Te feia i faatuitehia no Gileada—Ineine no te haaparare i te parau apî maitai

“TE OHIPA nehenehe roa ˈˈe te nehenehe e moemoeâhia aˈenei.” Mea na reira to Anders e Amalia Groth putapûraa no nia i ta raua faaineineraa mitionare. Ua faaite raua i te mau manaˈo hohonu o na 48 feia i faatuitehia o te pǔpǔ 97 o te Haapiiraa bibilia no Gileada a te Taiete Watchtower ma te na ô e: “Ua turai e ua faaineine te faaineineraa no Gileada ia matou, ua ineine ïa matou i te amo i ta matou mau hopoia apî.”

E nehenehe tatou e ite i teie oaoa a faataa ˈi te feia haapii i to ratou mau manaˈo no nia i te porotarama faatuiteraa; ua putuputu mai e 6 420 feia i te 4 no setepa 1994, no te oroa faatuiteraa.

“Ua omua Theodore Jaracz no te Tino Aratai i te porotarama na roto i te paraparauraa no nia i te upoo parau ra ‘Ia haapiihia tatou e Iehova,’” ta David Abel e ta ˈna vahine o Kelli i parau. “Te manaˈo faufaa te ore roa e moehia ia matou oia hoi i to te taeae Jaracz parauraa e: ‘E tia ia tatou ia farii i to tatou nei huru haihai ia faaauhia i to Iehova,’ e ua faahohoˈa oia i te reira e te hoê haapiiraa puai itehia i roto ia Ioba pene 38 e 39. Ua haapapu maite te taeae Jaracz e a faarahi noa ˈi matou i to matou ite no nia i te Bibilia maoti te Haapiiraa no Gileada, aita matou i ite i te pahonoraa o te mau uiraa atoa. E tia ia matou ia tamau noa i te haapii i te Parau a te Atua.”

I teie nei ua na ô Christian e Angele Coffy e: “Ua putapû roa mâua i te oreroraa horoahia e Max Larson i te upoo parau ra e ‘Eaha te faufaaraa o te hoê niu maitai?’ Ua au mâua i to ˈna faaauraa ia tatou i te hoê paturaa o te titau ra i te hoê niu hohonu i roto i te repo fenua etaeta no te mau papu ia tupu atoa anaˈe te hoê aueueraa fenua. Na roto i te haapii-maitai-raa, e nehenehe tatou e faatupu i te hoê taairaa piri roa e o Iehova e e nehenehe tatou e niu i to tatou faaroo i nia i te ite hohonu ia nehenehe ïa tatou e mau papu i roto i te mau taime fifi.”

“E haamanaˈo-maoro-hia te oreroraa a Milton Henschel, te peretiteni o te haapiiraa, i te upoo parau ra e ‘Ua ineine te mau faaapu no te auhuneraa,’” ta Gary e Lynn Elfers i tapao. “Ua haafaufaa te irava tumu, Ioane 4:35-38, i te haamaitairaa taa ê e vai ra ia matou no te tomo i roto i te hoê faaapu i ueue-ê-na-hia e te feia faaapu i haere mai na mua ˈtu. E turai te reira ia matou ia ohipa ma te ru”. Ma te turu i te reira, ua hiˈopoa o Jan e Sirpa Vaahtola e: “Ua faaara te taeae Henschel i to matou hinaaro ru no nia i te auhuneraa rave-ê-na-hia na roto i te vauvauraa i te tabula i mairi aˈenei no te mau hau baltiques. E 51 i nia i te hanere te maraaraa i Estonie, 106 i nia i te hanere i Lettonie, e e 51 i nia i te hanere i Lituanie. Auê i te putapû mau e! Te ani ra te mau taeae no taua mau vahi ra i te Fatu ia tono atu i te mau rave ohipa hau atu. Ua oaoa iho â râ mâua i te faarooraa e, e tonohia mâua i Estonie!”

