Te mau Ite no Iehova na te ao taatoa nei—Thaïlande

“TE FENUA o te ataata.” Te auraa ïa o te iˈoa o te fenua Thaïlande. E rave rahi mau manaˈo faaroo taa ê e vai ra i rotopu i to ˈna mau taata hau atu e 57 000 000, e feia rave ohipa itoito. Noa ˈtu e te haapaoraa rahi aˈe o te haapaoraa a Bouddha ïa, te vai atoa ra te mau haapaoraa kerisetiano i taua fenua ra no Asia Apatoa hitia o te râ. Te hinaaro nei teie mau taata atoa e faaroo i te parau apî maitai o te Basileia o te Atua.—Mataio 24:14.a

Te faaroo ra te feia tei faarue i to ratou fenua i te parau apî maitai

I roto i te mau puhaparaa i parare haere na nia i te mau aivi i Thaïlande i te hiti o Myanmar, ua tapae te parau mau o te Bibilia i rotopu i na hau atu e 10 000 feia no Karen i horo atu i te fenua Myanmar. E mau Ite no Iehova te mau melo o te hoê utuafare no Karen e ora ra i taua vahi ra. Ua haaparare ratou i te parau apî maitai i rotopu i te feia i horo i to ratou fenua. Mea nafea ta ratou ohipa i te haamataraa?

E rave rahi matahiti i teie nei, ua tâpû te hoê taurearea tamaroa i to ˈna mau taairaa e te Ekalesia no Beretane e ua riro mai oia ei Ite no Iehova. Turaihia e to ratou tia faaroo, ua patoi mai to ˈna mau fetii ia ˈna. Tera râ, ua faaruru oia ma te faaoromai, e ua iti noa mai te patoiraa a te utuafare. Ua tamau noa te mau ekalesiatiko o te Ekalesia no Beretane i te faaooo e tae noa ˈtu i te taime i tatarahia ˈi ratou i to ratou tiaraa no te peu tia ore i te pae taatiraa a piti matahiti i teie nei. I te mea e aita e orometua faahou i roto i te fare pure, ua hitimahuta roa te utuafare iho e te tahi atu mau fetii o te Ite e ua moemoe anaˈe ratou no te tauturu ore. E ahuru ma hoê i rotopu ia ratou tei haere mai i rapae i ta ratou ekalesia e ua ani i te mau Ite ia haapii ia ratou i te Bibilia.

Te haere noa ra te haapiiraa i mua ma te maitai, e ua apiti atoa mai te tahi atu feia tei faarue i to ratou fenua. Ua oioi te parau mau i te parareraa, e 17 Ite apî tei bapetizo ia ratou i roto i te anavai o te tahe mai na roto i te puhapa o te feia tei faarue i to ratou fenua. Auê ïa tupuraa oaoa e i te bapetizoraahia te hoê mama ruau e 88 matahiti e o ratou!

Te mau vahi faufaa o te video

E mea rahi te faito o te maraaraa i rotopu i te feia tei faarue i to ratou fenua. I te matahiti 1993, i te oroa Haamanaˈoraa, e 57 taata i putuputu mai. I te roaraa o te tere o te tiaau haaati i te avaˈe me o taua matahiti ra, 67 tei tairuru mai no te hoê o ta ˈna mau oreroraa parau. E tau 250 tei ruru mai no te mataitai i te ripene video a te Taiete Watchtower Te mau Ite no Iehova—Te faanahonahoraa i muri mai i te iˈoa (farani).

Ua haere atoa mai te vahine a te hoê orometua baptiste i roto i te puhapa to reira te feia tei faarue i to ratou fenua i te hoê oreroraa parau o te Bibilia huiraatira vauvauhia e te mau Ite e ua tapao oia i te mau irava o te Bibilia tei tuatapapahia. Ua parau oia i ta ˈna tane e ua inoino roa oia i te mau aˈoraa tei faahiti-noa-hia i roto i ta ratou fare pure. Ua patoi mai oia, ma te parau e e mai te peu e e haere o ˈna i te mau putuputuraa a te mau Ite no Iehova, e apee atoa ïa te taatoaraa o te feia no te paroita ia ˈna. I to ˈna haere-faahou-raa i te mau putuputuraa, ua tiahi ta ˈna tane ia ˈna e te hoê tipi e ua tutui i ta ˈna mau nota o te putuputuraa e te mau buka bibilia. Noa ˈtu râ te reira, i te pataraahia te video, ua haere faahou mai oia. I muri iho, ua faatia taua vahine ra i ta ˈna tane i te mea o ta ˈna i ite. Ma te faaite i te hoê tauiraa taa ê, ua hinaaro oia e mataitai i te ripene video e ua tatarahapa ˈtura oia i te tutuiraa i ta ˈna mau nota e te mau buka bibilia.

No reira, ua faaroo taua mau taata ra i te parau apî maitai i Thaïlande. Ua noaa ïa ia ratou te tiamâraa i te pae varua i “te fenua o te ataata.”—Ioane 8:32.

[Nota i raro i te api]

[Tumu parau tarenihia i te api 24]

TABULA O TE FENUA

Matahiti o te taviniraa 1993

NUMERA RAHI ROA ˈˈE O TE FEIA PORO: 1 434

FAITO: 1 taata poro no 40 299

FEIA I TAE MAI I TE OROA HAAMANAˈORAA: 3 342

NUMERA AU NOA O TE MAU PIONIE: 232

NUMERA AU NOA O TE MAU HAAPIIRAA BIBILIA: 1 489

RAHIRAA FEIA BAPETIZOHIA: 92

RAHIRAA AMUIRAA: 39

AMAA: BANGKOK

[Hohoˈa i te api 25]

Te feia poro i te Basileia o te poro ra ma te itoito i te parau apî maitai

[Hohoˈa i te api 25]

Te amaa matamua, matahiti 1947

[Hohoˈa i te api 25]

Te utuafare o te Betela i mua i te amaa i Bangkok, avarihia i te 8 no febuare 1992