Ia ore anaˈe te hara

“UA FANAUHIA mai anei tatou i roto i te hara?” Ua haafeaa teie uiraa i te hoê taata haere haapiiraa faatuitehia i te mau Hau Amui no Marite, i muri noa ˈˈe to ˈna haamataraa i te haapii i te Bibilia. No te mea e ua paari oia i roto i te oraraa Hindu, aita oia i ite i te manaˈo e ua taeahia te taata i te hara. Teie râ, mai te peu e ua taeahia mau â te taata i te hara, o ta ˈna ïa i feruri, aita e faufaa ia huna aore ra ia haavare ite ore i te parau mau o te reira. Nafea te hoê taata e nehenehe ai e ite i te pahonoraa i teie uiraa?

Mai te peu e ua taeahia te taata i te hara, papu maitai e haamataraa ïa to te hara. Ua poietehia anei te taata matamua ei taata ino, i faatae ai oia i te mau huru iino i ta ˈna mau tamarii? Aore ra ua tupu anei te ino i muri iho? Anafea mau na te haamataraa te hara? I te tahi aˈe pae, mai te peu e e tuhaa ino noa no rapae te hara, aore ra e faaueraa tumu, e nehenehe anei ta tatou e tiaturi e tiamâ mai tatou i te reira?

Ia au i te tiaturiraa Hindu, ua apitihia te mauiui e te ino i te poieteraa. “Te ratere noa ra te mauiui [aore ra te ino],” o ta te hoê aivanaa Hindu ïa e tapao ra, “mai te rumati tamau, na tera e tera vahi, eita râ e nehenehe e faaore roa i te reira.” Oia mau, ua riro te ino ei tuhaa o te ao o te huitaata nei i te roaraa o te aamu. Mai te peu e ua tupu te ino hou te mau faatiaraa o te aamu o te taata, e titauhia ïa te mau pahonoraa papu maitai no nia i to ˈna tumu, no ǒ mai i te hoê pu hau aˈe i te taata nei. No ǒ mai ïa te mau pahonoraa i te Atua ra.—Salamo 36:9.

Ua poietehia te taata ma te hara ore

E mau faataaraa taipe tei roto i te mau papai Veda no nia i te poieteraa o te taata, o ta te philosopho Hindu ra o Nikhilananda ïa e faˈi ra. Oia atoa, te faataa noa ra te rahiraa o te mau faaroo i te pae Hitia o te râ i te poieteraa ia au i te mau aai. Tera râ, te vai ra te mau tumu maramarama e i te pae aivanaa e haapapu ra e e nehenehe e tiaturi i te faatiaraa a te Bibilia e mea poietehia te taata matamua.a Te na ô ra ta ˈna pene matamua roa e: “Hamani ihora hoi te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.”—Genese 1:27.

Eaha te auraa e ua poietehia “ma te hohoˈa o te Atua ra”? Teie noa ïa: Ua hamanihia te taata mai te huru o te Atua ra, e fanaˈo oia i te mau ateributi o te Atua—mai te parau-tia, te paari, e te here—o te faataa ê ia ˈna i te mau animala. (A faaau e te Kolosa 3:9, 10.) Na roto i teie mau huru maitatai, e nehenehe oia e maiti i te maitai aore ra i te ino, ma te faariro ia ˈna ei taata tiamâ i te pae morare. Aita e hara i roto i te taata matamua, aita e ino aore ra e mauiui i roto i to ˈna oraraa, i to ˈna poieteraahia mai.

Teie ta te Atua ra o Iehova i faaue atu i te taata ra ia Adamu: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:16, 17) Na roto i te maitiraa i te auraro, e nehenehe ïa o Adamu e ta ˈna vahine ra o Eva e arue e e faahanahana i to raua Poiete e e vai noa ei feia hara ore. I te tahi aˈe pae, ia ore raua e auraro, tapao faaite ïa e eita raua e pee i te mau faaueraa tia roa a te Atua e e riro ïa raua ei feia tia ore—ei feia hara.

