“O vai tei au i to tatou Atua ia Iehova?”
“O vai tei au i to tatou Atua ia Iehova? o tei teitei e ua parahi i te raˈi teitei?—SALAMO 113:5.
1, 2. (a) Mea nafea te mau Ite no Iehova ia hiˈo i to ratou Atua e te Bibilia? (b) Eaha te mau uiraa te tia ia tuatapapahia?
UA HAAMAITAI-MAU-HIA te feia e arue nei ia Iehova. Auê ïa haamaitairaa i te riroraa ei melo no teie nunaa oaoa! Ei mau Ite no ˈna, te farii nei tatou i te aˈoraa, te mau ture, te mau haapiiraa, te mau parau tǎpǔ, e te mau parau tohu a te Parau a te Atua, te Bibilia. Te oaoa nei tatou i te tuatapapa i te mau Papai e ia “haapiihia [tatou] e [Iehova].”—Ioane 6:45.
2 No to ratou faatura hohonu i te Atua, e nehenehe te mau Ite no Iehova e ani e: “O vai tei au i to tatou Atua ia Iehova?” (Salamo 113:5) Te faaite ra teie mau parau a te papai salamo i te faaroo. Teie râ, no te aha te mau Ite no Iehova e faatupu ai i teie huru faaroo i roto i te Atua? E eaha te mau tumu e vai ra ia ratou no te arue ia Iehova?
Te faaroo e te arueraa e tano
3. Eaha te mau Salamo Arueraa, e no te aha ratou e mairihia ˈi i teie iˈoa?
3 E mea papu te faaroo i roto ia Iehova no te mea o ˈna te Atua otahi roa. Te haapapuhia ra te reira i roto i te Salamo 113, 114, e 115, e mau tuhaa no na Salamo Arueraa e ono. Ia au i te Fare haapiiraa rabi no Hillel, e himenehia na te mau Salamo 113 e 114 i te oroa Pasa ati Iuda i muri aˈe i te niniiraahia o te piti o te aˈua uaina e e tatarahia ˈi te auraa o teie oroa. E himenehia te mau Salamo 115 e tae atu i te Sal 118 i muri aˈe i te maharaa o te aˈua uaina. (A faaau e te Mataio 26:30.) E piihia ratou te mau “Salamo Arueraa” no te mea mea pinepine e faahitihia te parau ra Halelu Ia!—oia hoi “Arue ia Ia!”
4. Eaha te auraa o te parau “Halelu Ia,” e ehia taime oia e itehia ˈi i roto i te Bibilia?
4 “Halelu Ia!” o te papairaa ïa o te hoê parau hebera e itehia e 24 taime i roto i te mau Salamo. I te tahi atu vahi o te Bibilia, e itehia te hoê parau heleni e maha taime no nia i te oaoa e farereihia i te haamouraahia o Babulonia Rahi, te hau emepera o te mau haapaoraa hape, e te umereraa i taaihia e te haamataraa o te faatereraa a Iehova ei arii. (Apokalupo 19:1-6) I te mea e e tuatapapa tatou i teie nei e toru o te mau Salamo Arueraa, e tia ia tatou ia rave mai te mea ra e te himene ra tatou i teie mau himene ei arueraa ia Iehova.
Arue ia Ia!
5. Te pahono ra te Salamo 113 i teihea uiraa, e e tano taa ê te faaueraa i roto i te Salamo 113:1, 2 ia vai?
5 Te pahono ra te Salamo 113 i te uiraa, No te aha e arue ai ia Iehova? Te haamata ra oia e teie faaueraa: “E haamaitai ia Iehova. E haamaitai, e te mau tavini o Iehova, e haamaitai i te iˈoa o Iehova. Ia haamaitaihia te iˈoa o Iehova, i teie nei e a muri noa ˈtu.” (Salamo 113:1, 2) “Halelu Ia!” Oia mau, “Arue ia Ia!” E tano taa ê teie faaueraa i nia i te nunaa o te Atua i teie “tau hopea.” (Daniela 12:4) Mai teie atu nei e a muri noa ˈtu, e tia ia faateiteihia te iˈoa o Iehova na te fenua nei. Te faaite nei to ˈna mau Ite e o Iehova te Atua, o te Mesia te Arii, e ua haamauhia te Basileia i nia i te raˈi. Eita ta te Diabolo ra o Satani e ta ˈna faanahonahoraa e nehenehe e tapea i teie arueraa ia Iehova.
