Mau uiraa a te feia taio

E faatiahia mai anei te taata mai te peu e eita ratou e farii i te kerisetianoraa mau i teie nei e e pohe ratou hou te haamataraa o te ati rahi?

Mea maitai ia patoi tatou paatoa i te hinaaro e tia mai ei feia haava, e e tia ia tatou ia farii e i te pae hopea, o te haavaraa a Iehova na roto i te arai o Iesu Mesia, te mea faufaa. (Ioane 5:22; Ohipa 10:42; Timoteo 2, 4:1) Teie râ, te horoa maira te mau Papai i te tahi mau haamaramaramaraa e tauturu ia tatou ia pahono i te uiraa i nia nei.

Ua riro te pororaa i te parau apî maitai o te Basileia a te Atua na te ao nei, ei tuhaa faufaa roa o te ‘tapao o te vairaa mai o Iesu.’ Ua ite-papu-hia teie tapao i te omuaraa o teie nei senekele. Na roto i te ohipa pororaa, te faataa-ê-hia ra te mau nunaa atoa ia au i te parabole a Iesu no nia i “te mamoe” e “te puaaniho.” Ia hope anaˈe teie ohipa pororaa e te faataa-ê-raa, e haamou te “ati rahi” i teie nei faanahoraa o te mau mea iino.—Mataio 24:3, 21, 22; 25:31-46.

Na Iehova, apitihia e ta ˈna Tamaiti, e haava mai te peu e e tuuhia anei te feia o te patoi i te poroi o te Basileia e o te pohe na mua ˈˈe i te haamataraa o te ati rahi i roto i te pǔpǔ o te mau puaaniho. Ua parau o Iesu e e “haere ê [te puaaniho] e rave i te pohe mure ore.” No reira, e nehenehe tatou e faaoti e eita te feia o tei faataahia e te Atua ei puaaniho e fanaˈo i te tia-faahou-raa. Hoê â to ratou haavaraa e te feia o te “utuahia mai ïa i te pohe mure ore” i te tau o te ati rahi.—Tesalonia 2, 1:9.

Teie râ, eaha ïa no te feia o tei ore i faaitehia i te poroi o te Basileia i roto i te hoê faito navai maitai ia nehenehe ratou e rave i te hoê maitiraa maramarama no te turu aore ra no te patoi i te parau mau hou ratou e pohe ai i roto i teie mau ‘mahana hopea’?—Timoteo 2, 3:1.

E rave rahi o te pohe a rave-noa-hia ˈi te ohipa pororaa na mua ˈˈe i te ati rahi o te faatia-faahou-hia mai. O te mea ïa ta tatou e nehenehe e taio i roto i te Apokalupo 6:7, 8 no nia i te hororaa o te feia taipe na nia i te puaahorofenua. E rave rahi mau taata o tei pohe na roto i te mau tamaˈi, te mau oˈe, e te mau ati pohe. I te mea e na “Hade” e titau ra i teie mau taata i roohia i te “Pohe,” e faatia-faahou-hia mai ratou i roto i te Faatereraa Tausani matahiti a te Mesia, ia horoa faahou mai o Hade i te feia pohe atoa i roto ia ˈna ra. (Apokalupo 20:13) Ua faaroo paha vetahi o te feia e faatiahia mai i te poroi no te Basileia hou ratou a pohe ai.

Auê tatou i te mauruuru e i te mea e aita o Iesu i vaiiho e na te mau taata e faaoti e o vai te feia e au i te mamoe e o vai te au i te puaaniho! Eita e tia i te mau taata tia ore ia faataa ma te tano e eaha te ravea i horoahia i te tahi taata no te faaroo e no te farii i te parau apî maitai. E ite anei tatou e eaha te huru o to ˈna mafatu aore ra ahiri e mea here mau anei na ˈna te parau-tia? E nehenehe anei ta tatou e faito e ua ohipa anei to ˈna mau fetii, ta ˈna haapaoraa, aore ra te tahi atu mau tumu i nia i to ˈna huru? Eita. Teie râ, e nehenehe tatou e tiaturi e e nehenehe te Atua ra o Iehova e o Iesu Mesia e faataa i te reira e e faaoti i te mau haavaraa hapa ore, te tia, e te parau-tia.—Deuteronomi 32:4; Isaia 11:1-5.

Aita ïa e tumu no tatou ia uiui haere e o vai te feia o tei pohe aˈenei o te faatiahia mai aore ra eita. Aita tatou i faatiahia ia na reira. (A faaau e te Luka 12:13, 14.) Mea paari aˈe no tatou ia tiai i te mau faaotiraa o na Haava parau-tia, te Atua ra o Iehova e o Iesu Mesia. E vai hau noa ïa to tatou feruriraa ei mau tavini na Iehova. E tauturu atoa te reira ia tatou ia horoa hau atu â i te ara-maite-raa i nia i te tuhaa i faauehia mai ia tatou ia rave—‘a haere e faariro i te taata o te mau nunaa atoa ei pǐpǐ, a haapii ia ratou ia haapao i te mau mea atoa ta Iesu i faaue mai.’—Mataio 28:19, 20.

[Faaiteraa i te fatu o te hohoˈa i te api 31]

Leicester sheep, Meyers