Aita o Adamu raua o Eva i poietehia mai te mau atua. Teie râ, ua fanaˈo raua i roto i te hoê faito, i te mau ateributi o te Atua e te neheneheraa e rave i te mau faaotiraa i te pae morare. I te mea e na te Atua i poiete ia raua, e feia hara ore raua, aore ra e feia tia roa. (Genese 1:31; Deuteronomi 32:4) Aita to raua poieteraahia i haapeapea i te au-maite-raa i vai na i rotopu i te Atua e te ao taatoa nei mai te tau mai â e tae noa ˈtu i to raua hamaniraahia. Mea nafea ïa te hara i te haamataraa mai?

Nohea mai te hara

Ua tupu te hara na mua i roto i te ao varua. Hou te hamaniraahia te fenua e te taata, ua poiete te Atua i te mau varua maramarama—te mau melahi. (Ioba 1:6; 2:1; 38:4-7; Kolosa 1:15-17) Ua haafaufaa rahi roa te hoê o teie mau melahi i to ˈna iho haviti e to ˈna maramarama. (A faaau e te Ezekiela 28:13-15.) Na roto i te faaueraa a te Atua ia Adamu e ia Eva ia fanau i te tamarii, ua nehenehe teie melahi e ite e fatata e î te fenua taatoa i te feia parau-tia, e e haamori ratou paatoa i te Atua. (Genese 1:27, 28) Ua hinaaro atura teie varua e ia haamori ratou ia ˈna. (Mataio 4:9, 10) Ua aratai to ˈna manaˈonaˈo-noa-raa i teie hinaaro ia ˈna ia rave i te hoê haerea tano ore.—Iakobo 1:14, 15.

I to ˈna paraparauraa ˈtu ia Eva na roto i te arai o te hoê ophi, ua parau te melahi orure hau e na roto i te opaniraa e amu i te maa o te raau o te ite i te maitai e te ino, ua huna ïa te Atua i te ite o te tia hoi ia Eva ia noaa mai. (Genese 3:1-5) E haavare au ore roa te reira—e hara ïa. Na roto i te haavareraa, ua faariro oia ia ˈna iho ei melahi hara. Ei faahopearaa, ua piihia oia te Diabolo, e haavare, e o Satani, e patoi i te Atua.—Apokalupo 12:9.

Ua ohipa te mau parau faahema a Satani ma te ino i nia ia Eva. Ua tiaturi oia i te mau parau a te Faahema, ua vaiiho oia ia ˈna ia vare e ia amu i te tahi maa o te raau opanihia. Ua amu atoa ˈtura ta ˈna tane ra o Adamu i te maa, e ua riro maira raua toopiti atoa ra ei feia hara. (Genese 3:6; Timoteo 1, 2:14) Papu maitai e na roto i te maitiraa i te faaroo ore i te Atua, ua erehia i to tatou nau metua matamua i te tapao o te tia-roa-raa e ua riro raua ei feia hara.

E te mau tamarii ïa a Adamu e a Eva? Te faataa ra te Bibilia e: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12) Ua ohipa aˈena te ture o te huru tupuna. Eita ta Adamu e nehenehe e horoa na ta ˈna mau tamarii i te mea i erehia e ana. (Ioba 14:4) Ua erehia raua i te tia-roa-raa, e feia hara nau taata faaipoipo matamua i to raua fanauraa mai i ta raua mau tamarii. Ei faahopearaa, ua taeahia tatou paatoa—aita e faataaraa—i te hara. (Salamo 51:5; Roma 3:23) E te hara ra, ua faatupu noa ïa oia i te ino e te mauiui. Hau atu â, no te reira, te ruau nei e te pohe nei tatou paatoa, no te mea “e utua te pohe no te hara.”—Roma 6:23.

