E te mau matahiapo—A faatitiaifaro ia vetahi ê ma te aau mǎrû

E NEHENEHE te mafatu o te hoê kerisetiano mau e faaauhia i te hoê ô i te pae varua e faahotu ra i te mau maa maitatai. E tia hoi i te here, te oaoa, te hau, te faaoromai, te hamani maitai, te maitai, te faaroo, te mǎrû, e te hitahita ore ia tupu i te rahi i reira. E ere anei? Inaha hoi, o te mau hotu hoi teie o te varua moˈa no ǒ mai i te Atua ra o Iehova na ta ˈna mau tavini pûpûhia. (Galatia 5:22, 23) Teie râ, e tia i te mau kerisetiano atoa o te hinaaro ra e atuatu i te ô o to ˈna mafatu ei vahi e faaoaoa i to ˈna Metua i te raˈi ia haa no te aro ma te puai e te tamau i te mau hotu iino o te hara.—Roma 5:5, 12.

I te tahi mau taime, e haamata te hoê mea au ore i te tupu i roto i te mafatu tia ore o te hoê taata paieti. Peneiaˈe, e haerea maitai roa to ˈna i te pae varua. Teie râ, e tupu mai te hoê fifi, peneiaˈe na roto i te mau amuimuiraa iino aore ra te hoê faaotiraa tano ore. Nafea ïa te mau matahiapo o te amuiraa ia tauturu i teie taata i te pae varua?

Te aˈoraa a te mau aposetolo

No te tauturu i te hoê kerisetiano o tei hape, e tia i te mau matahiapo ia pee i te aˈoraa a te aposetolo Paulo: “Te mau taeae, noa ˈtu e e hape te hoê taata hou oia a ite ai, o outou tei ia outou ra te mau huru maitatai e titauhia i te pae varua, a tamata i te faatitiaifaro i teie taata na roto i te aau mǎrû, ma te ara atoa ia outou iho, ia ore outou ia hema atoa.” (Galatia 6:1, T.a.a.) Ia “hape” te hoê kerisetiano “hou oia a ite ai,” e hopoia na te mau matahiapo ia horoa ˈtu i te tauturu ma te ore e haamaoro.

Te faahiti ra o Paulo i “te hoê taata” o te hapa ra. Teie râ, e tano te parau Heleni (anʹthro·pos) e faaohipahia ra i ǒ nei no te hoê tane aore ra no te hoê vahine. E eaha te auraa ia “faatitiaifaro” i te hoê taata? Te auraa o teie parau Heleni (ka·tar·tiʹzo) oia hoi e “aratai i nia i te reni afaro.” Te faaohipahia ra teie parau no te tataˈiraa i te mau upeˈa. (Mataio 4:21) E tano atoa no te faaafaroraa i te hoê melo fati o te hoê taata. E faaafaro te taote i teie melo ma te haere mǎrû ia ore te taata pepe ia mauiui faufaa ore noa. Oia atoa, no te tauturu i te hoê taeae aore ra te hoê tuahine ia hoˈi mai i nia i te hoê reni afaro i te pae varua, e titauhia te haere mǎrû, te faatanoraa i te parau, e te aroha.

E horoa te mau matahiapo i te tapao no to ratou iho huru i te pae varua na roto i te faaiteraa i te mǎrû ia tamata anaˈe ratou i te faatitiaifaro i te hoê taata. Papu maitai, e arai te taata aau mǎrû ra o Iesu i te mau ohipa ma te mǎrû. (Mataio 11:29) E tia i te mau matahiapo ia faaite i teie huru i nia i te hoê tavini a Iehova o tei hape to ˈna taahiraa no te mea aita ratou iho i paruruhia i mua i te hara, taa ê atu i te mau hinaaro o to ratou mafatu. E nehenehe te reira e tupu a muri aˈe ahiri e aita te reira i tupu aˈena na mua ˈtu.

