Te auraroraa i te Atua—No te aha e o vai?
“Ua ite hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.”—IEREMIA 10:23.
1. Eaha te mau faatiamâraa o tei haafaufaa-rahi-hia?
I ROTO i te mau papai tuiroo roa ˈˈe a te taata nei, te vai ra te Faˈiraa o te Faatiamâraa, i reira to te mau 13 fenua aihuaraau beretane no Marite Apatoerau faaotiraa i te senekele 18 ra, e faataa ê ia ratou i to ratou hau metua, o Beretane. Ua hinaaro ratou i te tiamâraa, e inaha ua tuatihia te riroraa ei nunaa tiamâ i te faatereraa ěê e te tiamâraa. E nehenehe te tiamâraa mai i te pae politita e te pae faanavairaa faufaa e riro ei ohipa maitai. I te mau tau i mairi aˈenei ua tiamâ mai vetahi mau fenua no Europa Hitia o te râ i te pae politita. Teie râ, e tia ia fariihia e i roto i teie mau fenua, ua faatupu teie huru faatiamâraa e rave rahi mau fifi ino roa.
2, 3. (a) Eaha te huru faatiamâraa o te ore e tano? (b) Mea nafea teie manaˈo i te haapapuraahia i mutaa ihora?
2 Noa ˈtu e e nehenehe te tahi mau huru faatiamâraa e titauhia, te vai ra hoê faatiamâraa o te ore e tano. Eaha ïa te reira? Te faataa-ê-raa mai ia tatou i te Poiete o te taata, i te Atua ra o Iehova. E ere hoi te reira i te hoê haamaitairaa, e ati râ. No te aha? No te mea aita te taata i hamanihia no te ohipa ma te faataa ê mai ia ˈna i to ˈna Poiete, mai ta te mau parau a te peropheta o Ieremia i papaihia i nia nei e faaite papu ra. Oia hoi, ua hamanihia te taata no te auraro i to ˈna Poiete. Te auraroraa i to tatou Poiete, oia hoi te auraa te faarooraa ia ˈna.
3 Ua haapapu-maitai-hia teie manaˈo i te tane e te vahine matamua na roto i to Iehova faaueraa ˈtu ia raua, ia au i tei papaihia i roto i te Genese 2:16, 17, e: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” I to ˈna patoiraa i te auraro i to ˈna Poiete, ua noaa maira ia Adamu e ta ˈna huaai taatoa, i te hara, te mauiui, e te pohe.—Genese 3:19; Roma 5:12.
4, 5. (a) Eaha tei noaa mai na roto i to te taata patoiraa i te auraro i te Atua? (b) Eaha te ture morare o te ore e nehenehe e apehia?
4 E ere to te taata patoiraa i te auraro i te Atua i te haerea paari e mea ino atoa i te pae morare. I roto i teie nei ao, ua faatupu te reira i te parareraa o te ofatiraa i te ture, te taparahiraa taata, te haavîraa uˈana, e te peu taiata e to ˈna mau hotu atoa o te mau maˈi e parare na roto i te mau taatiraa o te tino. Taa ê atu, e ere anei te ati no teie mahana, oia hoi te taparahiraa taata ravehia e te ui apî, no roto mai i te patoiraa te mau taurearea ia auraro ia Iehova, e tae noa ˈtu i to ratou mau metua, e i te mau ture o te fenua? Te itehia ra teie haerea faatiamâ i roto i te mau ahu huru ê e te haapaoraa ore ta te taata e omono nei e ta ratou mau paraparauraa faufau.
5 Teie râ, eita e nehenehe e ape i teie ture aueue ore a te Poiete: “Eiaha e vare, e ore te Atua e noaa i te haavare, o ta te taata e ueue ra, o ta ˈna â ïa e ooti mai. O te ueue i ta to ˈna ihora tino, o te pohe ta ˈna e noaa i te tino ra.”—Galatia 6:7, 8.
6, 7. Eaha te tumu matamua o te patoiraa i te auraro, ia au i teihea mau hiˈoraa?
6 Eaha te tumu matamua o teie patoiraa i te auraro? Faaohie noa, o te miimii e te teoteo. No reira hoi o Eva, te vahine matamua, i hema ˈi i te ophi e i amu ai i te maa opanihia. Ahiri e ua farii oia i to ˈna mau otia e ua faaite oia i te haehaa, eita ïa oia e nounou i te riro mai te Atua ra te huru—ma te faaoti i te maitai e te ino no ˈna iho. Ahiri e aita o ˈna i haapao noa ia ˈna iho, eita ïa o ˈna e faahinaaro i te hoê mea ta to ˈna Poiete, te Atua ra o Iehova, i opani etaeta ia ˈna.—Genese 2:16, 17.
