Te taataahihia ra te tiamâraa i te pae no te haamoriraa i Singapour

I TE po o te 24 no febuare 1995, ua purara te mau mutoi i roto e maha fare o te oire no Singapour. Ua tapeahia e 69 taata i te taatoaraa.a I rotopu ia ratou te vai ra te hoê vahine e 71 matahiti to ˈna e e piti tamahine, 15 matahiti. No te aha? No te mea anei ua rave ratou i te tahi ohipa ino aore ra atâta? Aita. Aita te hoê noa ˈˈe o ratou i rave i te tahi ohipa o te faarirohia ei ohipa atâta, tia ore i te pae morare, aore ra o te patoi i te totaiete taata. Aita ratou i haamǎtaˈu i te mau faufaa i te pae morare, te hau, e te vai-maitai-raa o to ratou mau hoa no Singapour. Teie râ, i muri aˈe i to ratou paheruraa i na fare e maha, ua haru te mau mutoi i na 69 taata, o tei haaputuputu no te haapii i te Bibilia e no te amuimui ma te au, e ua afaihia ratou i te fare mutoi. I reira ua tapeahia ratou i te po taatoa, ua uiuihia ratou, ua neneihia to ratou manimani rima, e ua patahia to ratou hohoˈa—e, ua faariariahia ratou mai te mau taata ohipa ino ra te huru! I te roaraa o taua taime ra—e 18 hora te maoro i roto i te tahi vahi au ore—aita i fariihia e ia fanaˈo ratou i te aˈoraa i te pae o te ture e ua opanihia e ia taniuniu ratou i te mau melo fetii no te faaite e teihea roa ratou. E nehenehe e feruri e ua haapeapea mau teie huru ohipa rave-tauê-hia i nia i teie mau taata huiraatira hau, o te faatura nei i te ture!

Te faahaamanaˈo ra teie tupuraa i te mau ohipa i tupu i te roaraa o te tau pouri i Helemani Nazi e te tau faatereraa fatu amui ino mau i Rusia e i Europa Hitia o te râ. Eita te reira e manaˈohia e te hoê ratere i Singapour o te haere i roto i taua hau fenua mâ e te moni. Ua tuiroo o Singapour ei mea faahiahia o te senekele 20 no te haereraa i mua i te pae faanavairaa faufaa e i te pae totiale. Ua riro oia ei faatereraa manahune e te hoê pǎpǎ ture o te haapapu i te mau tiaraa tumu o to ˈna mau taata huiraatira, tae noa ˈtu i te tiamâraa i te pae no te faaiteraa i te manaˈo, i te pae faaroo, e i te pae no te haaputuputuraa.

Tera râ, ua haruhia te feia i tapeahia i febuare no te mea noa e mau Ite no Iehova ratou o tei haaputuputu no te haapii i te Bibilia e no te fanaˈo i te tahi auhoaraa kerisetiano. Teie te faahaparaa i tuuhia i nia ia ratou oia hoi “te apitiraa i te hoê putuputuraa o te hoê totaiete opanihia e te ture.”

Inaha, aita i fariihia e ia haamanahia te mau Ite no Iehova i mua i te ture i Singapour mai te matahiti 1972 mai â i te iritiraahia te Amuiraa no Singapour i te buka hau e ua opani-roa-hia te mau buka, e tae noa ˈtu te mau Bibilia, neneihia e te Watch Tower Bible and Tract Society. Aita i faatiahia e ia hiˈopoahia te mau manaˈo i ravehia. Aita i maoro aˈenei, ua tuatapapahia te faatureraa o teie haerea paetahi haamauhia i te mau tiribuna no Singapour no nia i te tupuraa o na maha Ite o tei faahapahia i te avaˈe febuare 1994 no te mea e buka bibilia opanihia ta ratou. Ua faaroohia te piiraa e patoi i ta ratou mau tiaturiraa i te avaˈe atete 1994 e ua tuu-poto-hia te reira i te hiti. Ua horoa te Haava rahi ra o Yong Pung How o te Tiribuna teitei i to ˈna manaˈo i te avaˈe i muri iho. Ua turu oia e aita te tiamâraa i te pae faaroo i ofatihia e ua haapapu-mau-hia te mau tiaturiraa i nia i te niu e ua riro te mau Ite no Iehova ei haamǎtaˈuraa no te vai-maitai-raa o te nunaa no te mea aita te mau melo e rave ra i te tau faehau. I te 17 no febuare 1995, ua imi na Ite e maha e ia nehenehe ratou e horo i teie faaotiraa patoi i te Tiribuna Hororaa no Singapour. Ua patoihia te aniraa.

