O vai Iehova?

“O VAI Iehova?” Ua uihia teie uiraa e 3 500 matahiti i teie nei na te Pharao teoteo, arii no Aiphiti. E au ra e na te manaˈo faatiatia i turai ia ˈna ia parau atoa ˈtu e: “Aore au i ite ia Iehova.” E piti taata o te tia ra i taua taime ra i mua ia Pharao e ua ite raua e o vai Iehova. O na taeae ïa o Mose raua o Aarona, no roto mai i te opu fetii ati Iseraela ra a Levi. Ua tono atu o Iehova ia raua no te ani e ia tuu te arii no Aiphiti i te mau ati Iseraela i roto i te medebara no te faatupu i te hoê oroa faaroo.—Exodo 5:1, 2.

Aita o Pharao e hinaaro ra e ia pahonohia ta ˈna uiraa. I raro aˈe i to ˈna mana, e faateitei na te mau tahuˈa i te haamoriraa o te mau hanere rahiraa atua haavare. Inaha hoi, e faarirohia na o Pharao iho ei atua! Ia au i te mau aai no Aiphiti, o ˈna te tamaiti a te atua-mahana ra o Ra e ua riro oia ei faahohoˈaraa taata o te atua upoo manu ra o Horus. Ua piihia o Pharao na nia i te mau tiaraa iˈoa ra “te atua puai” e “te mure ore.” Eita ïa e maerehia e ia ui atu oia ma te faaahaaha e: “O vai Iehova, a faaroo atu ai au i to ˈna reo?”

Aita e faufaa e ia pahono atu o Mose raua o Aarona i teie uiraa. Ua ite hoi o Pharao e o Iehova te Atua e haamorihia ra e te mau ati Iseraela, e faaoromai ra i taua taime ra i te faatîtîraa a to Aiphiti. Teie râ, e fatata roa o Pharao e o Aiphiti taatoa i te haapii e o Iehova te Atua mau. Oia atoa i teie mahana, e faaite papu o Iehova i to ˈna iˈoa e to ˈna tiaraa Atua i te mau taata atoa i nia i te fenua nei. (Ezekiela 36:23) E nehenehe ïa tatou e faufaahia na roto i te hiˈopoaraa e mea nafea to te Atua ra o Iehova faahanahanaraa i to ˈna iˈoa i Aphiti tahito ra.

Hau aˈe i te mau atua no Aiphiti

I to Pharao uiraa ma te faatiatia e o vai o Iehova, aita o ˈna i feruri noa ˈˈe i te mau faahopearaa o ta ˈna e faaruru atu. Na Iehova iho i pahono mai, ma te faatae mai i na ati hoê ahuru i nia ia Aiphiti. E ere noa teie mau ati i te tahi tairiraa i nia i te nunaa. E mau tairiraa râ teie i te mau atua no Aiphiti.

Ua haapapu te mau ati i te tiaraa hau aˈe o Iehova i nia i te mau atua no Aiphiti. (Exodo 12:12; Numera 33:4) A feruri na i te auê rahi i faaroohia i to Iehova tauiraa i te Anavai Nile e te mau pape atoa no Aiphiti ei toto! Maoti teie semeio, ua haapii o Pharao e to ˈna nunaa e mea hau aˈe o Iehova i te atua o te Nile, o Hapi. Ua riro atoa te poheraa o te mau iˈa i roto i te Nile ei tairiraa i te haapaoraa no Aiphiti, inaha e haamorihia na te tahi mau huru iˈa.—Exodo 7:19-21.

I muri iho, ua faatae aˈera Iehova i te ati rana i nia ia Aiphiti. Ua faahaama te reira i te ruahine o te rana ra a to Aiphiti, o Heqt. (Exodo 8:5-14) Ua haafeaa roa te toru o te ati i te mau tahuˈa tahutahu, aita hoi ratou i nehenehe e rave atoa i te semeio a Iehova o te faariroraa i te repo puehu ei naonao. “O te rima teie no te Atua,” o ta ratou ïa i tuô. (Exodo 8:16-19) Aita te atua Aiphiti ra o Thoth, tei tiaturihia e na ˈna i ite mai i te mau peu tahutahu, i nehenehe e tauturu i taua feia peu haavare ra.