E tia i teie mau taata tei noaa i te tiaraa i te pae varua ia ‘amo ma te here i te mau hopoia teimaha’ a to ratou mau hoa haamori. Oia mau, te vai ra i roto i te mafatu o te mau matahiapo i te hinaaro e tauturu i te hoê taeae aore ra te hoê tuahine ia aro atu ia Satani, i te mau faahemaraa, te mau paruparu o te tino, e te mau haafifiraa o te hara. O te hoê ïa ravea no te mau tiaau kerisetiano no te “faatia i te ture a te Mesia ra.”—Galatia 6:2.

Te feia tei ia ratou te aravihi mau i te pae varua, e mea haehaa ïa ratou, e te taa ra ia ratou e “te manaˈo ra hoi te hoê taata ia ˈna iho, e, e faufaa ta ˈna, e aita roa a ˈna, ua vare oia ia ˈna iho.” (Galatia 6:3) Noa ˈtu te mau tutavaraa a te mau matahiapo no te rave i te parau-tia e no te tauturu ia vetahi ê, eita iho â e naeahia ia ratou te faito o te Tamaiti tia roa e te aroha hamani maitai a te Atua, o Iesu Mesia. Teie râ, aita e tumu ia ore ratou e rave i ta ratou tutavaraa maitai roa ˈˈe.

Ua ite te mau matahiapo e eita e tano ia faahapa ˈtu i te hoê hoa kerisetiano ma te haerea teoteo aore ra faatiatia! Eita roa o Iesu e na reira. Inaha, ua pûpû oia i to ˈna ora eiaha noa no to ˈna mau hoa, no to ˈna atoa râ mau enemi! Te tutava nei te mau matahiapo i te faaite i teie atoa here ia tamata ratou i te tauturu i te mau taeae e te mau tuahine e fifihia ra e no te haafatata ˈtu ia ratou i to ratou Metua i te raˈi e ta ˈna mau ture tia. Eaha vetahi mau taahiraa avae o te tauturu i te mau matahiapo ia faatitiaifaro i te feia haamori?

Vetahi mau taahiraa avae faufaa

A turui atu i nia ia Iehova na roto i te pure e a paraparau e a ohipa na roto i te mǎrû. Ua riro o Iesu ei taata aau mǎrû, ua pure oia ma te hohonu i to ˈna Metua i te raˈi ia horoa mai i ta ˈna aratairaa, e ua rave noa oia i te mau mea e oaoa ˈi Oia ra. (Mataio 21:5; Ioane 8:29) E tia i te mau matahiapo ia na reira atoa ia tamata anaˈe ratou i te faatitiaifaro i te hoê taata o tei hape. Ei tiai mamoe auraro e te aau mǎrû, e faaitoito te hoê matahiapo e e turu atu oia na roto i ta ˈna mau parau, eita râ oia e faariaria. I roto i te tauaparauraa, e tamata oia i te faatupu i te hoê huru o te tamǎrû i te kerisetiano e hinaaro ra i te tauturu ia nehenehe oia e faaite ohie noa i to ˈna mau manaˈo. Ia naeahia te reira, e riro te hoê pure omuaraa putapû ei tauturu rahi. E nehenehe ïa te taata e aˈohia ra na roto i te mǎrû e hohora ohie aˈe i to ˈna mafatu ahiri e ua ite oia e, mai ia Iesu, te hinaaro ra te taata aˈo e rave i te mau mea e au i te Atua ra. E riro te pure faaotiraa i te haaputapû i te taata ia ite i te faufaaraa ia faaohipa i te aˈo i horoahia mai ma te here e te aau mǎrû.

