Te faatia ra te feia poro i te Basileia

‘Ua tamau noa ratou ma te tuutuu ore’

MAI te tau o Iesu Mesia e o ta ˈna mau aposetolo mai â, ua rave te mau aratai faaroo i te mau ravea atoa no te haafifi i te pororaa o te parau apî maitai o te Basileia o te Atua. Ua ‘faauehia’ te mau aposetolo ma te pinepine e ma te etaeta e te mau mana faatere no Ierusalema e “eiaha roa ratou e parau ma te iˈoa o Iesu.” (Ohipa 5:27,28, 40) Teie râ, te faataa ra te faatiaraa a te Bibilia e “tupu atura te parau a te Atua, e rahi roa ˈtura hoi te mau pîpî i Ierusalema.”—Ohipa 6:7.

E piti mileniuma i muri iho te ite-noâ-hia ra te mau aratai faaroo no Iseraela o tei turai i te mau mana faatere ia faataupupu i te ohipa a te mau kerisetiano mau i roto i taua fenua ra. I raro aˈe i te faaheporaa a te feia faaroo etaeta, i te avaˈe novema 1987, ua faaue te mau mana faatere no Tel Aviv, i Iseraela, i te mau Ite ia faaea i te faatupu i te mau putuputuraa kerisetiano i te Piha no te Basileia i te vahi o te amaa a te Taiete Watch Tower. Ua mana te faaueraa i te avaˈe atopa 1989. Ma te auraro, ua putuputu te mau Ite i roto i te mau fare hamaniraa tauihaa tarahuhia i taua vahi ra e toru matahiti te maoro a vai noa ˈi ta ratou Piha no te Basileia ma te ore e faaohipahia.

I roto i taua taime ra, ua afaihia taua ohipa ra i mua i te Tiribuna Teitei Iseraela o te Haavaraa. Ua hiˈopoa faahou te piha paruru a te hau i te parau turu vauvauhia e te mau Ite e ua parau oia e e manuïa ta ratou aniraa no te mea ua niuhia te faatereraa i nia i te faainoraa ite-papu-hia i te pae faaroo. No reira, ua tia aˈera i te mau mana faatere o taua vahi ra ia faaore i ta ratou faaotiraa, e ua hoˈi te mau Ite no Iehova ma te oaoa i roto i ta ratou Piha no te Basileia.

Ua topatopa anei te ohipa pororaa i te mau parau mau o te Bibilia i te roaraa o taua mau matahiti ra? Aita roa ˈtu! I te opaniraahia te Piha no te Basileia, te vai ra ïa e piti amuiraa i Tel Aviv e te hoê pǔpǔ haapiiraa bibilia taa ê i pihai iho i te oire o Lod. E toru matahiti i muri iho, i te haamatara-faahou-raahia te Piha no te Basileia, ua hau atu â te mau Ite no Iehova i te rahi i roto e maha amuiraa, e ua putuputu te hoê pǔpǔ apî haapiiraa bibilia i Beersheba.

Aita te maraaraa i Iseraela i taotiahia i te mau pǔpǔ e paraparau nei i te reo tumu, oia hoi te Arabia e te Hebera. E rave rahi mau taata no te mau fenua ěê mai te tahi pae i Rusia tahito o tei haere mai, no reira ua ineine te mau Ite no Iehova e paraparau nei i te reo Rusia i teie nei i te haaparareraa i te parau apî maitai e o ratou. Ua faatupuhia te tahi mau putuputuraa na roto i te reo Rusia i roto e toru amuiraa; ua hau atu i te hoê hanere taata o tei putuputu aita i maoro aˈenei no te hoê tairururaa rusia.

Ma te feaa ore, e tamau noa te feia faaroo faaino i ta ratou patoiraa i te haamoriraa mau. Tera râ, te tamau nei te feia poro i te Basileia i te pee atu i te mau kerisetiano o te senekele matamua, e noa ˈtu te patoiraa, “aore e mahana tuua ia ratou i te aˈo, e te haapii atu i te taata, e o Iesu â te Mesia, i roto i te hiero, e i tera fare, i tera fare.”—Ohipa 5:42.