Te mau taurearea o tei ‘tiaturi ia Iehova’

E ERE tei te mau taurearea anaˈe iho te nehenehe, e ere atoa tei te ruhiruhia anaˈe iho te paari. (A faaau i te Maseli 11:22; Koheleta 10:1.) Tei fatu râ i te nehenehe e vai i te vairaa e te paari mau o tei tiaturi ïa ia Iehova e o tei parau ma te mafatu tae e: “O oe tau Atua!”—Salamo 31:14; Maseli 9:10; 16:31.

Na te ao nei te haere noa ra i te rahi te feia nehenehe, te taurearea e te ruhiruhia, o tei faaite i to ratou paari i te taviniraa i te Atua e te pororaa i te parau apî maitai o te Basileia. Ei hiˈoraa, a hiˈopoa na ia Sabrina e vau matahiti.

Te ora nei o Sabrina i Helemani, e tei roto o ˈna i te CE1. O ˈna te Ite no Iehova matamua i roto i to ˈna fare haapiiraa. Ma te au ore hoi, e faaooo noa to ˈna mau hoa haere haapiiraa ia ˈna e tae roa ˈtu i te mahana i ani ai te orometua haapii ia afai mai te mau tamarii i ta ratou buka au-rahi-hia i te fare haapiiraa. Ua faaoti o Sabrina e hopoi mai i Ta ˈu Buka Aamu Bibilia. Te po na mua ˈˈe, noa ˈtu to ˈna taiâ, ua faaineine maitai o ˈna ia ˈna no te haapiiraa. I te mea e e 26 tamarii i roto i ta ˈna piha haapiiraa, ua ite oia e aita paha ta ˈna e taime rahi. Ua papu râ ia ˈna e eiaha roa te hoê e tâpû i ta ˈna faaiteraa e ua papu ia ˈna e e tauturu mai Iehova ia ˈna. I te mahana i faaotihia, ua ui te orometua haapii e o vai tei hopoi mai i te hoê buka e o tei hinaaro e faaite matamua ta ˈna. Ma te maere mau o Sabrina anaˈe iho tei hopoi mai i ta ˈna. Ua tia oia i mua i te mau tamarii e ua haamata oia i te paraparau, ma te taio e ma te faaite i te mau hohoˈa o ta ˈna buka e ma te faataa e ua niuhia te taatoaraa i nia i te Bibilia. Ei faaotiraa ua parau oia e: “O vai te hinaaro i teie buka?” Ua horoa oia i te hoê buka i te orometua haapii, e i te mau mahana i muri iho, ua horoa oia ahuru atu â mau buka i te tahi o ta ˈna mau hoa haere haapiiraa. Teie te parau a te orometua haapii no nia i ta ˈna faaiteraa: “Aitâ vau i ite i te hoê mea mai te reira te huru.” Ua horoa oia na Sabrina i te nota A no ta ˈna ohipa.

Parau mau, e feia poro oaoa i te parau apî maitai e rave rahi feia poro i te fare haapiiraa. Teie te tahi atu hiˈoraa, o Erika, e tamarii poro e 11 matahiti i Mehiko. Mai to ˈna tamariiriiraa ra te haapiiraahia o ˈna ia here ia Iehova. Mea maitai roa ta ˈna ohipa i te haapiiraa. Te hoê tuhaa ohipa o te faaineineraa ïa i te parau no nia i te SIDA e te puhipuhiraa i te avaava e te inu-hua-raa i te ava. Ua faaineine maitai o ˈna, ma te faaohipa i te vea A ara mai na!, e ua noaa ia ˈna te nota maitai roa ˈˈe. Ua ani mai te orometua haapii ihea oia te iteraahia e a ˈna te mau haamaramaramaraa e ua horoa o ˈna i te mau vea no nia i teie mau tumu parau. I muri iho, ua rave te orometua haapii i teie mau vea no te tauaparau i te taatoaraa o te mau tamarii no ta ˈna piha haapiiraa. No te haerea o Erika, to ˈna faatura i ta ˈna orometua haapii, e ta ˈna mau nota maitai roa, ua noaa ia ˈna te mau ô, te mau parau tuite, e ua aufauhia te hoê tuhaa o ta ˈna haapiiraa. Noa ˈtu â ïa te reira, te manaˈo nei o ˈna e ta ˈna ohipa faahiahia roa ˈˈe o te faaiteraa ia ˈna ei Ite no Iehova, e ua nehenehe ia ˈna e vaiiho i te mau buka no nia i te Bibilia, e ua faahanahana oia i te iˈoa o te Atua.

E teie atoa o Shannon, e tamaroa e ahuru matahiti te ora nei i te Niu Zelani. Hoê anaˈe iho mata maitai ta ˈna; e aiû oia i te inoraa te tahi atu mata i te mariri aitaata. E hitu matahiti to Shannon, i to ˈna metua vahine haamataraa i te haapii i te Bibilia e te mau Ite no Iehova. Teie râ hoi, aita i maoro roa i muri aˈe i to ˈna haapiiraa i te Bibilia, ua haamata oia i te faaea e te hoê tane ma te faaipoipo ore e ua faaoti e faaea i ta ˈna mau haapiiraa. Ua taparu râ o Shannon ia tamau-noa-hia ta ˈna iho. Ua fariihia ta ˈna aniraa. Ua hoˈi mai te mau Ite, e ua tae na melo tootoru o te utuafare i te haapii faahou i te Bibilia e ua haere i mua i te pae varua. I muri aˈe i te faaipoiporaa, ua bapetizohia te metua vahine o Shannon e ta ˈna atoa metua hoovai tane.

I te hoê mahana, te poro ra o Shannon e te vahine o te tiaau haaati. Ua ani te hoê fatu fare ia Shannon: “Eaha te ohipa i tupu i nia i to oe mata?” “Ua roohia vau i te mariri aitaata, e ua iritihia,” ta ˈna i pahono atu. “Ua fatata roa o Iehova i te horoa mai i te hoê mata apî no ˈu i roto i te Paradaiso e tei ô nei mâua no te faaiteraa ˈtu ia oe i te reira.”