Ua purara teie faaotiraa hopea i roto i te mau ravea neneiraa arataihia e te faatereraa no Singapour. Ma te feaa ore ua faatupu teie faaotiraa a te tiribuna e te haapurororaa i ravehia i te mau ohipa i tupu i muri iho. I roto i te hoê noa hebedoma ua tapeahia e 69 Ite. Ua faaorehia te mau faahaparaa i ravehia i nia i na maha taata o ratou—e mau taata no Beretane, Farani, e Luxembourg—i muri aˈe. Ua riro râ te reira ei tupuraa peapea mau no teie mau taata. Ua ora e ua ohipa na te hoê taata e ta ˈna vahine i Singapour e rave rahi matahiti te maoro. Ua erehia raua i ta raua ohipa e ua tarahu raua i to raua fare e ua tia aˈera ia raua ia faarue i to raua mau hoa piri roa e rave rahi.

Ua faahapahia na 63 taata paari e toe ra e tei roto ratou i te hoê totaiete opanihia, e ua faahapa-atoa-hia vetahi e e buka opanihia ta ratou. Ua faautuahia ratou e e toru matahiti tapearaa i roto i te fare auri aore ra no te hoê tino moni e 3 000 dala (2 100 dala marite) aore ra na toopiti atoa ra faautuaraa. Ua afaihia na tamahine e piti, 15 matahiti, ma te faataa-ê-hia i mua i te tiribuna na te mau tamarii.

E ere i te hoê haamǎtaˈuraa no te ihotaata e te tahoêraa o te nunaa

Na te ao atoa nei, i roto hau atu i te 200 fenua o ta ratou e faaea ra, ua matauhia te mau Ite no Iehova ei mau taata tura, haapao maitai, o te auraro i te ture. Te itehia ra ratou no to ratou patoiraa ma te aueue ore i te apitiraa ˈtu i roto i te tahi huru ohipa atâta, orureraa i te faatereraa—e ere i te hoê ohipa kerisetiano e e nehenehe ratou e tiavaruhia aore ra e tuuhia i rapae. Oia mau, aita e tumu e ia mǎtaˈu te faatereraa no Singapour ia ratou. E ere roa ˈtu ratou i te hoê haamǎtaˈuraa no te vai-maitai-raa o te nunaa no Singapour aore ra no te ihotaata e te tahoêraa o te nunaa. (Roma 13:1-7) Ua faataa-taatoa-hia te reira i roto i te hoê rata o te 21 no mati 1995, papaihia e Milton G. Henschel, peretiteni o te Watch Tower Bible and Tract Society, i te Faatere hau matamua ra o Goh Chok Tong no Singapour. Ua piahia taua rata ra ia faufaahia te feia taio.

E ite te mau taata, e here nei i te tiamâraa, i roto i te tuhaa o te tapihooraa, te faatereraa, e te tuhaa iti o te totaiete ma te anaanatae e nafea teie huru tupuraa i Singapour i te ohiparaa. E ohipa anei te faatereraa no Singapour ia au i te mau tiaraa tumu o te taata e te tiamâraa apitihia e ta ˈna iho pǎpǎ ture e te mau nunaa atoa o te ao nei? Papu maitai, te haapeapea rahi nei te mau Ite no Iehova na te ao nei no nia i to ratou mau hoa haamori i Singapour. Te faahaamanaˈo ra ratou ia ratou i roto i ta ratou mau pure e te tapea nei ratou i te tiaturiraa papu o te itehia i roto i te Bibilia: “E mea au hoi na Iehova te parau-tia, e ore hoi oia e faarue i tana feia moˈa ra.”—Salamo 37:28.