“Ua horoa o Joel Adams i te oreroraa i muri iho i te upoo parau ra e ‘A turui i nia ia Iehova,’” ta Kevin e Evelyn Cortina i faahaamanaˈo. “Ua aˈo oia ia matou e eita roa e tia ia tatou ia manaˈo e e nehenehe tatou e turui i nia ia Iehova i te tahi mau taime e te tahi atu mau taime e nehenehe tatou e tiaturi i to tatou iho paari. I roto i ta matou hopoia e faaruru matou e rave rahi mau tautooraa—te oraora-maitai-raa, te maa, te reo, te mau peu matauhia, e rave rau atu â. E titau pauroa te reira ia turui matou i nia ia Iehova.”

I muri iho ua orero mai o Gerrit Lösch, te hoê melo o te Tino Aratai, i nia i te upoo parau ra e “E tamau noa anaˈe i te faatupu i te hamani maitai o Iehova.” Ua parau o Alen e o Ann Maria Gokavi e: “Ua haapapu oia e ua riro te faaaanoraa i te hamani maitai i to tatou mau hoa mitionare e vetahi atu ta tatou e tufa ra i te parau apî maitai ei tapao o te tiaraa paari kerisetiano. Te faatupu ra te mau tuhaa taviniraa ěê i te tusia, aita anaˈe râ e hamani maitai, e mea iti roa te faufaa o ta tatou tusia.” (Mataio 9:13) Ua parau Peter e Fleur Hupston e: “Ua parau te taeae Lösch e e tia ia tatou ia hamani maitai i to tatou mau taeae e mau tuahine, ma te hiˈoraa ia ratou na te muriraa o te hiˈo fenua, e auraa parau noa teie, e faaitihia ïa to ratou mau hape maoti i te faarahihia.”

“I muri iho ua orero mai o Jack Redford, te hoê o ta matou orometua haapii i Gileada, i nia i te upoo parau ra e ‘E nehenehe anei outou e tapea i te hoê aˈoraa?’” ta Mickey e Sherry Minsky i haamanaˈo. “Ua haapapu oia e e haafifi te teoteo ia farii i te aˈoraa e mai te peu e e turori ohie tatou i te aˈoraa, e erehia tatou i ta ˈna mau haamaitairaa. Ua horoa oia i muri iho i te tahi mau manaˈo tauturu aravihi no nia i te fariiraa i te aˈoraa niuhia i nia i Te Oto a Ieremia ra 3:27-31.” Ua parau mai o Charles e o Joan Held e: “I te rahiraa o te taime mea matapo tatou i mua i ta tatou iho mau hapa; e tia ïa ia tatou ia hiˈo i te aˈoraa mai te hoê ravea no te faaaraara i to tatou mata no te ite i te mau mea te ore e iteahia e tatou. Ua riro te faahaparaa aore ra te aˈoraa no ǒ mai ia Iehova ra ei haapapuraa o to ˈna here ia tatou.”

“Ua paraparau te tahi atu orometua haapii, o Ulysses Glass, i nia i te upoo parau ra e ‘A tutava ia noaa te paari aravihi o te aratai ra i te ora.’ Ua ani oia e: ‘Nafea outou ia faaohipa i ta outou i haapii na?’” ta Kenneth e Lisbeth Ardkäll i parau. “I muri iho ua horoa mai oia i te hoê faahohoˈaraa niuhia i nia i te Maseli 30:24-26 no nia i te saphana iti e mea nafea to Iehova aupururaa ia ˈna ia ora mai oia. I to tatou aˈe pae, aita tatou i fanauhia e te paari, no reira e tia ia tatou ia tutava ia noaa mai te paari. Ua horoa mai Iehova i te mau mea atoa ta tatou e titau ra no te rave i te reira. A haafatata noa ˈi tatou ia Iehova e i te tahi e te tahi na roto i te here, e mea rahi te noaa mai ia tatou.”

Te oreroraa tumu

“Ua tuatapapa ma te mahanahana te taeae Karl F. Klein, te hoê melo o te Tino Aratai, i te Salamo 19 e o matou i roto i ta ˈna oreroraa ra ‘Te hoê taoˈa faufaa i ropu i te mau taoˈa faufaa,’” ta Jay e Gwen Abraczinskas i parau. “Ua haamatara oia i te mauruuru hohonu o te papai salamo ra o Davida no Iehova e to ˈna here no te Parau a te Atua.” “Ua faataa ê te taeae Klein i te salamo na roto e toru tuhaa,” ta Keith e Donna Hornback i tapao. “Te faaite ra te tuhaa 1 (mau irava 1-6) i te mauruuru o Davida no te poieteraa a te Atua, te faataa ra te tuhaa 2 (mau irava 7-10) i to ˈna mauruuru no te mau ture a te Atua, e te faahaamanaˈo maira te tuhaa 3 (mau irava 11-14) e, mai ia Davida, e tia ia tatou hinaaro e atuatu i te hoê taairaa maitai e o Iehova.”