6. Nafea Iehova ia aruehia “mai te hitiraa mai o te mahana e tae noa ˈtu i to ˈna mairiraa”?
6 E haere noa te himene arueraa i mua e tae roa ˈtu i te taime e rave ai Iehova e ia î roa te fenua nei i teie himene. “Mai te hitiraa mai o te mahana e tae noa ˈtu i to ˈna mairiraa, ia haamaitaihia te iˈoa o Iehova!” (Salamo 113:3) Ua hau atu te auraa o te reira e te haamoriraa ta vetahi mau taata e rave i te mau mahana atoa. E hiti mai te mahana i te pae hitia o te râ e e topa oia i te pae tooa o te râ, ma te tapoˈi i te fenua atoa nei. Na te mau vahi atoa e anaana ˈi te mahana, fatata roa te iˈoa o Iehova i te aruehia e te mau taata atoa o tei tiamâ mai i te faatîtîraa a te haapaoraa hape e te faanahonahoraa a Satani. Inaha, te himenehia nei teie himene o te ore roa e hope e te mau Ite no Iehova faatavaihia e te feia o te riro ei mau tamarii i nia i te fenua a to ˈna Arii, o Iesu Mesia. Auê ïa haamaitairaa taa ê e fanaˈohia e ratou ei feia himene i te mau arueraa ia Iehova!
Eita Iehova e nehenehe e faaauhia ia vetahi ê!
7. Eaha na tuhaa e piti o te tiaraa teitei aˈe o Iehova tei tapaohia i roto i te Salamo 113:4?
7 Te na ô faahou ra te papai salamo e: “E teitei to Iehova i to te mau fenua atoa! e ua hau to ˈna hanahana i te teitei i to te mau raˈi atoa ra!” (Salamo 113:4) Te huti ra teie parau i te ara-maite-raa i nia e piti huru o te tiaraa teitei o te Atua: (1) I mua ia Iehova, Tei hau aˈe i te teitei “i to te mau fenua atoa,” ua riro ratou mai te hoê topata pape o te hoê patete e mai te repo puehu i nia i te faito; (Isaia 40:15; Daniela 7:18) (2) ua hau aˈe to ˈna hanahana i to te mau raˈi materia, inaha, te rave nei te mau melahi i to ˈna hinaaro mana hope.—Salamo 19:1, 2; 103:20, 21.
8. No te aha e mea nafea o Iehova e farii ai i te haapao mai i te mau ohipa o te raˈi e o te fenua?
8 No to ˈna putapû i te teiteiraa o te Atua, ua parau te papai salamo e: “O vai tei au i to tatou Atua ia Iehova? o tei teitei e ua parahi i te raˈi teitei. Te tuu haehaa nei râ oia i te hiˈoraa mai i raro i nia i te mau raˈi, e i nia atoa i te fenua.” (Salamo 113:5, 6) No te teitei hau aˈe o te Atua, e tia ia ˈna ia faahaehaa mai no te haapao i te mau ohipa i nia i te raˈi e te fenua. Noa ˈtu e e ere Iehova i te mea iti aˈe i te tahi taata aore ra aita o ˈna e auraro ra ia vetahi ê, te faaite nei oia i te haehaa ia faaite oia i te aroha e te hamani maitai i nia i te feia hara riirii ra. Ua riro to ˈna pûpûraa mai i ta ˈna Tamaiti, o Iesu Mesia, ei tusia “taraehara” no te mau kerisetiano faatavaihia e no te ao o te huitaata nei ei tapao no te haehaa o Iehova.—Ioane 1, 2:1, 2.