7 Aita i maoro i muri aˈe i to Adamu raua o Eva hararaa, ua turai te teoteo e te miimii ia Kaina ia taparahi i to ˈna taeae o Abela. Oia atoa, ua turai te miimii i te tahi mau melahi ia ohipa ma te auraro ore, e ua faarue ratou i to ratou tiaraa matamua no te rave mai i te tino taata ia nehenehe ratou e ite i te navenave o te mau taatiraa o te tino. Na te teoteo e te miimii i turai ia Nimeroda ia ohipa e ua faaite atoa te rahiraa o te mau faatere o teie nei ao i teie mau huru mai to ˈna ra tau mai â.—Genese 3:6, 7; 4:6-8; Ioane 1, 3:12; Iuda 6.
No te aha tatou e titauhia ˈi ia auraro i te Atua ra o Iehova
8-11. Eaha na tumu puai e maha e tia ˈi ia tatou ia auraro i te Atua?
8 No te aha tatou e titauhia ˈi ia auraro i to tatou Poiete, te Atua ra o Iehova? A tahi, no te mea o ˈna te Arii i nia i te ao atoa nei. Tei roto ia ˈna te mana taatoa. O ˈna to tatou Haava, to tatou Iriti ture, e to tatou Arii. (Isaia 33:22) Ua tano roa hoi teie mau parau i papaihia no ˈna e: “Te vai noa nei râ te mau mea atoa ma te maheu roa i mua i to ˈna mata, to tei haava mai ia tatou nei.”—Hebera 4:13.
9 Hau atu, i te mea e e mana hope to tatou Poiete, eita ta te hoê taata e nehenehe e patoi atu ia ˈna ma te manuïa; eita ta te hoê taata e nehenehe e haapae i ta ˈna hopoia e auraro Ia ˈna. Ia tae iho â i te hoê taime, e haamouhia te feia patoi mai te Pharao o te tau tahito ra, e te Diabolo ra o Satani i te tau i faataahia e te Atua ra.—Salamo 136:1, 11-15; Apokalupo 11:17; 20:10, 14.
10 Ua riro te auraroraa ei hopoia titauhia i te mau mea poietehia maramarama atoa no te mea te ora nei ratou no te tavini i to ratou Poiete. Te na ô ra te Apokalupo 4:11 e: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” O ˈna te Potera Rahi, e te hamani nei oia i te mau farii taata no te tavini i ta ˈna opuaraa.—Isaia 29:16; 64:8.
11 Eiaha e moehia ia tatou i te mea e tei to tatou Poiete ra te paari taatoa, no reira ua ite oia e eaha te mea maitai aˈe no tatou. (Roma 11:33) Ua riro ta ˈna mau ture ei ‘maitai no tatou.’ (Deuteronomi 10:12, 13) Hau atu, ‘E here te Atua,’ no reira te hinaaro noa nei oia i to tatou maitai. E rave rahi mau tumu e faahepo ra ia tatou ia auraro i to tatou Poiete, te Atua ra o Iehova!—Ioane 1, 4:8.
Iesu Mesia, te hiˈoraa tia roa o te auraroraa i te Atua
12, 13. (a) Mea nafea to Iesu Mesia faaiteraa i to ˈna auraroraa i te Atua? (b) Eaha te mau parau a Iesu e faaite ra i to ˈna haerea auraro?
12 Ma te feaa ore, ua horoa mai te Tamaiti fanau tahi a Iehova, o Iesu Mesia, i te hiˈoraa tia roa o te auraroraa i te Atua. Te faahiti ra te aposetolo Paulo i te reira i roto i te Philipi 2:6-8: “O te huru ïa [o Iesu] no te Atua, e aore oia i parau e haru toroa ia faito atoa oia i te Atua, haapae atura râ i to ˈna iho, rave atura i to te tavini ra huru, i te fanauraa mai ma te huru o te taata nei. E no te mea oia i itea mai te taata nei i te huru, ua faahaehaa [â] oia ia ˈna iho, i te haapao-maite-raa e tae noa ˈtura i te pohe [i nia i te pou haamauiuiraa].” I to ˈna oraraa i nia i te fenua nei, ua faaite pinepine o Iesu e eita o ˈna e ohipa na nia i to ˈna iho hinaaro; aita o ˈna i ohipa ma te faataa ê mai ia ˈna i te Atua, teie râ, ua auraro noâ oia i to ˈna Metua i te raˈi ra.
