A faaite i te iˈoa o Iehova i mua i te taata
“E pûpû tatou ma te tuutuu ore i te Atua ra te hoê tusia arueraa, oia hoi, te hotu o te vaha o te faaite i mua i te taata i to ˈna ra iˈoa.”—HEBERA 13:15, T.a.a.
1. Eaha ta te peropheta Hosea i faaue i to ˈna mau hoa ati Iseraela ia rave?
E POROI faufaa roa ta te peropheta a Iehova ra o Hosea no to ˈna mau hoa ati Iseraela. I te senekele vau hou to tatou nei tau, ua faaue oia i te feia faaroo ore o to ˈna ra tau ia tatarahapa. Ua aˈo oia e: “E rave outou i te parau a fariu ai ia Iehova; a parau ai ia ˈna e, E faaore mai i te mau hara atoa, a farii mai ai ia matou ma te aroha; a horoa ˈtu ai matou i te tusia [apî] o to matou vaha.” (Hosea 14:2) I to ˈna aˈoraa i te nunaa ia pûpû na Iehova ‘te tusia [apî] o to ratou vaha,’ ua faaitoito te parau tohu a Hosea i te mau ati Iseraela ia tatarahapa e ia pûpû i te mau tusia arueraa ma te aau tae i te Atua ra.
2. Eaha te huru tusia ta te aposetolo Paulo i faaitoito i te mau kerisetiano ia pûpû atu?
2 Te pûpû ra te mau Ite no Iehova i ‘te tusia [apî] o to ratou vaha’ i teie nei mahana. Te haapao atoa ra ratou i te faaueraa a te aposetolo Paulo, o tei faahiti i teie mau parau i roto i te parau tohu a Hosea i to ˈna papairaa e: “[Na roto i te arai o Iesu Mesia] e pûpû tatou ma te tuutuu ore i te Atua ra te hoê tusia arueraa, oia hoi, te hotu o te vaha o te faaite i mua i te taata i to ˈna ra iˈoa.” (Hebera 13:15, T.a.a.) No reira, te arue ra te mau tavini o te Atua ia Iehova ma te oaoa na roto i ta ratou ohipa pororaa i te Basileia.—Mataio 24:14.
3. Nafea tatou e nehenehe ai e pûpû na Iehova “te hoê tusia arueraa,” e e tuatapapa tatou i teie nei i ta vai mau ohipa?
3 E haamaitairaa taa ê faito ore te faaiteraa i te iˈoa o Iehova i mua i te taata no te feia hara. Auê te oaoa e ia faaite tatou ia vetahi ê i to tatou ra Atua, na reira e pûpû ai tatou na Iehova “te hoê tusia arueraa,” ‘te tusia [apî] o to tatou vaha’! No te faaitoito ia tatou i roto i te pororaa i te parau apî maitai o te Basileia i mua i te taata i teie nei mahana, e tuatapapa tatou eaha ta te Bibilia e faaite ra ia tatou no nia i te mau peropheta a te Atua e te tahi atu mau tavini a Iehova. I roto i te roaraa o to ratou oraraa, e nehenehe tatou e huti rahi mai i te haapiiraa o te tauturu ia tatou ia haafaufaa i ta tatou ohipa pororaa.—Roma 15:4.
Te tuhaa a te mau peropheta
4, 5. (a) Na roto i te mau reo tumu o te Bibilia, eaha te auraa tumu o te mau parau iritihia na roto i te parau ra “peropheta”? (b) Eaha te mea e faaite ra e e tuhaa faahiahia mau to te mau peropheta i roto i te faanahoraa a te Atua?
4 E haamaitairaa taa ê na ta te mau peropheta o Iehova i te faaiteraa i ta ˈna poroi i mua i te taata. Mea papu ore te tumu o te parau hebera ra “peropheta” (na·viʼʹ), te faaite nei râ to ˈna faaohiparaa i roto i te Bibilia e e mau auvaha na Iehova te mau peropheta mau, e mau taata na te Atua e te mau poroi faauruahia. Te auraa mau o te parau heleni iritihia na roto i te parau ra “peropheta” (pro·pheʹtes) oia hoi “te hoê taata taiâ ore i te paraparau,” te parauraa i te hoê mea “tia ˈtu i” aore ra “i mua roa i” te hoê taata. Ua riro te hoê peropheta ei taata o te faaite ra i te mau poroi no ǒ mai i te Atua ra. Mea pinepine, eiaha râ i te mau taime atoa, e tohu te mau peropheta mau a te Atua i te mau ohipa e tupu i te tau no a muri aˈe.
