Te Bibilia—Te hoê buka te tia ia taiohia

E ERE i te mea ohie ia faataa te hoê taata i te Bibilia maoti i te mau parau faahiahia roa. O ˈna te buka parare rahi roa ˈˈe o te mau tau atoa. O te Bibilia te buka tahito roa ˈˈe, tei huri-rahi-aˈe-hia, tei faahiti-rahi-aˈe-hia, o tei faaohipa i te mana rahi roa ˈˈe, e te buka faaturahia rahi roa ˈˈe. Peneiaˈe, o te buka aimârô rahi roa ˈˈe atoa. E mea papu o te buka o tei ora mai i te rahiraa o te mau opaniraa, te mau tutuiraa, e te patoiraa uˈana. Tera râ, ma te peapea, te vai ra te hoê tuhaa faahiahia o te ore e tano faahou no te Bibilia. Eita e nehenehe faahou e parau e buka taio-rahi-hia te Bibilia na te ao nei.

Noa ˈtu e Bibilia ta te mau taata i te tahi vahi i roto i te fare, e rave rahi râ o te parau nei e mea ohipa roa ratou no te rave i te taime no te taio atu. Na mua ˈˈe, ua riro te taioraa ei faaanaanataeraa manaˈo tuiroo. I teie nei mahana râ, mea au aˈe na te rahiraa e haamâuˈa i to ratou taime vata no te mataitai i te afata teata aore ra e rave i te tahi atu ohipa. Mea au aˈe na te feia e taio nei i te tahi buka o te titau ra i te tahi noa maa tutavaraa iti e te ohie. E titau te taioraa i te Bibilia ia haamau i te feruriraa, e aita te rahiraa o te mau taata e haamau faahou nei i to ratou feruriraa i nia i te mea ta ratou e taio ra.

Aita râ te Bibilia i ora mai ia vaiiho-noa-hia oia i roto i ta tatou vairaa buka. Te vai ra te mau tumu maitatai e e tia oia ia taiohia. E hiˈopoa tatou i te tahi mau tupuraa no nia i te reira.

E ere i te mea maere e ua faaoromai oia!

No roto mai te parau ra “Bibilia” i te parau heleni ra bi·bliʹa, oia hoi te auraa “mau buka rii.” Te faahaamanaˈo ra te reira ia tatou e e rave rahi mau buka i roto i te Bibilia—e ere vetahi i te mea nainai roa! Ua papaihia ratou i roto i te hoê area taime hau atu e tausani e ono hanere matahiti. Noa ˈtu e mau taata te feia papai, ua faauruahia râ ratou e te hoê Tumu teitei. Ua parau te hoê taata papai Bibilia e: “E ere hoi i to te hinaaro o te taata i tae mai ai te tohu i tahito ra; o te mau taata moˈa râ o te Atua tei parau i ta te [varua moˈa] i tuu mai ia ratou ra.” (Petero 2, 1:21) Te mea mau no te parau tohu a te Bibilia e mea mau atoa ïa no te toea o te Bibilia. Ua î taua “mau buka rii” ra faauruahia mai e te Atua i te mau manaˈo teitei o te Atua ra o Iehova. (Isaia 55:9) E ere i te mea maere e ua faaruru te Bibilia e mea maoro i teie nei!

Ua riro noâ te Bibilia no te mau tavini a te Atua ei buka faufaa roa ˈˈe. Te farii nei ratou i te manaˈo o te aposetolo Paulo, ua papai atoa oia i te Bibilia. Ua parau oia e: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa.” (Timoteo 2, 3:16) Oia mau, o te Bibilia te niu o te faaroo o te mau Ite no Iehova i teie nei mahana. E faaoti oia i ta ratou mau haapiiraa e e aratai i to ratou haerea. Te faaitoito nei ratou ma to ratou mafatu atoa i te taata tataitahi ia taio i te tahi tuhaa o te Parau a te Atua i te mau mahana atoa e ia feruri hohonu ma te aau mehara i nia i te mau mea i roto.—Salamo 1:1-3.

Te peu matauhia o te taioraa o te Bibilia

Ua haafaufaahia te peu matauhia o te taioraa o te mau Papai i te tau tahito ra. Ua titauhia i te mau arii no Iseraela ia papai i roto i ta ratou iho buka i te Ture—te hoê tuhaa faufaa o te Bibilia i teie nei—e ia taio i te reira i te mahana tataitahi mai te hoê faahaamanaˈoraa tamau i te hinaaro o te Atua no ratou. (Deuteronomi 17:18-20) Ua topa e rave rahi arii no te haapao ore i taua faaueraa ra.

