E au i te hoê tumu raau
“NA TE mau taata maamaa mai ia ˈu nei e hamani i te mau pehepehe, o te Atua anaˈe râ te nehenehe e hamani i te hoê tumu raau. Ma te haafaahiahia i te mau maitai e rave rahi o te mau tumu raau, te faahanahana ra te rohipehe ra o Joyce Kilmer i te Atua, oia i poiete ia ratou.
Ua rau te mau tumu raau ta te Atua ra o Iehova i hamani, te mau mea nehenehe e te mau mea faufaa roa. Te mea nainai e te mea rarahi, inaha eita e nehenehe e faataa i to ratou nehenehe. Hau atu, te horoa mai nei te mau tumu raau i te maa, i te taoˈa e ama, e i te mǎrǔ-pohe. E te imi nei â te feia aravihi i te tahi mau ravea apî no te faaohipa i te raau.
I roto i te Bibilia, e faaohipahia na te mau tumu raau i te tahi taime, no te faahohoˈa i te mau basileia, i te feia faatere, e te tahi mau taata. (Ezekiela 31:1-18; Daniela 4:10-26) E apitihia na te parau no te mau tumu raau i te oaoa, te hau, e te mau huru tupuraa haamaitaihia no ǒ mai i te mana arii ra o Iehova e te faatiamâ-faahou-raahia to ˈna pǔpǔ taata. (Paraleipomeno 1, 16:33; Isaia 55:12; Ezekiela 34:27; 36:30) Te tǎpǔ atoa maira te mau Papai e e riro te mau mahana o te mau taata o te Atua mai to te hoê tumu raau ra te huru. (Isaia 65:22) E auraa faufaa roa to te reira ia ite tatou e e ora na te tahi mau tumu raau ehia rahiraa hanere matahiti.
Te parau ra te hoê papai salamo bibilia e te taata e hinaaro i te ture a te Atua “e au oia i te raau i tanuhia i te hiti anavai ra, o tei hotu i to ˈna ra tau mau, e o tei ore roa i maheahea to ˈna rau; oia atoa, o ta ˈna atoa e rave ra, te maitai ra ïa.” Te faahaamanaˈo ra hoi te hoê tumu raau ruperupe maitai e tanuhia i te hiti anavai ra, i te papai salamo, i te ruperupe i te pae varua e fanaˈohia e te taata e “hinaaro i te ture a Iehova.” (Salamo 1:1-3) Mai te peu e mea hinaaro mau na outou i te ture a te Atua e ta ˈna Parau Moˈa, e nehenehe to outou pue mahana e riro mai te mau mahana o te hoê tumu raau. Inaha, ia haa outou ia au maite i te ite mau no nia i te Atua ra o Iehova e o Iesu Mesia, e nehenehe outou e atuatu i te tiaturiraa e ora e a muri noa ˈtu.—Ioane 17:3.