Eaha te huru o te feia pohe?

UA NIUHIA te mǎtaˈu i te feia pohe i nia i te hoê manaˈo—e te vai ra to te feia pohe i te hoê nephe aore ra te hoê varua o te ora i muri aˈe i te pohe. Ahiri e te haapii tahaa ra te Bibilia e ua hape taua manaˈo ra, ua pahono-faahope-roa-hia ïa te uiraa ahiri e e haamauiui anei te feia i taoto i roto i te pohe ia outou. No reira râ, eaha ta te Bibilia e parau ra?

No nia i te huru o te feia pohe, te parau ra te Parau a te Atua e: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe i te fenua nei; ua aramoina hoi ratou. To ratou aroha e to ratou riri, e to ratou feii, ua mou anaˈe ïa; aita hoi a ratou e tufaa e a muri noa ˈtu i te mau mea atoa e ravehia i raro aˈe i te mahana nei.”—Koheleta 9:5, 6.

Ma te ite i te reira, e nehenehe anei te feia pohe e tauturu aore ra e haamauiui ia outou? Aita, ta te mau Papai e parau ra. Ua aramoina te feia pohe e tei roto ratou i te homumu. Aita ratou e nehenehe e faatupu i te taairaa e te feia e ora ra aore ra e faaite i to ratou mau manaˈo hohonu—te here aore ra te riri—aore ra ia rave i te tahi noa ˈˈe ohipa. Aita e faufaa e ia riaria outou ia ratou.

‘Oia mau, e tano te reira mai te peu e e faahiti outou i te parau o te tino iˈo,’ e parau mai paha vetahi. ‘E ere râ te pohe o te tino iˈo i te hopearaa o te oraraa; e faatiamâ noa oia i te varua mai roto mai i te tino. E tauturu taua varua ra aore ra e haamauiui i te feia e ora ra.’ Te reira te manaˈo o na mirioni taata e haaati ra i te ao nei.

Ei hiˈoraa, i te fenua Madagascar ua riro noa te ora ei tauiraa, no reira e faarirohia te hunaraa e te tatararaa i te tino mai roto atu i te repo ei ohipa faufaa aˈe i te faaipoiporaa. E manaˈohia e e haere mai te taata i pohe mai roto mai i to ˈna mau tupuna e e hoˈi oia i pihai iho ia ratou ia pohe oia. No reira, e hamanihia te fare o te feia e ora ra e te raau e te pereti, taoˈa e pê i te roaraa o te tau, area te hunaraa maˈi, te “fare” o te feia pohe e hamani-maitai-aˈe-hia e e vai maoro aˈe. Ia tatara-anaˈe-hia te tino pohe mai roto mai i te repo fenua, e manaˈo te utuafare e te mau hoa e e haamaitaihia ratou, e te tiaturi ra te mau vahine e ia tapea ratou i te mau ivi o te fetii i pohe, e riro ratou ei vahine hotu mau. Eaha faahou râ ta te Parau a te Atua e faaite ra?

Aita te pohe i faanahohia no te huitaata

Mea anaanatae ia tapao e ua poiete te Atua ra o Iehova i te taata no te ora, e ua faahiti oia i te utua o te pohe ei faahopearaa noa no te faaroo ore. (Genese 2:17) Ma te peapea hoi, ua hara te tane e te vahine matamua, e ei faahopearaa, ua parare te hara i nia i te huitaata atoa nei ei tufaa i horoahia mai e te mau tupuna. (Roma 5:12) No reira, e parau paha outou e e te pohe e ohipa mau te tia ia tatou ia faaruru i roto i te oraraa mai te taime a faaroo ore ai na taata matamua, oia mau, e tuhaa mauiui mau o te oraraa. Ua poietehia tatou no te ora, o te faataa rii e no te aha e mea fifi mau no e rave rahi taata ia hiˈo i te pohe ei hopearaa.

Ia au i te faatiaraa a te Bibilia, ua tamata o Satani i te haavare i na taata matamua no nia i te pohe na roto i te faahaparaa i te faaararaa a te Atua e e hopoi mai te faaroo ore i te pohe. (Genese 3:4) A mahaere noa ˈi te tau, ua ite-maitai-hia e te pohe ra te mau taata mai ta te Atua iho â i parau. No reira, na roto i te mau senekele to Satani faaohiparaa i te tahi atu â haavare—e e ora te tahi tuhaa o te varua o te taata ia pohe te tino. Ua tano iho â taua huru manaˈo peapea i te Diabolo ra o Satani, o ta Iesu i faataa mai te “metua o te haavare.” (Ioane 8:44) I te taa-ê-raa râ, ua horoa te Atua no te feia pohe i te hoê tiaturiraa faaitoito mau.

Eaha ïa tiaturiraa?

