Ua rave raua i te hinaaro o Iehova

Mose e Aarona—Feia poro itoito i te parau a te Atua

A FERURI na i te tupuraa: Te tia ra o Mose e vau ahuru matahiti to ˈna e to ˈna tuaana, o Aarona, i mua i te taata puai roa ˈˈe o te fenua nei—Pharao no Aiphiti. No te feia no Aiphiti ua hau atu teie taata i te hoê tia o te mau atua. Te tiaturi nei ratou e e atua oia. Ua faarirohia o ˈna ei faahohoˈaraa taata no Horus, hoê atua upoo manu. Ratou paatoa e o Isis raua o Osiris, o Horus te toru tahi matamua i rotopu i te mau atua e te mau ruahine no Aiphiti.

Ua nehenehe noa te mau taata atoa e haafatata ˈtu ia Pharao e ite atu i te hohoˈa riaria mau o te afii o te hoê asepi e toro ra i rapae mai i te ropuraa o to ˈna korona. I te parauraa, e nehenehe taua ophi ra e tutuha i te auahi e e haamou i te mau enemi atoa o Pharao. I teie nei te haere ra o Mose raua o Aarona i mua i teie arii faarirohia ei atua e te hoê aniraa aore â i itehia aˈenei—ia tuu o ˈna i te mau ati Iseraela faatîtîhia ia haere e ia nehenehe ratou e faatupu i te hoê oroa na to ratou Atua ra o Iehova.—Exodo 5:1.

Ua tohu aˈena o Iehova e e mafatu etaeta to Pharao. No reira, aita o Mose raua o Aarona i maere i ta ˈna pahonoraa teoteo: “O vai Iehova, a faaroo atu ai au i to ˈna reo, a tuu atu ai au ia Iseraela? aore au i ite ia Iehova, e ore hoi au e tuu ia Iseraela.” (Exodo 4:21; 5:2) No reira, ua ineine noa te hoê aroraa riaria mau. I te farereiraa i muri iho, ua horoa o Mose raua o Aarona i te haapapuraa maere mau ia Pharao e e mau tia raua no te Atua mau e te mana hope.

Ua tupu mai te hoê semeio

Mai tei faauehia e Iehova, ua faatupu o Aarona i te hoê semeio o tei haapapu i te mana hope o Iehova i nia i te mau atua no Aiphiti. Ua taue oia i ta ˈna raau i mua ia Pharao, e ua riro vave maira te reira ei ophi rahi! Ma te huru ê roa i teie semeio, ua titau aˈera o Pharao i ta ˈna mau tahuˈa ohipa tahutahu.a Ma te tauturuhia e te mau mana no ǒ mai i te mau demoni ra, ua nehenehe taua mau taata ra e na reira atoa e ta ratou iho mau raau.

Ahiri e ua oaoa o Pharao e ta ˈna mau tahuˈa, no te hoê noa râ taime poto. A feruri na i to ratou mau hohoˈa mata i to te ophi a Aarona horomiiraa i ta ratou mau ophi, te tahi i muri aˈe i te tahi! Ua nehenehe te taatoaraa tei hiˈo atu i te reira e ite e aita te mau atua no Aiphiti i aifaito i te Atua mau ra o Iehova.—Exodo 7:8-13.

I muri aˈe atoa i te reira, ua faaite noâ o Pharao i te mafatu etaeta. I muri noa ˈˈe i to te Atua faataeraa ˈtu e hoê ahuru tairiraa, aore ra ati, i nia ia Aiphiti to Pharao parauraa ia Mose raua o Aarona i te pae hopea e: “A tia, a haere ê, orua e te tamarii atoa a Iseraela, e faarue mai i to ˈu ra taata; e haere e haamori ia Iehova, i ta orua i parau maira.”—Exodo 12:31.

