Te mau Ite no Iehova na te ao nei—Tuete
TE POˈI ra te fenua Tuete i te pae hitia o te râ o te fenua iti no Scandinavie e te parare ra oia i nia i te Reni poro fenua Apatoerau. Ua tui to ˈna roo na te ao atoa nei no to ˈna pereue ruperupe rahi o te mau uru raau vai matie noa, tae noa ˈtu to ˈna mau roto, e to ˈna mau mouˈa, ua riro te fenua Tuete ei hoê o te mau fenua taata ore-roa ˈˈe-hia i Europa. Noa ˈtu râ, ua paheru te mau Ite no Iehova e ua manuïa, i te feia here mau no taua vahi ra mai te mau matahiti 1800 hopea nei mai â. E rave anaˈe na i te hoê hiˈoraa no teie roa nei.
Ua haapii te hoê vahine i te Bibilia e te mau Ite, aita râ ta ˈna tane i au i te reira. Ua parau oia i ta ˈna vahine ia faaea i te haapii, e ua na reira iho â o ˈna. E rave na teie taata i te ohipa i roto i te hoê fare haaputuraa pia. I te hoê mahana ua tere atu te hoê taata faahoro pereoo i te fare haaputuraa e ta ˈna mootua e ahuru matahiti to ˈna. Ua ani te papa ruau i taua taata ra ia haapao i te tamaroa a faaî ai o ˈna i to ˈna pereoo. No te haamata noa i te hoê tauaparauraa, ua ani te taata i te tamaroa iti e eaha te mau ô ta ˈna i fanaˈo no to ˈna oroa mahana fanauraa i mairi na. I te maere rahi o te taata, ua parau atu te tamaroa iti ia ˈna e aita o ˈna e to ˈna utuafare e faatupu ra i te mau oroa mahana fanauraa no te mea e Ite no Iehova ratou. Ua parau atoa te tamaroa iti ia ˈna e e horoahia ta ˈna mau ô i te tahi atu mau taime o te matahiti e aita o ˈna i erehia i te hoê aˈe mea, i te mea e e mea mahanahana e mea here mau to ˈna utuafare fetii. Aita te hoê noa ˈˈe ô o tei faito atu i te reira, ta ˈna ïa i parau faahou.
Ua hoˈi mai te tamaroa iti e to ˈna papa ruau e rave rahi mau taime. I te mau taime atoa, e ani atu te taata i te tamaroa e rave rahi mau uiraa, e ua maere roa o ˈna i te huru o te tamaroa iti ia horoa anaˈe oia i te mau pahonoraa haavare ore, papu maitai ma te ore e haamarirau aˈe. Ua putapû roa atoa o ˈna i te haafaufaa-rahi-raa te tamaroa i te mau mea faufaa mau. Hoê po i muri aˈe i to ˈna hiˈoraa i te hoê porotarama i roto i te afata teata o tei faaite i te mau huru tupuraa ino mau i roto i te ao nei, ua taa o ˈna e e tia ia ˈna ia hiˈopoa ma te haapao maitai aˈe i te mau mea varua. Ua taniuniu oia i te mau Ite o tei haapii e o ta ˈna vahine e ua ani ia ˈna ia hoˈi mai. Ma te ore e haamaoro ua faaterehia te haapiiraa a taua taata ra e te hoê Ite e ua haere oioi oia i mua. Ua bapetizohia o ˈna i te 10 no eperera 1994. I teie nei ua bapetizo-atoa-hia ta ˈna vahine.
Te titau ra te maraaraa i te paturaa
Ua riro te fenua Tuete ei utuafare no e rave rahi feia horo no te tahi atu mau fenua, e ua itea mai i te mau Ite no Tuete i te mau faahopearaa maitatai i te pororaa ˈtu ia ratou. Ua manuïa rahi te ohipa e ua titau te reira i te mau Piha no te Basileia apî no te faaô i te rahiraa. Mai te matahiti 1986 tae atu i te matahiti 1993, ua patuhia 37 Piha no te Basileia na roto i te ravea paturaa oioi, e e 8 piha o tei faarahihia e o tei faaapîhia. I te matahiti 1994 noa, ua patuhia e hitu Piha no te Basileia hau atu, e e toru o tei faaapîhia.
I teie nei, te vai ra e 65 amuiraa o te tiai ra i te tauturu no te patu i te hoê Piha no te Basileia apî aore ra no te faarahi aore ra no te faaapî i ta ratou piha. Tau 2 500 rima tauturu o tei turu i taua mau opuaraa paturaa ra, e ua mauruuru rahi te mau amuiraa i ta ratou tauturu here mau.
E piihia te tuhaa apatoerau o te fenua Tuete, o te parare ra i nia i te Reni poro fenua Apatoerau, i te tahi taime e te fenua o te mahana o te hora ahuru ma piti i te po. Ua piihia mai te reira no te mea i te roaraa o te tau veavea eita te mahana e topa vave i taua vahi ra. Teie nei râ, na te fenua Tuete taatoa, te tamau noâ ra te maramarama o te parau mau i te anaana rahi. Ma te haamaitairaa a Iehova, eita taua maramarama i te pae varua ra e haapouri, e maramarama râ ma te anaana noa ˈtu â.
[Tumu parau tarenihia i te api 8]
TABULA O TE FENUA
Matahiti taviniraa 1994
NUMERA RAHI ROA ˈˈE O TE FEIA PORO: 24 246
FAITO: 1 Ite no e 362
FEIA I TAE MAI I TE OROA HAAMANAˈORAA: 40 372
NUMERA AU NOA O TE MAU PIONIE: 2 509
NUMERA AU NOA O TE MAU HAAPIIRAA BIBILIA: 11 306
RAHIRAA FEIA BAPETIZOHIA: 850
RAHIRAA AMUIRAA: 358
AMAA: ARBOGA
[Hohoˈa i te api 9]
Te amaa e te Fare no te Betela i Arboga
[Hohoˈa i te api 9]
Ua faaohipa te mau Ite matamua i Hjo i teie pereoo faauta iti no te tere atu na te hoê tuhaa fenua tau 5 000 kilometera tuea te rahi