Ua faahohoˈahia te faufaaraa o te tuatapaparaa i te mau Papai i roto i te hiˈoraa o te peropheta paari ra o Daniela. No ta ˈna iho tuatapaparaa i te mau tuhaa o te Bibilia i vai na i to ˈna ra tau, ua nehenehe ia Daniela, a vai tîtî noa ˈi oia i Babulonia, e ‘ite na roto i te mau buka’ e ua fatata te hoê parau tohu faufaa faahitihia e Ieremia i te tupu.—Daniela 9:2.

I te taime fanauraa o Iesu, ua tiai te taata “parau-tia e te haapao maitai” o Simeona ma te papu i te taime e ite ai oia i tei riro mai ei Mesia. Ua tǎpǔhia e ore o Simeona e pohe hou oia e ite ai i te Mesia. I to Simeona faahitiraa i te parau tohu a Isaia i te taime e tapea ˈi oia i te aiû ra o Iesu i roto i to ˈna rima, te faaite ra te reira e taata taio haapao maitai o ˈna i te mau buka o te Bibilia o tei papai-aˈena-hia i to ˈna ra tau.—Luka 2:25-32; Isaia 42:6.

I te taime a poro ai o Ioane Bapetizo, “[Te tiai] noa ra te taata atoa” i te Mesia. Eaha ta te reira e faaite ra? E au ra e e rave rahi i rotopu i te mau ati Iuda tei matau i te mau parau tohu no nia i te Mesia faahitihia i roto i te mau Papai. (Luka 3:15) E mea anaanatae te reira, no taua tau iho â râ mea varavara hoi te mau buka. E tia ia haapao-maitai-hia i te papai-faahou-raa o te mau buka o te Bibilia, e mea moni e mea fifi atoa ia noaa mai. Nafea te mau taata e haamatau ai i te mau mea i roto?

I roto e rave rahi tupuraa, na roto i te taioraa i mua i te taata. Ei hiˈoraa, ua faaue Mose e i te tahi mau taime faataahia, e tia ia taiohia te Ture atoa horoahia mai e te Atua i te mau ati Iseraela o tei tairuru mai. (Deuteronomi 31:10-13) I te senekele matamua o to tatou nei tau, ua parare te taioraa i te mau buka o te Bibilia i mua i te taata. Ua parau te pǐpǐ ra o Iakobo e: “Te vai nei hoi te feia i parau ia Mose i te mau oire atoa mai tahito mai â, te taiohia mai nei hoi oia i roto i te mau sunago i te mau mahana sabati atoa nei.”—Ohipa 15:21.

I teie nei mahana, e mea ohie ia noaa mai ta ˈna iho Bibilia. Te vai nei teie “mau buka rii” i roto i te mau reo o na 98 i nia i te hanere o te huiraatira o te ao nei. No reira, e mea peapea ia ite e e rave rahi o te ore e anaanatae nei i te tuatapapa i te mea ta te Bibilia e parau ra ia ratou. E tau ite i te pae aivanaa teie, e “mea maitai rahi [noâ te Parau a te Atua, te Bibilia,] ei haapiiraa.” Te horoa maira oia i te mau aˈoraa papu no nia i te huru peu morare, te mau taairaa taata, e rave rahi atu â mau tumu parau. Hau atu â, te pûpû maira te Bibilia i te tiaturiraa papu hoê roa no te hoê oraraa no a muri atu i roto i te hau.

A taio tamau ia ˈna

Ua rave te mau Ite no Iehova i te hoê tuhaa rahi o ta ratou ohipa no te faaitoito i te taioraa tamau o te Bibilia. Ua papaihia na roto i te mau reta meumeu i nia i te fare neneiraa o ta ratou pu rahi i Brooklyn, New York, e itehia teie aˈoraa: “A TAIO I TE PARAU A TE ATUA TE BIBILIA MOˈA I TE MAHANA TATAITAHI.” E ite te tahi tau mirioni taata o te haere ra na reira i taua mau parau ra, e te tiaturihia ra e rave rahi taata tei haapao i te reira.