Te mau haapiiraa no tatou

Na te aha i turai ia Mose raua o Aarona ia haafatata ˈtu i te Pharao puai mau no Aiphiti? I te omuaraa, ua erehia o Mose i te tiaturiraa i to ˈna iho aravihi, ma te parau e “e reo maromaroâ e te maumau” to ˈna. I muri aˈe atoa i te haapapuraahia e te turu ra Iehova ia ˈna, ua ani oia e: “E tono oe i te au ia oe ia tono ra.” Na roto i te tahi atu mau parau, ua ani o Mose e ia tono te Atua i te tahi atu taata. (Exodo 4:10, 13) Ua faaohipa râ o Iehova i te taata mǎrû ra o Mose, ma te horoa ˈtu i te paari e te puai e titauhia no te amo i ta ˈna hopoia.—Numera 12:3.

I teie nei mahana, te pee ra te mau tavini o te Atua ra o Iehova e o Iesu Mesia i te faaueraa e “faariro i te mau fenua atoa ei pǐpǐ.” (Mataio 28:19, 20) No te rave i ta tatou tuhaa i roto i te faatupuraa i teie hopoia, e tia ia tatou ia faaohipa ma te maitai roa ˈˈe i te ite o te mau Papai e to tatou atoa mau aravihi. (Timoteo 1, 4:13-16) Maoti i te faaea noa i nia i to tatou manuïa ore, e farii anaˈe i te mau hopoia atoa ta te Atua e tufa maira ia tatou ma te faaroo. E nehenehe o ˈna e faaaravihi e e haapaari ia tatou no te rave i to ˈna hinaaro.—Korinetia 2, 3:5, 6; Philipi 4:13.

I te mea to mua o Mose i te patoiraa no ǒ mai i te mau taata e te mau demoni ra, ua hinaaro mau â o ˈna i te tauturu tei hau aˈe i ta te taata nei. No reira, ua haapapu o Iehova ia ˈna e: “Inaha, ua faariro vau ia oe ei atua ia Pharao ra.” (Exodo 7:1) Oia, ua fanaˈo o Mose i te turu e te mana no ǒ mai i te Atua ra. Tauturuhia e te varua o Iehova, aita e tumu e ia mǎtaˈu o Mose ia Pharao aore ra i ta ˈna mau pǔpǔ faatere teoteo.

E tia atoa ia tatou ia tiaturi i te varua moˈa o Iehova, aore ra puai ohipa, no te faatupu i ta tatou taviniraa. (Ioane 14:26; 15:26, 27) Ma te turu o te Atua e nehenehe tatou e faahiti faahou i te mau parau a Davida, o tei himene e: “E tiaturi au i te Atua, e ore e mǎtaˈu i ta te taata ia rave mai ia ˈu.”—Salamo 56:11.

Na roto i to ˈna aroha aita o Iehova i vaiiho noa ia Mose e o ˈna anaˈe iho i roto i ta ˈna hopoia. Ua parau râ te Atua e: “E to tuaana ra, o Aarona, ei peropheta ïa na oe: oe te parau atu i te mau parau atoa ta ˈu e faaue ia oe na; e na to tuaana na Aarona e parau atu ia Pharao.” (Exodo 7:1, 2) Auê ïa haerea here mau i to Iehova ohiparaa ia au i te mau otia e maraa ia Mose ma te feruriraa tia!

Te faafanaˈo ra te Atua ia tatou i te hoê taatiraa o te mau hoa kerisetiano o te farii nei i te tautooraa e riro ei mau Ite no Iehova, Tei teitei roa ˈˈe. (Petero 1, 5:9) No reira, noa ˈtu eaha te mau haafifiraa o ta tatou e nehenehe e faaruru, e pee anaˈe i te hiˈoraa o Mose raua o Aarona—ei feia poro itoito i te parau a te Atua.

[Nota i raro i te api]

[Hohoˈa i te api 25]

Ua riro o Mose raua o Aarona ei mau tia itoito no Iehova i mua ia Pharao