13 Te taio nei tatou i roto i te Ioane 5:19, 30 e: “Ua parau atura Iesu ia ratou, na ô atura, Amene, Amene, e parau atu vau ia outou, Eita e tia ta te Tamaiti ia rave oia anaˈe ihora, maori râ o ta ˈna i ite i te Metua i te raveraa ra; te mau mea atoa ta ˈna e rave ra, oia atoa ta te Tamaiti e rave. Aore e mea e tia ia ˈu iho ia rave; te faaau nei au i ta ˈu e faaroo nei; e parau-tia hoi ta ˈu; aita hoi au i imi i to ˈu iho hinaaro, o te hinaaro râ o te Metua o tei tono mai ia ˈu nei ra.” Oia atoa, ua pure pinepine oia i te po a hoohia ˈi oia e: “Ia tupu râ to oe hinaaro, eiaha to ˈu.”—Mataio 26:39, 42, 44; hiˈo atoa Ioane 7:28; 8:28, 42.
Te mau taata o te tau tahito o tei auraro i te Atua
14. Mea nafea to Noa faaiteraa i to ˈna auraroraa i te Atua?
14 I rotopu i te mau taata o te tau tahito o tei auraro i te Atua, te vai ra o Noa. Ua faaite oia i to ˈna auraro na roto e toru ravea. A tahi, na roto i te riroraa ei taata parau-tia, te piˈo ore i rotopu i te feia o to ˈna ra tau, e ua au to ˈna haerea i te Atua. (Genese 6:9) A piti, na roto i te paturaa i te araka. “Ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite.” (Genese 6:22) A toru, na roto i te faaararaa e te fatata maira te Diluvi, riro atura oia ei “taata i aˈo i te parau-tia ra.”—Petero 2, 2:5.
15, 16. (a) Eaha te hiˈoraa maitai ta Aberahama i vaiiho i te pae no te auraroraa i te Atua? (b) Mea nafea to Sara faaiteraa i to ˈna auraro?
15 O Aberahama te tahi atu hiˈoraa faahiahia no te auraroraa i te Atua. Ua faaite oia i to ˈna auraro na roto i te faarooraa i te faaueraa a te Atua: “E haere ê mai oe i to fenua na.” (Genese 12:1) Te auraa ra e faarue i te hoê vahi nahonaho maitai i Ura (e ere hoi te hoê oire faufaa ore, mai ta te mau ohipa i itehia mai e te ihipǎpǎ e haapapu ra) no te hahaere mai te hoê ratere i roto i te hoê fenua ěê hoê hanere matahiti te maoro. Ua faaite iho â râ o Aberahama i to ˈna auraro i te Atua na roto i te fariiraa i te tamataraa rahi roa ˈˈe o te pûpûraa i ta ˈna tamaiti o Isaaka.—Genese 22:1-12.
16 Ua riro atoa o Sara, te vahine a Aberahama, ei hiˈoraa maitai roa no te auraroraa i te Atua. E ere hoi i te mea ohie ia ratere haere na roto i te hoê fenua ê, teie râ, aita i papaihia e ua amuamu oia. Ua horoa oia i te hiˈoraa maitai o te auraroraa i te Atua i roto e piti huru tupuraa, i to Aberahama faaiteraa ia ˈna ei tuahine no ˈna i mua i te mau arii etene. Tera e piti taime, ua turu oia i teie faaotiraa, noa ˈtu e fatata roa oia i te riro mai ei vahine na teie mau arii. Ei haapapuraa no to ˈna auraroraa i te Atua, o to ˈna ïa piiraa i roto ia ˈna iho i ta ˈna tane, o Aberamaha, e “ta ˈu fatu,” e tapao faaite hoi te reira e ua riro te auraroraa ei huru mau no roto mai i to ˈna mafatu.—Genese 12:11-20; 18:12; 20:2-18; Petero 1, 3:6.
