Te haafaufaa ra anei outou i te Bibilia?
HAU atu i te 200 matahiti i teie nei, ua fanauhia o Mary Jones i Llanfihangel, te hoê oire iti tahito no te fenua no Galles e ere i te mea atea i te hiti o te moana Ataranitita. E feia taviri vavai veve to ˈna mau metua—veve roa eita e noaa mai te hoê Bibilia. Tera râ, ua faatupu raua i te here no te Atua i roto i te mafatu o ta raua tamahine ma te faatia ia ˈna i te mau aamu o te Bibilia e ma te faahiti noa i te mau irava tei mau mai ia raua. E pinepine o Mary i te taio i te Bibilia na roto i te reo no te fenua no Galles a te taata tapiri e ua haamata oia i te haaputu i te tahi maa vahi iti moni ta ˈna e nehenehe, ma te opua e hoo mai hoê na ˈna.
I te matahiti 1800, e 16 matahiti to Mary, ua faarooroo oia e te hoohia ra te tahi mau Bibilia na roto i te reo no te fenua no Galles e 40 kilometera te atea i roto i te oire nainai ra o Bala. Ma te ore e haaparuparu, ua faaoti oia ma te papu e haere avae i reira. O te reira iho â ta ˈna i rave, na roto i te mau aivi aita e tiaa. I to ˈna râ taeraa ˈtu, ua hoo-pauroa-hia te mau buka. E ua faaroo atoa o Mary e mea iti roa te taatoaraa o te moni ta ˈna i haaputu.
Ua maere roa te orometua o taua vahi ra i te ite e te here o Mary no te Bibilia. I te iteraa i to ˈna mau roimata i te taheraa no te inoino no te mau tutavaraa atoa ta ˈna i rave, ua horoa atura oia na ˈna ma te maitai i ta ˈna iho Bibilia, ma te parau e: “A taio maitai ia ˈna, a haapii maite ia ˈna, a haafaufaa i ta ˈna mau parau moˈa ma te haamanaˈo ia ratou, e a ohipa ia au i ta ˈna mau haapiiraa.”
Ua faatiahia teie aamu i muri aˈe i te hoê putuputuraa a te Tomite a te Taatira vea Faaroo no Lonedona. I reira te raveraahia te hoê faaotiraa e horoa te mau tatararaa a te Bibilia eiaha i te feia no Galles anaˈe, i te ao taatoa râ. Na roto noa i taua haamataraa ohie ra i matara mai ai e rave rahi mau taiete o te Bibilia i te senekele 19. I muri aˈe i te reira, ua fa atoa mai te mau huriraa o te Bibilia na roto i te mau reo ěê e te tamau noa ra i te maraa.
I teie nei mahana, te nenei ra te Watch Tower Bible and Tract Society, fariihia i te matahiti 1884, i te mau Bibilia e te mau buka tauturu no te haapii i te Bibilia i roto hau atu e 200 reo. Na te ao atoa nei, ua operehia e 72 mirioni buka o te Tatararaa a te ao apî o te mau Papai Moˈa. Hurihia mai te reo tumu Hebera e Heleni, te vai ra te Tatararaa a te ao apî i roto i to ˈna taatoaraa aore ra tei tatuhaahia i roto e 18 reo e te hurihia ra i teie nei i roto e 12 reo ěê atu.
I te mea e e roaa te Bibilia fatata i te mau taata atoa i teie nei, nafea outou ia hiˈo i te reira ia ˈna? Te haafaufaa ra anei outou i te Bibilia? Te vai ra anei ta outou buka o ta outou e haafaahiahia ra e e taio ra?
[Faaiteraa i te fatu o te hohoˈa i te api 3]
No roto mai i te buka The Story of Mary Jones and Her Bible