[Nota i raro i te api]

[Tumu parau tarenihia i te api 30]

21 no mati 1995

Goh Chok Tong

Faatere hau matamua

Istana Annexe

Singapore 0923

Repubilita no Singapour

Lee Kuan Yew

Faatere hau teitei

Piha a te Faatere hau matamua

460 Alexandra Road

37-00 PSA Bldg

Singapore 0511

Repubilita no Singapour

E te mau tia mana e:

E mea huru ê mau ta te hoê vea Reuters no Singapour o te 25 no febuare 1995 i faaite. Te faahiti ra oia e ua haafifihia te mau putuputuraa haapiiraa i te Bibilia a te mau Ite no Iehova e te mau mutoi e ua tapeahia e 69 taata. Ua aratai teie faaiteraa i te ara-maite-raa o te ao nei i nia i te huru tupuraa a te mau Ite no Iehova i Singapour, i reira te opaniraahia ta ratou mau ohipa e mau buka e hau atu i te 20 matahiti te maoro.

Mea fifi mau â ia taa e no te aha e opanihia ˈi te hoê faanahonahoraa faaroo i Singapour o tei ohipa ma te tiamâ e te paruru taatoa o te ture i roto hau atu i te 200 fenua, te hoê fenua o te pee i te mau faatureraa o te faatereraa manahune. E mea huru ê mau ia hiˈopoa-anaˈe-hia i te haapapuraa a te pǎpǎ ture i Singapour no nia i te tiamâraa i te pae no te haamoriraa no to ˈna mau taata huiraatira.

Aita te mau Ite no Iehova i haamǎtaˈu aˈenei i te vai-maitai-raa o te nunaa noa ˈtu eaha te vahi. Oia mau, na te ao atoa nei ua matauhia ratou ei mau taata hau, o te rave puai i te ohipa, mea tia i te pae morare, e o te faatura i te ture—ua papu ia ˈu e ua riro te reira ei mau huru maitatai o ta outou e faaitoito i roto i to outou fenua.

Parau mau no nia i to ratou pee-maite-raa i te mau ture a te Bibilia no te mau kerisetiano, i te tahi taime aita te tiaraa o te mau Ite no Iehova e taahia ra aore ra te hiˈohia ra te reira ma te hape. Tera râ, aita anei te tumu o te kerisetianoraa i hiˈo-atoa-hia ma te hape e ua patoi oia ia “Kaisara,” te faatereraa o to ˈna ra tau? Te apee noa nei te mau Ite no Iehova i te hiˈoraa o Iesu e o te mau kerisetiano matamua. Te faatura nei ratou i te faatereraa o to ratou vahi faaearaa, te aufau nei ratou i te mau tute, e te turu nei ratou i te mau faufaa morare maitai. E mau taata huiraatira haapao maitai e te tia ratou. Aita te mau Ite no Iehova i faaô aˈenei i roto i te tahi ohipa orureraa i roto i te hoê fenua e e nehenehe au e haapapu atu ia outou e e ere to ratou vairaa mai i Singapour i te hoê haamǎtaˈuraa no te mau faufaa i te pae o te nunaa o to outou fenua.

No te mau parau ta te mau ravea haaparareraa parau i faaite aita i maoro aˈenei, ua ite-rahi-hia i teie nei i te mau huru raveraa haavî i nia i te mau Ite no Iehova i Singapour e ta outou faatereraa. Ua riro mau te reira ei haapeapearaa no to ratou mau hoa e 12 mirioni na te ao nei. Te ani nei au ia outou ia faaohipa i to outou mana maitai no te faatitiaifaro i te fifi e ia nehenehe te mau Ite no Iehova e fanaˈo i te tiamâraa i te pae no te haamoriraa e i te pae o te haava manaˈo i roto i to outou fenua haapapuhia e te Pǎpǎ ture.

Te tiaturi nei au e e tauturu te hoê tauaparauraa mahora e te mau tia o te mau Ite no Iehova ia outou ia faaore i te mau taa-ore-raa atoa no nia i ta matou faanahonahoraa e ta matou ohipa e ia haapapu ia outou e aita e tumu e ia mǎtaˈu te faatereraa no Singapour i te mau Ite no Iehova. Te oaoa nei au i te faanaho i teie huru farereiraa.

Te tiai maite nei au i ta outou pahonoraa.

Ma te tura,

Milton G. Henschel

Peretiteni

[Faaiteraa i te fatu o te hohoˈa i te api 31]

Nik Wheeler/H. Armstrong Roberts