Te haapii ra ïa o Pharao e o vai râ o Iehova. O Iehova te Atua o te faaara i ta ˈna opuaraa na roto ia Mose e a faatupu atu ai na roto i te faataeraa i te mau ati semeio i nia i te feia no Aphiti. E nehenehe atoa ta Iehova e haamata e e faahope i te mau tairiraa mai ta ˈna e hinaaro. Aita râ teie ite i turai ia Pharao ia auraro ia Iehova. Maoti râ, ua tamau noa te arii teoteo ra no Aiphiti ma te etaeta i te patoi atu ia Iehova.

I te maharaa o te ati, ua pau roa te fenua e ua î roa te mau fare i te mau popoti, e eita e ore e ua purara atoa ˈtu na roto i te reva, tei riro atoa hoi ei taoˈa haamoriraa tei faahohoˈahia e te atua ra o Shu aore ra te ruahine o Isis, arii vahine o te raˈi. Ua hurihia te parau Hebera no teie manumanu na roto i te mau parau ra “raô rarahi,” “raô,” e “manumanu.” (Tatararaa a te ao apî; V.C.J.S.; Young) Ahiri e o te manumanu scarabée teie, ua atihia ïa te mau Aiphiti i te mau manumanu o ta ratou i faariro ei mea moˈa, e eita te taata e nehenehe e haere na raro ma te ore e taahi atu i nia iho. Noa ˈtu râ, ua haapii teie ati ia Pharao i te tahi mea apî no nia ia Iehova. A ore ai te mau atua no Aiphiti e paruru i ta ratou feia haamori i te mau popoti, area Iehova ra, ua paruru oia i to ˈna nunaa. Ua tairi teie e te mau ati atoa i tupu i muri iho i te mau Aiphiti eiaha râ te mau ati Iseraela.—Exodo 8:20-24.

Te paeraa o te ati, o te maˈi pee ïa i nia i te mau nǎnǎ no Aiphiti. Ua haavahavaha teie tairiraa ia Hathor, Apis, e te ruahine ra o Nut tei faahohoˈahia e te hoê tino puaatoro ufa. (Exodo 9:1-7) Ua faatae te ono o te ati i te mau fefe i nia i te taata e te animala, ma te faahaehaa i te mau atua ra o Thoth, o Isis, e o Ptah, tei tiaturi-hape-hia e e mana to ratou no te faaora i te maˈi.—Exodo 9:8-11.

Te hitu o te ati, o te ûa paari ïa, e te auahi o tei haruru na roto i te ûa ofai. Ua faahaama teie tairiraa i te atua ra o Reshpu, tei manaˈohia e o ˈna te fatu o te uira, e o Thoth, tei parauhia e na ˈna e mana ra i nia i te ûa e te patiri. (Exodo 9:22-26) Ua faaite te vau o te tairiraa, te ati manu vivi, i te tiaraa hau aˈe o Iehova i nia i te atua o te hoturaa ra o Min, tei manaˈohia hoi e o ˈna te paruru o te mau faaapu. (Exodo 10:12-15) Ua afai mai te iva o te tairiraa, te pouri e toru mahana te maoro i nia ia Aiphiti, i te vahavaha i nia i te mau atua Aiphiti mai te mau atua-mahana ra o Ra e o Horus.—Exodo 10:21-23.

Noa ˈtu na ati vavahi e iva, aitâ o Pharao i farii i te tuu i te mau ati Iseraela. Ua pau rahi o Aiphiti na roto i te etaeta o to ˈna mafatu, i to te Atua faataeraa mai i te ahuru e te ati hopea—oia hoi te poheraa o te matahiapo ta te taata e ta te animala. Ua pohe atoa te matahiapo a Pharao, noa ˈtu e ua faarirohia oia ei atua. I reira, ‘ua tahoo Iehova i te mau atua atoa o Aiphiti i te utua.’—Exodo 12:12, 29.

Ua titau aˈera o Pharao ia Mose raua o Aarona e ua parau atura: “A tia, a haere ê, orua e te tamarii atoa a Iseraela, e faarue mai i to ˈu ra taata; e haere e haamori ia Iehova, i ta orua i parau maira. E hopoi atoa hoi i ta outou mau mamoe, e ta outou mau puaatoro, ta outou i parau maira, e e haere; e e haamaitai mai hoi orua ia ˈu.”—Exodo 12:31, 32.