17. No te aha e nehenehe ai e parau e ua faaite o Isaaka i te auraroraa i te Atua?
17 Eiaha ia moehia ia tatou i te hiˈoraa o te auraroraa i te Atua i horoahia mai e te tamaiti a Aberahama, o Isaaka. Te faaite ra te parau tutuu ati Iuda e tei roto o Isaaka i te area e 25 matahiti i to Iehova faaueraa ˈtu i to ˈna metua, o Aberahama, ia pûpû ia ˈna ei tusia. Ahiri e ua hinaaro o Isaaka, mea ohie roa na ˈna ia haapaari atu i nia i to ˈna metua tane, e hanere matahiti paari aˈe hoi oia ia ˈna. Aita râ oia i na reira. Noa ˈtu e ua aniani o Isaaka e no te aha râ e aita ta raua e animala e pûpû ei tusia, ua auraro oia ma te haehaa i to to ˈna metua tane faataravaraa ia ˈna i nia i te fata e to ˈna taamuraa i to ˈna rima e to ˈna avae no te haavî i te mau hautiutiraa hinaaro-ore-hia e nehenehe e tupu ia faaohipahia te tipi no te taparahiraa.—Genese 22:7-9.
18. Mea nafea to Mose faaiteraa i to ˈna auraroraa i te Atua?
18 Tau matahiti i muri iho, ua haamau o Mose i te hoê hiˈoraa maitai no tatou i te pae no te auraroraa i te Atua. Te haapapuhia ra hoi te reira na roto i te parau ra, “e [haehaa] rahi to taua taata ra to Mose, i to te taata atoa o te ao atoa nei.” (Numera 12:3) Te haapapu râ to ˈna faarooraa i te mau faaueraa a Iehova e 40 matahiti i roto i te medebara, noa ˈtu e ua tiai oia i te hoê nunaa orure hau tei naeahia e piti aore ra e toru mirioni, i to ˈna auraroraa i te Atua. Te na ô ra te faatiaraa e “na reira ˈtura hoi Mose; te mau mea atoa ta Iehova i parau mai ia ˈna ra, o ta ˈna ïa i rave.”—Exodo 40:16.
19. Na roto i teihea mau parau to Ioba faaiteraa i to ˈna auraroraa ia Iehova?
19 O Ioba te tahi atu taata faahiahia mau o tei vaiiho mai i te hoê hiˈoraa hau aˈe i te maitai i te pae no te auraroraa i te Atua. I muri aˈe i to Iehova faatiaraa ia Satani ia faaere ia Ioba i ta ˈna mau faufaa atoa, ia haapohe i ta ˈna mau tamarii, e i muri iho ia tairi ia ˈna “i te maˈi mai te tapuaˈe avae e tae noa aˈera i te tupuai upoo,” ua parau maira te vahine a Ioba ia ˈna e: “Te tamau ra oe i ta oe parau-tia? a faaino atu i te Atua, a pohe atu ai.” Noa ˈtu râ, ua faaite o Ioba i to ˈna auraro i te Atua i te na ôraa ˈtu ia ˈna e: “Te faafaito ra oe i ta oe parau i ta te vahine maamaa ra; e farii anei tatou i te maitai i te rima o te Atua, e eiaha tatou e farii atoa i te ino?” (Ioba 2:7-10) Hoê â huru feruriraa e faaitehia ra i roto i ta ˈna mau parau i roto i te Ioba 13:15: “Inaha! e pohe â hoi au ia ˈna, e tiaturi â râ vau ia ˈna.” Noa ˈtu e ua haapeapea rahi o Ioba no nia i te faatitiaifaroraa ia ˈna iho, eiaha ia moehia ia tatou e i te pae hopea, ua parau o Iehova i te hoê o to ˈna mau hoa tamahanahana haavare e: “Ua riri au ia oe, e na hoa atoa no oe ra toopiti; aore hoi ta outou parau i au ia ˈu, mai ta tau tavini mai ta Ioba.” Ma te feaa ore, ua riro o Ioba ei hiˈoraa maitai no tatou i te pae no te auraroraa i te Atua.—Ioba 42:7.
20. Mea nafea to Davida faaiteraa i to ˈna auraroraa i te Atua?
20 No te faahiti faahou i te hoê hiˈoraa no roto mai i te mau Papai Hebera, te vai ra o Davida. I to te Arii ra o Saula aˈuaˈuraa ia Davida mai te hoê animala ra te huru, e piti taime to Davida neheneheraa e taparahi ia Saula no te faahope i ta ˈna mau fifi. Ua tapea râ te auraroraa i te Atua ia Davida ia na reira. Ua papaihia ta ˈna mau parau i roto i te Samuela 1, 24:6: “Ia faaore mai hoi Iehova eiaha vau ia na reira i tau fatu, i ta Iehova ra taata i faatahinuhia ra; eiaha tau rima ia rave noa ˈtu ia ˈna, o tei faatahinuhia hoi oia e Iehova ra.” (Hiˈo atoa Samuela 1, 26:9-11.) Ua faaite atoa oia i to ˈna auraro i te Atua na roto i te fariiraa i te aˈo i to ˈna haperaa aore ra i to ˈna raveraa i te hara.—Samuela 2, 12:13; 24:17; Paraleipomeno 1, 15:13.
