Te mau Ite no Iehova na te ao nei—Porto Rico

TE TARAVA ra te motu ruperupe mau no te pae rua ma no Porto Rico i rotopu i te Miti no Caraïbes e te Miti Ataranitita. Ua faariro o Christophe Colomb ia ˈna ei tuhaa fenua no Paniora i te matahiti 1943 e ua topa i to ˈna iˈoa San Juan Bautista ei haamanaˈoraa ia Ioane Bapetizo. Mea maoro te piiraahia to ˈna oire rahi o Porto Rico, aore ra “Uahu moni rahi.” I te taime tano, ua faatanohia taua iˈoa ra no te taatoaraa o te fenua, noa ˈtu e tau taime noa i muri iho ua piihia te oire pu o San Juan.

Ua faaite o Porto Rico e e oire moni rahi mau oia i roto e rave rahi mau tuhaa. Ua haponohia e rave rahi auro mai reira mai i te omuaraa o te mau matahiti faatereraa a te mau Paniora. I teie nei, te hoo nei te oire i te tô, te taofe, te meia, e te taporo, noa ˈtu e o te hamaniraa taoˈa e te taiete maona tei riro ei tereraa faufaa o te fenua i teie nei mahana. Teie nei râ, ua haapapu o Porto Rico e e uahu moni rahi mau oia i roto i te hoê auraa rahi atu â.

Ua haamatahia i te poro i te parau apî maitai no nia i te Basileia o te Atua i reira i te matahiti 1930. I teie nei mahana, te vai ra hau atu i te 25 000 feia poro i te parau apî maitai i Porto Rico. I te matahiti 1993, ua maraa te numera feia rave ohipa i te amaa a te Taiete Watch Tower mai te 23 ua hau atu i te 100. Mea titauhia taua maraaraa ra a nehenehe atu ai te amaa e haapao i te huriraa i te mau buka bibilia na roto i te reo Paniora, ma te rave e ia navai maitai teie mau buka no te tahi tau 350 000 000 feia e paraparau ra i te reo Paniora na te ao nei.

Te hoê aua apî

Te faatia atoa ra te piha ohipa a te amaa e: “Ua matara mai i te hoê aua apî i Porto Rico no te mea ua tutava matou i te afai i te poroi o te Basileia i te feia taria turi. Te faatia ra te hoê tuahine i te ohipa i tupu i muri nei: ‘Te ohipa ra vau i pihai iho i te feia taria turi e te haere ra vau e farerei i te hoê vahine e e piti ta ˈna tamarii nainai. I to ˈna taaraa e e Ite au, ua patoi oia ia ˈu i taua iho taime ra no te mea e aita ta ˈna tane e e taria turi atoa hoi e au ra i te mau Ite no Iehova.

“‘Tau avaˈe i muri iho, ua haere taua noâ vahine ra e farerei i te hoê hoa o te haapii ra i te bibilia e te mau Ite. Ua apiti atu oia i te haapiiraa e ua au rahi roa oia i te reira. Ua haere faahou atura vau e farerei i te vahine, e ua parau faahou mai oia e aita ta ˈna tane e au i te mau Ite. Teie nei râ, ua hinaaro oia e taa i te bibilia e ua rohirohi roa oia i ta ratou ekalesia no te mea aita ratou e haapii ra i te bibilia. Ua haamata atura mâua i te haapii, ma te faaohipa i te hoê api parau iti. I te hoê mahana ua parau mai oia ia ˈu e ia hoˈi mai i te mahana maa no te mea tei te fare ta ˈna tane. “Aita hoi oia e au nei ia matou, e ere anei?” o ta ˈu ïa i ani atu. Ua pahono mai oia e: “Te hinaaro nei oia e ite eaha mau na ta te mau Ite no Iehova e haapii ra.”

“‘I te mahana i muri, ua patoto raua e piti atoa i to ˈu opani! I te mea e mea rahi roa ta te tane mau uiraa, ua titau manihini au ia raua i ta tatou putuputuraa no te feia taria turi. Ua tae raua na mua ˈˈe ia ˈu e aita raua i mairi noa ˈˈe i te hoê putuputuraa mai taua mahana ra mai â. Te poro ra te tane i te tahi atu feia taria turi, ua haere oia i te tairururaa, e te hinaaro nei oia e bapetizo.’”

Te tamau noa ra te piha ohipa a te amaa i te faatia: “I ta matou tairururaa mataeinaa no teie matahiti, ua horoahia te taatoaraa o te porotarama na roto i te reo aparaa rima, e ua putuputu mai e rave rahi feia taria turi e to ratou utuafare. Ua riro ei taime horuhoru mau i te oreroraa parau hopea i to te taeae faahitiraa i te ohipa te tia ia rave i rotopu i te feia taria turi e ua faaite oia e fatata 70 tei tae mai. Ua paaina te hoê haapopouraa rahi mau, tera râ, mai ta te taeae orero i tapao, aita te feia taria turi i faaroo noa ˈˈe. Ua anihia ˈtura i te feia taria turi ia hiˈo i te feia i putuputu mai, e ua ui faahou te taeae orero i ta ˈna uiraa, ‘Ua oaoa anei outou e ua putuputu atoa mai to outou mau taeae taria turi i pihai ia outou?’ e ua ani oia i te feia i putuputu mai ia haapopou ma te faataueue i na rima e piti. Ua riro mau â ei hohoˈa faahiahia mau ia ite e 11 000 taeae e tuahine e haapopou ma te faataueue i to ratou mau rima. Ua rahi atu â to tatou mau taeae taria turi i te oaoa e ua ite ratou e tei roto ratou i te hoê utuafare fetii taeae rahi mau. Ua manii mai e rave rahi roimata o te oaoa.”

A tamau noa ˈi te mau Ite no Iehova i te apiti i roto i te ohipa auhune i Porto Rico, papu maitai e tamau noa oia i te riro ei uahu moni rahi mau. E tamau noa te “mamoe” a te Atua, tei piihia “te mau mea hinaarohia o te mau nunaa,” i te ô mai i roto i te fare o Iehova tei î i te hanahana.—Ioane 10:16; Hagai 2:7.

[Tumu parau tarenihia i te api 9]

TABULA O TE FENUA

Matahiti taviniraa 1994

NUMERA RAHI ROA ˈˈE O TE FEIA PORO: 25 428

FAITO: 1 Ite no e 139

FEIA I TAE MAI I TE OROA HAAMANAˈORAA: 60 252

NUMERA AU NOA O TE MAU PIONIE: 2 329

NUMERA AU NOA O TE MAU HAAPIIRAA BIBILIA: 19 012

RAHIRAA FEIA BAPETIZOHIA: 919

RAHIRAA AMUIRAA: 312

AMAA: GUAYNABO