E hamani maitai o Iehova
9, 10. Nafea te Atua ‘ia faateitei i tei veve, i te faanohoraa ia ˈna i roto i te feia rarahi ra’?
9 Ma te haafaufaa i te hamani maitai o te Atua, te na ô atoa ra te papai salamo e “te faateitei nei oia i tei haehaa ra no raro mai i te repo ra; e ua faateitei i tei ati no raro i te tiriapera ra; i te faanohoraa oia ia ˈna i roto i te feia rarahi ra, i roto i te feia rarahi ra i to ˈna ihora pǔpǔ taata. O tei haaparahi i te vahine fanautama ore i te utuafare ra, ei metua vahine oaoa i ta ˈna ra mau tamarii. Halelu Ia.” (Salamo 113:7-9) Te tiaturi nei te nunaa o Iehova e e nehenehe oia e faaora i te feia parau-tia tei ati, e taui i to ratou huru tupuraa, e e haamâha i te mau mea o ta ratou e titau mau ra e to ratou mau hinaaro. ‘E faaitoito o tei mana, e te teitei, i te taata aau haehaa e te mafatu o te feia o tei tatarahapa.’—Isaia 57:15.
10 Nafea Iehova ‘ia faateitei i tei veve, i te faanohoraa ia ˈna i roto i te feia rarahi ra’? Ia au i te hinaaro o te Atua, e tuu oia i ta ˈna mau tavini i nia i te mau tiaraa hoê â hanahana e to te feia rarahi. Ua na reira oia no Iosepha, o tei riro mai ei taata tufa maa i Aiphiti. (Genese 41:37-49) I Iseraela, ua riro te parahiraa e te feia rarahi, oia hoi te mau taata e tiaraa mana to ratou i roto i te nunaa o Iehova, ei faufaa taa ê te tia ia poiherehia. Mai te mau matahiapo kerisetiano i teie mahana, ua fanaˈo teie mau taata i te tauturu e te haamaitairaa a te Atua.
11. No te aha e nehenehe ai e parau e e tano taa ê te Salamo 113:7-9 i te nunaa o Iehova no teie nei tau?
11 Eaha ïa no te ‘faariroraa i te vahine fanautama ore ei metua vahine oaoa’? Ua horoa te Atua i te hoê tamaiti na te vahine tama ore ra o Hana—o Samuela, o ta ˈna i pûpû atu no te tavini Ia ˈna. (Samuela 1, 1:20-28) Hau atu i te faufaa, maoti o Iesu e te niniiraahia te varua moˈa i nia i ta ˈna mau pǐpǐ i te Penetekose o te matahiti 33 o to tatou nei tau, ua haamata te vahine taipe a te Atua, o Ziona i nia i te raˈi, i te fanau i te mau tamarii pae varua. (Isaia 54:1-10, 13; Ohipa 2:1-4) E mai ta te Atua i faahoˈi mai i te mau ati Iuda i to ratou fenua tumu i muri aˈe i te hopoi-ê-raahia i Babulonia, i te matahiti 1919, ua faatiamâ mai oia i te toea faatavaihia o “te Iseraela a te Atua” i te tapearaa a Babulonia e ua haamaitai rahi oia ia ratou i te pae varua e inaha, ua tano roa te mau parau a te Salamo 113:7-9 i nia ia ratou. (Galatia 6:16) Ei mau Ite no Iehova taiva ore, te pahono nei te toea o te Iseraela i te pae varua e to ratou mau hoa e tiaturi nei e ora i nia i te fenua, ma te aau rotahi i te mau parau hopea a te Salamo 113: “Halelu Ia [e au mau taata e!]”