Tei faaherehere i to ˈna nunaa

Ua faareva ˈtura te mau ati Iseraela, aita râ i maoro, ua manaˈo atura o Pharao e te haere taa ore noa ra ratou na roto i te medebara. Ua ani atura oia e ta ˈna mau tavini atoa e: “Eaha teie rave ia tatou nei, i tuu ai tatou ia Iseraela nei i te taviniraa ia tatou nei?” (Exodo 14:3-5) E riro hoi te ereraa i teie nunaa faatîtîhia ei pau teimaha no Aiphiti i te pae faanavairaa.

Ua haaputuputu aˈera o Pharao i ta ˈna nuu faehau e ua auau atura ia Iseraela i Pi-hahirota. (Exodo 14:6-9) I te pae no te nuu, e au ra e mea maitai roa no to Aiphiti no te mea aita ta te mau ati Iseraela e hororaa i rotopu i te miti e te mau mouˈa. Ua ohipa mai râ Iehova no te paruru i te mau ati Iseraela na roto i te tuuraa i te hoê ata i rotopu ia ratou e te mau Aiphiti. I te pae a to Aiphiti ma, “e ata e te pouri” ïa, o tei tapea ia ratou ia aro mai. I te tahi pae, mea anaana ïa te ata, “e ao noa aˈera taua rui ra” no Iseraela.—Exodo 14:10-20.

E manaˈo haru e e haamou to Aiphiti tera râ ua tapeahia ratou e te ata. (Exodo 15:9) I te peeraa te ata, auê ïa te faahiahia e! Ua taa ê te mau pape o te Miti Uteute, e te haere ra te mau ati Iseraela na roto i te tahora e tae atu ai i te tahi pae na nia i te repo mǎrô! Ua ru atura o Pharao e to ˈna mau nuu na roto i te tahora, ma te hinaaro e haru e e haapau i ta ratou mau tavini tahito. Teie râ, aita te arii teoteo ra no Aiphiti i tâuˈa i te Atua o te mau Hebera. Ua haamata ˈtura o Iehova i te faatupu i te huanane i rotopu i te mau Aiphiti, na roto i te tataratararaa i te mau huira o to ratou mau pereoo.—Exodo 14:21-25a.

“Tatou e horo e faarue i teie nei ati Iseraela,” o ta te mau taata puai no Aiphiti ïa i tuô, no te mea “te [aro ra] Iehova [no] ratou ia pau to Aiphiti nei.” Ua maoro roa râ teie manaˈo to Pharao e ta ˈna mau taata. Ua ora oia i te tahi atu pae miti, ua faatoro atura o Mose i to ˈna rima i nia i te miti, e ua hoˈi maira te miti, ma te haapohe ia Pharao e to ˈna mau nuu puai.—Exodo 14:25b-28.

Te mau haapiiraa e hutihia mai

O vai atura ïa o Iehova? Ua noaa ia Pharao teoteo ra i te pahonoraa i teie uiraa. Ua haapapu te mau ohipa i tupu i Aiphiti e o Iehova te Atua mau hoê roa, e e ere roa ˈtu oia mai te mau ‘atua faufaa ore’ a te mau nunaa. (Salamo 96:4, 5) Na roto i to ˈna puai hau aˈe i te faahiahia, ‘na Iehova te raˈi nei i hamani, e te fenua.’ O ˈna atoa te Faaora Rahi, Na ˈna i ‘aratai mai i to ˈna mau taata ia Iseraela mai te fenua maira mai Aiphiti, ma te tapao, e te ravea taa ê, e ma te rima puai, e te rima faatorohia ra, e ma te riaria rahi.’ (Ieremia 32:17-21) Ua haapapu mau â te reira e e nehenehe ta Iehova e paruru i to ˈna nunaa!

Ua huti mai o Pharao i teie mau haapiiraa na roto i te mau tupuraa mauiui. Inaha, ua pohe oia i te haapiiraa hopea. (Salamo 136:1, 15) Mea maitai aˈe hoi ahiri e ua faaite oia i te haehaa i to ˈna aniraa ˈtu e, “O vai Iehova?” I reira, e nehenehe ïa taua arii ra e ohipa ia au i te pahonoraa i horoahia ˈtu. Ma te oaoa, e rave rahi mau taata haehaa i teie mahana o te haapii nei e o vai Iehova. Eaha To ˈna huru? Eaha ta ˈna e ani maira ia tatou? Ia faarahi te tumu parau i muri nei i to outou mauruuru no te Atua hoê roa o Iehova to ˈna iˈoa, e tia ˈi.—Salamo 83:18.

[Faaiteraa i te fatu o te hohoˈa i te api 3]

Pictorial Archive (Near Eastern History) Est.