5 No nia i te tuhaa faahiahia mau o te mau peropheta i roto i te faanahoraa a te Atua, te faataa ra te Buka parau paari (beretane) a M’Clintock e Strong e: “I te tahi mau taime e aimârôhia ta ratou poroi . . . I te rahiraa râ o te taime ua turaihia ratou mai roto roa mai ia ratou ia faaite i te mau taata e aita hoi ta ratou mau aˈoraa e aimârôhia, e aita ratou i taiâ i te parau tahaa roa ˈtu e ma te papu i te mau vahi, paha, e faatupu ai to ratou tomoraa i te riri e te riaria.” (Buka VIII, api 640) A hiˈopoa na i te tahi mau hiˈoraa no nia i te mea i turai i te mau peropheta ia rave i teie tiaraa itoito mau.
Te mau manaˈo hohonu e te manaˈo e turai ia tatou
6, 7. Eaha te mea ta Iehova i faaue i te peropheta Ezekiela ia amu, e eaha te faahopearaa o te reira?
6 Na mua ˈˈe te haamouraa o Ierusalema i te matahiti 607 hou to tatou nei tau, ua paraparau o Iehova i te mau ati Iuda i hopoi-tîtî-hia i Babulonia na roto i te arai o ta ˈna peropheta ra o Ezekiela. Ua parau o Iehova ia ˈna e: “E te tamaiti a te taata na, a amu i tei faaitehia ˈtu; e amu i teie nei otaro, a haere ai, a parau ai i te utuafare o Iseraela.” Ua auraro o Ezekiela. Ua pahono oia e: “Ua hamǎmǎ ˈtura vau i tau vaha, e ua faaamu maira oia i taua otaro ra. Ua parau maira hoi oia ia ˈu, E te tamaiti a te taata na, ia farii mai to opu, e ia î hoi to opu i teie nei otaro ta ˈu e ho atu ia oe ra. Ua amu ihora vau; e mai te meli te huru i to ˈu nei vaha i te momona.”—Ezekiela 3:1-3.
7 E faufaahia to tatou tino i te mau taoˈa faaitoito no roto mai i te maa ta tatou e amu nei, e i roto i te hoê auraa e riro mai te reira ei tuhaa o tatou nei. Oia atoa, ua riro te “otaro” ta Ezekiela i amu—te poroi a Iehova te tia i te peropheta ia faaite—ei tuhaa no ˈna, o tei haaputapû i to ˈna mau manaˈo hohonu. I te mea e ua haaputapû rahi mau te mau parau a te Atua i te mau manaˈo hohonu roa ˈˈe a Ezekiela, ua riro te faaiteraa i te reira i mua i te taata ei oaoaraa na ˈna. Mai te peu e e Ite no Iehova outou, te oaoa ra anei outou i te faaite i te poroi o te Atua i mua i te taata?
8, 9. Eaha te mea i turai ia Amosa ia tohu?
8 A hiˈo atoa na i te peropheta ra o Amosa. Ua ora oia i te senekele iva hou to tatou nei tau, tei roto o ˈna i te mau peropheta hebera matamua o tei papai i te hoê buka o te Bibilia piihia e to ˈna iho iˈoa. Mai ia Ezekiela, e taata poro i te parau a Iehova taiâ ore o Amosa. Oia mau, ua faahitihia te parau ra “te na ô maira Iehova” e 11 taime i roto i te buka o te amo ra i to ˈna iˈoa! (Amosa 1:3, 6, 9, 11, 13; 2:1, 4, 6; 3:12; 5:4; 7:17) Ua ite o Amosa i te faufaaraa ia faaite i te mau parau a te Atua i mua i te taata.
9 Ei peropheta a te Atua, ua haa o Amosa i mua i te mau faaiteraa no ǒ mai i te Atua na roto i te raveraa i te ohipa papu. Na roto i te arai o Amosa, ua parau te Atua e: “Ua uâ te liona, o vai te ore e mǎtaˈu? ua parau te Fatu ra o Iehova, o vai te ore e tohu?” (Amosa 3:8) Ma te otohe ore, ua turaihia te peropheta ia faaite i te poroi a Iehova.
