Te mau Ite no Iehova na te ao nei—Te Repubilita no Philipino

TE MAU 7 083 motu taratara no te pae rua no roto i te Repubilita no Philipino, o te tuhaa ïa e faura ra i rapae o te hoê anairaa mouˈa tei tapoˈihia i te miti.a E mea au roa na te mau 62 000 000 taata no Philipino ia paraparau no nia i te mau huru tumu parau atoa. Te faaitoito nei teie huru faahoa ohie noa i te hoê aua hotu mau no te pororaa i te poroi o te Basileia.

Te pororaa i te fare haapiiraa

I nia i te motu no Masbate, ua nehenehe te hoê taurearea haere haapiiraa tuatoru e poro i to ˈna orometua haapii e i to ˈna mau hoa haapiiraa i roto i te hoê uiuiraa ma te mau pahonoraa hape aore ra tano. Te faatia ra oia e:

“Teie te pereota, ‘Mai te peu e te here ra te Atua ia ˈu, eita oia e horoa mai i te mau fifi aore ra e vaiiho ia ˈu ia mauiui.’ I to te orometua haapii hiˈopoaraa i ta matou mau papai, ua ite aˈera oia e ua pahono pauroa te mau tamarii e tano, maoti râ o vau. Ua faatia to ˈu orometua haapii ia ˈu ia faataa i mua i te piha haapiiraa e no te aha vau i pahono ai e hape. Ua parau atura vau e e ere na te Atua i horoa mai i te mau fifi, noa ˈtu e te farii nei oia i te mauiui e te faatia nei oia e ia tamatahia tatou. Ma te faaohipa i ta ˈu Bibilia, o ta ˈu e afai noa i te fare haapiiraa, ua haaferuri au i te pǔpǔ haapiiraa i nia i te mau parau a te Ioane 1, 4:8, oia hoi ‘E here te Atua.’ I muri aˈe i ta ˈu tatararaa, ua farii to ˈu orometua haapii i teie manaˈo, ua tupaipai atura oia i nia i ta ˈna iri papairaa, e ua na ô ihora: ‘Ua tano o Marilou.’ O vau anaˈe tei horoa i te pahonoraa tano i teie uiraa e ua noaa ia ˈu te nota maitai roa ˈˈe.”

Tei te mau vahi atoa te poroi o te Basileia

Ia ˈna i poro na te mau fare i te tahi atu vahi no Philipino, ua farerei te hoê vahine pionie tamau (taata poro i te parau apî maitai ma te taime taatoa) i te hoê metua vahine e toru tamarii nainai ta ˈna. Ua faaite teie vahine i te anaanatae no te poroi o te Basileia, e ua ohie noa ˈtura i te haamata i te hoê haapiiraa bibilia e o ˈna. Noa ˈtu e aita ta ˈna tane i oaoa i te mea e te haapii ra oia i te Bibilia, e te mau Ite no Iehova iho â râ, ua tamau noa te haapiiraa.

Ua afai atura te tane i to ˈna utuafare i te tahi atu oire, ma te manaˈo e eita ta ˈna vahine e farerei faahou i te mau Ite. Aita râ i maoro, ua itehia mai teie vahine ia ratou, e ua haamata faahou atura ratou i ta ˈna haapiiraa bibilia. Aita e faufaa ia parau e ua riri ta ˈna tane. Ua haere atu o ˈna i te ohipa ma te hae, e ua faaite atu oia i te tumu o to ˈna iriâ i te hoê taata o tei afai mai i to ˈna pereoo e na ˈna e tataˈi. Aita te tane i ite e e Ite no Iehova teie taata.

Ua faataa ˈtura te Ite e e mea maitai roa no te utuafare taatoa ia tamau noa ta ˈna vahine i te haapii i te Bibilia. E nehenehe oia e haamata i te faaohipa i te mau faaueraa tumu a te Bibilia i te fare. Ua parau atoa ˈtura oia e e nehenehe te tane iho e maitaihia na roto i te haapiiraa i te parau no te Basileia o te Atua.

Eaha te faahopearaa o teie aparauraa? Ua fanaˈo te vahine a teie taata i te tiamâraa rahi aˈe no te haapii i te Bibilia, e ua faaoti aˈera ta ˈna tane e hoˈi atu e to ˈna utuafare i to ratou vahi faaearaa matamua. I reira, ua haere â te vahine i mua e tae roa i te faito e riro mai ai ei taata poro bapetizo-ore-hia no te Basileia. Ua farii atoa ta ˈna tane i te hoê haapiiraa bibilia, e ua haamata te utuafare taatoa i te haere i te mau putuputuraa kerisetiano.

[Nota i raro i te api]

[Tumu parau tarenihia i te api 8]

TABULA O TE FENUA

Matahiti taviniraa 1993

NUMERA RAHI ROA ˈˈE O TE FEIA PORO: 116 576

FAITO: 1 Ite no e 549

FEIA I TAE MAI I TE OROA HAAMANAˈORAA: 357 388

NUMERA AU NOA O TE MAU PIONIE: 22 705

NUMERA AU NOA O TE MAU HAAPIIRAA BIBILIA: 94 370

RAHIRAA FEIA BAPEZITOHIA: 7 559

RAHIRAA AMUIRAA: 3 332

AMAA: MANILA

[Hohoˈa i te api 9]

E faatupu te pororaa i te matete i te mau faahopearaa maitatai roa

[Hohoˈa i te api 9]

Amaa a te Taiete Watchtower i Manila