O te tiaturiraa no te tia-faahou-raa no te rahiraa. O a·naʹsta·sis te parau heleni i hurihia na roto i te parau ra “tia-faahou-raa.” Teie ïa te auraa “tia faahou mai i nia,” e e tano te reira no te faatiahia mai mai roto mai i te pohe. Oia mau, e taoto te mau taata i roto i te pohe, area o te Atua na roto i to ˈna puai e nehenehe oia e faatia faahou mai te feia i pohe. E pohe te taata, e nehenehe râ te Atua e horoa faahou i te ora. Ua parau te Tamaiti a te Atua, o Iesu Mesia e “te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29) Ua faahiti te aposetolo Paulo e te “tiaturi nei au i te Atua . . . e e tia-faahou-raa to tei pohe, te feia parau-tia e te feia parau-tia ore.” (Ohipa 24:15) Ua faaite atoa o Ioba, te hoê tavini haapao maitai a te Atua na mua ˈˈe i te tau kerisetiano, i to ˈna tiaturiraa i roto i te tia-faahou-raa: “Ia pohe te taata nei, e ora faahou anei? E tiai au i to ˈu pue mahana i haapaohia ra e ia hope, e ia tae i te taime e faahoˈihia ˈi au ra. Na oe e tiaoro mai, e na ˈu e parau atu ia oe.”—Ioba 14:14, 15.

E ere anei e na te parau tǎpǔ maramarama o te tia-faahou-raa e haapapu ra i te hape o te manaˈo e te ora ra te feia pohe i roto i te huru varua? Mai te peu e te ora ra te feia pohe e te fanaˈo ra i te ora i nia i te raˈi aore ra i roto i te ao varua, eaha ïa te tumu o te tia-faahou-raa? Aita anei i noaa ia ratou i to ratou haamauruururaa aore ra te ora i faataahia no ratou? Te faaite ra te haapiiraa i te Parau a te Atua e ua pohe mau â te feia pohe, aita e parau itea, te taoto ra tae roa i te faaararaa rahi na roto i te tia-faahou-raa i roto i te ao apî—te hoê paradaiso—tei tǎpǔhia e to tatou Metua here ra o Iehova. Teie nei râ, mai te peu e e ere te pohe i te faataaraa o te tino e te varua e mai te peu e aita te varua e tamau noa i te ora, eaha te nehenehe e parauhia no nia i te mau huru taairaa no ǒ mai i te ao varua ra?

Te mau taairaa no ǒ mai i te ao varua

Ua faatiahia e rave rahi tupuraa no nia i te taairaa i noaa paha e te ao varua. Nohea mau na te reira? Te faaara maira te Bibilia ia tatou e “o Satani hoi tei faahua melahi atoa ia ˈna iho no te maramarama. E ere hoi i te mea maere rahi, ia faahua tavini . . . tana mau tavini no te parau-tia.” (Korinetia 2, 11:14, 15) Oia mau, no te haavare e no te aratai hape i te taata ma te ohie aˈe, ua faatupu te mau demoni (te mau melahi orure hau) i te taairaa e te feia e ora ra, e ua riro i te tahi taime ei mau ohipa faufaa.

E horoa mai te aposetolo ra o Paulo i te tahi atu â faaararaa no nia i taua ohipa no te haapeapea: “E faarue ai te tahi pae i te faaroo nei, i te faarooraa ˈtu i te mau varua haavare, e te parau o te mau demoni.” (Timoteo 1, 4:1) No reira te mau pahonoraa atoa e horoahia i te feia pohe no ǒ roa mai i te mau demoni ra o te faahua nei i te riro ei “mau tavini no te parau-tia” e te haaparare nei i te haavare i te pae faaroo, ma te faatîtî i te taata e te haapiiraa tahutahu e aratai ia ratou i rapae au mai i te parau mau o te Parau a te Atua.

Ma te haapapu e eita te feia pohe e nehenehe e faahiti i te hoê noa ˈˈe parau, e rave i te hoê noa ˈˈe ohipa, aore ra e faatupu i te hoê noa ˈˈe manaˈo, te faahiti ra te Salamo 146:3, 4 e: “Eiaha e tiaturi i te hui arii, e te taata atoa, aita hoi o ˈna e ora. Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” Eaha ïa te varua o te “reva nei”? O te puai ohipa ïa o te taata e atuatuhia ra e te hutihutiraa aho. No reira, ia faaea anaˈe te hoê taata i te huti i te aho, eita to ˈna mau tumu ite e tere faahou. E tomo ïa oia i roto i te huru itea-ore-roa-raa. Eita ïa oia e nehenehe e faatere te feia e ora ra.

