A faaaraara i te mata i nia i te parau apî maitai

“EITA te raˈi e iti mai i te ninamu no te mea aita te matapo e ite ra ia ˈna,” ta te hoê ïa parau paari danemata e parau ra. Tera râ, i roto i to tatou nei oraraa ohipa roa i teie nei mahana, te ite ra anei tatou e mea ninamu mau iho â te raˈi, ei auraa parau? Te hiˈo ra anei tatou i te tau a muri aˈe ma te tiaturi mau? Te tiaturi mau ra anei tatou i te parau apî maitai ta te Parau a te Atua, te Bibilia e faaite mai nei?

I roto i te tumu parau na mua ˈtu, ua hiˈo mai na tatou i te mau huru o te matapo mau. Ia tuatapapa na ïa tatou i teie nei, i te hoê huru ite faufaa roa ˈtu â. E ohipa o ˈna i nia i to tatou oaoaraa mure ore e oia atoa hoi i nia i te mau tiaturiraa no a muri aˈe no tei herehia e tatou.

Ma te feaa ore, te faaruru nei tatou i te “ati rahi i taua anotau hopea nei.” (Timoteo 2, 3:1) Eaha te ohipa e tupu, a haa noa ˈi te taata i te imi i te faufaa no to ˈna oraraa, ma te faaruru i te mau fifi i te pae no te oraora-maitai-raa e no te utuafare, e a faaû noa atoa ˈi i te parau-tia ore i te pae totiare e i te parau no te ereraahia i te here? Ma te peapea mau, e rave rahi teie e ite nei e te iti noa ra to ratou tiaturiraa i te hoa, i te haapaoraa, e i te faatereraa. I te mea hoi e te ite nei ratou e aita e ravea, e faaoti atura ïa vetahi pae e eita roa ˈtu to ratou mau fifi e nehenehe e araihia. I roto i te vea beresilia Jornal da Tarde, teie ta Jacob Pinheiro Goldberg e parau ra: “No to ratou taa ore i mua i te mau hape eita ˈtura te taata, i mua i te mea mau, e feruri maitai faahou, e e tuu atura ïa ratou i to ratou tiaturiraa i roto i te mau haapaoraa miterio.” Tera râ, noa ˈtu e e ino roa te mau mea, e hinaaro tatou e haapao maitai, eita anei?

A feruri na maa taime iti e te hinaaro ra outou i te hoê fare no to outou utuafare fetii, e e ere te moni i te fifi. Peneiaˈe outou i te paimi e i te haere e hiˈo e rave rahi mau fare i roto i te mau vahi taa ê. Noa ˈtu â ïa e e tamata te feia hoo i te faaau mai i te mau fare o ta outou e hinaaro ra, aitâ râ i itehia ia outou i te huru fare o ta outou e hinaaro. E i te mea hoi te hinaaro ra outou e ia mauruuru e ia maitai to outou utuafare, eita ïa outou e tuu, e ere anei? I teie nei, a feruri na ïa i te oaoa, ia itehia ia outou i te fare o ta outou e moemoeâ noa na.

Mai ta outou e horoa i te taime no te paimi i te hoê fare apî, no te aha ïa outou e ore ai e tuatapapa i te Bibilia ia itea ia outou i te hoê ravea no te arai i to outou mau fifi? Mai te tia ia tatou ia feruri maitai, ia rave tatou i te tahi mau opuaraa no nia i te hooraa mai i te hoê fare, mea hinaaro atoa na tatou e feruri maitai i nia i te mau mea o ta tatou e taio i roto i te Parau a te Atua. E rahi roa ˈtu â i te maitai i te iteraahia te hoê fare, o te iteraahia ïa ia tatou e te fariiraa tatou i te parau mau no nia i te Atua ra o Iehova e o Iesu Mesia. Teie ta Iesu i parau: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

Teie râ, mai te peu e mea faufaa mau te poroi a te Bibilia, no te aha ïa te mata o te rahiraa o te taata e piri noa ˈi i nia i ta ˈna parau apî maitai? No te hoê ïa tumu, e e riro e rave rahi mau taata i te maere i te reira, oia hoi “te vai noa nei to te ao atoa i raro aˈe i taua varua ino ra.” (Ioane 1, 5:19) Ei faahopearaa, “[ua haapouri te Diabolo ra o Satani] i te aau faaroo ore . . . ia ore te maramarama o te evanelia hanahana o te Mesia, o te hohoˈa o te Atua ra, ia anaana mai i roto ia ratou.” (Korinetia 2, 4:4) Noa ˈtu â ïa e maoti to tatou mata tatou e ite ai, na to tatou roro e haru mai i te maramarama e ô mai i roto i to tatou mata. No reira, e faataa-atoa-hia te vai-matapo-raa mai te “oreraa e nehenehe aore ra e hinaaro e ite aore ra e haava.” Te faahaamanaˈo maira ïa te reira ia tatou i te hoê parau tuiroo e na ô ra e: “Aita e taata matapo mai te feia e ore e hinaaro e ite.”

