Rahaba—Tiahia maoti te mau ohipa faaroo
A FERURI na! Te hoê vahine faaturi o tei tiahia i mua i te aro o te Atua. “Eita ïa e nehenehe!” e rave rahi o te na reira i te parau. Teie râ, o te ohipa ïa i tupu i nia i te vahine faaturi ra o Rahaba no Ieriko, te hoê oire Kanaana tahito.
Te faaite ra te taata papai bibilia ra o Iakobo e: “I tiahia te taata i te ohipa, eiaha i te faaroo anaˈe aore e ohipa ra. Oia atoa hoi te faaturi ra o Rahaba, aita anei oia i tiahia i te ohipa, a farii ai oia i na manu ra, e tuu atura hoi na te tahi eˈa ê? Mai te tino nei hoi ia ore te varua ra, e mea pohe ïa, oia atoa te faaroo aore e ohipa ra, e mea pohe atoa ïa.” (Iakobo 2:24-26) No te aha o Rahaba i tiahia ˈi? Eaha ta ˈna i rave i fanaˈo ai oia i teie tiaraa maitai roa ˈˈe i mua i te Atua?
Te haere maira te mau ati Iseraela!
E hoˈi atu tatou i te matahiti 1473 hou to tatou nei tau. A feruri na i te huru tupuraa. E oire paruru-maitai-hia o Ieriko. Te tia ra te fare o Rahaba te vahine faaturi ra i nia roa i te mau patu o te oire. Mai teie vahi teitei, e nehenehe oia e hiˈo atu i te mau pape puai ra o te anavai Ioridana i te pae hitia o te râ. (Iosua 3:15) I te pae pape hitia o te râ, te ite ra paha oia i te puhaparaa a te mau ati Iseraela, e to ratou nuu tamaˈi tei hau atu i te 600 000 taata. Tau kilometera noa ratou i te atearaa!
Ua ite o Rahaba i te mau upootiaraa rahi a Iseraela. Ua faarooroo atoa oia i te parau no te mana o Iehova, i to ˈna iho â râ iritiraa i te hoê eˈa no te mau ati Iseraela na roto atu i te Miti Uteute. Eita iho â ïa te mau pape pue no Ioridana e tapea ia ratou. E taime peapea mau teie! Eaha ïa ta Rahaba e rave?
Ua maiti o Rahaba i to ˈna pae
Aita i maoro, e piti ratere manaˈo-ore-hia o tei tae mai i ǒ Rahaba—e mau mata huna no ǒ mai i te puhaparaa a Iseraela ra. Te imi ra raua i te hoê vahi faaearaa, e ua farii atura oia ia raua i roto i to ˈna fare. Tera râ, ua tapae te parau e tei ǒ nei raua i roto i te tariˈa o te arii no Ieriko. Ua tono oioi atura oia i ta ˈna mau vea no te haru ia raua.—Iosua 2:1, 2.
I te taime a tae mai ai te mau vea a te arii, ua maiti ê na o Rahaba e tia ˈtu i te pae o te Atua ra o Iehova. “A aratai mai na i na taata i haere mai ia oe na,” o ta te mau vea a te arii ïa i ani mai. Ua faatapuni o Rahaba i na mata huna i rotopu i te mau tumu lino o ta ˈna i taraˈi i nia i to ˈna tapoˈi fare. Ua parau atura oia: “E pue taata â hoi tei haere mai i ǒ nei ia ˈu nei, area te vahi no reira mai raua ra, aore ïa vau i ite: e te pouriraa iho nei, i te opaniraa i te uputa [o te oire] nei, haere atura taua na taata nei i rapae. Aita râ vau i ite i te vahi ta taua pue taata i haere ra: a tipapa etaeta na; e roohia ˈtu ïa e outou.” (Iosua 2:3-5) O ta te mau taata ïa a te arii i rave—aita râ hoi e faufaa.
Ua aratai hape o Rahaba i te mau enemi. Ua rave â oia i reira iho i te tahi atu mau taahiraa avae o tei faaite i to ˈna faaroo ia Iehova maoti te mau ohipa. Ua paiuma ˈtura oia i nia i te tahua tapoˈi i to ˈna fare e ua parau atura i na mata huna e: “Ua ite au e, ua horoahia e Iehova te fenua na outou.” Ua farii atura o Rahaba e te mehameha pauroa ra te taata no taua fenua ra no te mea ua faaroo ratou e “ua haamǎrôhia e Iehova te miti uteute” i mua i te mau ati Iseraela a 40 matahiti na mua ˈtu. Ua ite atoa te nunaa e ua haamou roa te mau ati Iseraela e piti arii no Amori. “Tei to matou iteraa i taua parau ra,” o ta Rahaba ïa i parau, “tarapape noa ihora to matou aau, a ore roa e itoito i toe i roto i te taata atoa ra ia outou: o to outou Atua ra hoi o Iehova, o te Atua ïa no te raˈi nia ra, e no raro atoa nei no te fenua.”—Iosua 2:8-11.
