Ua maiti oia ia Iehova i to ˈna iho nunaa

I ROTO i te hoê fare i nia i te patu o Ieriko, te ora ra te hoê vahine taiata o Rahaba te iˈoa. Mai to ˈna haamaramarama, e nehenehe oia e ite i teie “oire o te mau tamara” e te hitiraa mahana. (Deut. 34:3) Ia haere râ oia na roto i te oire, ua ite o ˈna i te mǎtaˈu o te taata o Ieriko. Ua taa ia ratou e tauturu Iehova ia Iseraela no te haru e no te haamou ia ratou. E ua tano iho â te reira.

To pihai iho, te nunaa Iseraela i te puhaparaa. E maha ahuru matahiti na mua ˈtu, ua faaora Iehova i to ˈna nunaa ma te haamou i te nuu a Pharao, ua haaparemohia ratou i roto i te miti Uteute. Aita i maoro, ua horoa Iehova i to ˈna nunaa, ei nunaa overe i roto i te medebara, i te upootiaraa i nia i te mau faatereraa arii puai no te ati Amori no Sihona e Oga. I teie nei ua tae ratou i Ieriko, arataihia na Iehova no te faautua i teie nunaa no ta ratou mau ohipa ino!

Ua taa ia Rahaba mea ino to ˈna nunaa. Ua hinaaro paha oia e fanaˈo i te tahi atu oraraa i to ˈna iho ei vahine taiata. Aita ta ˈna i faaroo no nia ia Iehova, i haamǎtaˈu ia ˈna, ua faatupu râ oia i te faaroo. Teie hoê Atua tei paruru e faatura i to ˈna nunaa, e ere mai te mau atua o Kanaana. Ua faafatata o ˈna i teie Atua viivii ore, parau-tia e paruru ra o Iehova.

I te hoê po, ua haere mai e piti taata ěê i to ˈna uputa, no te imi i te hoê vahi no te faafaaea. Ua taa oioi ia Rahaba o vai raua: ei mata huna Iseraela! Ua faarooroo râ te arii no Ieriko no teie e piti mata huna. No reira o ˈna i tono ai i to ˈna mau taata ia Rahaba, no te ani ia faahaere mai i teie mau taata i rapae i to ˈna fare. Tei mua Rahaba i te hoê faaotiraa o te nehenehe e taui i to ˈna oraraa. E paturu anei oia i to ˈna nunaa aore ra e tia o ˈna no Iehova?

Ma te itoito ua maiti Rahaba ia Iehova. Ua tapuni oia i na mata huna i nia i to ˈna tafare e ua aratai ê oia i te mau taata o te arii. I to ratou faarueraa ia ˈna, ua haere o ˈna i nia i te tafare e ua parau i teie na Iseraela no te aha o ˈna i faaora ˈi ia raua. “Ua ite iho â vau e horoa Iehova i teie fenua no outou.” Ua faatupu o ˈna i te faaroo i to raua Atua! Ua faaite oia ia raua i teie parau mau: Ua mǎtaˈu roa te mau taata no Ieriko i te mau Iseraela. E ua taparuparu oia ia paruru raua ia ˈna ia haamou Iehova i teie oire.

Ua faaora Rahaba i teie na mata huna e ua taa ia raua e ua tia Rahaba no Iehova. Ua farii raua e rave mai ta ˈna i ani. Ua paruruhia Rahaba e to ˈna utuafare, eiaha râ o ˈna e faaite teihea roa raua, ia faatautau oia i te taura uteute i to ˈna haamaramarama i te pae o te patu o te oire e ia faaea oia e to ˈna utuafare ǐ o ˈna i te taime aroraa. No reira o ˈna e to ˈna utuafare i ora ˈi.