10. Eaha te huru o te mau tavini o Iehova o teie nei tau ia patoihia ta ratou ohipa pororaa?
10 Mai te hoê liona ra te huru, te uâ ra o Iehova i te mau poroi haavaraa o te faataehia i nia i te faanahoraa ino o teie nei ao. Mai ia Amosa, te turaihia ra te mau tavini o Iehova no teie tau ia faaite i te mau parau a te Atua i mua i te taata. Oia atoa, ia haamǎtaˈuhia ratou e te feia patoi, te pee nei ratou i te hiˈoraa o te mau aposetolo Petero e o Ioane, o tei parau ma te puai e: “E ore hoi matou e tia ia ore ia parau i ta matou i [ite] aˈenei, e ta matou i faaroo aˈenei.” Ua haapapu atoa te mau aposetolo e: “O te Atua ta matou e faaroo e tia ˈi eiaha te taata.” (Ohipa 4:20; 5:29) Eaha ïa no tatou nei? Mea maitai ia hiˈopoa i to tatou mau manaˈo hohonu no nia i te faaiteraa i te iˈoa o Iehova i mua i te taata.
‘No te î o te mafatu’
11. Eaha te mea o te turai ia tatou ia tamau maite i roto i te faaiteraa i te iˈoa o Iehova i mua i te taata?
11 Aita e feaaraa e ua mauruuru te mau peropheta o Iehova no ta ratou mau hopoia taa ê. E tia atoa e ia turai teie mauruuru no Iehova ia tatou ia faaite i to ˈna iˈoa i mua i te taata. Te faataa ra te Salamo 145:1, 2 e: “E faateitei â vau ia oe, e tau Atua, e te Arii; e haamaitai â vau i to oe ra iˈoa e a muri noa ˈtu. E haamaitai â vau ia oe i te mau mahana atoa nei; e arue au i to iˈoa e a muri noa ˈtu.” Mai teie mau parau atoa anei to outou haerea? E tauturu te haapiiraa i te Bibilia ma te tamau ia tatou ia faahohonu â i to tatou mauruuru no te mea ta Iehova i rave, ta ˈna e rave ra, e ta ˈna e rave faahou no tatou nei. E ia haapii amui tatou i te Bibilia mai te hoê utuafare fetii, aita anei tatou e ite ra e te faatupu ra te Parau a te Atua i te puai, ma te turai ia tatou ia hinaaro e paraparau no nia ia ˈna e ta ˈna mau opuaraa? (Hebera 4:12) Ia noaa ia tatou i te aravihi i roto i te faaiteraa i te iˈoa o Iehova i mua i te taata, e titau atoa tatou ia faaohipa ma te rahi i te mau buka kerisetiano pûpûhia e te Atua ra o Iehova na roto i te arai o te “tavini haapao maitai e te paari” faatavaihia.—Mataio 24:45-47.
12. Nafea te mau putuputuraa kerisetiano e te feruri-hohonu-raa e tauturu ai ia tatou ia faaite i mua i te taata?
12 Mai te peu e te hinaaro ra tatou e arue ia Iehova ma te mafatu o tei î i te mauruuru, e titau tatou i te apiti atu i te mau putuputuraa kerisetiano ma te tamau. E tia i te mau taata atoa o Iehova ia haapao i te faaararaa a te aposetolo Paulo: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.” (Hebera 10:24, 25) Te tae tamau ra anei outou i te mau putuputuraa kerisetiano? Te tauaparau pinepine ra anei outou no nia i te mau parau mau o te mau Papai, te mau tupuraa maitatai, e te mau parau apî anaanatae no nia i te maraaraa teotaratia ta outou e faaroo ra i te mau putuputuraa o te nunaa o te Atua? Mai te peu e te haamarirau ra outou i te faaite ia Iehova e ta ˈna mau opuaraa, a rave i te taime no te feruri ma te hohonu i nia i ta ˈna Parau ia ô hohonu to ˈna mau manaˈo i roto i to outou mafatu. (Salamo 77:12; 143:5) E, e tauturu te mau putuputuraa kerisetiano e te feruri-hohonu-raa ma te tamau i nia i te Parau a te Atua ia outou ia haafaufaa i te hopoia taa ê faahiahia mau e faaite i te iˈoa o Iehova i mua i te taata.