Ua taparu ihora o Rahaba e: “E teie nei, teie ta ˈu parau ia orua, e tǎpǔ orua ia Iehova ia ˈu, e mai ia ˈu i hamani maitai ia orua nei, e hamani maitai atoa mai outou i te utuafare o tau metua nei; e ho mai hoi orua i te tahi tapao mau na ˈu, E e faaora outou i tau metua tane, e tau metua vahine, e tau mau tuaane, e tau mau taeae, e to ratou atoa ra.”—Iosua 2:12, 13.
Ua farii aˈera na taata e ua faaite ihora raua ia Rahaba e eaha te tia ia ˈna ia rave. E tia ia ˈna ia faatautau na nia mai i to ˈna haamaramarama te hoê taura uteute tei faaohipahia no te haapou mai i te mau mata huna i raro i rapae au atu i te mau patu no Ieriko. E tia ia ˈna ia haaputuputu mai i to ˈna utuafare i roto i to ˈna fare, i reira ratou e parahi noa ˈi ia paruruhia ratou. Ua horoa ˈtura o Rahaba i te mau haamaramaramaraa o te tauturu i na mata huna no nia i te huru o te fenua e ua faaite atura e nafea raua ia ape i te feia e imi ra ia raua. Ua na reira iho â na mata huna. I muri aˈe i to ˈna faatautauraa i te taura uteute e to ˈna haaputuputuraa mai i to ˈna utuafare, ua tiai noa ˈtura o Rahaba e eaha te mau ohipa e tupu i muri iho.—Iosua 2:14-24.
Eaha ta Rahaba i rave? Inaha, ua haapapu oia e ua niuhia to ˈna faaroo i nia i te Atua Puai Hope ra o Iehova! E ora oia ia au i ta ˈna mau faaueraa. Oia mau, e e tiahia oia no taua mau ohipa faaroo ra.
Mairi ihora te mau patu
Ua mairi ihora tau hebedoma. Apeehia e te mau tahuˈa—vetahi e te mau tara mamoe oni e vetahi e amo ra i te afata moˈa o te faufaa—ua faaohu te mau taata tamaˈi Iseraela ia Ieriko. Ua na reira noa ratou hoê taime i te mahana e ono mahana i teie nei. I te hituraa o te mahana, ua haaati aˈena ratou i te oire e ono taime. E te haere faahou ra ratou!
I te hoperaa te hituraa o te haaatiraa, ua faaroohia ˈtura te mau faaotoraa pu maoro. I muri iho, ua tuô puai aˈera te mau ati Iseraela. I reira, ua rave ihora Iehova e ia mairi te mau patu paruru ia Ieriko i raro na roto i te haruru patiri. O te patu anaˈe tei reira te fare o Rahaba o te tia noa ra i nia. Area te toea o te oire e to ˈna mau taata ra, ua haamouhia ïa. Maoti to ˈna faaroo haapapuhia e te mau ohipa, ua ora mai te vahine faaturi o tei tatarahapa e to ˈna utuafare atoa, e ua parahi atura oia i rotopu i te nunaa o Iehova.—Iosua 6:1-25.
Te huru o Rahaba
E ere o Rahaba i te vahine haapeu hupehupe, inaha te vai ra te mau tumu lino apǎpǎhia i nia i to ˈna fare o tei taraˈihia i te mahana. E faaohipahia hoi teie mau tumu no te hamani i te ahu lino. Te vai atoa ra te mau haapueraa taura uteute i roto i te fare o Rahaba. (Iosua 2:6, 18) Peneiaˈe ïa te rave ra oia i te hamaniraa ahu lino e ua ite atoa paha oia i te ohipa û i te ahu. E vahine rave ohipa mau ïa o Rahaba. Hau atu, ua noaa ia ˈna te mǎtaˈu faatura ia Iehova.—A faaau e te Maseli 31:13, 19, 21, 22, 30.
Eaha ïa no nia i te tahi atu ohipa a Rahaba? E ere noa hoi oia i te fatu vahine o te hoê hotela. Aita, te haapapu maitai ra te mau Papai e o vai ra o ˈna na roto i te faaohiparaa i te mau parau Hebera e Heleni e tano no te hoê vahine faaturi. Ei hiˈoraa, e faaohipahia te parau Hebera ra zoh·nahʹ i te mau taime atoa no te tahi taairaa taiata. Inaha hoi, i rotopu i te mau ati Kanaana, e ere te peu faaturi i te hoê toroa haama.
Te haapapu ra to Iehova faaohiparaa i te hoê vahine faaturi i to ˈna aroha rahi. E nehenehe tatou e hape i te hiˈoraa rapaeau, area o te Atua ra, “e hiˈo ïa i te [mafatu].” (Samuela 1, 16:7) No reira, e nehenehe te mau vahine faaturi mafatu tia o te tatarahapa i to ratou haerea taiata e fanaˈo i te faaoreraa i ta ratou hara e te Atua ra o Iehova. (A faaau e te Mataio 21:23, 31, 32.) Ua faarue o Rahaba iho i te hara no te pee i te hoê haerea parau-tia o tei fariihia e te Atua.