No reira te Bibilia e faaau ai i te pohe o te mau taata e te pohe o te animala, ma te haapapu e aita e parau itea ia pohe raua toopiti atoa ra e e hoˈi i te repo no reira hoi raua i te hamaniraahia. Te parau nei te Koheleta 3:19, 20 e: “Hoê â hete hopea to te taata atoa nei, e to te puaa atoa ra; hoê o ratou roohiaraahia mai: te pohe nei te tahi pae, e te na reira atoa nei te tahi pae i te pohe; hoê hoi o ratou atoa ra aho; e aita ˈtura te taata i hau i te puaa; e mea faufaa ore ratou atoa ra. Te haere nei ratou i te vahi otahi; no te repo anaˈe ratou e te hoˈi anaˈe nei i te repo â.”

Ma te ite e te tamata nei te mau demoni i te haavare i te taata ma te manaˈo e e nehenehe ratou e faatupu i te taairaa e te feia pohe e e nehenehe ratou e haapeapeahia e te feia pohe, ua faaara te Atua ra o Iehova i to ˈna nunaa, te mau ati Iseraela i tahito ra e: “Eiaha roa te hoê i roto ia outou . . . e te hiˈo ata, e tei imi i te pifao, e te hiˈohiˈo, e te hebere, e te feia e imi i te varua ino, e te taura, e te feia uiui i tei pohe ra. O te feia atoa hoi i rave i te reira ra peu, e feia faufau ïa na Iehova e no te reira mau mea faufau i tiavaru ai to Atua ra o Iehova ia ratou i mua ia oe ra.”—Deuteronomi 18:10-12.

Ma te papu, e ere te manaˈo e e nehenehe te feia pohe e haamauiui ia outou no ǒ mai i te Atua ra. E Atua parau mau oia. (Salamo 31:5; Ioane 17:17) E te faaherehere nei oia i te hoê oraraa faahiahia mau no te feia e au ra i te parau mau o te haamori ra ia ˈna na roto i te “varua e te parau mau.”—Ioane 4:23, 24.

Iehova, e Atua o te parau mau e o te here

Ua tǎpǔ mai to tatou Metua here ra i te raˈi, “o te ore roa e tia ia haavare,” e: E faatiahia mai te mau mirioni e te mau mirioni o tei pohe e tei tuuhia i roto i te apoo e te neheneheraa e ora e a muri noa ˈtu i roto i te hoê ao apî parau-tia! (Tito 1:1, 2; Ioane 5:28) Te faaite nei teie parau tǎpǔ here mau no nia i te tia-faahou-raa e te anaanatae hohonu ra o Iehova i te maitairaa o ta ˈna poieteraa taata e te hinaaro mau ra oia e faaore roa i te pohe, te oto e te mihi. No reira aita e faufaa e e mǎtaˈu atu i te feia pohe aore ra e ia haapeapea hua ˈtu no ratou e no te mea o ta ratou e nehenehe e rave. (Isaia 25:8, 9; Apokalupo 21:3, 4) E nehenehe e e faatia to tatou Atua here e te parau-tia ra o Iehova ia ratou, ma te faaore roa i te mauiui o te pohe.

E rave rahi faataaraa i roto i te Parau a te Atua, te Bibilia, no nia i te huru o te fenua i roto i taua ao apî parau-tia i tǎpǔhia. (Salamo 37:29; Petero 2, 3:13) E mau taime hau e te oaoa e te here no te huitaata nei. (Salamo 72:7; Isaia 9:7; 11:6-9; Mika 4:3, 4) E vai paruru noa te taatoaraa, te mau fare maitai, oia atoa i te ohipa maitai. (Isaia 65:21-23) E amu te taatoaraa e rave rahi mau mea maitatai. (Salamo 67:6; 72:16) E fanaˈo te taatoaraa i te oraora-maitai-raa taatoa. (Isaia 33:24; 35:5, 6) A faatere noa ˈi te mau aposetolo apitihia e te hoê numera taata taotiahia e o Iesu i roto i te mau raˈi, aita te Bibilia e faahiti ra i te mau haamaitairaa i roto i te mau raˈi no te mau nephe o te tahi mau taata i muri aˈe i te pohe. (Apokalupo 5:9, 10; 20:6) E mea maere mau â ahiri e e ora te tahi tau mirioni feia pohe i reira i muri aˈe i to ratou pohe.

Eita râ tatou e maere ia ite anaˈe tatou i te haapiiraa maramarama a te Bibilia: E faaea te feia pohe i te ora ei nephe ora. Eita ratou e nehenehe e haamauiui ia outou. Te taoto noa ra te feia i roto i te apoo, ma te itea ore tae roa i te tia-faahou-raa i te taime ta te Atua i faataa. (Koheleta 9:10; Ioane 11:11-14, 38-44) Tei te Atua râ ïa to tatou mau tiaturiraa e to tatou tiaraa. “E oaoa tatou ma te ouˈauˈa i te ora na ˈna.”—Isaia 25:9.

[Hohoˈa i te api 7]

Mai ta te Parau a te Atua e faaite maramarama ra, e vai ohipa ore te feia pohe tae roa i te tia-faahou-raa