Te “faahapa” ra aore ra te “faatia” ra te haava manaˈo

A hiˈo atoa na i te ohipa a te hara i nia i te haerea o na taata faaipoipo matamua. Ua tapoˈi raua i to raua tino e ua tamata raua i te tapuni i mua i te aro o te Atua. (Genese 3:7, 8) Ua turai te hara ia raua ia faahapa ia raua iho, ia peapea, e ia haama. Te ite atoa nei te huitaata i teie mahana i teie mau huru manaˈo horuhoru.

O vai ïa taata i ore i faaruru i teie mau manaˈo hohonu haapeapea, i te oreraa e faaite i te maitai i nia i te hoê taata e fifihia ra, aore ra i ore i tatarahapa i te parauraa i te mau parau tei ore roa ˈtu e tia ia faahiti? (Iakobo 4:17) No te aha tatou e faaruru ai i teie mau huru manaˈo haapeapea? Te faataa ra te aposetolo Paulo e no ‘te ture ïa i papaihia i roto i to tatou aau.’ Mai te peu e aita to tatou haava manaˈo i etaeta, e haapeapea tatou i roto ia tatou ia ofati tatou i taua ture ra. No reira, na te reo o te haava manaˈo e “faahapa, MN” aore ra e “faatia” ia tatou. (Roma 2:15; Timoteo 1, 4:2; Tito 1:15) Noa ˈtu e te taa ra ia tatou i te reira aore ra aita, te vai ra i roto ia tatou te hape, te hara!

Ua ite maitai o Paulo i to ˈna mau hinaaro e rave i te hara. Ua faˈi oia e: “Ia hinaaro vau i te rave i te mea maitai ra, tei pihai iho te ino ia ˈu i reira. Te oaoa nei hoi au i te ture a te Atua, i te haapaoraa i te taata i roto ra; te ite nei râ vau i te tahi ture i roto i tau tino nei, i te mârôraa mai i te ture i roto i tau aau nei, e te faariroraa ia ˈu ei tîtî na te ture ino i roto i tau tino nei.” No reira o Paulo i ani ai e: “Na vai râ vau e faaora i teie nei tino pohe?”—Roma 7:21-24.

Te tiamâraa mai i te hara—Nafea?

“Te tiamâraa, i roto i te tutuu Hindu,” o ta te hoê aivanaa ïa e parau ra, “o te tiamâraa mai ïa i te fa-faahou-raa tamau i roto i te hoê tino ê.” Te faahiti atoa ra te faaroo a Buddha i te hoê ravea, te Nirvana—te hoê ïa huru e haamoe roa i te mau tupuraa mau no rapae. No to ratou taa ore i te manaˈo e ua taeahia te taata i te hara, te tǎpǔ noa ra te haapaoraa Hindu i te hoê maue-ê-raa i te oraraa.

I te tahi aˈe pae, te ravea a te Bibilia no te tiamâ mai, o te faaore-mau-raa ïa i te huru taata hara. I muri aˈe i to ˈna aniraa e nafea oia ia faaorahia mai i te hara, te pahono ra te aposetolo Paulo e: “E haamaitai au i te Atua, i to tatou Fatu ra ia Iesu Mesia.” (Roma 7:25) Oia, no ǒ mai te faaoraraa i te Atua ra na roto ia Iesu Mesia.

Ia au i te Evanelia a Mataio, ua haere mai “te Tamaiti a te taata nei,” o Iesu Mesia no te “horoa i to ˈna ora ei hoo no te taata e rave rahi.” (Mataio 20:28) Mai tei faahitihia i roto i te Timoteo 1, 2:6, ua papai o Paulo e o Iesu “tei horoa ia ˈna iho ei hoo [“aifaito,” MN] i te taata atoa.” Te auraa o te taˈo ra “hoo,” o te aufauraa ïa i te taoˈa aufau no te faatiamâ mai i te feia i tapeahia. I te mea e hoo aifaito, te tuuhia ra te tapao i nia i te manuïaraa o te hoo i aufauhia no te faatuea i te faito o te parau-tia. Teie râ, nafea te pohe o te hoê taata e nehenehe ai e riro ei “hoo aifaito i te taata atoa”?