Ua haapao te mau mata huna Iseraela i te Ture a te Atua, no reira aita ratou i faaea i te fare o Rahaba no te tahi mau tumu taiata. Te tumu paha, peneiaˈe eita te taata e tâuˈa mai ia raua ia haere atu raua i roto i te fare o te hoê vahine faaturi. E faaohie atoa teie vahi i nia i te patu o te oire i to raua hororaa. Eita e ore e na Iehova i aratai ia raua i te fare o te hoê vahine hara o tei haaputapûhia te mafatu na roto i te mau faaiteraa o te mau taairaa a te Atua e te mau ati Iseraela e ua tatarahapa roa e ua taui roa oia i to ˈna oraraa. Te haapapu ra te parau a te Atua e e tia ia Iseraela ia haamou i te mau ati Kanaana no ta ratou mau peu taiata, e to ˈna haamaitairaa ia Rahaba e te haruraahia o Ieriko, e aita roa ˈtu te mau mata huna i rave i te peu taiata.—Levitiko 18:24-30.
Eaha ïa no nia i te mau aratairaa hape a Rahaba i te feia e imi ra i na mata huna? Ua farii te Atua i to ˈna haerea. (A faaau e te Roma 14:4.) Ua rave oia i te hoê ohipa atâta no ˈna no te paruru i ta ˈna mau tavini, e tapao haapapuraa hoi te reira no to ˈna faaroo. E mea ino te haavareraa i mua i te aro o Iehova, area ra, eita te hoê taata e faahepo ia faaite i te mau haamaramaramaraa i te feia o te ore e tia ia ite i te parau mau. Aita atoa o Iesu Mesia i horoa i te taatoaraa o te parau aore ra i te mau pahonoraa papu i te taime e nehenehe ai te reira e faatupu i te peapea faufaa ore. (Mataio 7:6; 15:1-6; 21:23-27; Ioane 7:3-10) Ma te feaa ore, e nehenehe to Rahaba faahaperaa i te mau vea enemi e hiˈohia ia au i teie huru manaˈo.
Te haamaitairaa a Rahaba
Mea nafea to Rahaba haamauruururaahia no to ˈna faatupuraa i te faaroo? Ua riro mau â to ˈna oraraa mai i te haamouraa o Ieriko ei haamaitairaa no ǒ mai ia Iehova ra. I muri iho, ua faaipoipo atura oia ia Salamona (Salama), te tamaiti a te raatira no te medebara ra o Naasona no te opu o Iuda. Na nia i to raua tiaraa metua o te taata paieti ra o Boaza, tei roto atoa o Salamona raua o Rahaba i te mau tupuna o tei aratai atu i te Arii ra o Davida no Iseraela. (Paraleipomeno 1, 2:3-15; Ruta 4:20-22) Hoê mea faufaa ˈtu â, tei roto te faaturi tahito ra o Rahaba i na vahine e maha anaˈe o tei faahitihia to ratou iˈoa i roto i te pǎpǎ tupuna o Iesu Mesia a Mataio. (Mataio 1:5, 6) Auê ïa haamaitairaa no ǒ mai ia Iehova ra e!
Noa ˈtu e e ere oia i te ati Iseraela e e vahine faaturi oia na mua ˈˈe, ua riro o Rahaba ei hiˈoraa faahiahia mau no te hoê vahine o tei haapapu na roto i ta ˈna mau ohipa e e tiaturiraa taatoa to ˈna ia Iehova. (Hebera 11:30, 31) Mai vetahi pae, o tei faarue i te hoê oraraa taiata, e fanaˈo atoa oia i te tahi atu haamauruururaa—te tia-faahou-raa mai te pohe mai no te ora i roto i te paradaiso i nia i te fenua nei. (Luka 23:43) No to ˈna faaroo i apitihia e te ohipa, ua fanaˈo o Rahaba i te farii maitai o to tatou Metua here i te raˈi o te faaore i te hapa. (Salamo 130:3, 4) E ma te papu maitai, e riro to ˈna hiˈoraa maitai ei faaitoitoraa no te feia atoa e here ra i te parau-tia ia tiaturi i te Atua ra o Iehova e a muri noa ˈtu.
[Hohoˈa i te api 23]
Ua tiahia o Rahaba no te mea ua haapapu ta ˈna mau ohipa e e faaroo to ˈna
[Hohoˈa i te api 24]
Ua heru mai te feia ihipǎpǎ i te mau toetoea o te oire tahito no Ieriko,e oia atoa te hoê tuhaa iti o te hoê patu tahito
[Faaiteraa i te tumu]
Pictorial Archive (Near Eastern History) Est.