I muri aˈe i te pure, a pûpû atu i te mau haapopouraa haavare ore. E nehenehe e faahitihia te mau huru maitatai o teie taata, mai te maitai, te tiaturi aore ra te itoito. E nehenehe e haapopou i ta ˈna taviniraa haapao maitai ia Iehova, peneiaˈe i roto e rave rahi mau matahiti. Ia na reira tatou, te faaite ra ïa tatou e te haapao mau ra tatou e te faatupu ra tatou i te hoê manaˈo e au i to te Mesia i nia i teie taata. Ua haamata o Iesu i ta ˈna poroi i te amuiraa no Tuatira ma te haapopou atu, i te na ôraa e: “Ua ite au i ta oe ohipa, e to oe hinaaro, e to oe hamani maitai, e te faaroo, e te faaoromai, e ta oe na mau ohipa hopea o tei hau ïa i tei mutaa ihora.” (Apokalupo 2:19) Ua haapapu atu teie mau parau i te mau melo o te amuiraa e ua ite o Iesu i te ohipa maitai o ta ratou e rave ra. Noa ˈtu e e hapa iho â ta te amuiraa—te mana o “Iezebela” o tei farii-noa-hia—e ohipa maitai ta ˈna i roto i te tahi atu mau tuhaa, e ua hinaaro o Iesu e ia ite taua mau taeae e mau tuahine ra e aita ta ratou ohipa itoito i moehia. (Apokalupo 2:20) Hoê â huru, e tia i te mau matahiapo ia horoa i te mau haapopouraa i te vahi e tano.

Eiaha e faarahi roa i te hoê hapa hau atu i tei titauhia. E tia i te mau matahiapo ia paruru i te nǎnǎ a te Atua e ia tapea i te viivii ore o ta ˈna faanahonahoraa. Teie râ, e nehenehe te mau hapa i te pae varua o te titau i te aˈo puai e araihia e te hoê matahiapo aore ra e piti ma te ore e faatupu i te hoê aparauraa haavaraa. E rave rahi mau tupuraa, o te paruparu taata nei eiaha râ te ino opuahia tei riro ei tumu i hapa ˈi te hoê kerisetiano. E tia i te mau matahiapo ia aupuru i te nǎnǎ e ia haamanaˈo i teie parau: “O te faahapa anaˈe ra ta ˈna e noaa, e ore te aroha, ta tei ore roa i aroha ra; e haavi ra te aroha i te faahapa i te taata e aroha ra.” (Iakobo 2:13; Ohipa 20:28-30) Maoti i te faarahi roa i te mau ohipa, e tia i te mau matahiapo ia tauaparau atu e te mau kerisetiano tatarahapa ma te mǎrû, mai to tatou Atua aroha e te hamani maitai, o Iehova.—Ephesia 4:32.

A faaite e te taa ra ia outou te mau tumu o tei aratai ia rave i te hapa. E tia i te mau matahiapo ia faaroo maitai i te parau ta te kerisetiano e faaite tahaa ra mai roto mai i to ˈna mafatu. I te mea e ‘o te aau paruparu ra e te oto ra, e ore roa te Atua e vahavaha i te reira,’ eiaha ïa ratou e na reira. (Salamo 51:17) Peneiaˈe, o te ereraa i te turu here o te hoa faaipoipo te tumu o te fifi. Peneiaˈe ua haaparuparu te hepohepo rahi e te maoro o te feruriraa i te puai o te hoê taata aore ra ua haafifi rahi te reira ia ˈna no te rave i te mau faaotiraa paari. E tia i te mau matahiapo here ia haapao i teie mau tumu, inaha noa ˈtu e ua parau atu o Paulo i to ˈna mau taeae ia “aˈo atu outou i te haapao ore,” ua faaue atoa ˈtu oia e: “E haamahanahana ˈtu i te aau taiâ, e tauturu atu i tei paruparu, ia maoro te faaoromai i te taata atoa ra.” (Tesalonia 1, 5:14) Noa ˈtu e eita e tia i te mau matahiapo ia haaparuparu i te puai o te mau ture tia a te Atua, e tia ia ratou ia haapao i te mau tupuraa taa ê, mai ta te Atua e rave ra.—Salamo 103:10-14; 130:3.