Haapapuraa no te tiaraa otahi roa o Iehova
12. Nafea te Salamo 114 ia faaite i te tiaraa otahi roa o Iehova?
12 Te faaite ra te Salamo 114 i te tiaraa otahi o Iehova na roto i te faahitiraa i te mau ohipa otahi o tei tupu i nia i te mau Iseraela. Ua himene te papai salamo e: “Ia Iseraela i haere maira mai Aiphiti mai; te utuafare o Iakoba mai roto i te pǔpǔ taata reo ê ra; riro atura Iuda ei feia moˈa no ˈna; Iseraela to ˈna manaraa.” (Salamo 114:1, 2) Ua faatiamâ mai te Atua ia Iseraela i te faatîtîraa a to Aiphiti, e reo ê hoi to ratou i to ratou tariˈa. Te faaite ra te faaoraraahia te nunaa o Iehova, tei piihia o Iuda e o Iseraela na roto i te mau faaauraa pehepehe, e e nehenehe ta te Atua e faaora i to ˈna mau tavini atoa i teie mahana.
13. Nafea te Salamo 114:3-6 ia faaite i te tiaraa teitei o Iehova e ia tano i nia i te mau ohipa i farereihia e Iseraela tahito?
13 Te ite-papu-hia ra te tiaraa mana hope o Iehova i nia i te poieteraa taatoa na roto i teie mau parau: “Ua ite te miti ia ˈna, e ua maue: o Ioridana, ua hoˈi atura i muri! Ua ouˈauˈa te mau mouˈa mai te mamoe oni ra, e te mau aivi mai te fanauˈa mamoe ra! Eaha tia oe, e te miti, i maue ai? e Ioridana, i hoˈi ai oe i muri? E te mau mouˈa, i ouˈauˈa ˈi mai te mamoe oni ra? e o outou hoi, e te mau aivi, mai te fanauˈa mamoe ra?” (Salamo 114:3-6) Ua “maue” te Miti Uteute i to te Atua iritiraa i te hoê eˈa ia haere to ˈna nunaa na roto i te pape. Ua ite ïa o Iseraela i te rima puai o Iehova i te ohiparaa i nia i te mau Aiphiti o tei pohe i te hoˈiraa mai te mau pape. (Exodo 14:21-31) I roto i te hoê faaiteraa ê atu o te mana o te Atua, ua ‘haere ê’ atura o Ioridana, ia nehenehe te mau ati Iseraela e haere atu na roto e tae atu i Kanaana. (Iosua 3:14-16) ‘Ua ouˈauˈa te mau mouˈa mai te mamoe oni ra’ a auauahi ai e a aueue ai te Mouˈa ra o Sinai i te taime a fafauhia ˈi te faufaa o te Ture. (Exodo 19:7-18) Ma te haafatata ˈtu i te tuhaa faufaa roa ˈˈe o ta ˈna himene, ua faanaho te papai salamo i ta ˈna mau parau ma te ui i te mau uiraa, peneiaˈe no te faaite e ua putapû roa te miti, te anavai, te mouˈa e te aivi i te mǎtaˈu i mua i teie mau tapao o te mana o Iehova.
14. Eaha tei ravehia na roto i te mana o Iehova i Meriba e i Kadesa, e nafea te reira ia ohipa i nia i to ˈna mau tavini no teie nei tau?
14 Ma te faahiti noâ i te mana o Iehova, ua himene te papai salamo e: “Ia aueue oe e te fenua e, i te aro o te Fatu ra; i te aro o te Atua o Iakoba; o tei faariro i te mato ei pape hopuna, e te ofai arâ ra ei pape pihaa.” (Salamo 114:7, 8) Na roto i te hoê hohoˈa taipe, te faaite ra te papai salamo e e tia ˈtu te huitaata nei ma te mǎtaˈu o Iehova, te Fatu e te Arii Mana hope o te fenua atoa nei. O ˈna “te Atua o Iakoba,” oia hoi o Iseraela, e oia atoa te Atua o te mau Iseraela i te pae varua e to ratou mau hoa o te fenua nei. I Meriba e i Kadesa i roto i te medebara, ua faaite o Iehova i to ˈna mana na roto i te horoa-semeio-raa i te pape na Iseraela, “o tei faariro i te mato ei pape hopuna, e te ofai arâ ra ei pape pihaa.” (Exodo 17:1-7; Numera 20:1-11) Te horoa nei teie mau faahaamanaˈoraa no nia i te mana faahiahia o Iehova e to ˈna poihere, i to ˈna mau Ite i te mau tumu papu no te faatupu i te faaroo aueue ore i roto ia ˈna.
