Eaha te mau pǔpǔ faaroo amaha?

TE 28 NO FEBUARE 1993—hau atu i te hoê hanere mutoi a te hau o tei purara na roto i te hoê pǔpǔ fare teitei e faaeahia ra e te mau ahuru tane, mau vahine, e mau tamarii. Ta ratou tapao, te imiraa ïa i te mau mauhaa opanihia e te ture e te tapearaa i te hoê taata ohipa ino. Ua hitimahuta râ teie mau mutoi i te pupuhiraahia mai ratou na roto mai i te mau fare teitei. Ua pupuhi atoa ˈtura ratou.

Ahuru taata tei pohe e e rave rahi tei pepe i roto i teie aroraa. I roto i na 50 mahana i muri iho, e mau hanere mutoi a te hau o tei tiai i teie mau fare teitei e ua navai maitai ta ratou mau mauhaa no te faatupu i te hoê tamaˈi iti. Ua hope teie huru tupuraa atâta na roto i te hoê aroraa o tei haapohe e 86 taata, tei roto atoa tau 17 tamarii.

O vai râ hoi te enemi? E feia hoo raau taero faahuehue anei? E pǔpǔ faehau anei? Aita. Ua ite paha outou e, te “enemi,” e mau taata faaroo ïa, e mau melo ratou no te hoê pǔpǔ faaroo amaha [parauhia secte]. Ua huti teie ati i te ara-maite-raa o te ao atoa nei i nia i te hoê oire iti ite-ore-hia no ropu ia Texas, i te mau Hau amui no Marite. Ua haapuroro te mau ravea parau apî na roto i te mau aru radio teata e te mau vea i te mau rahiraa tumu parau, tatararaa, e tuatapaparaa no nia i te atâtaraa o te mau pǔpǔ faaroo maamaa.

Ua faahaamanaˈohia i te huiraatira te tahi mau ohipa i tupu aˈenei i reira ua aratai te mau raatira pǔpǔ faaroo amaha i to ratou mau melo ia haapohe ia ratou: te feia taparahi taata ra o Manson i te matahiti 1969 i Kalifonia; te haapoheraa te taatoaraa o te mau melo o te hoê pǔpǔ faaroo amaha ia ratou i Jonestown, i Guyana i te matahiti 1978 ra; te parau faaau no te haapoheraa i opuahia e te raatira pǔpǔ faaroo amaha, o Park Soon-ja no Korea, o tei hope na roto i te poheraa e 32 melo. Inaha hoi, ua parau te rahiraa o teie mau taata e e mau kerisetiano ratou e te tiaturi ra ratou i te Bibilia.

Papu maitai, e rave rahi o te faatura nei i te Bibilia ei Parau na te Atua o te peapea roa i te mea e te faaohipa hape ra teie mau pǔpǔ faaroo amaha ma te haama i te mau Papai. Ei faahopearaa, i te roaraa o te mau matahiti, e mau hanere faanahonahoraa o tei haamauhia no te hiˈopoaraa i te mau pǔpǔ faaroo amaha e te faaite-tahaa-raa i ta ratou mau peu atâta. Te faaara nei te feia aravihi i te pae no te mau pǔpǔ faaroo amaha e e riro te haerea mai o te hoê mileniuma apî i te mau matahiti e haere mai nei i te faatupu i te maraaraa o te mau pǔpǔ faaroo amaha. Ua tapao te hoê vea e ia au i te mau pǔpǔ aro i te mau pǔpǔ faaroo amaha, e mau tausani pǔpǔ faaroo amaha “o tei ineine i te haru i to outou tino, i te faatere i to outou feruriraa, i te faaino i to outou nephe . . . E mea iti o te faaohipa nei i te mau mauhaa, e mea atâta râ te rahiraa. E faahema e e eiâ mai ratou ia outou, e faaipoipo e e tanu atoa ratou ia outou.”

Eaha te hoê pǔpǔ faaroo amaha?

E rave rahi mau taata o te faaohipa hape nei i te parau “pǔpǔ faaroo amaha,” aita hoi ratou e papu maitai ra i to ˈna mau auraa. Ia ore ia hapehia, te ape nei vetahi feia tuatapapa faaroo i te faaohipa i teie parau.

