Te faatia ra te feia poro i te Basileia

Te naearaahia te mau oire iti atea no Groenland

E RAVE rahi matahiti te maoro ua faaohipa te mau Ite no Iehova i te mau vea Pare Tiairaa e A ara mai na! no te poro i te parau apî maitai. Te faahanahana ra teie mau vea i te paari o Iehova mai tei faahitihia i roto i ta ˈna Parau, te Bibilia. Te ara maite nei ratou i te mau ohipa e tupu ra na te ao nei o te tuati ra i te parau tohu bibilia, e te faaohipa nei ratou i te aˈoraa tia a te Bibilia no te mau fifi o teie nei mahana.—Iakobo 3:17.

I te matahiti 1994, ua rave te mau Ite no Groenland i te hoê tutavaraa taa ê no te pûpû i Te Pare Tiairaa e te A ara mai na! i te mau taata atoa e farereihia e ratou. I te roaraa o te tau veavea, ua rave ratou i te tahi mau faanahoraa no te haere atu i te mau oire rii atea no Groenland. Ua tere atu te hoê pǔpǔ feia poro i te Basileia na nia i te poti e hau atu i te 4 000 kilometera na te pae tooa o te râ e tae atu i Qaanaaq (Thule), e ua farerei ratou vetahi mau pǔpǔ taata i te pae apatoerau roa o te palaneta. E hitu hebedoma te maororaa o to ratou tere. I te pae hitia o te râ, ua tapae e piti Ite faaipoipo i te oire iti no Ittoqqortoormiit e no te taime matamua ua haapararehia te parau apî maitai i taua vahi ra.

Na mua ˈtu i taua matahiti ra, i te avaˈe eperera, ua vaiihohia e 7 513 vea o Te Pare Tiairaa e o te A ara mai na! i te mau taata no Groenland. Oia hoi te auraa e, i nia i te hoê faito au noa, ua opere te mau 127 taata poro tataitahi i te Basileia e 59 vea—1 vea no te mau 7 taata atoa. I taua avaˈe ra, ua hohora te A ara mai na! i te hoê anairaa tumu parau i raro aˈe i te upoo parau matamua e “Te mariri ai taata o te titi—Mǎtaˈuraa na te vahine taitahi.” Ua vaiiho te hoê Ite, o tei opere e 140 vea, i te mau vea o te A ara mai na! i te hoê vahine faaite parau apî no te afata teata. E piti mahana i muri iho, ua faaite te hoê porotarama parau apî i roto i te afata teata i te mau tumu parau no nia i te mariri ai taata o te titi. Ua pata te vahine faaite parau apî i te vea i roto i te afata teata, ma te hohora e rave rahi mau api a haapopou noa ˈi oia i te huriraa faahiahia i ravehia na roto i te reo Groenland. Ua haamatara atoa o ˈna i te mau manaˈo tauturu ohie i horoahia i roto i te A ara mai na! ei ravea parururaa i te oraora-maitai-raa.

Ua uiuihia te Ite o tei vaiiho i te mau vea i te vahine faaite parau apî i roto i taua porotarama ra o te afata teata. Ua pahono o ˈna i te hoê rahiraa uiraa no nia i te mau Ite no Iehova e ua paraparau oia no nia i te opereraa rahi o te mau vea i taua avaˈe ra. Ua tatara atoa o ˈna i te paari faufaa mau o te itehia ra i roto i te Bibilia e ua haapapu o ˈna e e nehenehe taua huru aˈoraa tia ra e tauturu ia tatou ia faaruru i te mau fifi o teie nei mahana.

Ua faahopehia te porotarama e te hoê uiuiraa manaˈo i te peretiteni no te Taiete Mariri ai taata no Groenland. Ua parau o ˈna e aita oia i ite aˈenei i teie huru tuatapaparaa maitai e te maramarama mau no nia i te tumu parau na roto i to ˈna iho reo. I muri iho ua titau o ˈna i te feia atoa e anaanatae ra i te tumu parau no nia i te mariri ai taata o te titi ia taio i te mau tumu parau o te A ara mai na!. Ua parau o ˈna e e tumu tano mau ia haamauruuru i te mau Ite no Iehova no ta ratou mau tutavaraa.

Mai te fenua Groenland, te tamau noa nei te mau Ite no Iehova na te ao nei i te poro i te parau apî maitai “i te taata atoa i raro aˈe i teie nei raˈi.” (Kolosa 1:23; Ohipa 1:8) Ma te faaohipa i te mau buka bibilia, tae noa ˈtu i Te Pare Tiairaa e te A ara mai na!, te tauturu nei ratou i te mau huru taata atoa ia faaruru i te mau fifi o teie nei mahana e te horoa atoa nei ratou i te hoê tiaturiraa no te hoê tau maitai aˈe no a muri aˈe.

[Hohoˈa fenua i te api 8]

Qaanaaq (Thule)

Ittoqqortoormiit

Nuuk (Godthåb)