A haapae i te huru feruriraa faateitei!

Te na ô ra te hoê maseli paari a te Bibilia e: “O tei faateitei i to ˈna uputa, ua imi ïa i te pohe.” (Maseli 17:19) Eaha hoi te ino ia faateitei i te uputa? E eaha te manaˈo faufaa o teie maseli?

I TE mau tau tahito, e ere te mau taata e te mau nǎnǎ eiâ na nia i te puaahorofenua i te mea varavara. E pau ohie te mau fare paruru-ore-hia i te fenua mahora noa i te feia eiâ. No te paruru e ia ore ta ratou mau faufaa ia eiâhia, e faatia na vetahi fatu fare i te hoê patu e te hoê uputa taa ê. Mea teitei te patu, mea haehaa râ te uputa. Inaha, aita te tahi i hau atu i te 1 metera i te teitei—mea haehaa roa ïa ia tomo mai te hoê puaahorofenua e te taata i nia iho. Te feia o tei ore i faahaehaa i te uputa o to ratou aua, e nehenehe ïa te taata na nia i te puaahorofenua e horo mai i roto e e eiâ i ta ratou mau taoˈa.

I roto i te mau oire, mea pinepine e mea haehaa e te faaunauna-ore-hia te mau uputa o te aua, e aita e tapao faaiteraa i te faufaa e vai ra paha i roto mai i te hoê aua haaatihia i te patu. Teie râ, i Peresia, ua riro te hoê uputa teitei ei tapao no te tiaraa arii, ta vetahi mau tavini i tamata i te hamani atoa ma te atâta. Te taata o te hamani i te hoê uputa teitei no to ˈna fare, te titau ra ïa oia i te feia eiâ no te mea te faaite ra te reira i to ˈna ruperupe.

Te faaite ra ïa te Maseli 17:19 e te feia o tei faateitei i to ratou uputa, te tapiri atura ïa ratou i te ati na roto i te faateiteiraa ia ratou hau atu i to tatou iho tiaraa. E nehenehe atoa teie maseli e faahiti i te vaha mai te hoê uputa e faateiteihia na roto i te huru paraparauraa teoteo e te faaahaaha. E faatupu teie huru paraparauraa i te feii e e nehenehe e aratai i te hoê taata faaoru i te ati. No reira, mea paari ia haapae i te feruriraa faateitei!

[Faaiteraa i te fatu o te hohoˈa i te api 30]

Picturesque Palestine, Sinai and Egypt, Buka 1, a te Tapao pae Wilson (1881)