Te faataa ra Te buka parau paari a te ao nei (beretane) e “ia au i te auraa tumu, e tano te parau pǔpǔ faaroo amaha no te mau huru haamoriraa aore ra haapaoraa atoa.” Ia au i teie tatararaa, e nehenehe te mau faanahonahoraa faaroo atoa e piihia e pǔpǔ faaroo amaha. Tera râ, i roto i te paraparauraa matauhia i teie mahana, e auraa taa ê to te parau “pǔpǔ faaroo amaha.” Te tapao ra teie â buka e “mai te afaraa o te mau matahiti 1900 mai â, ua taui te mau parau i haapararehia no nia i te mau pǔpǔ faaroo amaha i te auraa o teie parau. I teie mahana, te faaohipahia nei teie parau no nia i te mau pǔpǔ o te pee ra i te hoê taata aratai e ora ra o te haapii nei i te mau haapiiraa e te mau peu apî e tei taa ê roa i tei matauhia.”

Ma te turu i te faaohiparaa matauhia o teie parau, te faataa ra te vea Newsweek e te mau pǔpǔ faaroo amaha “mea pinepine, e mau pǔpǔ iti huru ê, e ia noaa mai to ratou tiaraa taata e ta ratou tapao, te pee nei to ratou mau melo i te taata hoê, e mana to ˈna i nia ia ratou.” Oia atoa, te tapao ra te vea Asiaweek e “e mea papu ore roa te parau [pǔpǔ faaroo amaha], tera râ e mea pinepine oia i te tano no te mau ture faaroo apî patuhia i nia i te hoê taata aratai e mana to ˈna, o te tia pinepine mai ma te parau e e hohoˈa taata oia no te Atua.”

Te horoa atoa ra te parau i faaohipahia i roto i te hoê faaotiraa amui a te 100raa o te Apooraa a te Hau no Maryland, i te mau Hau amui no Marite, i te auraa au ore o te parau pǔpǔ faaroo amaha. Te haapapu ra taua faaotiraa ra e “te hoê pǔpǔ faaroo amaha, o te hoê ïa pǔpǔ feia o te faatae ra i te hanahana rahi roa i nia i te hoê taata aore ra te hoê manaˈo e o te faaohipa ra i te mau ravea râmâraa tia ore no te faahema e no te faatere i te feruriraa ia manuïa te mau tapao o to ˈna mau aratai.”

Oia mau, te papuhia ra e e mau manaˈo e mau peu ê roa etaeta to te mau pǔpǔ faaroo amaha, o te patoi nei i te mea e fariihia ra i teie mahana mai te haerea totiale e au. Mea pinepine, te rave huna nei ratou i ta ratou mau ohipa faaroo. E rave rahi o teie mau pǔpǔ faaroo amaha o te faataa ê nei ia ratou i roto i te mau oire rii. Te auraro nei ratou i te hoê taata o tei faariro ia ˈna ei aratai, ma te pûpû ia ratou taatoa no ˈna anaˈe. Mea pinepine te faatiatia nei teie mau aratai e ua maitihia ratou e te Atua aore ra e natura atua to ratou.

I te tahi mau taime, ua parau vetahi mau faanahonahoraa aro i te mau pǔpǔ faaroo amaha e te mau ravea haapurororaa e e pǔpǔ faaroo amaha te mau Ite no Iehova. Ua anoi vetahi mau tumu parau i roto i te mau vea aita i maoro aˈenei i te mau Ite e te mau pǔpǔ faaroo amaha o tei matauhia no ta ratou mau peu atâta. Tera râ, e mea tano anei ia faaau i te mau Ite no Iehova i te hoê pǔpǔ iti huru ê? Mea pinepine te mau melo o te mau pǔpǔ faaroo amaha i te faataa ê ia ratou i to ratou mau hoa, mau fetii, e tae noa ˈtu i te totaiete nei. Mai te reira anei te huru o te mau Ite no Iehova? Te faaohipa ra anei te mau Ite i te mau ravea haavare e te tia ore no te huti mai i te taata?

Ua itehia e te faaohipa nei te mau aratai pǔpǔ faaroo amaha i te mau ravea râmâraa no te faatere i te feruriraa o ta ratou mau pǐpǐ. Te vai ra anei te tahi haapapuraa e te na reira nei te mau Ite no Iehova? Mea tapuni anei ta ratou haamoriraa? Te pee ra anei ratou e te faahanahana ra anei ratou i te hoê aratai taata? Ei haapoto-noa-raa, e pǔpǔ faaroo amaha anei te mau Ite no Iehova?

[Faaiteraa i te fatu o te hohoˈa i te api 3]

Jerry Hoefer/Fort Worth Star Telegram/Sipa Press