Ua turu te Tiribuna Teitei roa ˈˈe no Nigeria i te tiamâraa i te pae faaroo
UA EIÂ te feia o te hoê oire iti i te maa i ootihia e te hoê taata faaapu. Ua tomo vetahi i roto i te fare o te hoê taata patu fare piriti e ua haru ratou i ta ˈna mau tauihaa. Ua tapea vetahi i te hoê vahine ia hoo i te taoˈa. No te aha teie mau ohipa iino atoa i ravehia ˈi? No te mea aita te feia o tei hamani-ino-hia, e Ite no Iehova anaˈe hoi, e amui atu i roto i te mau taatiraa faito matahiti. ‘Te mau aha?’ o ta outou paha e aniani ra.
Te hoê taatiraa faito matahiti, o te hoê ïa pǔpǔ taata, mea pinepine e mau tane, o tei fanauhia i roto i te hoê â area taime e i roto i te hoê â oire iti. Mea rahi roa te mau pǔpǔ faito matahiti i Nigeria hitia o te râ. E nehenehe ratou e turu i te hoê opuaraa na te huiraatira, te faaô atoa nei râ ratou i roto i te haamoriraa idolo e te rave nei ratou i te mau peu hiˈohiˈo no te faaite e ua tiahia te matahiti o te mau melo. No te mea e te opani ra te Bibilia i te mau kerisetiano mau ia rave i teie mau peu, eita te mau Ite no Iehova e apiti i roto i teie mau pǔpǔ.—Korinetia 1, 10:20, 21; Ioane 1, 5:21.
E toroa nira ahu ta Samuel Okogbue i Aba, i Nigeria. I te omuaraa o te matahiti 1978, ua ani maira te mau melo o te Taatiraa Faito Matahiti Umunkalu no Alayi e ia aufau oia i te hoê “tute” no te turu i te paturaa o te hoê fare rapaauraa. Ei kerisetiano mau, te tutava ra o Samuel i te tauturu i te taata, teie râ, ia au i to ˈna haava manaˈo, ua patoi oia i te faaô atu i roto i te pǔpǔ faito matahiti. I te 22 no eperera o taua matahiti ra, e ono melo o te pǔpǔ o tei tomo i roto i ta ˈna fare toa e o tei haru i ta ˈna matini nira ahu, ma te parau e e tapea noa ratou i teie taoˈa e tae roa ˈtu i te taime e aufau ai oia i te moni. Ua patoi atu o Samuel e eita o ˈna e nehenehe e faahepohia ia aufau i te moni no te mea e ere oia i te melo no ta ratou taatiraa. I te mea e aita ta ˈna matini nira ahu i faahoˈihia mai, ua afai atura o Samuel i teie ohipa i mua i te tiribuna.
Mai tera tiribuna i te tahi tiribuna
I te Tiribuna a te Haava Rahi, ua faaite aˈera te pǔpǔ faito matahiti e no to ˈna matahiti, ua taiohia o Samuel ei melo no ta ratou pǔpǔ, ma te titauhia ia aufau i te tute o ta ratou iho e aufau ra. Hau atu, te titau ra te peu tumu e mai te peu noa ˈtu e eita te hoê melo e aufau i te tute, e haruhia to ˈna fenua e tae roa ˈtu i te taime e aufau ai oia.
Aita râ te tiribuna i farii i te reira. I te 28 no febuare 1980, ua faaoti aˈera oia e eita o Samuel e nehenehe e faahepohia ia riro ei melo no te hoê pǔpǔ faito matahiti. Ua faaite atura te Haava Rahi e: “Te ofati ra te hoê peu o te faaere i te hoê melo huiraatira i te tiamâraa ia maiti i te amuimuiraa, i te T[uhaa] 37 o te Pǎpǎ ture a te Hau Repubilita no Nigeria e eita ïa oia e fanaˈo i te mana o te Ture.”
