No te aha ‘e haere ai e hiˈo i te ro’?

UA HOROA te Arii paari no Iseraela tahito ra o Solomona i teie aˈoraa: “A haere na a hiˈo i te ro.” No te aha oia i na reira ˈi i te parau? Eaha ta tatou e nehenehe e haapii mai i te mau ro?

Te na ô faahou ra o Solomona e: “A haamanaˈo i [ta te ro] ravea, ia paari oe: aita hoi o ˈna aratai, aita e tavana, aita e faaitoito, te faaitoito ra hoi i ta ˈna maa i te tau mau ra, e ia auhune ra e haaputu ai oia i ta ˈna maa.” (Maseli 6:6-8) Te faataa ra teie mau parau no tahito ra i te mau parau mau i iteahia mai e te feia tuatapapa natura no teie nei tau.

Te faaite ra te taata papai maseli ra o Agura e ‘e paari’ to te ro. (Maseli 30:24, 25) Oia mau, aita to ratou paari i noaa mai na roto i te haaferuriraa maramarama, no roto mai râ i te mau ite faataa-ê-na-hia ta te Poiete i tuu i roto ia ratou. Ei hiˈoraa, maoti teie ite faataa-ê-na-hia, e haaputu te mau ro i ta ratou maa i te taime mau ra.

Mea nahonaho maitai te mau ro. Ma te tahoê maite e te haapao atoa i to ratou mau hoa rave ohipa, te tauturu nei ratou i te mau ro tei pepe aore ra tei rohirohi roa ia hoˈi atu i te ofaaraa. E faaineine ratou no te tau a muri aˈe e e imi ratou i te mau ravea atoa no te faaî i ta ratou mau hopoia.

Te faaite ra te haerea natura o te ro e e tia atoa i te mau taata ia feruri i te tau a muri aˈe e ia riro ei feia rave ohipa itoito. E tano te reira i te fare haapiiraa, i te vahi raveraa ohipa, e i roto i te mau ohipa pae varua. Mai ta te ro e maitaihia i to ˈna itoito, te hinaaro atoa nei te Atua e ia ite te taata “i te maitai no ta ˈna ra ohipa.” (Koheleta 3:13, 22; 5:18) Mai te mau ro rave ohipa, te rave nei te mau kerisetiano mau i te hoê mahana ohipa î maitai. Te rave nei ratou ‘i tei itea i ta ratou rima e rave,’ eiaha no te mea e te hiˈo maira ta ratou paoti ohipa, no to ratou râ haerea parau-tia e ma te hinaaro e riro ei feia rave ohipa itoito, e te hotu.—Koheleta 9:10; a faaau e te Maseli 6:9-11; a hiˈo atoa Tito 2:9, 10.

E oaoa mau â tatou, mai te peu e ‘e haere tatou e hiˈo i te ro’ e ia faaohipa tatou i te mea o ta tatou e haapii mai ia ˈna ra. E e oaoa rahi atu â te noaa mai ia tatou mai te peu e e rave tatou i te hinaaro o te Atua ra o Iehova ma te itoito, ia au i tei faaitehia mai i roto i te Bibilia.