E ere oia mai te mau atua idolo
15. Nafea paha te Salamo 115 i te himeneraahia?
15 Te faaue ra te Salamo 115 ia tatou ia arue e ia tiaturi ia Iehova. Te farii nei oia e no ǒ mai ia ˈna ra te haamaitairaa e te tauturu e te haapapu ra oia e mea faufaa ore te mau idolo. Peneiaˈe ua himenehia teie salamo mai te hoê reo himene tatairaa. Oia hoi, e himene mai te hoê reo e: “O outou, e te feia atoa e mǎtaˈu ia Iehova ra, e tiaturi ia Iehova.” E e pahono mai te amuiraa e: “Oia to ratou tauturu e to ratou paruru.”—Salamo 115:11.
16. Eaha te taa-ê-raa e itehia ra i rotopu ia Iehova e te mau idolo o te mau nunaa?
16 Eita e tia ia faataehia te hanahana i nia ia tatou nei, i nia râ i te iˈoa o Iehova, te Atua o te aroha hamani maitai, oia hoi te here taiva ore, e te parau mau. (Salamo 115:1) E ani mai te mau enemi ma te faaooo e: “Tei hea to ratou Atua?” Teie râ, e pahono atu te nunaa o Iehova e: ‘Tei te raˈi ra to matou Atua e e rave oia i te mea atoa o ta ˈna e hinaaro ra.’ (Sal 115 Irava 2, 3) Eita te mau idolo o te mau nunaa e nehenehe e rave i te hoê mea, no te mea e mau tii ario e te auro noa ratou tei hamanihia e te taata. Noa ˈtu e e vaha, e mata, e e tariˈa to ratou, eita ta ratou e nehenehe e parau, e ite, e e faaroo. E ihu to ratou, eita râ ratou e hâuˈa, e avae, eita râ e haere, e arapoa to ratou, aita râ e taˈi e matara mai. Te feia e hamani nei i teie mau idolo faufaa ore e tae noa ˈtu te feia e tiaturi nei ia ratou, hoê â ïa to ratou huru, e pohe atoa ratou.—Sal 115 Irava 4-8.
17. I te mea e eita te mau taata pohe e nehenehe e arue ia Iehova, eaha te tia ia tatou ia rave, e maoti teihea mau tiaturiraa?
17 Te faaitoitohia ra i muri iho ia tiaturi ia Iehova ei Tauturu e ei Paruru no Iseraela, o te utuafare autahuˈa o Aarona, e o te feia atoa e mǎtaˈu ra i te Atua. (Salamo 115:9-11) Ei feia i mǎtaˈu ia Iehova, te faatupu nei tatou i te hoê faatura hohonu no te Atua e te hoê mǎtaˈu tia e ia ore oia e mauruuru. Te tiaturi atoa nei tatou e e haamaitai mai “Tei hamani i te mau raˈi e te fenua nei” i te feia taiva ore e haamori ra ia ˈna. (Sal 115 Irava 12-15) Ua riro te raˈi ei parahiraa no to ˈna terono, teie râ, ua hamani te Atua i te fenua ei vahi nohoraa mure ore no te huitaata taiva ore e te auraro. I te mea e eita te feia pohe e vai mamû ra e te itea ore, e nehenehe e arue ia Iehova, e tia ïa ia tatou, te feia ora, ia na reira ma te paieti e te taiva ore rahi. (Koheleta 9:5) O te feia anaˈe o te arue ia Iehova o te fanaˈo i te ora mure ore e o te nehenehe e “haamaitai” ia Iehova “e a muri noa ˈtu,” ma te faahiti i te parau maitai no ˈna ‘i te tau mure ore.’ Ia apiti na tatou ma te taiva ore i te feia e pee nei i teie aˈoraa: “Halelu Ia [e au mau taata e!]”—Salamo 115:16-18.