A ape i te vavahi i te manaˈo faatura ia ˈna iho o te hoa kerisetiano. Eita tatou e hinaaro e faaere i to tatou taeae aore ra to tatou tuahine i to ˈna tiaraa tura aore ra e horoa ˈtu i te manaˈo e aita to ˈna e faufaa. Maoti râ, e riro te haapapuraa ˈtu e te tiaturi nei tatou i te mau huru maitatai kerisetiano o teie taata e to ˈna here i te Atua, i te faaitoito ia ˈna ia faaafaro i ta ˈna hape. Oia atoa, ua faaitoitohia te mau Korinetia ia faaite i te horoa maitai i to Paulo parauraa ˈtu ia ratou e ua haapopou oia i mua ia vetahi ê i “te tia o to [ra]tou aau” e to ratou “itoito” i roto i teie tuhaa.—Korinetia 2, 9:1-3.

A faaite e e nehenehe te fifi e titiaifaro na roto i te tiaturiraa ia Iehova. Oia, a tutava maite i te tauturu i te taata ia ite e ia tiaturi oia i te Atua e ia faaohipa oia i te aˈo a Ta ˈna Parau, e tauturu te reira ia faatitiaifaro i te mau ohipa. No reira, e tia ia niuhia ta tatou mau parau i nia i te mau Papai e te mau buka bibilia. E piti tapao ta tatou e titau ra: (1) e tauturu i te taata e hinaaro ra i te turu ia ite e ia taa i te huru manaˈo o Iehova e (2) e faaite i te taata e mea nafea te moeraahia ia ˈna aore ra to ˈna ereraa i te pee i teie mau aratairaa a te Atua.

A faaau te aˈo a te mau Papai e te mau uiraa mǎrû e te tano maitai. E nehenehe te reira e manuïa no te haaputapû i te mafatu. Na roto i te peropheta ra o Malaki, ua faaohipa Iehova i te hoê uiraa ia taa i To ˈna nunaa e mea nafea to ratou atea-ê-raa. “E [eiâ] anei te taata nei i ta te Atua?” o ta ˈna ïa i ani atu, ma te parau atoa ˈtu e: “Ua [eiâ] maira outou ia ˈu ra.” (Malaki 3:8) I te mea e aita o Iseraela i horoa ˈtu i te tuhaa ahuru o ta ratou mau hotu mai tei titauhia i roto i te Ture a Mose, mai te mea ra ïa e te eiâ ra ratou ia Iehova. No te faatitiaifaro i teie huru tupuraa, ua titauhia te mau ati Iseraela ia faaî i ta ratou mau hopoia i roto i te haamoriraa viivii ore ma te tiaturi e e haamaitai hua mai te Atua ia ratou. Na roto i te mau uiraa haaputapû manaˈo e te papu, e nehenehe atoa te mau matahiapo e haamatara e e titau te raveraa i te mea tia i teie mahana ia tiaturi tatou i to tatou Metua i te raˈi e ia auraro tatou ia ˈna. (Malaki 3:10) E tauturu rahi mai te faataeraa ˈtu i teie manaˈo i te mafatu i to tatou taeae ia ‘hamanina i te eˈa o to ˈna avae.’—Hebera 12:13.

A tuu i te tapao i nia i te mau haamaitairaa o te fariiraa i te aˈo. Ia manuïa te aˈo, e tia ia faaara no nia i te mau faahopearaa o te hoê haerea ino e oia atoa ia haamanaˈo no nia i te mau haamaitairaa e noaa mai na roto i te faaafaroraa i te mau ohipa. I muri aˈe i te hoê faaararaa tano roa, ua haapapu atu o Iesu i te feia paruparu i te pae varua o te amuiraa no Laodikea e mai te peu e e tatarahapa ratou i to ratou haerea tahito e ia riro faahou mai ratou ei mau pǐpǐ itoito, e fanaˈo ïa ratou i te mau haamaitairaa hau aˈe i te faahiahia, mai te tiaturiraa e faatere i pihai iho ia ˈna i nia i te raˈi.—Apokalupo 3:14-21.