“Ua haafaufaa matou i te manaˈo e e mea faufaa roa ia mǎtaˈu ia Iehova mai te peu e e tia ia matou ia ape i te mea ino. Te turai ra te reira ia matou ia rave i te mea viivii ore i mua i to ˈna aro,” ta David e Raylene Long i parau. O ta Frank e Vibeke Madsen atoa i turu. “Ua tatara poto te mau faataaraa a te taeae Klein no nia i te maitai rahi o te mau haamanaˈoraa, te mau ture, e te mau faaueraa a Iehova i ta matou i haapii i Gileada,” ta raua i parau. “Ua haapapu rahi atu â te reira ia matou ia pee i te Parau a te Atua i te tau no a muri aˈe e ia faariro i te reira mai te hoê afata taoˈa faufaa.”

I muri aˈe i te oreroraa parau tumu, ua horoahia i te feia haapii ta ratou mau parau tuite, e ua faaitehia ta ratou tuhaa taviniraa ěê. I muri aˈe i te hoê taime faafaaearaa no te amuamu, ua putuputu pauroa faahou no te tuhaa avatea. Ua apiti mai te feia i faatuitehia na roto i te pahonoraa i te mau uiraa o te Haapiiraa poto noa o Te Pare Tiairaa.

“I muri iho ua vauvauhia mai te porotarama haapiiraa ‘Faaineinehia no te riro ei feia poro o te Basileia na te fenua atoa,’” ta Bob e Shannon Lakatos i faahaamanaˈo. “Ua faatia te tuhaa matamua o te porotarama i te mau tupuraa haapiiraa i farereihia i roto i te pororaa i na avaˈe e pae ta mâua i ratere. Ua niuhia te reira i nia i te faaohiparaa aravihi i te mau uiraa i roto i ta mâua taviniraa. Ua faaite te hoê tuhaa uiuiraa manaˈo i te mau ravea maitatai no te faaruru i te mau tautooraa e te mau huru tupuraa taui noa o te oraraa mitionare. Ua horoa mai na pataraa hohoˈa e toru, no nia ia Costa Rica, Inidia, e Malawi, te hoê hiˈoraa poto no nia i te faanahonahoraa a Iehova na te ao nei.”

“Ua faaite te darama i muri iho, A faaite i te huru teotaratia, eiaha te huru o te ao, i te faahopearaa ino a vetahi mau fetii no teie nei ao, feruriraa tiamâ,” ta Jesse e Michelle Duncan i tapao. “Ua haapapu te reira e e tia i te mau kerisetiano ia farii i te mau faaueraa a te Faatereraa teotaratia e ta ˈna mau aratairaa ei mau faaueraa faufaa e o te haamaitai,” ta Wenzel e Kelly Koula i faahiti.

Ua faahope te hoê himene e te hoê pure i te porotarama oaoa mau. A tiai ru noa ˈi te feia i faatuitehia i ta ratou mau tuhaa taviniraa ěê i roto e 18 fenua, ua faaite-maitai-hia to ratou mau manaˈo e teie tuhaa parau a Tommi e Jael Kauko e: “Ua ineine roa mâua i te rave i ta mâua tuhaa taviniraa e i te faaohipa i ta mâua i haapii. Ua fanaˈo rahi hoi mâua—i teie nei na mâua ˈtura e horoa.”

[Hohoˈa i te api 26]

Te pǔpǔ 97 i faatuitehia a te Haapiiraa bibilia no Gileada a te Taiete Watchtower

I roto i te tabula i muri nei, ua numerahia te mau anairaa taata mai mua mai e haere atu ai i muri, e ua tapaohia te mau iˈoa na te pae aui mai te haamataraa e haere atu ai i te pae atau no te anairaa taitahi.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.