13. Nafea tatou e ‘faatupu ai i te mea maitai’ no roto mai i to tatou mafatu?
13 Ma te î o te mafatu i te mauruuru no Iehova, e faatupu tatou i te mau mea maitatai. “E tuu mai te taata maitai i te mea maitai no roto i te pueraa o te maitai ra o to ˈna [mafatu],” ta Iesu ïa i haaferuri atu, “e tuu mai te taata ino i te mea ino no roto i te pueraa o te ino ra o to ˈna [mafatu]: no te î hoi o te [mafatu] i parau ai te vaha.” (Luka 6:45) Eaha te ravea ‘faatupuraa i te mea maitai’ faahiahia roa ˈˈe i te faaiteraa i te iˈoa o Iehova i mua i te taata e te faahitiraa i ta ˈna mau opuaraa i to tatou mau taata tapiri, to tatou mau fetii—oia mau, i te feia atoa ta tatou e farerei ra?
Te mau faahopearaa o te faaiteraa i mua i te taata
14. (a) Eaha ta te taata faaite e ta te taata farii i te poroi o te Basileia e nehenehe e faatupu? (b) Eaha te faatupuhia ra na roto i te ohipa pororaa i te Basileia?
14 Ua ite te mau peropheta a te Atua i te oaoa i roto i ta ratou taviniraa, e ua faufaahia te feia i farii maitai i te mea ta ratou i faaite. Oia atoa, e faatupu te faaiteraa i te poroi o te Basileia i mua i te taata i te oaoa rahi no te feia e faaite ra i te reira. (Ohipa 20:35) E auê te feia e farii maitai ra i te reira i te faufaahia! Te tauturu ra te fariiraa i te parau apî maitai i te mau taata ia manuïa i te hepohepo aore ra ia haapaiuma e te reira. Te oaoa ra te feia e mauiui ra i te tiaturiraa o te tia-faahou-raa. Te ape ra te feia i taero i te raau taero i te faatîtîraa o te nicotine, te héroïne, e te tahi atu mau raau taero. Ua faaitoitohia e rave rahi i te pae morare, e te noaa ra i te feia atoa e farii ra i te parau mau o te Bibilia i te tiamâraa i te pae varua. (Ioane 5:28, 29; 8:32) Ua riro atoa te pororaa i te Basileia mai te tiaturiraa otahi roa o te huitaata ei ravea no te faaara i te feia iino, ma te faatupu i te hoê pahonoraa oaoa i roto i te mafatu haavare ore. No reira, e faataahia te mau taata no te “pohe mure ore” aore no te “ora mure ore” ia faataehia te haavaraa a te Atua i nia i teie ao ino. (Mataio 24:14; 25:31-46; Ezekiela 33:1-9; Timoteo 1, 2:3, 4) Ua riro ta tatou ohipa pororaa ei ohipa faaora aita i tupu aˈenei, te faaiteraa rahi roa ˈˈe e te aano roa ˈˈe horoahia aˈenei ia tupu i nia i te fenua nei!
15. Eaha te nehenehe e ravehia no te tauturu i te feia o te tia ia haerehia e farerei i roto i ta tatou tuhaa fenua o te pororaa?
15 Ei mau Ite no Iehova o teie tau, te ohipa ra tatou ma te oaoa e te auraro no to tatou Fatu i te raˈi ra. (Roma 12:11) No reira, te oaoa ra tatou i te faataa i te taime ma te tamau no te faaô i roto i te ohipa pororaa i te parau apî maitai i mua i te taata e na te mau fare. (Ohipa 5:42; 20:20) Te faaite ra te mau tabula na te ao taatoa nei e te vai ra te tahi mau taata i roto i ta tatou mau tuhaa fenua o te tia ia haerehia e farerei. A taui noa ˈi te mau tupuraa i roto i te ao, te haaputapûhia ra te mau taata na roto e rave rau mau ravea. E rave rahi o tei riro ma te ore e manaˈohia ei mau taata tei horo, ei mau taata ěê i roto i te hoê fenua ěê. Peneiaˈe te vai ra vetahi o teie mau taata i roto i ta tatou tuhaa fenua o te pororaa. Mai te peu e e, e haa tatou ia au i tei maraa ia tatou no te tauturu ia ratou i te pae varua a tamau maite noa ˈi tatou i roto i ‘te ohipa moˈa o te parau apî maitai.’ (Roma 15:16) Ua tia i te tahi mau kerisetiano ia haapii i te hoê reo ê atu no te faaite i te parau apî maitai o te Basileia i teie mau taata.