Eita te hoê taata matapo e nehenehe e ite eaha to mua ia ˈna, no reira e nehenehe ïa o ˈna e pepe. Eita te huru matapo o te rahiraa e nehenehe e tauihia, e eita atoa râ te hoê taata e faahepohia ia faaea matapo noa i te pae varua.

Te na-nia ˈˈe-raa i te huru matapo i te pae varua

Mai ta te mau huru tupuraa ino mau i te pae no te vai-mâ-raa e nehenehe e faaino i te mata, e nehenehe atoa te viiviiraa i te pae morare e haaati ra ia tatou e haamatapo i te pae morare. Hau atu, ua faaara mai o Iesu Mesia e e ara i te mau haapiiraa e te mau peu tutuu a te taata. Ua haapapu maitai mai oia e aita te mau aratai haapaoraa i tahito ra i aratai maitai i ta ratou nǎnǎ: “E matapo aratai matapo ïa; e ia aratai te matapo i te matapo ra, e hiˈa apipiti ïa i roto i te pouohu.”—Mataio 15:14.

Maoti hoi i te ore e mauruuru i te mau aratai matapo i te pae varua e i te pae morare, auê ïa te feia e faaaraara maitai i to ratou mata i nia i te parau apî maitai o te Basileia o te Atua, i te oaoa e! Teie ta Iesu i parau: “I haere mai nei au i te ao nei . . . ia ite te feia ite ore ra.” (Ioane 9:39) Nafea ïa te feia matapo i te pae varua e nehenehe ai e ite? Oia mau, e tamau anaˈe na tatou i te hiˈo i te huru mau o te matapo.

Mea rahi te mau ravea e vai nei no te feia e fifi ra to ratou mata. E ere noa hoi mai te reira te huru. Aita te mau ravea maitai roa i ravehia no te tauturu i te matapo hou aˈe o Valentin Haüy i haamau ai i te hoê fare haapiiraa taa ê na te matapo i te matahiti 1784 ra. I muri aˈe, ua faatupu aˈera o Louis Braille i te faanahoraa e amo ra i to ˈna iˈoa; ua na reira oia no te tauturu i te feia i fifi to ratou mata, ia taio.

Eaha ïa no nia i te matapo i te pae varua? I te mau matahiti fatata roa mai ia tatou nei, ua ravehia te mau tutavaraa papu maitai no te faaite i te parau apî maitai i roto i te mau vahi atea roa ˈˈe o te fenua nei. (Mataio 24:14) Mea oaoa roa na te mau Ite no Iehova ia afai i te tiaturiraa i te matapo i te pae varua e i te pae tino.

Teie ta te hoê vahine no Beresilia i papai: “Te hinaaro nei au e parau e maoti to ˈu fifi i te pae tino, e nehenehe ta ˈu e ite—i te pae varua. Auê ïa Atua faahiahia mau e! Te oaoa nei matou i te iteraa e ‘e heheu o Iehova i to ˈna rima e e haamâha oia i te hiaai o te mau mea ora atoa nei.’” (Salamo 145:16) E te haamanaˈo ra o Jorge, e matapo hoi i te pae tino e: “E nehenehe to ˈu oraraa e tatuhaahia na roto e piti tuhaa: na mua ˈˈe e i muri aˈe i te mau Ite. . . . Na roto i to ratou arai, ua haamata aˈera vau i te ite i te ao nei ma te papu maitai e te maramarama maitai. Te fanaˈo nei au i te mau auraa maitai mau e te taata tataitahi i roto i te amuiraa.” Inaha, noa ˈtu to ˈna huru faahiahia, te horoa mai nei te Bibilia i te haapapuraa e fatata roa aita e matapo faahou i nia i te fenua nei—i te pae tino aore ra i te pae varua. Mai te aha ïa te huru? Nafea hoi te reira ia haapapu mai i te fenua taatoa nei e “o Iehova tei faaaraara i te mata o tei matapo ra”?—Salamo 146:8.