Te mau huru maitatai faahiahia roa o Iehova
18, 19. I roto i teihea mau tuhaa te mau huru maitatai o Iehova e taa ê ai i te mau atua hape?
18 Taa ê atu i te mau idolo pohe, o Iehova te Atua ora, e te faaite nei oia i te mau huru faahiahia roa. O ˈna te hiˈoraa hau aˈe o te here e te “aroha noa, e te hamani maitai rahi, [eita oia e riri vave], e te maitai rahi.” (Exodo 34:6; Ioane 1, 4:8) Ua taa ê mau â oia i te atua taehae no Kanaana ra o Moloha, tei pûpûhia ˈtu te mau tamarii iti ei tusia na ˈna! Te manaˈohia ra e e hohoˈa taata to te tii o teie atua e e afii puaatoro. E tahuhia na te idolo i te auahi ia uteute roa, e e taorahia ˈtu na te mau tamarii i roto i to ˈna rima faatorohia, a topa ˈtu ai i roto i te umu ura i raro aˈe mai. No to ˈna here e to ˈna aroha rahi, aita te manaˈo no teie mau tusia taata i ‘puta noa ˈˈe i roto i te mafatu o Iehova.’—Ieremia 7:31.
19 I roto i te mau huru maitatai matamua o Iehova, te vai atoa ra te parau-tia tia roa, te paari otia ore, e te puai mana hope. (Deuteronomi 32:4; Ioba 12:13; Isaia 40:26) E te mau atua aai ïa? Maoti i te faatupu i te parau-tia, e mau atua e mau ruahine tahoo to Babulonia. E ere te mau atua no Aiphiti i te mau hiˈoraa maitatai i te pae no te parau-tia, tera râ e au to ratou mau paruparu i to te taata nei. Eita e maerehia inaha ua hamanihia teie mau atua e teie mau ruahine haavare e te mau taata ‘feruriraa faufaa ore’ o tei faahua taata maramarama. (Roma 1:21-23) E tatamaˈi na te mau atua Heleni te tahi e te tahi. Ei hiˈoraa, i roto i te mau aai, ua faaohipa o Dia i to ˈna mana ma te haavî na roto i te faatahuriraa i to ˈna metua tane, o Cronus, o tei faatahuri na i to ˈna iho metua tane, o Uranus. Auê ïa te oaoa e ia tavini e ia arue ia Iehova, te Atua ora e te parau mau, o te faaite nei i te here, te parau-tia, te paari, e te puai ma te tia roa!
E tano iho â ia arue ia Iehova e a muri noa ˈtu
20. Eaha te mau tumu ta te Arii ra o Davida i horoa no te arueraa i te iˈoa o Iehova?
20 Mai ta te mau Salamo Arueraa e faaite ra, e tano iho â ia arue ia Iehova e a muri noa ˈtu. Oia atoa, i to Davida e to ˈna mau hoa Iseraela pûpûraa i te taoˈa no te patu i te hiero, ua parau oia i mua i te amuiraa e: “Ia haamaitaihia oe, e a muri noa ˈtu, e te Atua o to matou metua o Iseraela, e Iehova. Tei ia oe, e Iehova, te rahi, e te mana, e te hanahana, e te [maitai hau aˈe], e te tura, to nia i te raˈi ra, e to nia i te fenua, na oe anaˈe ïa; tei ia oe te hau, e Iehova, o oe tei rahi i te mau mea atoa nei. No ǒ na mai te taoˈa e te tura, e tei ia oe te mana i nia i te mau mea atoa; e tei to rima te puai e te etaeta; e na oe e faarahi mai, e te horoa mai i te etaeta i te taata atoa nei. E teie nei, e to matou Atua, te haamaitai nei matou ia oe, te arue nei matou i to oe nei iˈoa hanahana.”—Paraleipomeno 1, 29:10-13.