Ua horo atura te pǔpǔ faito matahiti i teie faaotiraa i mua i te Tiribuna Teitei e ua upootia ˈtura ratou. I reira, ua faaue atura te haava ia Samuel ia aufau i te tute, ma te faaite e ua riro noa te reira ei ravea no te turu i te maitairaa o te huiraatira o to ˈna oire.
Ua horo atura o Samuel i teie faaotiraa o ta ˈna i manaˈo e aita i tano. Ua faaore atura te Tiribuna Hororaa i te haavaraa a te Tiribuna Teitei, ma te turu i te pae o Samuel. I te mea e aita ratou i hinaaro e farii e ua pau ratou, ua afai atura te pǔpǔ faito matahiti i teie ohipa i mua i te Tiribuna teitei roa ˈˈe no Nigeria.
I roto i taua area taime ra, ua rohi te mau melo o te pǔpǔ i te oire o Samuel. Ma te haapapu e te patoi ra te mau Ite i te mau opuaraa atoa a te huiraatira, ua turai atura ratou i te raatira o te oire ia opani i te mau ohipa a te mau Ite no Iehova i taua vahi ra. Ua faaite aˈera te auvaha a te oire e e titauhia te feia atoa e paraparau noa ˈtu i te mau Ite no Iehova ia aufau i te hoê utua. Ua haere maira te mau Ite no te mau oire tapiri no te haamaramarama i teie ohipa i mua i te feia paari o te oire. Ua faataa ˈtu ratou e aita roa ˈtu te nunaa o te Atua e patoi ra i te maitairaa o te nunaa. Inaha, ua faaite atu o Samuel i te mau parau i mua i te tiribuna no te haapapu e ua turu oia i te mau opuaraa a te huiraatira o tei ore i faanahohia e te mau pǔpǔ faito matahiti. Ua faaore ihora te mau matahiapo o te oire iti i ta ratou faaotiraa e faataa ê i te mau Ite.
Ua upootia te tiamâraa i te pae faaroo
I te 21 no atopa 1991, ua rave e pae haava no te Tiribuna Teitei roa ˈˈe no Nigeria ma te manaˈo hoê i te hoê faaotiraa no te turu ia Samuel. Ia au i te haavaraa matamua a te Haava Paul Nwokedi, ua faataa aˈera te Haava Abubakar Wali e: “E ere te [tute faahepohia] ta te taata e faahapahia ra [o Samuel] e patoi ra i te aufau, o te riroraa râ ei melo no te tahi totaiete, te tahi taatiraa aore ra te tahi pǔpǔ faito matahiti, o te ofati ra i ta ˈna tiaturiraa faaroo, inaha, e melo oia no te mau Ite no Iehova.”
Te na ô râ te haava e: “Te paruru ra te Pǎpǎ ture o te matahiti 1963, tuhaa 24(1) i te tiamâraa o te haava manaˈo, o te manaˈo, e o te haapaoraa na te taatoaraa o te mau melo huiraatira no Nigeria. E tiaraa to te taata faahapahia ia tapea maite i te tiaturiraa o ta ˈna haapaoraa, to ˈna manaˈo e to ˈna haava manaˈo e opani ra ia ˈna ia amui atu i roto i te Pǔpǔ faito matahiti. Te ofati nei te peu o te faahepo i te reira, i te Pǎpǎ ture e aita ïa to ˈna e mana e e faufaa.”
Ei haapotoraa, ua faaoti te tiribuna e aita te hoê taata e nehenehe e faahepohia i mua i te ture ia apiti atu i roto i te hoê pǔpǔ faito matahiti noa ˈtu e ua riro te tiaraa melo ei peu tumu na te huiraatira. Ua faaoti atoa oia e aita hoê taata e nehenehe e faahepohia i mua i te ture ia aufau i te mau tute na roto i te hoê taatiraa e ere o ˈna i te melo, noa ˈtu e e turu teie tute i te maitairaa o te huiraatira. No reira, i roto i teie fifi e au ra e mea nainai roa, ua turuhia te tiamâraa i te pae faaroo no te feia atoa no Nigeria.