. I muri iho ua haapii o ˈna i roto i te Bibilia i te manaˈo o Iehova no nia i te moˈaraa o te ora. E tamahine nehenehe mau ta ˈna i teie nei. Ua haere oioi o Elizabeth i mua e aita i maoro ua bapetizo aˈera ia ˈna. Noa ˈtu e e maha tamarii e e ohipa taime taatoa ta ˈna, ua nehenehe o ˈna e rave i te taviniraa pionie tauturu fatata i te mau avaˈe atoa. Ua haamaitaihia o ˈna i to ˈna iteraa i ta ˈna tane i te haapiiraa i te Bibilia. Te parau ra o ˈna e: “Ua itea ˈtura ia ˈu i te Atua mau e te haamoriraa mau, maoti ia Iehova e i ta ˈna faanahonahoraa here mau.”

E rave rahi mau taata i roto i taua tuhaa fenua huru rau ra o te farereihia i roto i te pororaa na te mau aroâ, e titauhia râ te tuutuu ore no te faatupu i to ratou anaanatae. O te tupuraa ïa i farereihia e te hoê vahine apî o Sallay to ˈna iˈoa, no Sierra Leone mai. Ua horoa te hoê Ite i te hoê api parau iti na ˈna, ua horoa oia i ta ˈna vahi faaearaa, e ua faanaho oia e ia farerei-faahou-hia o ˈna. Ua anaanatae e ua farii o Sallay i te hoê haapiiraa bibilia, no te mau faateimaharaa râ i te pae ohipa e vetahi atu mau fifi, aita te reira i rave-tamau-hia. I muri iho ua haere tauê o ˈna ma te ore e faaite i ta ˈna vahi faaearaa apî. Ua tamau noa te Ite i te haere i to ˈna fare tahito, e ua afai aˈera o Sallay i te hoê poroi i te Ite e ia haere o ˈna i to ˈna fare apî.

Mea tamau te haapiiraa i teie nei noa ˈtu e tei te mau avaˈe hopea o te hapuraa o Sallay. I muri aˈe i to ˈna fanauraa i te aiû, ua riro maira o Sallay ei taata poro bapetizo-ore-hia. E au ra e mea ohie roa te reira, e ere roa ˈtu râ. I te hora 6H30 i te poipoi, e tia ia ˈna ia faaineine no te rave i te pereoo uta taata afa hora te maoro no te vaiiho i ta ˈna pepe i te fare haapiiraa tamahou, i muri iho no te rave i te tahi atu pereoo uta taata no te haere i te ohipa. I muri aˈe i ta ˈna ohipa tamâraa, e tere faahou o ˈna no te hoˈi i te fare. I te mau po o te putuputuraa, aore ra ia haere o ˈna i roto i te pororaa, e rave o ˈna i te pereoo uta taata hoê hora faahou te maoro no te tere tataitahi, noa ˈtu te patoiraa a ta ˈna tane. Ma te here ia ˈna e te faaoromai, ua haere o ˈna i mua tae roa ˈtu i te pûpûraa e te bapetizoraa. Eaha ïa no ta ˈna tane? Ua haere oia i te oroa Haamanaˈoraa o te poheraa o te Mesia e ua farii o ˈna i te hoê haapiiraa bibilia.

Haamaitaihia e te mau faahopearaa maitai

No te rahiraa o teie mau taata, e faaea poto noa ratou i Ateno. E rave rahi o te hoˈi atu i to ratou fenua tumu no te tufa i te parau apî maitai e te mau fetii e te mau hoa. E haere vetahi pae i te tahi atu mau fenua i te pae Tooa o te râ ma te tamau i te tavini ia Iehova. Te fanaˈo ra te feia o te faaea nei i Heleni i te mau faahopearaa maitai ma te poro atu i te feia o to ratou fenua o tei haere atoa ˈtu i reira. I roto i te tahi atu mau tupuraa e hotu mai te mau huero o te parau mau ia haere noa te feia ratere i te tahi atu fenua e ia farerei ia ratou i te mau Ite.

Te haapapu ra te reira e aita o Iehova e maiti ra i te huru o te taata. Te farii nei oia i te mau taata no te mau nunaa atoa o te mǎtaˈu ra ia ˈna e o te here nei i te parau-tia. (Ohipa 10:34, 35) Mai teie mau taata e au i te mamoe, ua faatupu to ratou haereraa i te tahi atu fenua no te tahi mau maitai i te pae materia i te mau haamaitairaa rahi atu â o ta ratou i manaˈo na—te ite no nia i te Atua mau, o Iehova, e ta ˈna parau tǎpǔ o te ora mure ore i roto i te hoê ao apî parau-tia. Oia, ua haamaitai rahi mau o Iehova i te mau tutavaraa ia naeahia te mau taata ěê i Ateno o teie nei tau!

[Hohoˈa i te api 16]

Te faaroo ra te mau taata no te mau fenua e rave rahi i te parau apî maitai i Ateno