Te hiˈoraa o te auraroraa o Paulo
21-23. I roto i teihea mau huru tupuraa to te aposetolo Paulo faaiteraa i to ˈna auraro?
21 I roto i te mau Papai Heleni Kerisetiano, te vai ra te hoê hiˈoraa faahiahia roa o te auraroraa i te Atua maoti te aposetolo Paulo. Ua pee oia i te hiˈoraa o to ˈna Fatu, o Iesu Mesia, i roto i teie tuhaa, e tae noa ˈtu i roto i te mau tuhaa ê atu o ta ˈna taviniraa aposetolo. (Korinetia 1, 11:1) Noa ˈtu e ua faaohipa te Atua ra o Iehova ia ˈna ma te puai aˈe i te tahi atu mau aposetolo, aita o Paulo i ohipa o ˈna anaˈe. Te faaite mai ra o Luka e i te taime a faahitihia ˈi te uiraa e e tia anei i te feia no te mau nunaa o tei riro mai ei kerisetiano ia peritomehia, “ua haapao atura ratou [te mau taeae no Anetiohia] ia Paulo raua o Baranaba, e i e toofanu mau taata no ratou iho, e haere i Ierusalema i te mau aposetolo ra e te mau [matahiapo] ra i taua [mǎrôraa] ra.”—Ohipa 15:2.
22 No nia i te ohipa mitionare a Paulo, te na ôhia ra i roto i te Galatia 2:9 e: “E o Iakobo, o Kepha, e o Ioane, o tei manaˈohia e pou no te ekalesia, ite aˈera i te maitai i horoahia mai ia ˈu nei, ua horoa maira ratou i te rima atau au ia mâua o Baranaba, e ei ia mâua te etene, e ei ia ratou te peritome.” Maoti i te ohipa na nia i to ˈna iho manaˈo, ua imi o Paulo i te aratairaa.
23 Oia atoa, i te taime hopea a vai ai o Paulo i Ierusalema, ua farii oia i te aˈoraa a te mau matahiapo i reira no nia i te haereraa i te hiero e te raveraa i te faaueraa a te Ture ia ite te mau taata atoa e e ere oia i te apotata no nia i te parau o te Ture a Mose. I to ˈna na reiraraa, ua tupu ihora te hoê faahuehueraa rahi e ua uˈana roa te nahoa i te patoiraa ia ˈna, no reira, ua hape anei oia i to ˈna auraroraa i teie mau matahiapo? Aita roa, mai tei haapapuhia i roto i te Ohipa 23:11 o te na ô ra e: “E rui ihora, ua tia maira te Fatu i pihai iho ia Paulo, ua parau maira, E faaitoito, e Paulo, mai ta oe i faaite i te parau no ˈu i Ierusalema nei, e faaite atoa hoi oe i Roma.”
24. Eaha te mau tuhaa ê atu i te pae no te auraroraa o te tuatapapahia i roto i te tumu parau i muri nei?
24 Oia mau, te horoa maira te mau Papai i te mau tumu puai mau ia auraro tatou e te mau hiˈoraa putapû mau o te feia o tei faaite i teie auraroraa. I roto i te tumu parau i muri nei, e hiˈopoa tatou i te tahi mau tuhaa i reira tatou e nehenehe ai e auraro i te Atua ra ia Iehova, te mau tauturu no te na reira, e te mau haamaitairaa e noaa mai.
Nafea outou ia pahono mai?
◻ Eaha te huru tiamâraa o te ore e tano?
◻ Eaha te tumu matamua o te patoiraa i te auraro?
◻ Eaha te mau tumu tatou e titauhia ˈi ia auraro ia Iehova?
◻ Eaha te mau hiˈoraa maitatai ta te mau Papai e horoa ra no nia i te auraroraa i te Atua?
[Hohoˈa i te api 10]
Nimeroda, te arii matamua i muri aˈe i te diluvi o tei patoi i te auraro i te Atua
[Hohoˈa i te api 13]
Noa, hiˈoraa piˈo ore no te auraroraa i te Atua.—Genese 6:14, 22