16. Eaha te mea o te nehenehe e tauturu ia tatou ia tamau maite i roto i te faaiteraa i te iˈoa o Iehova?
16 Ua amo e rave rahi mau peropheta a te Atua i te mau hopoia fifi mau. E ere i te mea ohie no ratou ia faaite i te mau poroi a te Atua i te mau taata farii ore. Oia atoa, e ere i te mea ohie no te taata atoa i pûpû ia ˈna no Iehova ia faaite i To ˈna iˈoa i mua i te taata, i roto iho â râ i te mau tuhaa fenua farii ore. Teie râ, ma te horoa i te tiaturi faatupuhia e te haapiiraa i te Parau a te Atua ma te pure, amuihia mai e te puai ta Iehova e horoa ra, e nehenehe tatou e tamau noa i te faaite i te poroi o te Basileia. (Philipi 4:13; Apokalupo 14:6) No reira, eaha ˈtu â ta tatou e nehenehe e haapii no nia i te mau peropheta a Iehova e te tahi atu â o ta ˈna mau tavini o te tau tahito?
Te mau hoa i roto i te taviniraa
17. Eaha vetahi mau hiˈoraa a te mau Papai no nia i te auhoaraa maitai i roto i te taviniraa a te Atua?
17 I to ˈna amoraa i ta ˈna hopoia, e vai na i te omuaraa i te peropheta a te Atua ra o Mose te tauturu a to ˈna tuaane matahiapo, o Aarona. Ua parau o Iehova ia Mose e: “Na [Aarona] e parau atu i te taata i ta oe parau, ei vaha mau hoi oia no oe, e ei mono oe i te Atua ia ˈna ra.” (Exodo 4:16) A hiˈo atoa na i te tau o te mau peropheta Elia e Elisaia, i to “te mau pǐpǐ o te mau peropheta” faraa mai. Ua riro ratou ei mau pǔpǔ o te mau tavini a te Atua o tei ohipa amui, eita e ore ma te haafaufaa i te auhoaraa maitai i rotopu i te tahi e te tahi. (Te mau arii 2, 2:3-5; 4:38; faaau e te Samuela 1, 10:5, 10.) Papu maitai, aita o Mose e o Aarona e “te mau pǐpǐ o te mau peropheta” i faaô ia ratou i roto i te faaiteraa i te parau apî maitai o te Basileia. Noa ˈtu râ, ua faufaahia ratou paatoa i to ratou taatiraa ˈtu. Tau senekele i muri iho, ua tono “tatoopiti” te Mesia 70 pǐpǐ i roto i te taviniraa, e ma te feaa ore ua faufaahia ratou e te apitiraa ˈtu i te mau hoa i haapaohia na ratou.—Luka 10:1-16; faaau e te Ohipa 17:10, 11; 20:20.
18. Nafea te mau hoa i roto i te taviniraa i te faatupuraa i te hoê opuaraa faufaa i teie mahana?
18 I te matahiti 1953, ua haamau te mau Ite no Iehova i te hoê porotarama e e ohipa amui te mau taata poro o te Basileia i roto i te taviniraa. Papu maitai, aita te reira i ravehia no te auhoaraa noa. Ua opuahia teie porotarama faaineineraa no te faariro i te mau tavini o te Atua ei mau taata haapii e ei mau taata poro o te parau apî maitai aravihi aˈe. E teie tapao i roto i te feruriraa, ua apiti te mau taata poro o te Basileia aravihi aˈe i roto i te taviniraa e te mau taata apî. Ua faatupu teie porotarama faaineineraa na te mau fare i te haamaitairaa rahi e ua tauturu i te nunaa a Iehova ia haamaitai atu â i roto i te faaiteraa i to ˈna iˈoa i mua i te taata. (Timoteo 1, 4:16) I teie mahana, ua riro te parururaa ei tumu ê atu e ia haere te mau kerisetiano i roto i te taviniraa “tatoopiti,” i roto iho â râ i te tahi mau vahi.
