Te tiaraa paretenia—No te aha?

“TE haamoriraa i te tiaraa paretenia”—te reira ta Randall Balmer, orometua rahi i Barnard College/Columbia University, e pii ra te huru peu o te haere noa ˈtura i te rahi i rotopu i te mau taurearea no te haataime i te taatiraa i te pae tino e tae roa ˈtu i to ratou paariraa.

Eita e maerehia, no roto mai te rahiraa o te faaitoitoraa i te haapaeraa i te taatiraa i te pae tino i te mau pǔpǔ haapaoraa. “Teie râ e peu taata noa te manaˈo faaitoito i muri i te haamoriraa i te tiaraa paretenia, e ere i te peu faaroo,” o ta te Orometua Balmer ïa e faaite ra. “O te mǎtaˈu, te tumu mau o te faaearaa ei paretenia—e ere te mǎtaˈu i te faautuaraa a te Atua, te mǎtaˈu râ i te maˈi pohe.” No reira, te faataa ê ra oia i “te haamoriraa o te Paretenia ra o Maria,” o tei faahohoˈahia te haapaeraa mai te hoê manaˈo a te haapaoraa, e te “haamoriraa i te tiaraa paretenia” i to tatou nei tau, o te faaite ra i te haapaeraa hau atu â i te hoê oraora-maitai-raa.

“E faahitiraa parau peapea teie no nia i te mau ohipa a te haapaoraa i roto i te mau matahiti 1990 e te ohipa nei te mǎtaˈu i te maˈi i te huru morare,” ta te Orometua Balmer e parau faahou ra. “Ua faaite te mau aratai haapaoraa, no te ape-huˈa-raa i te hape, i te hoê ereraa i te pae morare, aore ra aita roa ˈtu. E ua vaiihohia e na te mau aivanaa e te mau tia i te pae o te oraora-maitai-raa o te huiraatira e aˈo atu i te mau taurearea e nafea ia haapao maitai i to ratou haerea i te pae taatiraa.”

Teie râ, e ere mai te reira te huru e te mau Kerisetiano mau. A hiˈo na ia Chad, te hoê taurearea tei paari ei Ite no Iehova. Ua haafatata ˈtu te hoê tamahine ia Chad no te haamata i te hoê aparauraa. Teie râ ua papu-maitai-hia aˈera hoi e ua hau atu â to ˈna mau hinaaro i te hoê noa aparauraa. “Ua tupu ïa te reira i nia ia ˈu,” o ta Chad ïa e parau ra. “Eita ta ˈu e nehenehe e faainoino ia Iehova. Maoti te manaˈo e faaoaoa ia Iehova i roto i to ˈu feruriraa, ua parau atu vau ia ˈna e te haere ra vau.”

Mai ia Chad, te tapea ra e rave rahi feia apî i rotopu i te mau Ite no Iehova i te mau faufaa morare maitatai eiaha noa no te oraora-maitai-raa, no te faaoaoa râ na mua i to ratou Poiete, te Atua ra o Iehova. E ere na te mǎtaˈu o te maˈi e aratai ra i to ratou haerea morare. Te pee ra râ teie feia apî i te aˈoraa a te Koheleta 12:1: “E tena na, e haamanaˈo i tei Hamani ia oe i to apîraa ra.”