Te mau Ite no Iehova na te ao nei—Nigeria

TEI ropu te fenua NIGERIA i te mau otia o Afirika i te pae tooa o te râ. Tei roto oia i te Ooa no Guinée, i te pae apatoerau noa o te reni ropu o te fenua e ua hau atu i te 88 mirioni taata e faaea ra i reira.a

I te mau matahiti taviniraa toopiti i mairi aˈenei, ua horoa te amaa no Nigeria a te Taiete Watch Tower i te hoê ara-maite-raa taa ê no te mau taurearea. Ua faaite te hoê hiˈopoaraa i roto i te mau amuiraa a te mau Ite no Iehova e tei roto 80 i nia i te hanere feia o tei haamata i te poro i te parau apî maitai i Nigeria i te matahiti 1992 i te faito matahiti 10 tae atu i te 20. I te pae o te feia i bapetizo i taua matahiti ra, tei roto 63 i nia i te hanere i taua faito matahiti ra.

Te riro ra te mau taurearea ei mau pionie

Te faaô ra e rave rahi mau taurearea i roto i te ohipa pororaa ma te taime taatoa ei mau pionie. Te parau ra te hoê pionie o Hannah to ˈna iˈoa e: “I te taime a fatata ˈi ta ˈu haapiiraa i te hope, ua haere vau e hiˈo i te feia o tei haaputuputu i te Haapiiraa no te taviniraa pionie, i reira to ˈu farereiraa e piti tuahine paari. Ua manaˈo atura vau ia ˈu iho e, ‘Mai te peu e e nehenehe o raua e riro mai ei pionie, no te aha ïa eita ta ˈu e nehenehe?’

“No reira i to ˈu faahoperaa i ta ˈu haapiiraa, ua riro mai au ei pionie. E toru avaˈe i muri iho ua farerei au ia Josephine e 26 matahiti to ˈna, te hoê vahine haamori i te taoˈa tahutahu. Ua parau oia e: ‘E mau taata iino outou te mau Ite no Iehova. Aita outou e faatupu ra i te oroa Noela aore ra e faaohipa ra i te mau taoˈa tahutahu.’ Ua pahono vau e mai te peu e e farii o ˈna ia haapii vau i te Bibilia e o ˈna, e taa ïa ia ˈna no te aha tatou e ore ai e rave i taua mau ohipa ra. Ua titau manihini mai o ˈna ia ˈu i muri aˈe. Ua haamata ˈtura o ˈna i te haere i te mau putuputuraa e ua rave oia e rave rahi mau tauiraa i roto i to ˈna oraraa. I te avaˈe no titema 1990 ua bapetizohia oia. Mai te avaˈe no atete 1991, ua riro o Josephine ei pionie. I to ˈna putuputuraa i te Haapiiraa no te taviniraa pionie i te matahiti i mairi aˈenei, ua faaite o ˈna ia ˈu i to ˈna mau hoa haapiiraa mai to ˈna metua vahine i te pae varua!”

Te ripene vidéo e te Piha no te Basileia

Ua tauturu te hoê o te mau ripene vidéo a te Taiete i te hoê amuiraa iti ia noaa mai i te hoê fenua no te hoê Piha no te Basileia. Ma te imi i te hoo mai i te hoê fenua, ua haere e maha taeae e farerei i te Onojie, te raatira tumu o taua vahi ra. Ua pûpû oia na ratou te hoê fenua no te hoê tino moni e 20 000 naira (1 025 dala marite). Aita ta te amuiraa e ravea no te horoa i teie moni rahi, i te mea e e 17 taata poro noa ratou no te aufau i te opuaraa. Ua parau te Onojie e e feruri o ˈna i nia i te tahi atu tuhaa fenua.

Tau avaˈe i muri iho, ua mataitai te hoê o te mau matahiapo o te amuiraa i te vahi faaearaa o te Onojie. Te hiˈo ra te Onojie i te hoê ripene vidéo no nia i to ˈna faakoronaraahia. Ua parau te matahiapo e: “Te vai ra ta ˈu te hoê ripene vidéo o ta ˈu e hinaaro ra ia mataitai oe. Te mau Ite no Iehova—Te faanahonahoraa i muri mai i te iˈoa ïa te upoo parau.”

I muri aˈe, ua ani te matahiapo eaha te manaˈo o te Onojie no nia i te ripene vidéo. “Ua mataitai au i te ripene e pae taime,” ta te Onojie ïa i parau. Ua faahaamanaˈo te matahiapo i te Onojie i te mau Piha no te Basileia ta ˈna i ite i roto i te ripene vidéo e ua faataa oia e e hinaaro te amuiraa o taua vahi ra e patu i te hoê â huru fare. Ua ani ïa oia e mai te peu e e nehenehe te amuiraa e hoo mai i te tahi fenua tapiri atu i te hoê fenua nainai ta ˈna e fatu ra. Ua pahono te Onojie e: “Inanahi po ra i muri aˈe i to ˈu mataitairaa i te ripene vidéo, ua manaˈo vau i te hoê â mea.” Inaha, ua faito oia e 6 metera i te aano i pihai iho i te tuhaa fenua o te amuiraa. “E nehenehe outou e rave i te reira,” ta ˈna ïa i parau. “Ma te roaraa, e nehenehe outou e rave i te tuhaa fenua atoa o ta outou e hinaaro. A faaineine i te mau papie, e e tarima vau i te reira.”

[Nota i raro i te api]

[Tumu parau tarenihia i te api 9]

TABULA O TE FENUA

Matahiti taviniraa 1993

NUMERA RAHI ROA ˈˈE O TE FEIA PORO: 174 582

FAITO: 1 Ite no e 507

FEIA I TAE MAI I TE OROA HAAMANAˈORAA: 473 245

NUMERA AU NOA O TE MAU PIONIE: 19 777

NUMERA AU NOA O TE MAU HAAPIIRAA BIBILIA: 242 028

RAHIRAA FEIA BAPETIZOHIA: 8 888

RAHIRAA AMUIRAA: 3 289

AMAA: BENIN CITY, EDO STATE