21. Te horoa ra te Apokalupo 19:1-6 i teihea haapapuraa e faaite ra e e aruehia Iehova e te feia e noho ra i nia i te raˈi?
21 E haamaitai-atoa-hia e e aruehia Iehova e a muri noa ˈtu i nia i te raˈi. Ua faaroo te aposetolo Ioane i “te hoê feia rahi i nia i te raˈi” i te na ôraa e: “Haleluia [e au mau taata e!]: o te ora, e te hanahana, e te tura, e te mana, tei te Fatu, tei to tatou Atua ïa. E mea mau hoi e te tia ta ˈna ra tuuraa utua: ua faautua iho nei hoi oia i taua faaturi rahi ra [Babulonia Rahi], o tei haaviivii i to te ao nei i tana faaturiraa; e ua tahoo oia i te toto o to ˈna ra mau tavini, ta to ˈna rima i haamanii ra.” Te na ô faahou ra ratou: “Haleluia [e au mau taata e!]” Ua na reira atoa “te mau [matahiapo] e piti ahuru ma maha, e na mea ora e maha ra.” Ua na ô atura te hoê reo no roto mai i te terono e: “E haamaitai i to tatou Atua, o outou atoa o to ˈna ra mau tavini o outou hoi o tei mǎtaˈu ia ˈna ra, o te taata rii, e te feia rarahi.” E te na ô faahou ra o Ioane e: “Ua faaroo atura vau i te haruru mai te reo o te hoê pupu rahi ra, e mai te haruru miti rahi ra, e mai te haruru patiri rahi ra i te na ôraa e, Haleluia [e au mau taata e, ua haamata to tatou Atua o Iehova, te Puai hope i te faatere ei arii].”—Apokalupo 19:1-6.
22. Nafea o Iehova e aruehia ˈi i roto i te ao apî i tǎpǔhia mai?
22 Mea tano roa ia arue te feia e noho ra i nia i te raˈi ia Iehova! I roto i ta ˈna ao apî e fatata maira, e apiti atu te feia taiva ore tei faatiahia mai e te feia i ora mai i te hopea o teie faanahoraa no te arue ia Iehova. E nǎnǎ te mau mouˈa teitei i to ratou upoo i nia ei himene arueraa i te Atua. E himene te mau aivi heeuri e te mau tumu raau maahia i te arueraa ia ˈna. Inaha, e arue te mau mea poietehia atoa e ora nei e e huti nei i te aho i te iˈoa o Iehova i te himene Halelu Ia rahi! (Salamo 148) E faaroo-atoa-hia anei to outou reo i roto i taua nahoa oaoa ra? Oia, mai te peu e e tavini outou ia Iehova ma te taiva ore e to ˈna nunaa. Ia riro te reira ei tapao i roto i to outou oraraa e tia ˈi, inaha hoi, o vai tei au i to tatou Atua ia Iehova?
Nafea outou ia pahono mai?
◻ No te aha tatou e arue ai i te Atua ra o Iehova?
◻ Eita Iehova e faaauhia ia vetahi ê i roto i teihea mau tuhaa?
◻ Eaha te haapapuraa e e aroha to Iehova?
◻ Nafea Iehova e taa ê ai i te mau idolo pohe e te mau atua haavare?
◻ No te aha tatou e nehenehe ai e parau e e fanaˈo Iehova i te arueraa mure ore i nia i te raˈi e i nia i te fenua?
[Hohoˈa i te api 9]
E himenehia na te mau Salamo Arueraa i te oroa Pasa