Eaha to outou manaˈo no nia i te hara?
“NO TE AHA o ˈna e haapine noa ˈi i te ani e ia faaorehia mai ta tatou mau hara na roto i te pure?” o te amuamuraa ïa a te hoê vahine e haapii ra i te Bibilia e te hoê Ite no Iehova. “Ia faaroo anaˈe au, e au ra e e vahine ohipa ino roa vau.” Mai teie vahine, e rave rahi i teie mahana o te ore e taa ra e e hara ta ratou ahiri e aita ratou i rave i te hoê ohipa ino roa.
E parau mau iho â râ te reira i te pae Hitia o te râ ma, i reira aita te mau taata mai mutaa ihora mai â i ite i te parau no te hara tupuna mai te haapiihia ra i roto i te mau haapaoraa ati Iuda kerisetiano. (Genese 3:1-5, 16-19; Roma 5:12) Ei hiˈoraa, te faaau nei te feia faaroo Shinto i te hara mai te hoê repo te nehenehe e tamâ-ohie-hia na roto i te hoê huiraa raau a te hoê tahuˈa, tei taamuhia te tahi papie aore ra te tahi ahu vavai i to ˈna hopea. I roto i teie huru raveraa, aita te tatarahaparaa i te mea i ravehia e titauhia ra. No te aha? “E ere noa te mau ohipa iino, te mau ati natura vî ore atoa râ, o tei piihia e tsumi [hara],” o ta te Buka parau paari Kodansha no Tapone (beretane) ïa e faataa ra. Ua faarirohia te mau ati natura, e mau tsumi aita ta te taata e mana i nia iho, ei mau hara o te faaorehia na roto i te mau peu tamâraa.
Ua aratai te reira i te manaˈoraa e e nehenehe te mau hara atoa, e tae noa ˈtu te mau ohipa iino i ravehia ma te hinaaro mau (taa ê atu i te mau ohipa taparahi taata e faautuahia e te ture) e faaorehia na roto i te mau peu tamâraa. I raro aˈe i te upoo parau ra “Peu tamâraa politita i Tapone,” ua faahiti te vea The New York Times i teie huru hiˈoraa e ua faataa oia e ua manaˈo te mau tia politita no Tapone o tei rave i te tahi mau ohipa hairiiri e ua “tamâhia” ratou ia maiti-faahou-hia ratou e te feia maiti. No reira, aita e faatitiaifaroraa papu o te ravehia, e e nehenehe teie mau huru ohipa hairiiri e tupu faahou â.
E hiˈoraa taa ê to te feia faaroo Bouddha o te tiaturi nei i te samsara, oia hoi te fanau-faahou-raa, e te haapiiraa o te Karma. “Ia au i te haapiiraa o te karman,” o ta Te buka parau paari Beretane (beretane) ïa e faataa ra, “e afai mai te haerea maitai i te hoê faahopearaa au mau e te oaoa e e faatupu oia i te hoê hinaaro e rave i te mau ohipa maitatai, area te haerea ino ra, e afai mai oia i te hoê faahopearaa ino e e faatupu oia i te hoê hinaaro e rave pinepine i te mau ohipa iino.” Oia hoi te auraa, e faatupu te haerea hara i te mau hotu iino. Ua taaihia te haapiiraa o te Karma e te haapiiraa o te fanau-faahou-raa, inaha te parauhia ra e e faatupu te mau Karma i te mau faahopearaa i roto i te mau oraraa no a muri aˈe e rave rahi mau matahiti i muri aˈe i te oraraa i reira te ohipa i te raveraahia.
Nafea teie haapiiraa ia ohipa i nia i te feia e tiaturi ra i te reira? Ua parau te hoê vahine faaroo Bouddha o tei tiaturi hohonu i te Karma e: “Ua manaˈo au e aita hoê aˈe auraa ia mauiui no te hoê mea tei roto ia ˈu mai to ˈu fanauraa mai â, tera râ, aita vau i ite e eaha râ. E tia ia ˈu ia farii i te reira ei oraraa faataahia no ˈu. Aita te faahiti-tamau-raa i te mau irava sutras e te tutavaraa i te ora i te hoê oraraa maitai i faatitiaifaro i to ˈu mau fifi. Ua riro maira vau ei vahine iria e te mauruuru ore, e te amuamu noa.” Ua vaiiho mai te haapiiraa a te faaroo Bouddha no nia i te mau faahopearaa o te haerea ino ia ˈna ma te manaˈo haafaufaa ore.
Ua haapii te faaroo Confucius, te tahi atu haapaoraa no te pae Hitia o te râ, i te hoê ravea ê atu no te arai i te ino o te taata nei. Ia au ia Hsün-tzu, hoê o na philosopho rahi tootoru a te faaroo Confucius, mea ino te natura taata e e piˈo oia i nia i te miimii. No te tapea i te nahonahoraa totiale i rotopu i te mau taata hara ra, ua haamatara oia i te faufaa o te li, oia hoi te iteraa i te peu, te haerea maitai, e te nahonahoraa o te mau mea. Ua farii o Meng-tzu, te tahi atu philosopho a te faaroo Confucius, noa ˈtu e ua faataa oia i te hoê hiˈoraa ê atu no nia i te natura taata, e te vai ra te mau fifi totiale e, ma te tiaturi e e mea maitai te natura o te taata, ua turui oia i nia i te haamaitairaa ia ˈna iho ei ravea. I roto i na hiˈoraa toopiti nei, ua vauvau te mau philosopho a te faaroo Confucius i te faufaaraa o te haapiiraa e te faaineineraa no te aro i te hara i roto i te ao nei. Noa ˈtu e e tuea ta ratou mau haapiiraa no nia i te titauraa i te li, mea papu ore roa to ratou hiˈoraa i te hara e te ino.—A faaau e te Salamo 14:3; 51:5.
Te morohi ra te manaˈo no nia i te hara i te pae Tooa o te râ
I te pae Tooa o te râ, ua faataa-papu-hia te mau huru hiˈoraa no nia i te hara mai mutaa ihora mai â, e e farii na te rahiraa o te taata e te vai ra te hara e e tia ia apehia. Teie râ, te taui ra te haerea i te pae Tooa o te râ no nia i te hara. E rave rahi o te patoi nei i te araraa i te hara, ma te faaau i te reo o te haava manaˈo e “faahapa,” te tahi mea te tia ia apehia. Hau atu i te 40 matahiti i teie nei, ua peapea te pâpa Pie XII i te na ôraa e: “Te hara o teie nei senekele, o te haamoeraa ïa i te hara.” Ia au i te hoê maimiraa i piahia i roto i te vea tahebedoma katolika Le Pèlerin, aita te hoê faito maere e 90 % o te huiraatira no Farani, i reira te parau nei te rahiraa o te taata e e katolika roma ratou, e tiaturi faahou nei i te hara.
Oia mau, i na pae Hitia o te râ e Tooa o te râ, e au ra e te ora nei te rahiraa o te taata i roto i te mauruuru ma te ore e tapitapi noa ˈˈe no te hara. Te auraa anei râ e aita te hara e vai ra? E nehenehe anei tatou e haamoe i te reira ma te haapeapea ore? E faaorehia anei te hara i te hoê mahana?