A faaite i te anaanatae no te ite ahiri e te peehia ra te aˈoraa. Mai ta te hoê taote haapao maitai e hiˈopoa i te tahi taime no te ite ahiri e te afaro noa râ anei te hoê ivi o ta ˈna i faahoˈi, e tia atoa i te mau matahiapo ia faataa ahiri e te faaohipahia ra te aˈo a te mau Papai. E tia ia ratou ia aniani ia ratou iho e: E tia anei ia horoa faahou i te tauturu? E tia anei ia faahiti faahou i te aˈoraa, peneiaˈe na roto i te tahi atu ravea? Ua aˈo pinepine atu o Iesu i ta ˈna mau pǐpǐ no nia i te faufaaraa o te haehaa. I muri aˈe i te tahi taime, ua imi aˈera oia ma te faaoromai i te faatitiaifaro i to ratou manaˈo na roto i te arai o te mau aˈo, te mau parabole, e te mau haapiiraa maoti te faahohoˈaraa. (Mataio 20:20-28; Mareko 9:33-37; Luka 22:24-27; Ioane 13:5-17) Mai te reira atoa, e nehenehe te mau matahiapo e tauturu ia hope roa te faatitiaifaroraa o te hoê taeae aore ra te hoê tuahine na roto i te faanahoraa i te tahi mau aparauraa no nia i te mau Papai i muri iho mai no te faaitoito i te haereraa i mua o te hoê taata ia naea-roa-hia te maitairaa i te pae varua.

A haapopou atu no te mau haamaitairaa atoa i ravehia. Mai te peu e te tutava mau ra te taata o tei hape i te faaohipa i te aˈo a te mau Papai, a haapopou atu ia ˈna ma te mahanahana. E haapuai te reira i te aˈo matamua e e faaitoito atu ia ˈna ia haere faahou i mua. I roto i te rata matamua a Paulo i to Korinetia, ua titauhia oia ia horoa na mua i te aˈo papu i nia e rave rahi mau tumu parau. I muri aˈe i to Tito faaararaa i te aposetolo no nia i to ratou farii maitai i ta ˈna rata, ua papai atura o Paulo no te haapopou ia ratou. “Te oaoa nei au,” o ta ˈna ïa i parau, “e ere râ no te mea i faaotohia outou, no te mea râ i oto outou ma te tatarahapa: i au hoi to outou oto i te Atua ia ore roa outou ia ino ia matou.”—Korinetia 2, 7:9.

Te hoê tumu no te oaoa

Oia mau, ua oaoa roa o Paulo i to ˈna faarooraa e ua tauturu ta ˈna aˈo i te mau Korinetia. Oia atoa, e oaoa rahi to te mau matahiapo no teie nei tau ia ora mai te hoê hoa haamori i te hoê hape na roto i to ˈna farii-maitai-raa i ta ratou turu here. E nehenehe ratou e oaoa i te tautururaa i te hoê kerisetiano tatarahapa ia iriti i te mau aihere taratara o te hara mai roto mai i to ˈna mafatu ia nehenehe te mau hotu paieti e tupu maitai.

Mai te peu e e manuïa te mau matahiapo i te faatitiaifaro i te hoê taata o tei hape te taahiraa, e faarue ïa oia i te hoê haerea o te faaino roa ia ˈna i te pae varua. (A faaau e te Iakobo 5:19, 20.) No teie turu, e tia i te taata i fanaˈo i te tauturu ia faaite i to ˈna mauruuru i te Atua ra o Iehova. E tano atoa ia faatae i te mau parau haamauruuru mau no te tauturu tei î i te here, te hamani maitai, e te taa-maitai-raa o te mau matahiapo. E ia ora roa anaˈe te feia i hape i te pae varua, e oaoa te taatoaraa i te mea e ua ravehia teie faatitiaifaroraa ma te aau mǎrû.