Te faatia ra te feia poro i te Basileia

E haamaitaihia te huru fati ore

Ua tohu atea mai o Iesu e e hamani-ino-hia ta ˈna mau pǐpǐ, e ua na reira atoa te aposetolo Paulo, mai te faahitihia ra i roto i te Timoteo 2, 3:12: “E te feia atoa e opua e haapao i te paieti ei roto â i te Mesia ra ia Iesu, e hamani-ino-atoa-hia ïa.” Tera râ, te taviniraa i te Atua ra ia Iehova ma te fati ore e haamaitai-rahi-hia ïa.

◻ E parau mau te reira i roto i te hoê oire i tatahi i te pae apatoerau no Malaisia. Noa ˈtu â ïa e taata haamori ia Bouddha haapao maitai tei haapii i ta ˈna mau tamarii ma te etaeta, aita teie metua tane i tapea i ta ˈna e toru tamahine e e toru tamaroa ia haapii i te Bibilia e te mau Ite no Iehova. E ua anaanatae atoa ta ˈna iho vahine i te parau mau. I te hoê mahana, ua faaooo te hoê taata tapiri ia ˈna: “Nafea oe i te ore e haavî i ta oe mau tamarii e a vaiiho ai ia ratou ia riro mai ei mau Ite no Iehova? E faaea ta ˈu mau tamarii atoa i to ˈu pae e i te haamoriraa a te mau tupuna ia Bouddha. Mea aroha roa oe!”

Ua hoˈi te metua tane i te fare no te faariaria e taparahi i te tuahine tei faatere i te mau haapiiraa e ta ˈna mau tamarii. Ua nehenehe te tamarii e faahau ia ˈna e ua tamau i te haapii i te Bibilia e te mau Ite no Iehova e ua haere mai ratou i te mau putuputuraa ma te turuhia e to ratou metua vahine.

I te pae hopea, ua faaue te metua tane i te taatoaraa o te utuafare ia haere mai i mua ia ˈna. “A maiti,” ta ˈna i ani “i rotopu ia ˈu e te faaearaa i te fare aore ra te riroraa mai ei kerisetiano e te faarueraa i te fare.” Te matahiapo, e tamaroa mǎrû, ua haamata i reira iho i te rave i ta ˈna tauihaa no te reva. “Eita!” ta te metua tane i tuô. “I te mea e e mau tamarii faaroo ore outou, mea maitai aˈe na ˈu te pohe.” Ua horo ihora i rapae au i te fare, ma te tapapahia e te mau melo o te utuafare, o tei taparu ia ˈna eiaha e haapohe ia ˈna. Ua huru-ê-roa-hia oia i ta ratou aniraa, e ua hoˈi oia i te fare.

Ua mairi te mau mahana. Ua haamata te metua tane i te ite i te ohipa maitai a te parau mau o te Bibilia i nia i te haerea a to ˈna mau tamarii. I te hoê mahana, ua farerei oia i to ˈna hoa tei faaooo ia ˈna, i teie nei e taata te mauiui rahi, o tei parau mai ia ˈna: “Ua inoino roa vau i ta ˈu mau tamarii. E haavare ratou ia ˈu e te eiâ ia ˈu.” Ua parau râ te metua tane e mau tamarii o te haapiihia ra e te mau Ite no Iehova e: “Oh, mea taa ê roa ta ˈu mau tamarii, e mea maitai roa ratou i nia ia ˈu e ua tauturu atoa ia ˈu no te aufauraa i te tarahu pereoo i to ˈu ereraa i ta ˈu ohipa.”

I teie nei mahana, ua bapetizo e toru tamahine e te metua vahine. E pionie taa ê te hoê tamaroa. E te metua tane haapao maitai e te iria? E mea maitai o ˈna e ua tae mai oia i te Oroa Haamanaˈoraa.

Ua haamaitai Iehova i te tamaroa e na tootoru tuahine e to ratou atoa metua vahine no to ratou huru fati ore. I teie nei e feia poro itoito ratou, ma te faaoaoa i te mafatu o Iehova.—Maseli 27:11.