19. Eaha te tia ia tapea i roto i te feruriraa no nia i te mau tapao tataitahi i roto i te taviniraa?
19 Ia ohipa outou e te hoê hoa faaroo i roto i te taviniraa aore ra ia haere outou i te hoê opani o outou anaˈe, a tutava no te tapae i ta outou iho tapao aore ra fa. E mau tapao tano, o tei maraa ia outou. Te titau ra anei outou i te tauturu no te faatano i ta outou omuaraa parau no te faaara i te anaanatae o te mau taata i roto i ta outou tuhaa fenua? Mai te peu e e, peneiaˈe e nehenehe outou e apiti atu e te hoê pionie, te hoê taata poro o te Basileia ma te taime taatoa, aore ra te hoê taata poro o tei aravihi paha i te pae iho â râ o te faaohiparaa i te mau omuaraa parau maitatai. E nehenehe paha to outou hoa e apiti ia outou i roto i te faaineineraa e te faaohiparaa i te mau omuaraa parau faahitihia i roto i Te taviniraa o te Basileia aore ra te buka Haaferuriraa ia au i te mau Papai. Ia haere outou e poro amui na te mau fare, a faaroo maite i te mau faaiteraa o to outou hoa. I muri iho, a tamata outou iho i te hoê â faaiteraa ia tae roa i te taime a matau maitai ai outou i teie huru o ta outou taviniraa.
20, 21. Eaha te mea o te nehenehe e faariro i te hoê hoa i roto i te taviniraa ei tauturu iho â râ?
20 Eaha ïa mai te peu e e titau outou i te tauturu no te rave i te mau hoˈi-faahou-raa e farerei aravihi e te tapao e haamata i te hoê haapiiraa bibilia i te fare o te taata? Peneiaˈe na roto i te taeae faatere i ta outou haapiiraa buka a te amuiraa, e nehenehe e ravehia te tahi mau faanahoraa no outou no te ohipa i roto i te taviniraa e te hoê taata poro o te Basileia o tei aravihi i te pae o te haamataraa i te mau haapiiraa bibilia. Eiaha outou e riro mai ei hoa o te mamû noa ia rave amui outou i te mau hoˈi-faahou-raa e farerei. Maoti râ, i muri aˈe to outou hoa faaiteraa e nafea oia, e tane paha aore ra e vahine e faaineine ai i te mau tumu parau no te hoê hoˈi-faahou-raa e farerei, e nehenehe outou e haafaufaa i te reira no te rave i te hoê â faaiteraa ia rave outou i te hoˈi-faahou-raa e farerei i muri iho. Tei reira to outou hoa no te tauturu e no te horoa i te tahi aˈoraa i muri aˈe.—Faaau e te Galatia 6:6.
21 E nehenehe teie huru apitiraa here no ǒ mai i te hoê hoa pororaa e tauturu ia outou ia tapae i ta outou mau tapao i roto i te taviniraa. E turai teie tauturu e to outou mauruuru hohonu i te hamani maitai o Iehova i to ˈna fariiraa ia outou ia rave i teie ohipa taa ê ia outou ia aravihi atu â i roto i ta outou mau ohipa pororaa i te Basileia. E a haafaufaa i ta outou hopoia taa ê e haamaitai ia Iehova na roto i te faahiti-maitai-noa-raa ia ˈna e na roto i te faaiteraa i to ˈna iˈoa i mua i te taata ma te tamau.—Salamo 145:1, 2, 9-13.
22. Eaha te mau uiraa o ta tatou haapiiraa i muri iho o te tauturu ia tatou ia pahono atu?
22 Ei mau Ite no Iehova, e pinepine tatou i te hoˈi e farerei i te taata i roto i ta tatou taviniraa i tera e tera fare. E rave rahi o te faaroo ra i te parau apî maitai ma te hoê mauruuru hohonu. Teie râ, e haamarirau paha vetahi i te faaroo i te poroi o te Basileia. Eaha ta tatou e tia ia rave i mua i teie mau huru tupuraa? Nafea tatou e nehenehe ai e tamau maite i roto i te ohipa ta Iehova i horoa no to ˈna nunaa? Eaha vetahi mau hiˈoraa a te mau Papai o te nehenehe e tauturu aore ra e aratai ia tatou? E pahonohia teie mau uiraa i roto i te tumu parau i muri nei.
Ua taa anei ia outou i teie mau tuhaa?
◻ Eaha ta Hosea e ta te aposetolo Paulo i parau no nia i te mau tusia na te Atua?
◻ Eaha te mea i turai ia Ezekiela e ia Amosa ia tohu?
◻ Nafea tatou e faariro ai i ta tatou ohipa pororaa i te Basileia?
◻ Eaha te mau haamaitairaa o te nehenehe e huti mai no ǒ mai i te mau hoa i roto i te taviniraa?
[Hohoˈa i te api 13]
E nehenehe te hoê hoa aravihi e tauturu ia tatou ia haamaitai i roto i te taviniraa