Mau uiraa a te feia taio
I te mea hoi e e taata mau te tahuˈa tahito ra o Melehizedeka, no te aha ïa te Bibilia e parau ai e “aore [to ˈna] e ihotatau”?
E itehia teie parau i roto i te Hebera 7:3. A rave na i te irava i roto i te taatoaraa o te parau:
“E taua Melehizedeka arii no Salema ra, e tahuˈa na te Atua teitei, o tei farerei atu ia Aberahama i te hoˈiraa mai, mai te taparahiraa i te mau arii ra, e ua faaora ˈtura ia ˈna; o ta Aberahama i horoa mai i te ahuru o te tufaa i te mau taoˈa atoa; o te arii ïa o te parau-tia te hoê auraa i tana iˈoa ra, e muri aˈe, o te arii ïa o te hau, oia hoi te arii o Salema. Aore e metua tane, aore hoi e metua vahine, aore e ihotatau, aore e mahana matamua, aore hoi e hopea to to ˈna ra oraraa; i faarirohia râ oia mai te Tamaiti a te Atua ra, o te vai tahuˈa maite mai â e a muri noa ˈtu.”—Hebera 7:1-3.
Mai tei faahitihia ˈtu na, e taata mau o Melehizedeka, mai ia Aberahama, o ta ˈna i farerei atu. (Genese 14:17-20; Hebera 7:4-10) Mai te peu mai te reira te huru ra, e metua iho â ïa to Melehizedeka, e metua tane e metua vahine, e eita e ore e huaai atoa ta ˈna. No reira, mai te mau taata atoa e ihotatau to ˈna aore e pǎpǎraa tupuna to ˈna. E pohe atoa o ˈna. Inaha, ua pohe mau hoi o Melehizedeka, ia au i te faahitiraa parau a Paulo i to Roma 5:12, 14. Tera râ, i te mea hoi e aita tatou i ite afea ra to Melehizedeka poheraa e i te faaearaa i te tavini ei tahuˈa, i roto ïa i taua tuhaa ra to ˈna taviniraa ma te ore e itehia i te hopea.
I roto i te Hebera, ua faahiti o Paulo i te tahi mau parau no nia ia Melehizedeka ia parau oia no nia i te tiaraa o Iesu Mesia ei Tahuˈa Rahi. Ma te faariro ia Melehizedeka ei hohoˈa aore ra ei taipe no Iesu i roto i teie tiaraa autahuˈa, teie ta Paulo i parau: “[O] Iesu . . . o tei faairohia ei tahuˈa rahi e a muri noa ˈtu ia au i te parau ia Melehizedeka.” (Hebera 6:20) I roto ïa i teihea auraa?
Ua papu maitai ia Paulo e aita te Bibilia e horoa ra i te taatoaraa o te mau parau no nia i te opu fetii o Melehizedeka—to ˈna mau tupuna aore ra ta ˈna mau huaai. E ere hoi teie haamaramaramaraa i te mea faufaa no te faatiaraa parau a te Bibilia. Ia au i te mau mea ta Paulo i ite aore ra o ta tatou i ite, e nehenehe maitai ïa e parau e “aore to ˈna e parau tupuna” (New World Translation of the Holy Scriptures; American Standard Version), “aore e huaai” (W. J. Conybeare), aore ra “aore to ˈna e e huifetii.”—J. B. Phillips.
Ua riro o Iesu mai te reira te huru i roto i teihea tuhaa? Papu maitai, ua ite tatou e te Metua tane o Iesu o te Atua ra o Iehova ïa e to ˈna metua vahine o Maria no roto mai i te opu fetii no Iuda. No reira, te vai atura ïa te hoê tuatiraa i rotopu ia Melehizedeka raua o Iesu. Nafea hoi? Aita o Iesu i fanauhia i roto i te opu fetii no Levi, te opu o te mau autahuˈa i roto i te nunaa o Iseraela. Aita, aita o Iesu i riro mai ei tahuˈa na roto i te parau no te huifetii. Na reira atoa o Melehizedeka, aita o ˈna i riro mai ei tahuˈa “i te ture parau tino ra,” oia hoi aita o ˈna i fanauhia i roto i te opu fetii autahuˈa. (Hebera 7:15, 16) Maoti i te riro mai ei tahuˈa na roto i te hoê metua tane taata o tei riro atoa oia iho ei tahuˈa, “i parauhia mai [râ oia] e te Atua e, e tahuˈa rahi mai te parau ia Melehizedeka.”—Hebera 5:10.
Hau atu, aita to Iesu huaai aore ra e mono i to ˈna tiaraa autahuˈa. I roto atoa i taua auraa ra, aita to ˈna e huifetii. E amo oia i ta ˈna taviniraa autahuˈa mai te hoê orometua rahi mau. Te na ô ra o Paulo no nia i ta ˈna taviniraa tamau e:
“Area [o Iesu] ra no te mea e tia i te parahiraa e a muri noa ˈtu, e ore to ˈna toroa tahuˈa e riro ia vetahi ê. E teie nei, e tia maitai roa ˈtu ia ˈna ia faaora i te feia e na reira ˈtu ia ˈna ra i te haere i te Atua ra, e tia hoi oia i te oraraa e a muri noa ˈtu ei tia ia ratou.”—Hebera 7:24, 25.
Ia hau aˈe hoi ta tatou tuatapaparaa i te mau parau a Paulo i roto i te Hebera 7:3, i te riro ei tuhaa iti ite ta tatou e haaputu noa i roto i to tatou feruriraa. Ia faarahi na hoi te reira i to tatou mauruuru no te mau maa ta te Atua ra o Iehova e horoa mai nei na tatou ma te here, ia nehenehe ta tatou mau hara e faaorehia mai e a muri noa ˈtu e ia au i te faanahoraa ta ˈna i haapao no tatou nei e roaa ˈtu ai ia tatou i te tauturu e te aratairaa e a muri noa ˈtu.