Te rapaauraa tamau otahi roa—te Basileia o te Atua

Noa ˈtu te ite i te pae no te rapaauraa e haere noa ˈtura i mua, te tamau nei â te mau maˈi e rave rahi i te faatupu i te huru matapo, i te peapea, e i te pohe. Eaha ˈtu â te mea e hinaarohia no te faaore i te navai-ore-raa te maa, te mau huru tupuraa veve i te pae no te vai-mâ-raa, e te hepohepo e faaore roa i te ite e te oaoaraa o te oraraa? E hiˈoraa haihai roa te faaoraraa o Iesu i te matapo e te tahi atu, no te tau a muri aˈe. Ma te oaoa, e hohoˈa ta ˈna haapiiraa e ta ˈna ohipa faaoraraa no te mau haamaitairaa e parare roa na nia i te fenua nei i raro aˈe i te faatereraa o te Basileia o te Atua.

Te fatata roa maira te faaoraraa e ravehia i nia i te faito o te ao nei.a Ua faahohoˈa-nehenehe-maitai-hia taua porotarama faaoraraa a te Atua ra e te aposetolo Ioane: “Ua faaite maira [oia] ia ˈu i te hoê pape ora tahe ra, mai te kerehe te ateate, no roto mai i te terono o te Atua e to te Arenio ra. E tei ropu i te aroâ i taua oire ra, e tei te tahi pae pape, e te tahi pae pape, o te raau ora ïa i te tiaraa, hoê ahuru ma piti huru o te huero, hoê marama hoê hoturaa, e hope roa ˈˈe te mau marama atoa ra; e te rau o taua raau ra, ei faaora ïa i te mau fenua.”—Apokalupo 22:1, 2.

Te mau parau ra “pape ora” e “raau ora” te faahohoˈa maitai maira ïa e i muri aˈe te amuiraa iino e vai nei e hope ai, e aratai rii mǎrû noa te mau hotu faaora o te Basileia o te Atua i te huitaata nei i nia i te huru tia roa. Inaha, e faatupu te mau haamaitairaa o te tusia taraehara o Iesu (e tae noa ˈtu te faaore-roa-raa i te hara), e te ite no nia ia Iesu Mesia e to ˈna Metua, i te huru taata tia roa i te pae tino e i te ora mure ore.—Ioane 3:16.

Te oaoa i roto i te ao apî a te Atua

A feruri na i teie nei te fenua nei ma te ore e ohipa taparahi taata faahou, aita e viivii, aore ra e veve. A feruri na i to outou utuafare e ora hau noa ra i roto i te paradaiso i haamau-faahou-hia. (Isaia 32:17, 18) Auê ïa oaoaraa ia ite atu i te mau ǔ huru rau ma te hoê feruriraa tia roa e ma te mau ravea atoa e!

“Te huru e titauhia e maitai ai te taata o te oraraa ïa i roto i te hoê vahi e tauiui tamau noa—te mori, te ǔ, te mau huru hamaniraa. Aita e vahi haumani i roto i te natura,” ta Faber Birren ïa e parau ra. “O te ǔ te hoê o te mau oaoaraa natura o teie nei ao. O te ture hoi te reira a te natura, eita te ǔ i roto i te natura e tupu noa i roto i te tahi noa mau hiˈoraa, e maoti atoa hoi o ˈna te oraraa e oaoa ˈi.”

Auê hoi te faufaa te ô o te mata e ite ra e! Auê hoi te oaoa ia ite te mata o te matapo mau aore ra o te matapo i te pae varua e!

Oia mau, i roto i te paradaiso e haamau-faahou-hia e fatata maira, eita te huru matapo e te tahi atu mau fifi e haapeapea faahou! Eita te taata e haavare-faahou-hia. I te mea hoi e o te here mau te itehia, e maramarama ïa te taatoaraa i te pae varua. E fatata roa hoi te reira i te tupu, tera râ teie te tau e fariihia ˈi tatou e Iehova o te faatupu i ta ˈna parau tǎpǔ e na ô ra e: “Ei reira e faaaraarahia ˈi te mata o te matapo ra”!—Isaia 35:5.

[Nota i raro i te api]

[Hohoˈa i te api 7]

Ei reira e faaaraarahia ˈi te mata o te matapo ra!