Ua hoo o Adamu i te huitaata nei, ia tatou atoa, i raro aˈe i te hara e te pohe. Te taoˈa aufau, aore ra te utua, o ta ˈna i aufau, o to ˈna ïa ora taata tia roa. No te tapoˈi i te reira, e tia i te tahi atu ora taata tia roa—te hoê hoo aifaito—ia aufauhia. (Exodo 21:23; Deuteronomi 19:21; Roma 5:18, 19) I te mea e eita ta te hoê taata tia ore e nehenehe e aufau i teie hoo, ua iriti maira te Atua, i roto i to ˈna paari rahi, i te hoê ravea ia matara mai i teie mau ati. (Salamo 49:6, 7) Ua rave maira oia i te ora tia roa o ta ˈna Tamaiti fanau tahi i nia i te raˈi e tuu atura i roto i te opu o te hoê paretenia i nia i te fenua nei, ia fanauhia mai oia ei taata tia roa.—Luka 1:30-38; Ioane 3:16-18.

No te faatupu i te hoo-faahou-raa mai i te huitaata nei, ua titauhia o Iesu ia tapea i to ˈna taiva ore i te taime atoa oia a parahi ai i nia i te fenua. Ua na reira mau oia. Ua pohe ihora oia i te hoê pohe tusia. Mea na reira ïa to Iesu haapapuraa i te faufaaraa o te hoê ora taata tia roa—to ˈna iho ora—no te aufau ei hoo no te faatiamâ mai i te huitaata nei.—Korinetia 2, 5:14; Petero 1, 1:18, 19.

Te mea ta te hoo o te Mesia e nehenehe e rave no tatou

E nehenehe tatou e faufaahia i te hoo tusia o Iesu i teie nei â taime. Na roto i te faatupuraa i te faaroo i roto i te reira, e nehenehe tatou e fanaˈo i te hoê tiaraa mâ i mua i te Atua, e e haapaohia mai tatou e Iehova ma te here e te maitai. (Ohipa 10:43; Roma 3:21-24) Maoti i te faateimaha-roa-hia e te manaˈo faahapa no te mau hara ta tatou paha i rave, e nehenehe tatou e ani tahaa roa ˈtu i te Atua ia faaore mai i te reira na nia i te niu o te hoo.—Isaia 1:18; Ephesia 1:7; Ioane 1, 2:1, 2.

I te tau i mua nei, e faatupu te hoo i te faaoraraa taatoa o te huru maˈi o te taata nei tei faatupuhia e te hara. Te faataa ra te buka hopea o te Bibilia i “te hoê pape ora tahe ra” no ǒ mai i te terono o te Atua. Na te pae pape, te vai ra te mau raau hotu maitai e to ratou mau rauere ra, “ei faaora ïa i te mau fenua.” (Apokalupo 22:1, 2) I roto i te hoê auraa taipe, te parau ra te Bibilia i ǒ nei no nia i te faanahoraa faahiahia a te Poiete e faatiamâ mai i te huitaata nei i te hara e te pohe e a muri noa ˈtu na nia i te niu o te hoo tusia o Iesu.

E fatata te mau orama parau tohu o te buka Apokalupo i te tupu. (Apokalupo 22:6, 7) I reira ïa te feia parau-tia atoa e riro ai ei feia tia roa, o tei ‘faaorahia mai i te tapea o te pohe.’ (Roma 8:20, 21) Eita anei te reira e turai ia tatou ia haapii hau atu â no nia i te Atua ra o Iehova e ta ˈna Tamaiti taiva ore ra o Iesu Mesia, o tei riro hoi ei hoo?—Ioane 17:3.

[Nota i raro i te api]

[Hohoˈa i te api 6]

Ua horoa o Adamu i te hara e te pohe i te huitaata nei

[Hohoˈa i te api 7]

E horoa mai te hoo tusia o Iesu i te tiamâraa mai i te hara e te pohe