Ua tauturu Rahaba i teie na mata huna ma te haapou atu na to ˈna haamaramarama e te tahi taura. I muri iho, ua rave oia mai ta raua i ani atu. Ua taamu oia i te hoê taura uteute i to ˈna haamaramarama e aita o ˈna i faaite no nia i teie na mata huna. Mea papu e haapohehia oia ahani ua itehia ta ˈna i rave no raua. Ma te auraro, ua faaea o ˈna i to ˈna fare e to ˈna utuafare. I to Iehova tapearaa i te anavai Ioridana, ua haere te mau Iseraela na ropu, ua papu atu â ia Rahaba e ua rave oia i te faaotiraa tano. I to te nuu Iseraela haaatiraa i te oire e hitu mahana, ua rahi atu â te mǎtaˈu o te mau taata i Ieriko. I te pae hopea, i te hituraa o te mahana, ua faaotohia te mau pu, ua tuô te ati Iseraela e ua parari te patu, ua ora râ Rahaba e to ˈna utuafare!

I muri aˈe i te aroraa, ua aratai te mau mata huna ia Rahaba e to ˈna utuafare i rapae i to ˈna fare te tia ra i te hoê tuhaa o te patu. Mai ta Iosua i faaue, ua ora Rahaba e to ˈna utuafare. Tau taime i muri iho, ua fariihia Rahaba i roto i te nunaa o Iseraela. Ua faaipoipo o ˈna i te hoê Iseraela e ua fanau mai i te tamarii. Tau matahiti i muri, ua fa mai hoê o to ˈna huaai tei riro ei taata itoito mau aita i ora aˈenei: o Iesu Mesia. (Mat. 1:5, 16) Ua haamaitai rahi Iehova ia Rahaba no to ˈna faaroo e itoito.

A taio i te aamu Bibilia:

• Iosua 2:1-24; 5:1; 6:14-25

• Hebera 11:30, 31

• Iakobo 2:24, 25

A aparau:

Mea nafea to Rahaba faaiteraa i te itoito?

A faahohonu atu â

1. 1. A faataa eaha te huru oraraa o Rahaba i Ieriko. (brwp131101 “I parauhia e vahine parau-tia na roto i te ohipa” par. 4-7)

   Ta oe pahonoraa

2. 2. E nafea tatou e ite ai aita te mau mata huna i haere i ǒ Rahaba no te tahi opuaraa ino? (it “Vahine taiata” par. 18)

   Ta oe pahonoraa

3. 3. No te aha ua apǎpǎhia te lino i nia i te tafare o Rahaba e eaha tei ravehia e te lino? (it “Lino” N^o 1 par. 1-3) A

   Ta oe pahonoraa

   

   Thanks for your interest in my photos/Moment Open via Getty Images

4. 4. No te aha aita Rahaba i hape i te aratai-ê-raa i te mau taata o te arii? (w05 1/1 17 par. 6) B

   Ta oe pahonoraa

   

A feruri i te mau haapiiraa

• No te aha i titauhia ˈi te itoito ia Rahaba no te faarue i to ˈna oraraa tia ore e no te haamori ia Iehova e to Iseraela? Eaha ta te mau piahi Bibilia e haapii mai i to ˈna hiˈoraa?

  Ta oe pahonoraa

• I roto i teihea ˈtu â tuhaa e nehenehe ai oe e pee i te itoito o Rahaba?

  Ta oe pahonoraa

A huti mai i te haapiiraa

• Eaha ta teie aamu e haapii mai no nia ia Iehova?

  Ta oe pahonoraa

• E nafea teie aamu e tuati ai i te opuaraa a Iehova?

  Ta oe pahonoraa

• Eaha ta ˈu e hinaaro e ani ia Rahaba i te tia-faahou-raa?

  Ta oe pahonoraa

A haapii hau atu â

Eaha ta te aamu o Rahaba e haapii mai no te ora ia tae mai te mahana o Iehova?

“Teihea to outou vahi haapuraa i te hopea o teie ao?” (brw090515)

A faaohipa i teie aamu Bibilia tahohoˈa no te tauturu i ta oe tamarii ia taa i te mau tupuraa o teie aamu.

“Te pee ra Rahaba i te mau aratairaa” (ijwis tumu parau 11)