I roto hau atu e 73 000 amuiraa a te mau Ite no Iehova na te ao nei, te faatupuhia ra te mau putuputuraa o te Haapiiraa o te taviniraa teotaratia i te hebedoma tataitahi. Te hoê tuhaa o te haapiiraa o te taioraa ïa i mua i te taata i te hoê tuhaa maitihia i roto i te Bibilia. E ohipa atoa ta te feia i putuputu mai ia taio i te tahi mau pene o te Bibilia i te mau hebedoma atoa o ratou anaˈe i to ratou iho fare. Te taio nei ïa te feia e tapea ra i teie porotarama i te taatoaraa o te Bibilia.

Te tuea ra teie faanahoraa i te hoê o te mau buka faaohipahia i taua haapiiraa ra. Te faaite ra te Buka no te Haapiiraa o te taviniraa teotaratia e: “E tia ia faahereherehia i te taime i roto i ta outou porotarama haapiiraa no te taioraa i te Bibilia. E faufaahia tatou ia taio i te Bibilia mai te haamataraa e tae roa ˈtu i te hopea. . . . Teie râ, i roto i ta outou taioraa, eiaha noa outou e taio ia pau oioi noa te mau api, tera râ, ia taa ia outou i te auraa rahi o te tuhaa e taiohia ra e ia mau mai ia outou. A rave i te taime no te feruri.”

Te faaitoito atoa ra te tahi atu mau buka neneihia e te mau Ite no Iehova i te taioraa o te Bibilia. Ei hiˈoraa, i roto i teie vea apiti, te A ara mai na!, te vai ra te faaitoitoraa i muri nei no te mau taurearea: “Ua taio anei outou . . . i te taatoaraa o te Bibilia? Oia mau, e buka rahi te Bibilia, teie râ, no te aha e ore ai e tatuhaa i te taioraa o te Bibilia? . . . ‘Ua hiˈopoa maite te feia maitatai’ no Berea ‘i te parau i papaihia ra i te mau mahana atoa.’ (Ohipa 17:11) Mai te peu e e apee outou i te hoê porotarama o te taioraa i te mahana tataitahi e 15 noa ˈˈe minuti i te mahana . . . , e hope i te taioraa o te Bibilia i roto noa e hoê matahiti.” Oia mau, te manaˈo ra te mau Ite no Iehova e e tia atoa i te mau kerisetiano i to tatou nei tau ia ite maitai i te mau Papai, mai te mau tavini atoa o te Atua i mutaa ihora.

Ma te haamanaˈo i te reira, ua turu te mau Ite i te hoê huru taa ê apî o te taioraa o te Bibilia i mua i te taata. I roto e rave rahi reo, ua faaharuharu ratou i te mau ripene o te taioraa o te Bibilia taatoa. No te rahiraa, ua riro mau te reira ei tauturu faahiahia roa no te haapaiuma i te tahi mau fifi o te taioraa o te Bibilia. Te faaroo nei vetahi i taua mau ripene ra a rave noa ˈi ratou i te ohipa i te fare, a faahoro noa ˈi i te pereoo, aore ra a rave noa ˈi i te tahi atu mau ohipa. E mea oaoa roa ia parahi e ia faaroo maite i te taioraa o te tuhaa o te Bibilia a apee noa ˈi i te taioraa i roto i ta outou iho buka.

Mai te peu e aitâ ïa outou i taio atura i te Bibilia i te mau mahana atoa, no te aha e ore ai e faariro i te reira ei peu matauhia? Aita e faufaa ia rave i te hoê taime roa i roto i te mahana, e rahi mai râ te mau haamaitairaa, no te mea e turai te faaohiparaa i te mau Papai ia outou ia ohipa ma te paari e ia fanaˈo i te hoê oraraa oaoa i te pae varua. E ohipa atoa outou ia au i teie faaueraa tei horoahia i te aratai ati Iseraela ra o Iosua e mea maoro i teie nei e: “Eiaha te buka ture na ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi.”—Iosua 1:8.

Te faaite ra te mau api o te Bibilia i te opuaraa here a Iehova no te huitaata o te auraro nei. Te faatupu ra te ite mau o ta ˈna Parau faauruahia i te oaoa mau e te tiaturiraa o te ora mure ore i roto i te Paradaiso i roto i te hoê ao apî faahiahia roa o te mau haamaitairaa mure ore. (Luka 23:43; Petero 2, 3:13) Ia rave mai outou i to outou taime no te taio e no te tuatapapa i te Bibilia e ia titau i taua oraraa nehenehe mau.